Omukanda Wa Vali wa Samuwele
10 Konyima ohamba yova Amoo+ ainyimi, omona wae Hanuu apingi kouhamba.+ 2 Pahe Ndaviti ati: “Mandyikala nolwembia olunene na Hanuu omona wa Naasi, ngeetyi tate yae akalele nolwembia olunene na ame.” Ngootyo Ndaviti atumu ovaundapi vae vekemutale mokonda wasiwapo na he. Mahi etyi ovaundapi va Ndaviti vehika kotyilongo tyova Amoo, 3 ovatumini vova Amoo avapopila Hanuu tatekulu yavo okuti: “Ove usoka okuti Ndaviti watuma tupu ovaundapi veye okukutala omokonda uhole ho? Ndaviti watuma ovaundapi vae opo vanoñgonoke otyilongo, veya okulava otyilongo opo vetyihanye-po.” 4 Pahe Hanuu akwate ovaundapi va Ndaviti, evekulula onondyeli nthele imwe,+ atete omivalo viavo pokati atee monontho; eveyeke avaende. 5 Ndaviti wati vala popilwee, atumu ovalume vamwe vakahonyene navo, mokonda etyi valingwa tyikundisa unene. Ohamba aivepopila okuti: “Nkhele kalei mo Selikoo,+ tyina onondyeli mbenyi mbamekulu amuya nawa.”
6 Mokweenda kwononthiki, ova Amoo avanoñgonoka okuti etyi valinga tyanumanesa* Ndaviti. Pahe, ova Amoo avatumu ovatumwa-ndaka vaovole omafwalali 20.000 okwendela pohi ova Silia, oko Mbete-Leombe+ no oko Sombaa;+ tupu avakongo ohamba yo ko Maakaa+ nomaswalali ayo 1.000 novalume 12.000 vo Isitombe.*+ 7 Etyi Ndaviti etyiiva, atumu Sowambe nomaswalali aeho, kumwe novita viae viokwapama vali.+ 8 Ova Amoo avaende avelionganeka kombundi yepunda-umbo opo valwe, mahi ova Silia voko Sombaa no voko Leombe, kumwe na Isitombe* na Maakaa, avelionganeka tyityavo motyipembe.
9 Tyina Sowambe akati ñgaa, omafwalali amwe onondyale eli monyima yae omakwavo eli komutwe wae, akoyo omaswalali amwe ayumbwa vali onthumbi ova Isilayeli, eveonganeka opo valwise ova Silia.+ 10 Ovalume vokwahupa-po eveavela ondenge yae Ambisai+ ngae uvetumina,* eveonganeka opo vakalwise ova Amoo.+ 11 Sowambe ati: “Ine ova Silia vamphona, endyu unkhwateseko; mahi ine ova Amoo vekupona, ame mandyiya okukukwatesako. 12 Tuna okupama nokukola omutima,+ atulwila ovanthu vetu nomapunda-umbo a Huku yetu, Siovaa malingi etyi tyaviuka komaiho ae.”+
13 Sowambe nomaswalali ae avaende opo vakalwise ova Silia, ova Silia avatili-ko avakahateka.+ 14 Etyi ova Amoo vetyimona okuti ova Silia vatila-ko, navo avatili ku Ambisai avanyingila mepunda-umbo. Konyima yovilwa ovio nova Amoo, Sowambe akondoka mo Selusalei.
15 Etyi ova Silia vetyimona okuti vatila kova Isilayeli, avelionganeka vali.+ 16 Pahe Handandesele+ akongo ova Silia veli motyilongo Tyondongi*+ aveya ku Helaau, ankho utuminwa na Sombake omutumini womafwalali a Handandesele.
17 Etyi Ndaviti etyiiva, liwa-liwa aongiya ova Isilayeli aveho, ayauka ondongi Solondau aende atee ko Helaau. Ova Silia avelionganeka opo velivase na Ndaviti, vemulwise.+ 18 Mahi ova Silia avatili-ko kova Isilayeli. Ndaviti aipaa ovalume 700 vomatemba ovilwa nova Silia 40.000 vokweendela kononkhambe, avange Sombake omutumini womafwalali, apa emuvangela ngapo ankhila.+ 19 Etyi onohamba ambuho, ovaundapi va Handandesele vatila-ko kova Isilayeli liwa-liwa avelifefe kova Isilayeli opo vakale nombembwa ngavo vevetumina.+ Ova Silia avatili owoma okuliwaneka vali nova Amoo.