Isekiyele

16 Ondaka ya Siovaa aindyendela vali aiti: 2 “Mona womulume, popila o Selusalei ovipuka vitoyesa ilinga.+ 3 Ipopila uti: ‘Etyi otyo Tatekulu Ohamba Onene Siovaa apopila o Selusalei, wati: “Onthuko yove, oku watyitilwa, otyilongo tyova Kanaa. Ho wali omu Amoleu,+ nyoko watukile mu Hete.+ 4 Ove pokutyitwa, monthiki wakutulwa, kwatetelwe ondyemba,* kwakohelwe nomaande usukuke, kwawavekelwe omongwa nii kwawingililwe povinyanga. 5 Nawike wekulingile onkhenda ehiki-vo kokukulingila tyike povipuka ovio. Nawike wekweetehilile-mo okankhenda. Ove wayumbilwehi vala motyipembe, ove wayalwa-le* monthiki watyitwa.

6 “‘“Ame pokulamba vala ondyila, nkhati ñgaa uli nokupinaunuka mohonde yove mwene, ulangi mohonde yove, ame andyiti: ‘Omwenyo oo!’ Yoo, ame andyipopila umwe ove ulangi mohonde yove andyiti: ‘Omwenyo oo!’ 7 Ame nekutyitula onthumbo yovanthu, ove walinga ngovikuna viamena mepia, okulu, olingi omunene, pahe ovale ovipuka viomahiwe oviwa viatyo. Otumbu omavele, onohuki mbove ambukulu, mahi nkhele otyo umuhoyo vala wahavalele.”’

8 “‘Ame pokulamba vala ondyila, nkhati ñgaa, pahe wekula umwe, uli meti liokuhandwa. Andyipolo otyikutu tyange,* andyikuvaleka-tyo,+ ohakala vali muhoyo, andyikulingila omphango, andyaane’ wetyipopia o Tatekulu Ohamba Onene Siovaa, ‘olingi umwe wange. 9 Andyipolo vali omeva ankhukoho, andyikusukula mohonde yove, andyikuseketa omulela.+ 10 Pahe, andyikuvaleka omivalo viatungailwa ovipapa oviwa, nononkhaku onongwa mbombandwa* yokwakola,* andyikuwingila momuvalo omungonga, andyikuvaleka ovikutu vilanda onombongo ononyingi. 11 Ankhuvaleka ovipuka oviwa ohiwa, andyikuvaleka ovinunga komavoko, andyikuvaleka okalienge pomunyino. 12 Andyikupake onombilingu keyulu, no komakutwi, andyikuvaleka ohala ongwa komutwe. 13 Ove viove viomahiwe wavalaile, oolu, opalata, ovikutu ovingonga, omivalo viatungilwa oupuka ouwa, omivalo vilanda onombongo ononyingi. Okulia kwove ofinde yanyetuka nawa, nowiki, nomulela, ove wali omuwa omulenga,+ himaa ulinga umwe ohamba.’”*

14 “‘Omunkhima wove auhimbika* okuhahana movanthu vovilongo aviho+ mokonda youwa wove, wali omuwa unene mokonda nekupaka ouwa wange,’+ wetyipopia o Tatekulu Ohamba Onene Siovaa.”

15 “‘Mahi ove waya mokupamena mouwa wove,+ omunkhima wove wekupa okulinga ekunga.+ Aveho valamba ondyila ove kavekulambe,+ walinga umwe ekunga enene, ouwa wove walinga wavo. 16 Ove wapola omivalo viove oundaisa navio onomphangu mbokwaya peulu, apa ulingila ovipengi viove+ — ovipuka viehe-viokulingwa-le, kupondola-le okulinga ovipuka ngo ovio. 17 Ove wapola umwe novipuka viomahiwe oviwa* vioolu viopalata nekupele, otungu navio ovilolo ovilume, pahe olala navio.+ 18 Wapola omivalo viove viokwatungilwa ovipapa oviwa, ovihiki,* ovipe omulela wange, nombao yange.+ 19 Ombolo nekupele — yalingwa nohinde yanyetuka nawa, nomulela, nowiki, ombolo nekupele ilinge yove yokulia — nayo weipakula kuvio ilinge omuniko omuwa.*+ Otyo umwe otyo walinga,’ o Tatekulu Ohamba Onene Siovaa wetyipopia.”

