Selemiya
52 Sendekiya+ wakala ohamba etyi ena omanima 21, atumina omanima 11 mo Selusalei. Ina utiwa o Hamutale+ omona wa Selemiya, wo ko Limbina. 2 Sendekiya walingile etyi tyapenga komaiho a Siovaa ngeetyi tyalingaile Seoyakii.+ 3 Onyengo ya Siovaa oyo yalingisa ovipuka ovio vialingwa mo Selusalei no mo Sundaa, atee umwe evetaata kotyipala tyae.+ Sendekiya atyitukila-po ohamba yo Mbambilonia.+ 4 Menima lya tyive Sendekiya eli kovipundi, mohanyi 10, monthiki 10 yohanyi, Nambukondonosole* ohamba yo Mbambilonia novita viae aviho aveya okulwisa o Selusalei. Aveyoongela onthanda, avatungu otyimato tyeliseta nepunda-umbo aliho.+ 5 Epunda-umbo alikala tyakwatwa atee menima 11 ohamba Sendekiya ili kovipundi.
6 Mohanyi ya kwana monthiki ya tyive,+ ondyala ailingi onene mepunda-umbo, ovanthu motyilongo avahakala nokulia.+ 7 Avatembe emphana motyimato tyepunda-umbo, omafwalali aeho mepunda-umbo aahene-mo kounthiki, aakwata pombundi yo pokati kovimato vivali, ponthee pononthemo mbohamba, etyi ova Kalindeya vapaka pokati epunda-umbo; aaende nondyila yo ko Alambaa.+ 8 Aa ngwe omafwalai ova Kalindeya aalandula ohamba Sendekiya,+ aekeivasa monthanthalahi moluhandya lwo ko Selikoo, omafwalali ae aeho ali nao aakapamba. 9 Avakwata ohamba, aveitwala kohamba yo Mbambilonia ko Limbela, motyilongo tyo Hamate, ngwe aimupopila etyi malingwa. 10 Ohamba yo Mbambilonia aiipaa ovana va Sendekiya ovakwendye, otyo Sendekiya yatyo atala; aiipaela ko Limbela ovanene vatyo aveho vo mo Sundaa. 11 Pahe ohamba yo Mbambilonia aikwata Sendekiya aimulingi omumphoki,+ aimukutu nomalienge otyitasu, aimutwala no ko Mbambilonia, akala umwe mokalavoso atee onthiki yononkhia mbae.
12 Mohanyi ya tano monthiki 10, menima 19 Nambukondonosole* ohamba yo Mbambilonia eli kovipundi, Nembusalandaa omunene wovayungi, omuundapi wohamba yo Mbambilonia, eya mo Selusalei.+ 13 Ayoko-po* ondywo ya Siovaa,+ neumbo liohamba,* nomaumbo aeho o mo Selusalei; nonondywo ambuho ononene embuyoko. 14 Ovimato viokweliseta no Selusalei avihanywa-po novita aviho viova Kalindeya viaile nomunene wovayungi.+
15 Nembusalandaa omunene wovayungi, ovanthu vokwahepa vamwe evetwala koupika, no vokwahupile-po vesalele mepunda-umbo. No vokwahula kohamba yo Mbambilonia, navo evetwala koupika, navo no vokuhonga omavai vahupa-po.+ 16 Mahi Nembusalandaa omunene wovayungi ava vokwahepa vali kovanthu aveho motyilongo evesipo, evesi vaundapa momapia omiti vionouva, no movilinga vamatumwa.+
17 Ova Kalindeya avatyoka-tyoka onomphandyi mbotyitasu+ mbondywo ya Siovaa noutuku-tuku,+ Nelunga liotyitasu+ likala mondywo ya Siovaa, avatwala otyitasu atyiho ko Mbambilonia.+ 18 Avatyindi novikwatelo, nonopaa, no viokunyima omutemo, novilindo,+ nomalufo,+ novityuma aviho viotyitasu vaundapa navio mondywo ya Huku. 19 Omunene wovayungi apolo-po onombasiya,+ novitenyo,* novilindo, novikwatelo, novikandiyelo,+ nomalufo, novilindo vialingwa noolu yatyo mwene nopalata yatyo mwene.+ 20 Mahi onomphandyi onombali, Nelunga, nonongombe ononthwei 12 mbotyitasu+ mbukala mombwelo Yelunga, noutuku-tuku ohamba Salomau yalingilile ondywo ya Siovaa, ovipuka ovio aviho vialingilwe notyitasu, kavevivilile okuviheteka.
21 Onomphandyi mbatyo ambuho, mbuna onokovandu* 18 motyitai, epanda liokuheteka lina onokovandu 12, lipondola okuliseta nambo;+ omphandyi yo tete mounene ituuka ominwe* vikwana, mokati ina ombundi. 22 Omutwe wo kombanda yotyipandyi, walingwa notyitasu; omutwe wike una onokovandu ononthano motyitai;+ omawanda nomalomaa okweliseta nomutwe, aeho alingwa notyitasu. Omphandyi ya vali yelifwa nomphandyi yo tete, nomalomaa atyo. 23 Yali nomalomaa 96 eliseta nayo mononthele; okweevalula aeho okweliseta nomawanda atuuka 100.+
24 Omunene wovayungi aikwata na Selaya,+ omunene wovanakwa, na Sofoniya+ omunakwa wa vali, novayungi vetatu vo konombundi.+ 25 Apolo omuundapi umwe wo mombonge mepunda-umbo, omululiki womafwalali, novalume epandu-vali vokupakela-mo ohamba vo mepunda-umbo, nomuhoneki womunene womafwalali, wokukwata ovanthu motyilongo, novalume 60 vo motyilongo nkhele vali mepunda-umbo. 26 Nembusalandaa omunene wovayungi evekwata, evetwala kohamba yo Mbambilonia ko Limbela. 27 Ohamba yo Mbambilonia aivevange, aiveipaela ko Limbela+ kotyilongo tyo Hamate. Ova Sundaa motyilongo tyavo avapolwa-mo avatwalwa koukonde.+
28 Etyi otyifwe tyovanthu Nambukondonosole* atwaile koupika menima lya pandu-vali: ova Sundaa 3.023.+
29 Menima 18 Nambukondonosole*+ eli kovipundi, ovanthu* 832 mo Selusalei avapolwa-mo avatwalwa.
30 Menima 23 Nambukondonosole* eli kovipundi, Nembusalandaa omunene wovayungi atwala ova Sundaa koupika, ovanthu* 745.+
Aveho vatwailwe koupika vena 4.600.
31 Pahe menima 37 Swakii+ ohamba yo Sundaa eli koukonde, tyina tyiti mohanyi 12 monthiki 25, menima Evili-Melondake alinga ohamba yo Mbambilonia, ayovola* Swakii ohamba yo Sundaa, emupolo mokalavoso.+ 32 Apopi nae nokankhenda, emupake kovipundi* emulingi omunene vali konohamba ali nambo ko Mbambilonia. 33 Pahe apolo-mo ovikutu viae viounkhwatwa, ahimbika okulia komesa yohamba ononthiki ambuho mbomwenyo wae. 34 Ononthiki ambuho upolelwa kokulia kwohamba yo Mbambilonia, ngatyo alingwa otyo ononthiki ambuho mbomwenyo wae, atee umwe onthiki yononkhia mbae.