Susuwee
8 Pahe Siovaa apopila Susuwee ati: “Wahatile owoma, wahalinge otyiho.+ Pola ovalume aveho ovakwa-vita, oende navo mukalwise o Ai. Tala! Ame napakula pomavoko ove ohamba yo Ai novanthu votyilongo tyae, nepunda-umbo liatyo notyilongo tyatyo.+ 2 Etyi walinga o Selikoo nohamba yatyo, otyo ulinga o Ai nohamba yatyo.+ Mahi pahe, etyi tyili-mo mupondola okutyipunda-mo atyiho novipako viatyo. Vamwe vaunde konyima yepunda-umbo.”
3 Susuwee novakwa-vita aveho, avaende avakalwisa o Ai. Susuwee apolo-po ovakwa-vita vokwapama vali vena 30.000, tyina tyiti kounthiki evetahe vende. 4 Evetolela okuti: “Tala Onwe mamukaunda monyima yepunda-umbo. Mwahakalelei unene kokule, amuho mwahatalukwei. 5 Ame kuno, na ava tuna-vo, matufwene kepunda-umbo, tyina ngwe vamahande okutulwisa ngeetyi vetulingile-ale,+ onthwe matulihahe. 6 Tyina vametulandula, onthwe matuvekokela kokule, ngwe mavati: ‘Vakwe, vatila-ko vali.’+ Onthwe otyo tuvehohovoka. 7 Tyina onwe mwamevemono otyo valinga otyo, apa muli tundei-po amulombokela mepunda-umbo. Epunda-umbo Siovaa Huku yenyi, melipakula peke lienyi. 8 Tyina onwe mwamanyingila mepunda-umbo, lipakei otupia.+ Lingei umwe etyi Siovaa apopia. Otyo, otyo ame nemutuma.”
9 Pahe Susuwee evetumu vende, avaende. Avakaunda pokati ko Mbetele no Ai, okwenda no koutakelo wo Ai. Ava ovo Susuwee, novanthu ovakwavo vena-vo avalala peke.
10 Etyi Susuwee apinduka-po kombimba, aongiya* omafwalali. Susuwee novakulu ova Isilayeli, avaende nomaswalali aeho ko Ai. 11 Ovakwa-vita aveho vaile navo,+ avaende atee vehika oku kwapilukila ombundi yepunda-umbo. Avaongo onthanda kombanda yo Ai, avafwene-ko umwe, avatyikwa vala nelola pokati. 12 Vaonga tupu opo onthanda, Susuwee wapunga-po-ale ovalume vehungi po 5.000 avakaunda+ pokati ko Mbetele+ no Ai, okuyemba koutakelo wepunda-umbo. 13 Ovanyingi vatyo, epunda-umbo aveliyembe kombanda,+ ngako vaonga onthanda onene yatyo, ava ovakwavo epunda-umbo avelihulu koutakelo.+ Motyinthiki tyatyo omo, Susuwee aende melola, ehiki umwe pokati-na-kati.*
14 Ohamba yo mo Ai yati vala tyimonee, atyiti nayo novalume vomepunda-umbo avatundu mepunda-umbo kombimba, vakalwise ova Isilayeli. Vahandele okukevelwisila pamwe pati tyina uli-po moluhandya mumoneka. Mahi ngwe kaityii okuti kuna ava vaunda konyima yepunda-umbo. 15 Etyi ovalume vomo Ai vahimbika okulwisa Susuwee nova Isilayeli aveho, ovo Susuwee avelihahe avapolesa-po etapalo, avakaviuka moluhandya.+ 16 Ovanthu aveho vomepunda-umbo avaihanwa-mo vataate ovo Susuwee nova Isilayeli. Tyina ngwe vevelandula, ava ovo Susuwee otyo vaya umwe, vevekokele kokule nepunda-umbo. 17 Mo Ai nomo Mbetele kamwesalele omulume nawike, aveho vakataatele ova Isilayeli. Epunda-umbo avelisi vala ngootyo umbululu, avakataata ova Isilayeli.