20 “‘Ove wapola ovana vove, novakwendye novakainthu wanthyitila,+ ovelingi ovilikutila kovilolo ovio, vanyinwe-po+ — ovipengi ulinga mokwalinga ekunga, kaviatuukile-ale? 21 Ove waipaa ovana vange, wevepakula, wevelinga ovilikutila, ovepake motupia.+ 22 Pokulinga ovipuka ovio aviho vitoyesa otyo ulinga ovipengi, ove kwahinangelele pouna wove, pononthiki wali muhoyo, wahavalele, otyo usaninina mohonde yove. 23 Kombanda yokwalinga-linga ovipengi ovio, ngongo yove, ngongo yove,’+ o Tatekulu Ohamba Onene Siovaa wetyipopia. 24 ‘Ove welitungila otyipunda, olilingila omphangu yaya peulu ponopalasa ambuho. 25 Ove welitungila onomphangu mbaya peulu ponomphangu mbankhimana momatapalo aeho. Ouwa wove weutyitula otyipuka tyitoyesa, etyi welipakula kovanthu* aveho valamba ondyila,+ oyawisa kovipengi viove moukunga wove.+ 26 Ove walinga ekunga ulala novana vo Isitu ovakwendye,+ ava mwelitungaila navo ovihayo,* ove ovipuka ovinyingi ulinga moukunga wove undeva. 27 Pahe, mankhukatulila okuvoko kwange, andyitete kokulia kwove,+ mandyikupakula kovakai vekuyele,*+ ovana vova Filisitiya, vahanunuka kombanda yovituwa viove vikundisa.+

28 “‘Mokonda ove watala kwakovelwe, pahe moukunga wove welipa vali ovana vo Asilia ovakwendye,+ olingi oukunga wove mahi natyo vala atyehekutuuka. 29 Oukunga wove weulinga vali omunene wekehika kotyilongo tyovakwa-niñgoso,* no kova Kalindeya,+ mahi natyo vala ohakowa-le. 30 Watae omutima wove* wali omuvei,’* o Tatekulu Ohamba Onene Siovaa wetyipopia ‘etyi wali nokulinga ovipuka ovio aviho, ovipuka walinga umwe lwekunga liahakundu!’+ 31 Mahi etyi ove welitungila ovipunda ponofika mbankhimana* mbomatapalo aeho, olilingila onomphangu mbaya peulu ponopalasa ambuho, kuti-ale ukunga, mokonda kutavela okwoondwa. 32 Ove wanepwa mahi u wonombalehi utambula ava wehei, ohahulu vala komulume wove mwene!+ 33 Ovanthu ovo vapa ovipuka omakunga,+ mahi ove, ove woonda aveho vekuhanda vesuka noove.+ Ove ulipumapo veye vatunde konohika ambuho aveya no kwoove, ulinge viove vioukunga.+ 34 Ove welikalela nomakunga vakwenyi. Kutupu nawike moukunga ulipaka-mo ngoove! Ove ufeta vakwenyi, ngwe kavekufete. Etyi ulinga tyelikalela unene.’

35 “Ove kunga ove,+ tehelela ondaka ya Siovaa. 36 Etyi otyo tyapopia Tatekulu Ohamba Onene Siovaa, wati: ‘Mokonda ovipepe viove vialinga vali ovinene, ulekesa umwe omapenge ove pokulipaka moukunga naava vekuhanda, no mokulipaka novilolo aviho vitoyesa, ovivi,*+ evi uti umwe nohonde yovana vove wevipakulila-yo,+ 37 ame pahe, mandyikongolola aveho vokukuhanda, ava ove uhambukiswa, novanthu aveho, naava uhole naava uyele. Mandyivekongolola konohika ambuho veye vekupilukile-po, andyivelekesa omapenge ove, avekutale uli umwe muhoyo.+

38 “‘Mandyikulingi etyi tyilingwa ovakai vokuna onombalehi,+ no vokumomesa ohonde,+ ohonde yove maikamomeswa nonyengo onene, nonkhwelume.+ 39 Mandyikekupakula peke liavo, mavakahanya-po ovipunda viove, mavateya-teya-po onomphangu mbove mbokwaya peulu;+ mavekekuhulula omatati ove,+ mavekekupola ovipuka viove viomahiwe,*+ avekusi muhoyo, osala poluhandya. 40 Mavekekweetela ovanthu ovanyingi,+ avekekutyopa-tyopa nomamanya,+ avekwipaa nomitunga viavo.+ 41 Mavakayoka-po ovitunge viove,+ omphela yove avekeipopila povakai ovanyingi otyo vekutala; tyove tyoukunga mankhetyimana-ko,+ mankhetyimana-ko tyove tyokufeta ovanthu. 42 Onyengo yange maikakululukila mwoove,+ onyengo yange onene, aikahondovoka kwoove;+ mandyikatula omutima, anahakanumana vali.’

