Omukanda wa Vali Onohamba
19 Etyi ohamba Isekiya etyiiva, atandula ovikutu viae, avale onosaku mbonongosa anyingila mondywo ya Siovaa.+ 2 Atumu Eliyakii onkhalamutwe yeumbo* na Sembina omuhoneki, novanakwa ovakulu, vavala onosaku avaende komuuli Isaiya+ omona wa Amosi. 3 Avemupopila okuti: “Isekiya wati: ‘Onthiki ei, onthiki yononkhumbi, onthiki yokukwelwa,* onthiki yokukunda. Mokonda ovana vahanda okuya,* mahi petupu ononkhono mbokuvekutula.+ 4 Hamwe Siovaa Huku yove wiiva-vo onondaka mba Lambisakee una watumwa na tatekulu yae ohamba yo Asilia, opo akwele Huku wokuna omwenyo,+ mokonda Siovaa Huku yove weiva onondaka mbae, memukoyesa. Pahe likwambela-vo,+ oitila-ko ava nkhele vahupa-po.’”
5 Ovaundapi vohamba Isekiya avaende ku Isaiya,+ 6 Isaiya evepopila okuti: “Kapopilei tatekulu yenyi okuti: ‘Etyi, otyo tyapopia Siovaa, wati: “Wahatile owoma+ onondaka weiva, onondaka mbokumphenya+ mbapopiwa novakwatesiko vohamba yo Asilia. 7 Mokonda mandyipake momutwe wae olusoke lumwe* eivi ondaka, akondoka kotyilongo tyae. Ame mandyikemutokesila pohi nomutunga motyilongo tyae+ mwene.”’”
8 Etyi Lambisakee eiva okuti ohamba yo Asilia ko Lakisi+ yatunda-ko, akondoka no kuyo eivasi ikahi nokulwisa o Limbina.+ 9 Pahe avapopila ohamba okuti Tilaka ohamba yo Etiopia, “Weya okukulwisa tatekulu.” Mokonda yotyo atumu vali ovatumwa-ndaka+ ku Isekiya vekemupopile okuti: 10 “Etyi, otyo muna okupopila Isekiya Ohamba yo Sundaa okuti: ‘Wahayeke Huku yove, ou ove wayumba onthumbi ekukembe okuti: “O Selusalei kamaipakulwa peke liohamba yo Asilia.”+ 11 Tala! Ove weiva etyi onohamba mbo Asilia mbalinga ovilongo aviho, mbevihanyauna-ko.+ Ove wasoka okuti pahe ove mohupu? 12 Okuti ono huku mbovilongo viovanthu vokwahanyaunwa-po nonombwale mbetu, mbeveamenene? O Ngosaa no Halaa+ no Lesefe, onomphangu ombo mbuli-pi, ovanthu vo ko Endene ankho vakala ko Teli-Asale veli-pi? 13 Ohamba yo Hamate nohamba yo Alupande nonohamba mbomapunda-umbo o Sefalavaii no Hena no Iva+ mbuli-pi?’”
14 Isekiya atambula omikanda pomavoko ovatumwa-ndaka ovo, evitange. Konyima Isekiya alondo kondywo ya Siovaa, evipake* kotyipala tya Siovaa.+ 15 Isekiya ahimbika okulikwambela+ ku Siovaa ati: “Siovaa womambamba ovita, Huku yova Isilayeli, upumphi kotyipundi tyoutumini keulu lyo no kelumbii.*+ Momauhamba aeho eli kombanda yohi,+ ove, ove vala Huku yotyotyili. Ove watunga eulu nohi. 16 Yendeleka-vo okutwi kwove Siovaa, otehelela!+ Ikula-vo omaiho ove+ Siovaa, otale! Tehelela-vo onondaka ambuho Senakelimbe atuma mbokukukwela, Huku una omwenyo. 17 Otyili Siovaa, onohamba mbo Asilia tyili mbahanyauna-ko ovanthu vovilongo novilongo viavo.+ 18 Ono huku mbavo vembuyumba motupia, mokonda ankho ha no huku-ko-ale,+ mbalingwa vala nomavoko ovanthu,+ omiti vala nomamanya. Otyo vetyivilila okumbuhanya-ko. 19 Mahi pahe, Siovaa Huku yetu, tuyovole-vo peke lya Senakelimbe, opo omauhamba aeho kombanda yohi anoñgonoke okuti ove Siovaa,+ ove vala awike Huku yotyotyili.”
