Omukanda Wa Vali wa Samuwele

18 Ndaviti avalula ovita viae, akoyo ononkhalamutwe mbovityita ekwii, nononkhalamutwe mbotyita.+ 2 Ndaviti ayapula ovanthu ovikundyi vitatu, Sowambe+ akala onkhalamutwe ya tyimwe,* Ambisai,+ omona wa Seluya,+ velilandula na Sowambe akala onkhalamutwe yotyikundyi otyikwavo, Itai,+ omu Ngate akala onkhalamutwe yotyikundyi otyikwavo. Ohamba aipopila omaswalali ayo okuti: “Naame mandyeende noonwe.” 3 Mahi ngwe avati: “Tatekulu sala vala,+ ine tukahateka, kamavesuku-ale noonthwe,* atee umwe ine vamwe pwoonthwe vankhia, kamavesuku-ale noonthwe, mokonda tatekulu upona pwoonthwe tuna 10.000.+ Hahe tatekulu usale mepunda-umbo, otumu vala etyi twesukisa.” 4 Ohamba aivepopila okuti: “Etyi mwasoka okuti tyaviuka otyo mandyilingi.” Ohamba aikala ponthele yombundi yepunda-umbo, putyina ovita viokuna otyita no viokuna ovityita ekwii valupuka. 5 Ohamba aipopila Sowambe na Ambisai na Itai aiti: “Omona Ambisalau mwehemulingei natyike mokonda yange.”+ Ovalume aveho veli-po avetyiivi etyi ohamba yapopila ononkhalamutwe ambuho yapopia Ambisalau.

6 Ovakwa-vita vakalwisa ova Isilayeli, avalwila motyiteta tyoko Efalaii.+ 7 Ovakwa-vita ova Isilayeli+ avatili-ko kovita vya Ndaviti,+ monthiki oyo amunkhi ovakwa-vita ovanyingi, vena 20.000. 8 Ovilwa aviliyandyana potyilongo atyiho, monthiki oyo otyiteta atyiipaa vali ovalume ovanyingi tyipona vana vaipawa nomutunga.

9 Ambisalau avasiwa nomafwalali a Ndaviti. Ankho wavelama komula, omula aikwate mombwelo yonompha mbomuti umwe omunene, omutwe wa Ambisalau auhakama pokati konompha ayendyelela,* omula oku avelama ayeende. 10 Pahe umwe emumono apopila Sowambe okuti:+ “Namona Ambisalau wayendyelela momuti umwe omunene.” 11 Sowambe apopila omulume oo ati: “Ine wemumona kwemwiipaelele-tyi? Ame ñgeno nahambukwa andyikwaavela onopalata 10 nepoha.” 12 Mahi omulume oo apopila Sowambe okuti: “Atee umwe okumpha* onopalata 1.000 ame ñgeno hetavelele okuyama nokuvoko kwange komona wohamba, mokonda neiva etyi ohamba yemupopila noove na Ambisai, na Itai yati: ‘Elowei, nawike una okulinga omapita Ambisalau.’+ 13 Ine ame naanyene ondaka yohamba andyimupolo omwenyo,* ñgeno yetyiiva noove vala ohetyivili okundyamena.” 14 Sowambe ati: “Himapesela vali omuvo okupopia noove!” Akwate ovivela vitatu viatwa ngeonga* atomo Ambisalau pomutima avikatumbuka ngwe nkhele ankho una omwenyo wayendyelela ponompha mbomuti. 15 Ovakwatesiko 10 va Sowambe vokutyinda-po ovihongati viae aveya avavange Ambisalau atee vemwipaa.+ 16 Konyima Sowambe ahiki onkhwino, ovalume vekahi nokutaata ova Isilayeli avatalama; ngootyo Sowambe evetyilika. 17 Avakwate Ambisalau avekemuyumba metoto limwe enene motyiteta, avayumbu kombanda yae omamanya omanyingi.+ Ova Isilayeli aveho avakahateka no komaumbo avo.

