Selemiya
31 “Pononthiki mbatyo opo,” o Siovaa wetyipopia, “ame mandyikalinga Huku yonombunga ambuho mbova Isilayeli, ngwe mavakalinga ovanthu vange.”+
2 Etyi otyo tyapopia Siovaa wati:
“Ovanthu vokwahupa komutunga valingilwe okankhenda moluhandya,
Pweetyi Isilayeli eli mondyila, enda no komphangu yae yokupululukwa.”
3 Siovaa andyendela andyimumonena kokule, ati:
“Ame ndyikuhole, nonthyole imwe yahapu.
Otyo nekweetela no kwaame nolwembia olunene.*+
4 Ame mandyikupindula-po, ove mopindukapo.+
Ove mukainthu wa Isilayeli wehei mulume, mokakwata vali ono pandelu mbove,
5 Ove mokatwika vali omapia omiti vionouva konomphunda mbo Samaliya;+
Ovalimi mavakatwika, avakalia ovinyango viavo.+
6 Makuya ononthiki ovayungi vo konomphunda mbo Efalaii mavakalaveleya avati:
‘Katukei, twendei tulondei ko Siyau, ku Siovaa Huku yetu.’”+
7 Mokonda etyi otyo tyapopia Siovaa wati:
“Twilei Sakoo ondolo yehambu,
Kwiililei mokonda onwe muli keulu liovanthu vovilongo.+
Tyipopiei; hilivikei Huku, amuti:
‘Ove Siovaa, yovola ovanthu vove ova Isilayeli vahupa-po.’+
8 Mandyivepolo kotyilongo tyo kombanda, andyiveeta.+
Mandyivekongolola-ko kononthele mbo kokule mbohi.+
Puvo mapakati novamphoki novilema,+
Novalemi, naava vakutula, aveho ovo.
Mavati tyina vakondoka kuno, vakalinga otyikumba tyimwe otyinene.+
9 Mavekeya tyilila.+
Ame mandyikevelulika ine veliheka kwaame.
Mokonda ame, ame he ya Isilayeli, Efalaii oe otyiveli tyange.”+
10 Tehelelei ondaka ya Siovaa, onwe vanthu vovilongo,
Keipopiei movilongo vikala kokule pokati komeva, muti:+
“Ou watyandyanesa ova Isilayeli, oe mekevekongolola.
Mekeveyunga ngomunthita uyunga ovipako viae.+
12 Mavekeya, avakwiililila keulu liomphunda Siyau,+
Mavakaliaima mokonda yokankhenda ka* Siovaa,
Mokonda yovilia, novinyu omphe,+ nomulela,
Mokonda yonondyona, nononthane.+
13 “Pononthiki opo, omuhikwena wehei mulume mahambukwa, mahele,
Novakwendye, novahikwena, nonombwale mavakahambukwa avahele.+
Okulila kwavo mandyikekutyitula ehambu.+
Mandyiveungumanesa,* andyivepe ehambu, otyo ngatyo tyikapinga polunyongi lwavo.+
14 Mandyikapa okulia* ovanakwa* avekuta,
Ovanthu vange mavakakowa kokankhenda kange,”+ o Siovaa wetyipopia.
15 “Etyi otyo tyapopia Siovaa wati:
‘Ko Lamaa+ kwiivala okulila, okulila umwe tyokweihamenwa:
Lakele ulila ovana vae ovakwendye.+
Waanya ketavelele okukengelelwa,
Mokonda ovana vae kave-ko vali.’”+
16 Etyi otyo tyapopia Siovaa wati:
“‘Muta wahalile vali, lisekuna ononkhuka,*
Mokonda ovilinga walinga mopewa ondyambi,’ o Siovaa wetyipopia.
‘Kotyilongo tyondyale mavakatunda-ko.’+
17 ‘Nkhele kevelako komutwe wandyila,’+ o Siovaa wetyipopia.
‘Ovana vove mavakakondoka motyilongo tyavo mwene.’”+
18 “Ame netyiiva umwe nawa etyi Efalaii eliyava ati:
‘Ove wambiyula, ame andyiviuku umwe,
Nalinga ngondume-tane yehenelongeswe.
Nkhondole, mandyikondoka liwa-liwa,
Mokonda ove, ove Siovaa, Huku yange.
Tyankhundisa, andyikala omapita,+
Mokonda olukundo lwange lwo poututu na hono ndyina-lo.’”
20 “Efalaii hamona wange napanda, hamona ndyihole?+
Tyina ndyimupopia, tyinthyinangelesa vali kwe.
Otyo ame mokati kange omu mututumbila* mokonda yae.+
Ame tyotyili mandyimulingi okankhenda,” o Siovaa wetyipopia.+
21 “Lipakela omahe metapalo,
Liikila pohi onomphehe.+
Tala nawa mondyila, mondyila moendela.+
Kondoka Isilayeli, muhikwena wehei mulume, kondoka komapunda-umbo ove.
