Wa Vali Wahonekelwa Ova Kolindu
1 Ame Paulu, mutumwa wa Kilisitu Sesusi kokwahanda kwa Huku, tuna Timotiu+ mutaveli mukwetu, wenda kewaneno lya Huku mo Kolindu, aveho ovasukuki no vomo Akaya.+
2 Okankhenda okanene kakale noonwe, atyiho nombembwa itunda ku Huku Tate yetu, no ku Tatekulu Sesusi Kilisitu.
3 Huku ahilivikwe, Tate ya Tatekulu yetu Sesusi Kilisitu,+ Tate wokankhenda,+ Huku omupameki,+ 4 Huku utupameka* mononkhumbi* ambuho tumona,+ utupameka noonthwe tutyivile-vo okupameka vakwetu+ mononkhumbi* ambuho.+ 5 Ngeetyi ononkhumbi tuli nokumonena mu Kilisitu mbalinga ononyingi,+ nokupamekwa kwatyo kwalinga okunene mu Kilisitu. 6 Naina, onthwe tumona ononkhumbi* onwe tyimupameke, muyovoke; onthwe tupamekwa noonwe mupamekwe, tyimupe ononkhono mukoleleye mononkhumbi ngo ombu noonthwe tuna-mbo. 7 Onthwe kwoonwe twayumba-ko umwe onthumbi, tutyii okuti, etyi tuli nokumonena kumwe ononkhumbi, no pokupamekwa matupamekelwa kumwe.+
8 Katwahandele vanthu vetu, onwe mwahanoñgonoke ononkhumbi twakala nambo ko Asiya.+ Twamonesilwe emone noonthwe pahe atwoofolola, nokuti vala matuhupu ankho pahe katutyii-ale vali.+ 9 Ankho pahe, twati umwe hamwe matwiipawa. Otyo tyalingwa umwe onthwe twahapamene vala mwoonthwe, mahi tupamene mu Huku,+ upindula-po vokwankhia. 10 Wetuhukulula, kwakambele katutu himaa tunkhia, metuyovola vali, twayumba-ko onthumbi, kametuyeke metuyovola.+ 11 Noonwe mupondola okutukwatesako tyina mutwiitila-ko,+ okulinga ngootyo ovanyingi mavapandula otyali twalingwa tyituka momalikwambelo ovanyingi etavelwa.*+
12 Mokonda otyipuka onthwe tulimphandela otyetyi, onombungo mbetu mwene nambo onombangi, onthwe mouye etyi twaenda-mo twasukuka umwe, twalinga votyili tya Huku, haunene etyi twakala noonwe, katwalingile ovipuka kounongo wohitu,+ mahi o kokankhenda okanene ka Huku. 13 Mokonda onthwe tutupu etyi twemuhonekela tyalema, twemuhonekela evi muvila okutanga,* evi munoñgonoka, ame nayumba-ko onthumbi, ndyityii okuti apeho onwe ovipuka ovio mamuvinoñgonoka nawa,* 14 ngeetyi mwanoñgonoka-le, mutyii-ale katutu okuti, onwe mulimphandela onthwe, ngeetyi noonthwe matukelimphandela onwe monthiki ya Tatekulu yetu Sesusi.
15 Naina tyokwayumba-ko umwe onthumbi, otyo ankho nahandela nkhele okuya oko, opo onwe mumone vali ehambu;* 16 mokonda nahandele okuya oko pokwenda no ko Masendonia, haa andyikwata vali oko pokutunda ko Masendonia, pahe tyina ndyenda no ko Sundeya amundyumbu pondyila.+ 17 Mahi pahe etyi ankho nasoka ngootyo, okuti ankho netyilinga vala ngokunyana? Ine pokwapanga ovipuka ankho nasoka vala lwohitu, ndyitie, “otyo umwe, otyo umwe,” andyiti vali “au, au”? 18 Mahi mokonda Huku nae uyumbwa onthumbi, etyi tumupopila katyilingi tyokutiwa “otyo umwe” haa atyitiwa vali “au.” 19 Mokonda Omona wa Huku, Sesusi Kilisitu, ou wapopiwa onwe mweiva mwoonthwe, onthwe na Silivanu,* na Timotiu,+ oo kalingile wo “otyo umwe” alingi vali wo “au” mahi o “otyo umwe” yae yalinga umwe o “otyo umwe.” 20 Mokonda aviho evi Huku apanga, vilinga tupu o “otyo umwe,” oe.+ Tupu oe tutila “Amem” tupopila Huku,+ otyo tyimupa okunkhimanena mwoonthwe. 21 Ngwe ou mwene wetyitola tyokuti noonthwe noonwe tuva Kilisitu oyou wetulembula, o Huku.+ 22 Tupu wapaka otyilimbo tyae kwoonthwe,+ wetwaavela-le opinyolo yeetyi matyiya,* omphepo ikola,+ ili-ale momitima vietu.
23 Ame pahe ndyiti Huku ombangi yange,* etyi neheilile liwa ko Kolindu utyii. 24 Hakuti onthwe, onthwe vahekulu vonthumbi yenyi,+ mahi tuundapa noonwe tyimupe ehambu, mokonda mwene mutai tupu onthumbi yenyi.