20 Pahe Isaiya omona wa Amosi atumu ondaka ku Isekiya ati: “Etyi, otyo tyapopia Siovaa Huku yova Isilayeli wati: ‘Elikwambelo+ walinga kwaame wapopia ohamba yo Asilia+ Senakelimbe neliiva. 21 Ei ondaka Siovaa apopia konthele yae:
“Omona omukainthu wa Siyau wekutoya, ekukwele.
Omona omukainthu wa Selusalei wekutala, apuku komutwe.
22 Olie ove wakwela, olie ove wapenya?+
Olie wakatulila ondaka?+
Olie wapanena omaiho okulipaka-ko?
Ukahi nokulwisa Omusukuki wo Isilayeli!+
23 Etyi watuma ovatumwa-ndaka+ vove, ove watesa onkhango Siovaa+ etyi wati:
‘Nononkhambe mbange mbomatemba ovilwa
Mandyilondo keulu lionomphunda,
Kononthele mbo kokule-kule mbo Limbanu.
Mandyikateta omisendulu viae viokwatandavela nomingalaviya viae viokukahi vali nawa.
Mandyikanyingila momaleva ae okokule-kule nomoviteta viae viokwapata.
24 Mandyikaheya ononyombo, andyikanwa omaande o kotyilongo tyehetyange.
Mandyikakukutisa omeva* o Isitu nouwa wonomphai mbange.’
25 Ove kwetyiivile? Otyo tyasokwa-le* kohale.+
Okomanima okohale-ale ame napanga* okutyilinga.+
Pahe mandyityilingi.+
Ove mokapilulula omapunda-umbo okwapama aakala ononthunthu* mbomatunthu.+
26 Ovanthu vokukala-mo vetupu etyi matyiveyakulila.
Mavakalimbililwa atyivekundisa.
Mavakakala tyihevili natyike ngovifo viomepia neholi liatalala,+
Ngeholi liamena keulu liotyitunge, alikukutiswa nomphepo itunda koutundilo.
27 Mahi, ame ndyityii nawa tyina ove upumphama na tyina ukatuka, na tyina unyingila,+
Na tyina wanumana na ame,+
28 Mokonda onyengo una naame,+ nonondyaya mbove, viehika momakutwi ange.+
Mandyipake ohako yange meyulu liove, notyitomo*+ tyange momulungu wove,
Andyikukondola nondyila weya nayo.”+
29 “‘Enyingilikilo malikulekesa-tyo* olieli: Enima eli, onwe mamuli evi vielimenena.* Menima lya vali, mamukalia etyi tyatunda konoñgima mbokwatuka kweevi vielimenena.+ Mahi menima lya tatu, mamukakuna ombuto amuteye, amukatwika momapia omiti vionouva amukalia ovinyango viatyo.+ 30 Vomeumbo lya Sundaa vana vokwahupa-po, vana vokwesala-po,+ mavakayumba omii meheke avakaima ovinyango konompha. 31 Mokonda ko Selusalei makukatunda vokwesala-po, komphunda Siyau akukatunda vana vokwahupa. Ombili ya Siovaa womambamba ovita maiketyilinga.+
32 “‘Etyi, otyo tyapopia Siovaa apopia ohamba yo Asilia,+ wati:
“Mepunda-umbo omu,+ kamanyingila-mo,
Nii kamayahe-mo nohevo,
Kamelikwatela ondyakulilo,
Nii kamekelitungila onondondelo mbokulilwisa.”’+
33 Ondyila eya nayo oyo makakondoka nayo.
Kamakanyingila mepunda-umbo omu,” o Siovaa wetyipopia.
34 “Ame mandyikayakulila epunda-umbo eli,+ andyiliyovola mokonda yenyina liange,+
Na Ndaviti+ omuundapi wange.”’”
35 Motyinthiki tyatyo otyo, oandyu ya Siovaa aiya aiipaa ovalume vomonthanda yova Asilia+ 185.000. Tyina ovanthu vapinduka-po komuhuka avavasi ovanthu aveho omandindi.+ 36 Senakelimbe ohamba yo Asilia atundu-po akondoka ko Ninive,+ ngako akakala.+ 37 Nthiki imwe etyi ankho ekahi nokulipetamena-po mondywo* ya Nisiloke otyika-huku tyae, ovana vae mwene Andalameleke na Salesele, avemwipaa nomutunga+ avatilila kotyilongo tyo Alalate.+ Omona wae Esale-Handomi,+ emupingi kouhamba.