22 Atee-pi mokala nomitima vivali, mukai wehe-wonthyole yotyili?
Siovaa walinga otyipuka tyimwe otyipe kombanda yohi:
Omukai makaovola omulume tyatokotelwa.”
23 Etyi otyo tyapopia Siovaa womambamba ovita, Huku yo Isilayeli, wati: “Motyilongo tyo Sundaa no momapunda-umbo atyo, mamukapopiwa vali onondaka ombu tyina ame namaeta ovanthu vokuli koupika: ‘Siovaa ekuyambe, ove umbo liokuviukisa,+ mphunda ikola.’+ 24 Omo o Sundaa maikakala, nayo nomapunda-umbo atyo aeho, no vokulima, no vovipako.+ 25 Mokonda mandyikakoweswa ou waponwa,* andyikutisa ou uli* nokunkhia.”+
26 Kuna pahe andyipinduka-po, andyipahula komaiho, olumphoki lwatyo lwapepa umwe nawa.
27 “Tala! Omboo mbuya ononthiki,” o Siovaa wetyipopia, “ononthiki mandyikakuna meumbo lya Isilayeli no meumbo lya Sundaa ombuto yomunthu,* nombuto yotyinyama.”+
28 “Ngeetyi natala kuvo ndyitukule, ndyiikule, ndyiteye, ndyihanye, andyinyono,+ otyo mandyitale kuvo ndyitunge, andyitwiki,”+ o Siovaa wetyipopia. 29 “Pononthiki opo, ovanthu kamavakati vali: ‘Valia onouva mbalula o vohe, mahi omayo alinga ouñge o ovana.’*+ 30 Mahi mwene wamapengesa oe makankhila mwene etyi alinga tyapenga. Ou wamali onouva mbalula, omayo ae oo mwene maakalinga ouñge.”
31 “Tala! Omboo mbuya ononthiki,” otyo tyapopia Siovaa, “ononthiki mandyilingi omphango omphe neumbo lya Isilayeli neumbo lya Sundaa.+ 32 Omphango oyo kaikakala nga ina nalingile no voho monthiki nevekwata mokuvoko pokuvepola motyilongo tyo Isitu,+ ‘omphango yange vanyona,+ ngwe ovange mwene,’* o Siovaa wetyipopia.”
33 “Mokonda ei oyo omphango mandyilingila veumbo lya Isilayeli tyina ononthiki ombo mbamalambe,” otyo tyapopia Siovaa. “Ame mandyikapaka ovitumino viange mokati kavo,+ ankhevihoneka komitima viavo.+ Ame ndyikalinga Huku yavo, ngwe avakalinga ovanthu vange.”+
34 “Nawike vali makalongesa mutyitwa-tyilongo mukwavo, no ou velilandula nae ati: ‘Noñgonoka Siovaa!’+ Mokonda aveho mavakanoñgonoka, okuhimbikila komona watyo atee komukulu,”+ o Siovaa wetyipopia. “Mandyikevepolela-po oviponyo viavo, nononkhali mbavo hikeembweeta-le vali komutima.”+
35 Etyi otyo tyapopia Siovaa,
Ou utundisa ekumbi limimikile onthiki,
Ou walinga ovitumino viohanyi no viononthungululu,* mbumimikila kounthiki,
Ou unkhindula elunga, ataha-taha omanyonda* alio,
Wenyina litiwa o Siovaa womambamba ovita, wati:+
36 “‘Ine ovitumino ovio viponya,’ o Siovaa wetyipopia,
‘Opo vala ovanthu vatuka mu Isilayeli vahamakakala-kala vali otyilongo kotyipala tyange.’”+
37 Etyi otyo tyapopia Siovaa, wati: “‘Ine eulu lietavelele okweelekwa, omalisesu ohi mombwelo aetavela okweovola, opo ñgeno naanya aveho vatuka mu Isilayeli kombanda yovipuka valinga,’ o Siovaa wetyipopia.”+
38 “Tala! Omboo mbuya ononthiki,” o Siovaa wetyipopia, “ononthiki epunda-umbo eli malipindulwa-po+ lilinge lya Siovaa, okuhimbikila Ketala Liomuyungi lyo Hananeli+ atee Kombundi yo Pevindi.*+ 39 Epanda liokweeleka+ malikehika kotyipunda tyo Ngalembe, alikeliseta alikaviuka no ko Ngoa. 40 Elola aliho liovivimbi, lietwe,* nomaheke aeho ovikuna, Nelola lyo Kindoloo,+ Nevindi Liombundi Yononkhambe,+ koutundilo, ovipuka ovio aviho mavikalinga ovipuka vikola ku Siovaa.+ Epunda-umbo kamalikatukulwa-po vali, nii kamalikahanywa-po.