Wo Tete Wahonekelwa Ova Kolindu
3 Ame pokwapopia noonwe vanthu vetu, hetyivilile okupopia ngatyina muvanthu vayemba ko vya Huku,+ mahi napopia ngatyina ndyili nokupopia novanthu vayemba ko viohitu, ovana+ mu Kilisitu. 2 Ame nemupele omahini, hemupele okulia kwakola, mokonda onwe ankho nkhele kamunekole. Na hono vala nkhele kamunekole-ale nawa-nawa,+ 3 nkhele mwayemba vala ko viohitu.+ Nkhele pokati kenyi peliluwa onkhi pena omalwei, ngootyo opo nkhele kamwayembele vala ko viohitu,+ kamuli vala nokweenda lwovanthu? 4 Tyina tyiti, ou uti: “Ame ndyiwa Paulu,” ou uti: “Ame ndyiwa Apolu,”+ ngootyo kamuli vala nokulinga evi vilinga ovanthu?
5 Pahe Apolu olie? Pahe Paulu olie? Ovo ovaundapi+ vala vemupa ondyila mutavele, ngeetyi Tatekulu apa ombundi ovanthu ovakwavo. 6 Ame natwika,+ Apolu atapelela,+ mahi ou wekulisa o Huku, 7 naina, tyati vala oyou watwika oyou watapelela, otyipuka tyike vala, walinga vala o Huku ukulisa.+ 8 No ou utwika no ou utapelela, etyi vahanda tyike* vala, mahi munthu na munthu makapewa ondyambi yae yata mu etyi alinga.+ 9 Onthwe tuundapa na Huku. Onwe, onwe epia lya Huku lili nokulimwa, onwe mutyitunge tya Huku.+
10 Mokankhenda okanene ka Huku napewa, ame natunga elisesu,+ natunga lwomutungi omunongo,* mahi pena vali ou uli nokutunga-ko. Mahi munthu na munthu atale nawa oñgeni ekahi nokutunga-ko kelisesu oko. 11 Petupu-ale vali ou ukatunga elisesu ekwavo, alambe-po eli lilipo-ale, Sesusi Kilisitu.+ 12 Pahe ou utunga kelisesu oko oolu, hamwe opalata, hamwe omamanya omawa, hamwe omiti, hamwe eholi, hamwe ovingenge, 13 etyi omunthu atunga natyo mwene haa matyimoneka-le,* apa kutya matyimoneka, mwene haa matyipakwa otupia+ tyitalwe, otupia oto matulekesa otyipuka patyi munthu na munthu atunga natyo. 14 Ine etyi omunthu atunga-ko katyipi, oo makapewa ondyambi; 15 ine etyi omunthu atunga-ko tyipia makapeseka ko tyae, mahi ngwe makayovolwa; mahi napo vala, malingi ngo ou wakwata motupia.
16 Kamutyii okuti onwe mundywo ya Huku,+ omphepo ya Huku ikala mwoonwe?+ 17 Omunthu okuhanya ondywo ya Huku, Huku mekemunyima-ko; mokonda ondywo ya Huku ikola, ngwe onwe mundywo ya Huku.+
18 Mwehelikembei: Ine pokati kenyi pena ou wati hamwe omunongo mouye uno,* oo elipake kouhima, alinge omunongo. 19 Mokonda ounongo wouye uno, ku Huku ouhima, ngwe tyahonekwa tyatiwa: “Vokwatonkhoka, mokuyondya kwavo omo umwe evekwatela.”+ 20 Tupu tyahonekwa tyatiwa: “Siovaa* utyii okuti evi ovanongo vasoka kavisilivila.”+ 21 Naina, mwehelimphandelei movanthu; mokonda ovipuka aviho ovienyi, 22 tyilinge Paulu, tyilinge Apolu, tyilinge Sefa,*+ tyilinge ouye, tyilinge omwenyo, tyilinge ononkhia, tyilinge evi nkhele vili-ko, tyilinge evi maviya, atyiho vala otyenyi; 23 mahi onwe mu va Kilisitu;+ ngwe Kilisitu owa Huku.