Omukanda wa Vali Ehipululo
7 Salomau wati vala manee okulikwambela,+ keulu akutundu otupia,+ atuyoko-po oviawa viokuyokwa, novilikutila, onohanya mbomunkhima wa Siovaa ambuyula mondywo.+ 2 Ovanakwa avehetyivili okunyingila mondywo ya Siovaa, mokonda onohanya mbomunkhima wa Siovaa ankho mbeyula mondywo ya Siovaa.+ 3 Tyina otupia tutoka, onohanya mbomunkhima wa Siovaa ambuya kombanda yondywo, otyo ovanthu aveho vomo Isilayeli vatala. Avaikila konongolo pohi patungwa nawa, avapupika ovipala viavo pohi, avapandula Siovaa, “mokonda omuwa, olwembia lwae olunene lutwalako apeho.”
4 Ohamba novanthu aveho avalingila Siovaa ovilikutila.+ 5 Ohamba Salomau ayaave ovilikutila onongombe 22.000, nonongi 120.000. Ngootyo, ohamba novanthu aveho, avapakula ondywo ya Huku yotyotyili.+ 6 Ovanakwa otyo veli ponomphangu mbavo mbovilinga, ava ovana va Levii otyo vena ovihumba novikwavo vali vihikwa, vihikilwa otyo oku ovanthu vaimbila Siovaa.+ (Ohamba Ndaviti walingile oviti ovio viokuhika, pononthiki ankho ahivilika Huku kumwe navo,* opo vihikwe pokupandula Siovaa, “mokonda olwembia lwae olunene, lutwalako apeho.”) Ovanakwa ankho vahikila peulu ononkhwino+ komutwe wovana va Levii, otyo ova Isilayeli aveho vetai.
7 Salomau asukula pokati-na-kati kepata liahula komutwe wondywo ya Siovaa, mokonda opo pahe akalingilile oviawa viokuyokwa,+ novilenga viovilikutila viombembwa, omutala wovilikutila wotyitasu+ Salomau alingile hamunene-ko. Ovilikutila viokuyokwa, noviawa viovilia,+ no viovilenga+ kavifu-ko. 8 Pononthiki opo, Salomau alingi otyipito mononthiki epandu-vali,+ nova Isilayeli aveho, ovanthu vamwe ovanyingi, vatunda ko Lembo-Hamate* no Kelola lyo Isitu.+ 9 Etyi vamana otyipito tyokupakula omutala wovilikutila tyalingwa ononthiki epandu-vali, avalingi otyipito mononthiki epandu-vali, mahi monthiki ya tyinana* avalingi otyonge otyinene.+ 10 Monthiki 23 yohanyi yapandu-vali, avelilekela novanthu, avaende komaumbo avo tyahambukwa,+ nomutima wavialuka mokonda yokankhenda Siovaa alinga Ndaviti, na Salomau, novanthu vae ova Isilayeli.+
11 Ngootyo, Salomau amane ondywo ya Siovaa, neumbo liohamba.*+ Ovipuka aviho Salomau apangele okulinga ondywo ya Siovaa, neumbo liae mwene, aviende nawa.+ 12 Siovaa amonekela Salomau+ motyinthiki otyo, emupopila okuti: “Neiva elikwambelo liove, ame nelikoyela omphangu ei opo ikale ondywo yovilikutila.+ 13 Ine ndyiika eulu, ombila ayahaloko, ine ndyituma ovimphunia-mphunia avinyono otyilongo, tupu ine ndyituma omukihi pokati kovanthu vange, 14 ovanthu vange vokwatyinda enyina liange,+ avelivondela,+ nokulikwambela, avaovola otyipala tyange, avayeke-po onondyila mbavo onombi,+ opo ame keulu mandyivetehelela, andyiveevela ononkhali mbavo, andyihakula otyilongo tyavo.+ 15 Pahe omaiho ange maatale nawa, omakutwi ange maatehelela omalikwambelo alingilwa momphangu ei.+ 16 Ame nakoya ondywo ei andyiisukukisa opo enyina liange likale-mo apeho,+ omo mamukala omaiho ange nomutima wange apeho.+
17 “Ove, ine weendela monondyila mbange ohatundu-mo ngeetyi tyalingile tate yove Ndaviti, otavela atyiho ndyikutuma, tupu ine utavela ovitumino viange aviho, novitumino viange vionomphela,+ 18 mandyikapameka otyipundi tyouhamba wove,+ ngeetyi natolelele tate yove Ndaviti+ okuti: ‘Apeho mapakala umwe watuka mu ove matumina o Isilayeli.’+ 19 Ine muyapuka movitumino viange napaka ponthele yenyi nevi napopia amuviyeke-po, amukalingila ovika-huku ovikwavo amulipetamena kuvio,+ 20 ova Isilayeli mandyivetukula motyilongo nevepa,+ andyikeveyumba kokule nomaiho ange, kokule nondywo ei ame nasukukisila enyina liange, ovanthu vovilongo aviho avekevepenya nokuvekwela.*+ 21 Ondywo oyo maikakala onthunthu yetwe. Aveho valambela-po mavekeitala tyahuva,+ avati: ‘Omokonda yatyi Siovaa alingila ñgana otyilongo etyi nondywo ei?’+ 22 Avakapopia okuti: ‘Omokonda vayeka-po Siovaa+ Huku yovakwaukulu vavo, wevepola kotyilongo tyo Isitu,+ avakwate-po ono-huku ononkhwavo avelipetamena kumbo, ngambo vaundapela.+ Otyo eveetelela ononkhumbi ombu ambuho.’”+