18 Etyi Ambisalau nkhele ena omwenyo welitungilile otyimato tyomunkhima Melola Liohamba,*+ ankho uti: “Ndyitupu omona oku makuhinangaililwa enyina liange.”+ Ambisalau tupu aluku enyina otyimato otyo, atee hono tyiihanwa okuti Otyimato tya Ambisalau.

19 Aimaasi+ omona wa Sandoke, ati: “Eta ndyiende ndyikapopile ohamba otyipuka etyi, mokonda Siovaa walinga ouviuki etyi emuyovola pomavoko onondyale mbayo.”+ 20 Mahi Sowambe ati: “Ai ove kupondola okukapopia otyipuka otyo hono. Haa ukemupopila onthiki onkhwavo, hono uhaye-ko, mokonda wanyima omona wae.”+ 21 Pahe Sowambe apopila omu Kuse okuti:+ “Enda kapopile ohamba etyi wamona.” Omu Kuse elipetamena ku Sowambe, atundupo aende nokuhateka. 22 Aimaasi omona wa Sandoke aiti vali ku Sowambe okuti: “Hityii etyi ndyipondola okulingwa, mahi mbambavo eta ndyilandule omu Kuse.” Mahi Sowambe emupulu okuti: “Ukalinga-tyi vali mona wange pehena vali etyi ukapopia?” 23 Mahi Aimaasi atwalako okwiita ati: “Hityii etyi mandyilingwa mahi eta vala ndyiende.” Sowambe emupopila okuti: “Enda!” Aimaasi aende nokuhateka okupolesa-po ondyila yokwenda no kotyilongo tyo Solondau,* alambela ponthele omu Kuse.

24 Ndaviti upumphi pokati konombundi mbepunda-umbo,+ ou omuyungi alondo keulu liotyimato tyombundi.+ Omuyungi alavelela nomaiho amono omulume ukahi nokuhateka. 25 Pahe alaveleya opo alondole ohamba. Ohamba aipopi okuti: “Ine uli nokuya aike una etyi eya okupopia.” Putyina omulume oo ekahi nokuya, 26 omuyungi amono vali omulume omukwavo ukahi nokuhateka. Alaveleya wokombundi ati: “Tala! Kuna vali omulume omukwavo uya nokuhateka!” Ohamba aiti: “Nae ngootyo una etyi eya okupopia.” 27 Omuyungi ati: “Otyipuka omulume wo tete ekahi nokuhateka o Aimaasi,+ omona wa Sandoke.” Ohamba aiti: “Oo omulume ukahi nawa, mapopi otyipuka otyiwa.” 28 Aimaasi alaveleya ohamba ati: “Ombembwa vala!” Aikila konongolo elipetamena pohi kohamba ati: “Siovaa Huku yove, wokwapakula ovalume vokwatyitukila-po* tatekulu yange ohamba, ahilivikwe!”+

29 Mahi, ohamba aimupulu okuti: “Omukwendye Ambisalau uli nawa?” Aimaasi akumbulula okuti: “Namona ovanthu vahangayala etyi Sowambe etutuma na nomuundapi wohamba,* mahi hityii oityi vahangayalela.”+ 30 Ohamba aimupopila okuti: “Nkhele kala ponthele apa, kevelela.” Ngootyo akala ponthele nokukevelela.

31 Etyi omu Kuse ehika+ apopi okuti: “Naetela tatekulu yange ohamba onondaka ombu: Hono Siovaa walinga ouviuki etyi ekuyovola pomavoko ovanthu aveho vokwatyitukila-po tatekulu.”+ 32 Ohamba aipulu omu Kuse okuti: “Omukwendye Ambisalau uli nawa?” Omu Kuse akumbulula okuti: “Onondyale ambuho mba tatekulu yange, ohamba, novanthu vokwatyitukila-po tatekulu opo vekulinge omapita vankhie ngomukwendye Ambisalau!”+

33 Ohamba aihulilwa ailondo keulu liondywo kotyimato tyombundi. Otyo yeenda nokulila okuti: “Mona wange Ambisalau, mona wange, mona wange Ambisalau! Ine ame ya nankhile-ko ñgeno hahe, Ambisalau, mona wange, mona wange!”+