Omukanda Wa Vali wa Samuwele
16 Etyi Ndaviti atunda katutu pokatanga-tanga komphunda,+ avasi Simba+ omukwatesiko wa Mefimbosete+ ukahi nokumukevela, ankho una ovimbulu vivali viapakwa omutumba, kombanda yavio ankho kuna onombolo 200, nomingome 100 vionouva mbakukuta, nomingome 100 viovinyango vyo pokwenye* nomulindi omunene wovinyu.+ 2 Pahe ohamba aipulu Simba okuti: “Ovipuka evi waeta oviatyi?” Simba akumbulula okuti: “Ovimbulu nevietela ovanthu vo meumbo liohamba opo vavelame-ko, onombolo novinyango vyo pokwenye nevietela ovalume valie, ovinyu neyetela ovanthu vana mavehiki moluhandya tyepwila opo vanwe.”+ 3 Ohamba aimupulu okuti: “Omona* wa tatekulu yove uli-pi?”+ Simba akumbulula ohamba okuti: “Wesala mo Selusalei, wati: ‘Hono onthiki ova Isilayeli mavankhondolela ouhamba wa tate.’”+ 4 Ohamba aipopila Simba okuti: “Tala! Ovipuka aviho vya Mefimbosete vikale viove.”+ Simba ati: “Ndyilipetamena kwoove hamba. Twalako okunthala okuti ndyimunthu omuwa tatekulu hamba.”+
5 Etyi Ohamba Ndaviti yehika ko Mbaulii, omulume umwe wo mombunga ya Saulu utiwa o Simei+ omona wa Sela, eya ku Ndaviti otyo emuhingana.+ 6 Otyo ayumba Ndaviti nomamanya, novaundapi aveho Vohamba Ndaviti, novanthu ovakwavo aveho, novalume vokwapama ankho vekahi kokulio kwohamba no kokumbili kwayo. 7 Tyina Simei emuhingana otyo apopia okuti: “Pita, tunda pano, ove wokwiipaa ovanthu! Ove kusilivila! 8 Siovaa wekwetela ovitateka mokonda yetyi waipaa eumbo lya Saulu opingi pomphangu yae yokutumina, Siovaa ukahi nokupakula ouhamba pomavoko omona wove Ambisalau. Pahe watokelwa novitateka mokonda wiipaa ovanthu!”+
9 Pahe Ambisai omona wa Seluya+ apopila ohamba okuti: “Omokonda yatyi tuyekela otyimbwa otyo tyankhia+ tyihingane tatekulu ohamba?+ Etei ndyende-ko ndyiketyitete omutwe.”+ 10 Mahi ohamba aimupopila okuti: “Oityi onwe munthyanda vana va Seluya?+ Muyekei anthyingane,+ mokonda Siovaa wemupopila okuti:+ ‘Kahingane Ndaviti!’ Olie mati: ‘Omokonda yatyi ulingila ngootyo?’” 11 Ndaviti apopila Ambisai novaundapi vae aveho okuti: “Ine omona wange mwene, mwene watunda mohonde yange,* woovola okumphola omwenyo,*+ opo pahe womuhoko wa Mbesamii!+ Muyekei anthyingane, mokonda o Siovaa wemutuma-tyo. 12 Hamwe Siovaa mamono ononkhumbi mbange,+ Siovaa mandyambe, kamanthyingana vali ngeetyi ndyikahi nokulingwa hono.”+ 13 Ndaviti novaundapi vae avatwalako okwenda netapalo, Simei otyo evelandula okutyama nomphunda, evehingana otyo eveyumba nomamanya,+ evelingila ombuma onyingi.
14 Konyima ohamba novanthu aveho ankho ina-vo avehiki oku venda tyaponwa, avapululukwa-po.
15 Pononthiki opo, Ambisalau nova Isilayeli aveho avehiki mo Selusalei, Aitofeli+ nae ankho opo eli. 16 Etyi Husai+ omu Alikita,+ epanga lya* Ndaviti apita ku Ambisalau, Husai apopila Ambisalau okuti: “Kala nomwenyo omule hamba!+ Kala nomwenyo omule hamba!” 17 Ambisalau apulu Husai okuti: “Otyo ulekesa ngootyo okuti una olwembia olunene nepanga liove? Omokonda yatyi wahailile nepanga liove?” 18 Husai akumbulula Ambisalau okuti: “Au, ame nahula ku una waholovonwa na Siovaa, waholovonwa novanthu ava, novalume aveho ova Isilayeli. Ame oe mandyikala nae. 19 Ndyikupopila vali okuti: Olie vali ndyina okuundapela? Have omona wae ndyiundapela? Ngeetyi naundapela tate yove, otyo mandyiundapela ove tatekulu.”+
20 Ambisalau pahe apopila Aitofeli okuti: “Mphakele-mo utale.*+ Oityi tuna okulinga?” 21 Aitofeli apopila Ambisalau okuti: “Lala nononthawa mba tate yove,+ vana vesala meumbo*+ opo veliyunge. Tyina ova Isilayeli aveho vametyinoñgonoka okuti tate yove ukuyele,* vana vahula ku ove mavakala tyapama.” 22 Ngootyo, avatungila Ambisalau ekaka kombanda yondywo,+ Ambisalau alala nononthawa mba tate yae,+ otyo ova Isilayeli aveho vatala.+
23 Pononthiki opo, etyi tyipopia Aitofeli+ ankho tyitalwa ngatyina ondaka yatunda ku Huku yotyotyili. Otyo Ndaviti na Ambisalau ankho vatala ngootyo etyi tyipopia Aitofeli.