Wo Tete Wahonekelwa Ova Kolindu
9 Ame okulinga etyi ndyilinga katyitei mwene kwaame? Ame himutumwa? Ame hamwene Sesusi Tatekulu yetu?+ Onwe hanwe ovilinga viange mu Tatekulu? 2 Namphila ku vamwe nehemutumwa, mahi kwoonwe andyitumwa! Onwe onwe tyilimbo tyityipopia umwe okuti ame ndyimutumwa movilinga vya Tatekulu.
3 Tyindyakulila kwaava vamphula, otyetyi: 4 Noonthwe tyokulia no tyokunwa, katyitei* vala kwoonthwe? 5 Noonthwe katyitei kwoonthwe ankho twahanda tyokulandulwa nomukai omutaveli,+ atulingi ngovatumwa vakwetu, atulingi ngonondenge mba Tatekulu,+ nga Sefa?*+ 6 Ine etyi tyokuundapa tumone tyetu, onthwe vala na Mbalanambee+ twahapondola okutyiyeka? 7 Okuti tyina omunthu aya koufwalali evi mesuku navio ulilandela? Pena ou utwika omiti vionouva kovinyango viatyo ahali-ko?+ Pena omunthita ulisa vala, komahini ovipako viatyo ahali-ko?
8 Okuti ovio ndyipopia viatunda mokwasoka kwovanthu? Ovitumino navio kavityipopi? 9 No Movitumino vya Mwisesi tyahonekwa-mo tyatiwa: “Wahakute ongombe komulungu tyina ityopa ovilia.”*+ Okuti pahe etyi Huku ankho eli nokusoka onongombe? 10 Wapopia tupu ngootyo hanthwe etyipopila? Otyo onthwe umwe mwene tyahonekelwa, mokonda tyati vala no ou ulima no ou utyopa, aveho vaundapa tupu okwahanda haa vapole-mo.
11 Onthwe vokwakuna mwoonwe vya Huku, okuti opo tyilema okupola mwoonwe ovipuka tusuka navio?+ 12 Ine ovalume vamwe muvepa-vio umwe vevitambula, opo ankho hanthwe vali ñgeno tuvipewa? Mahi ngwe onthwe namphila ankho ñgeno tuvipewa umwe,+ katuli nokuviita, tuli umwe vala nokulikwatehila twahatyopole oviwa ovipe viayemba ku Kilisitu.+ 13 Onwe kamutyii okuti ovalume valinga ovilinga vikola valia vyo mondywo ya Huku, ava vokuundapa apeho komutala wovilikutila vapolelwa povipuka vilingwa ovilikutila komutala?+ 14 Otyipuka tyike, naava Tatekulu atuma vaivisa oviwa ovipe wati navo valia moviwa ovipe.+
15 Mahi ame hinelie natyike povipuka ñgeno ankho ndyipewa.+ Ngwe otyo nahoneka, hakuti nati ndyipewe ovipuka ovio, opo nkhwali hahe nankhile tyipona — petupu nawike umphola elao liange limpha okulimphanda!+ 16 Ine ame ndyipopia oviwa ovipe, otyo hatyo tyimpha okulimphanda, mokonda otyo otyilinga natumwa. Ngwe tyili, ine ame hipopi oviwa ovipe, ngongo yange!+ 17 Ine ndyivipopia nomutima welihandya, mankhapewa ondyambi; mahi nga ndyivipopi vala tyahahandele, no ngootyo nalinga umwe otyilinga napewa.+ 18 Opo naina, ondyambi yange oipi? Ondyambi yange okupopia oviwa ovipe, okwaava oviwa ovipe anahafetwa, nahalinge ngatyina nahanda okulila-mo moviwa ovipe.
19 Ngwe namphila ame nehetei kovanthu, mwene nelilinga omupika ndyiundapele ovanthu aveho, ndyitale hamwe ndyipola-mo umwe ovanyingi hahe. 20 Mova Sundaa naame nalinga lwomu Sundaa opo ndyeete ova Sundaa;+ pwaava veheli motyitumino, naame nalinga lwo ou weheli motyitumino, namphila ame mwene ndyili motyitumino opo ndyeete ava veheli motyitumino.+ 21 Mu ava vehe votyitumino, nalinga lwo ou wehe wotyitumino, namphila ame mwene ndyi wotyitumino ku Huku, nomu Kilisitu+ ndyili motyitumino, opo ndyeete ava vehe votyitumino. 22 Pu ava vayengenga, naame nalinga wokwayengenga, opo ndyeete ava vokwayengenga.+ Ame nalinga umwe lwovanthu aveho, movanthu vatyo aveho omu velikalailila, atyiho otyo netyilingila okwahanda ndyiyovole-mo vamwe. 23 Mahi aviho ndyilinga, ndyivilingila oviwa ovipe, ndyivipopile-vo vakwetu.+
24 Kamutyii okuti ava vokuhateka velityutya, vahateka umwe aveho, mahi unganyala wike vala? Noonwe otyo muhateke ngootyo mukapewe ondyambi.+ 25 Mahi aveho velipa tyokulityutya, vesukisa okuliyunga movipuka aviho. Ngwe tyili ovo vetyilinga umwe avatambula ohala ivola,+ mahi onthwe, tukatambula ohala yahavolo.+ 26 Naina, ame omu ndyihatekela ha tyokwehei apa nkhehulila;+ nokuveta hivete ngo ou uveta omphepo; 27 mahi ndyiveta* olutu lwange,+ andyilutumina ngomupika, nahatie vakwetu nevepopila umwe, mahi pahe ame anehetavelwa.*