18 Siovaa apopila Susuwee, ati: “Tandaveka eonga olio una-lio peke, oliyulika ko Ai,+ mokonda mandyiipakula peke liove.”+ Susuwee atandaveka eonga ena-lio peke, eliyulika kepunda-umbo. 19 Wati vala tandavekee okuvoko kwae, ovalume vokwaunda, avakatuka avanyingila mepunda-umbo, avapundu atyiho tyili-mo. Avapake-ko otupia.+
20 Tyina ovalume vomo Ai valeuka, vakati ñgana mepunda-umbo mukatuka omwihi, nononkhono vala mbokukahateka avehembumono-ale vali, no oku vaya nako pahe kavekulwete vali. Ava veli nokutaata pahe avevepilukila-po, koluhandya avaanguluka-ko. 21 Etyi kuna ovo Susuwee nova Isilayeli aveho vetyimona okuti ovalume vokwaunda vanyingila mepunda-umbo, pahe mepunda-umbo muli nokukatuka omwihi, avakondoka, avahimbika okulwisa ovalume vomo Ai. 22 Kuna vakwavo, navo avatundu mepunda-umbo vahonyenene navo, avapake pokati ovalume vo mo Ai, pahe atyiti ova Isilayeli vamwe veli nthele, ovakwavo veli nthele. Aveveipaa aveho, apahahupu nawike, nawike wakahombokele.+ 23 Mahi ohamba yo mo Ai+ aveheiipaa aveikwata vala, aveitwala ku Susuwee.
24 Ova Isilayeli vaipaa ovanthu aveho vokukala mo Ai, ava vevetaatelele moluhandya. Etyi vevemana-po umwe aveho nomutunga, ngwe pahe avakondoka mo Ai, aveho vesalele-mo aveveipaa nomutunga. 25 Monthiki omo ovanthu aveho vomo Ai vankhile, ovalume novakai. Vaipaelwe vena 12.000, ovanthu vatyo umwe aveho vomo Ai. 26 Susuwee watandavekele+ okuvoko kwae kwo kuna eonga atee ovanthu aveho vomo Ai vahanywa-mo.+ 27 Ova Isilayeli avapundu ovipako, novipuka aviho viomepunda-umbo. Valingile umwe etyi Siovaa atumine Susuwee.+
28 Pahe Susuwee, o Ai eipake otupia, aihanyauka,+ aikala umwe ngeetyi ikahi ñgaa. 29 Ei ohamba yo Ai eiipaa, eipapela momuti, ngamo ikala atee komakumbi. Tyina tyiti komapeto, Susuwee atumu ovanthu vakapole otyivimbi otyo momuti.+ Aveketyiyumba kombundi yepunda-umbo, avatentheka-ko onthumbo imwe onene yomamanya. Na hono opo ili.
30 Etyi ovo Susuwee vatunda oko, ngapo Susuwee akatunga omutala wovilikutila wa Siovaa Huku yova Isilayeli Komphunda Embale,+ 31 ngeetyi Mwisesi omuundapi wa Siovaa atumine ova Isilayeli, ngeetyi tyahonekwa momukanda Wovitumino+ vya Mwisesi wati: “Omutala wovilikutila watungwa nomamanya ahavambaulilwe notyivela.”+ Komutala oko, ngako valingila Siovaa ovipuka viaawa viokuyokwa, novilikutila viombembwa.+
32 Pahe Susuwee ahoneka Ovitumino komamanya,+ evi Mwisesi ahonekele otyo ova Isilayeli vatala.+ 33 Ova Isilayeli aveho, novakulu, nononkhalamutwe, no vokuteta onomphela avaongelela Otyikasa, otyikasa tyatyindwa novanakwa vokwatuka mu Levii, ovanakwa vokutyinda otyikasa tya Siovaa tyomphango. Tyilinge ovanthu vovilongo ovikwavo pahe vakala ova Isilayeli, tyilinge ova Isilayeli vatyo, aveho vali-po.+ Atyiti vamwe vetai Pomphunda yo Selisii, ovakwavo vetai Pomphunda yo Embale+ (ngeetyi tyatumine Mwisesi omuundapi wa Siovaa),+ opo ova Isilayeli aveho vapeleyilwe oviwa. 34 Pahe, atangela peulu onondaka ambuho Mbovitumino,+ atange atyiho tyipa ovanthu elao,+ neetyi tyitengalesa ovanthu,+ atange umwe atyiho tyahonekwa momukanda Wovitumino. 35 Susuwee watangelele peulu onondaka ambuho Mwisesi atumine, kasile-po ondaka na ike. Susuwee ambuho wembutangelele ova Isilayeli+ aveho, ovakai, novana, novanthu vovilongo ovikwavo+ vakala* navo.+