Omukanda wo Tete wa Samuwele
22 Pahe Ndaviti atundu-ko,+ akaholama meleva lyo ko Andulau.+ Etyi ovakulu vae novanthu aveho vomeumbo lya he vetyiiva, avaende-ko oku ankho eli. 2 Aveho ankho vokuna ovitateka, novanthu vokwalevalwa, na vana ankho vasoka okuti valingwa onya,* aveliwaneka na Ndaviti, Ndaviti akala onkhalamutwe yavo. Ankho ovalume vatuuka 400.
3 Konyima Ndaviti aende no ko Misipaa ko Moambe, apopila ohamba yo Moambe okuti:+ “Mbambavo, ovo tate na mee vakale-vo muno atee ndyinoñgonoka etyi Huku mandingila!” 4 Ngootyo evesila ohamba yo Moambe, avakala motyilongo otyo, ononthiki ambuho ankho Ndaviti atwalako okuholama.+
5 Nthiki imwe, omuuli Ngande+ apopila Ndaviti okuti: “Wahakale meleva. Enda no kotyilongo tyo Sundaa.”+ Ndaviti aende, akanyingila motyiteta tyo Helete.
6 Saulu etyiivi okuti Ndaviti nomafwalali ae vena apa vavasiwa. Saulu ankho umpumphi komphunda imwe ko Simbeaa,+ mombwelo yomulunga, neonga liae peke, ovaundapi vae aveho ankho veliseta nae. 7 Pahe Saulu apopila ovaundapi ankho veliongiya ponthele yae, ati: “Tehelelei mbambavo vomuhoko wa Mbesamii. Okuti omona wa Sesee+ nae memwavela omapia, no omiti vionouva amuho? Okuti memulingi ononkhalamutwe mbo 1000, no mbotyita?+ 8 Onwe amuho munondyale mbange! Pwoonwe petupu nawike wamphopila etyi omona wange alinga omphango nomona wa Sesee!+ Nawike wakala nokankhenda naame andondola okuti, omona wange ukahi nokuhindila omuundapi wange okunthyitukila-po, ngeetyi ekahi nokundinga hono.”
9 Ngootyo, Ndowenge+ omu Endoo omutumini wovaundapi va Saulu akumbulula okuti:+ “Ame namona omona wa Sesee weya ko Nombe opo vekelivase na Aimeleke omona wa Aitumbe.+ 10 Aimeleke wemwitila-ko ku Siovaa, emwavela okulia. Atee umwe wemwavela omutunga wa Ngoliya omu Filisitiya.”+ 11 Liwa-liwa ohamba aitumu okukaihana omunakwa Aimeleke omona wa Aitumbe, novanakwa aveho vomeumbo lya tate yae, ankho veli ko Nombe. Aveho aveya okutavela kohamba.
12 Saulu ati: “Mona wa Aitumbe tehelela kuno!” Ngwe akumbulula okuti: “Tatekulu popia.” 13 Saulu emupopila okuti: “Omokonda yatyi noove nomona wa Sesee mwapangela okundyipaa? Omokonda yatyi wemwavelela ombolo nomutunga, omwitila-ko ku Huku? Omona oo undyele, ukahi nokundyeva atee pahetyino.” 14 Aimeleke apopila ohamba okuti: “Olie vali povaundapi vove uyumbwa onthumbi* nga Ndaviti?+ Ngwe wanepa omona wove hamba,+ tupu onkhalamutwe yovayungi vove, vomeumbo liove vena onthilo nae.+ 15 Okuti o hono vala nemwitila-ko ku Huku?+ Ame hipondola okupanga okukwipaa tatekulu! Wahatendeleye omuundapi wove, nii vomeumbo lya tate, mokonda omuundapi wove kei otyipuka natyike ukahi nokupopia.”+
16 Mahi ohamba aiti: “Kala tyityii okuti monkhi+ Aimeleke, ove no vomeumbo lya tate yove aveho.”+ 17 Pahe ohamba aipopila ovayungi* ankho vetai ponthele yayo, aiti: “Ipaei ovanakwa va Siovaa, mokonda vahula ku Ndaviti! Ankho vetyii okuti Ndaviti ukahi nokwenda-nkholo, avahamphopila!” Mahi ovaundapi vohamba avehetavela okupaka okuvoko kwavo kovanakwa va Siovaa. 18 Pahe ohamba aipopila Ndowenge okuti:+ “Ove veipaa!” Ndowenge, omu Endoo,+ liwa-liwa aipaa ovanakwa. Monthiki oyo, aipaa ovalume 85 ankho vavala otyikutu tyounakwa.+ 19 Tupu aipaa nomutunga vomepunda-umbo lyo Nombe,+ epunda-umbo liovanakwa. Aipaa ovalume novakai, novana nomalukembe, nonongombe, novimbulu, nonongi nomutunga.
20 Mahi Ambiyatale,+ umwe povana va Aimeleke, Aimeleke omona wa Aitumbe, ahupila-ko akahateka no ku Ndaviti. 21 Ambiyatale apopila Ndaviti okuti: “Saulu waipaa ovanakwa va Siovaa.” 22 Ndaviti apopila Ambiyatale ati: “Monthiki muna+ etyi namona Ndowenge omu Endoo, ankho netyimona-le okuti meketyitola ku Saulu. Ame umwe netyeeta-po, aveho* vomeumbo lya tate yove vakaipawa tupu ngootyo ame umwe. 23 Tukale atuho, wahatile owoma, mokonda una wahanda okukupola omwenyo,* ame ahanda okupola omwenyo;* mandyikuyakulila.”+