43 “‘Mokonda ove kwahinangelele ononthiki mbo pouna wove,+ ove welipaka movipuka ovio aviho vinumanesa, mandyikutyepesako mandyitokehila komutwe wove etyi tyata monondyila mbove,’ o Tatekulu Ohamba Onene Siovaa wetyipopia, ‘ove kumapangela motyituwa otyo tyikundisa, mokulinga ovipuka ovio vitoyesa.

44 “‘Tala! Aveho vokupopia omihe, mavekekupopila omuhe ou: “Nomona na ina tyike vala!”+ 45 Ove umona wa nyoko umwe, nyoko watomba omulume wae, novana vae. Ove wapola umwe tya ava mulikwai navo ovahikwena, navo vatomba ovalume vavo novana vavo. Mee yenyi watukile mu Hete, tate yenyi wali omu Amoleu.’”+

46 “‘Omukulu wove o Samaliya,+ ukala novana vae ovahikwena*+ kokulio* kwoove. Ondenge yove o Sondoma,+ ukala novana vae ovahikwena kokumbili* kwoove.+ 47 Ove hakuti walandula vala monondyila mbavo, hakuti wapola vala tyovituwa viavo vitoyesa, mahi ove kwasetele-ale wevelamba umwe, ovivi viove vievila-po.+ 48 Ndyitukaila umwe omwenyo wange,’ o Tatekulu Ohamba Onene Siovaa wetyipopia, ‘Sondoma ondenge yove, nae novana vae ovakainthu, nii vala kavalingile evi mulinga, noove novana vove ovakainthu. 49 Tala! Otyipuka tyapenga ondenge yove Sondoma alinga otyetyi: Ondenge yove, novana vae ovakainthu+ vali ovanthu vokulipaka-ko,+ vali nokulia okunyingi,+ notyiho kavali-ale natyo;+ mahi kavayakele-ale ou waetesa onkhenda, ou wahepa.+ 50 Vali vala ovanthu vokulipaka-ko,+ avalingila umwe ovipuka vitoyesa momaiho ange,+ etyi netyitala andyiti hahe ndyivehanye-ko.+

51 “‘Ononkhali mbalinga-linga Samaliya+ ko mbove kambupolo-ko-ale nii vala katutu. Evi vitoyesa walinga-linga vialamba-po-ale unene evi ngwe valingaile, soka ava mulikwai navo valinga vali onondingaviwa kombanda yovipuka aviho vitoyesa ulinga.+ 52 Pahe mwene tutumba nolukundo lwove, mokonda waamenene* ovituwa ovivi vya ava mulikwai navo. Kombanda yonkhali yove, kombanda yovipuka vitoyesa vali ove ulinga vialamba pu evi valinga-linga, pahe ngwe onondingaviwa vali kwoove. Pahe mokundu, mwene tutumba nolukundo lwove, mokonda ava mulilandula navo pahe valinga vali onondingaviwa kombanda yeevi ulinga.’

53 “‘Mandyikongolola ononkhwatwa mbavo, ononkhwatwa mba Sondoma no mbovana vae ovakainthu, nononkhwatwa mba Samaliya no mbovana vae ovakainthu; mandyikongololela kumwe nononkhwatwa mbove,+ 54 opo ututumbe nolukundo lwove; ove mokakunda mokonda yetyi walinga tyokweveungumanesa. 55 Ondenge yove Sondoma, nae novana vae ovakainthu, mavakakala ngeetyi vali kohale, ou omukulu wove Samaliya, nae novana vae ovakainthu, navo mavakakala ngeetyi vali kohale, ove noove novana vove ovakainthu noonwe mamukakala ngeetyi mwali kohale.+ 56 Sondoma ondenge yove katele-mo-ale mokutumbulwa noove monthiki ove welipakele-ko, 57 pweetyi ovivi viove vieheneye koluhandya.+ Pahe ovana va Silia ovakainthu, naava velitungaila navo veli nokukukwela, ava ovana vova Filisitiya ovakainthu,+ aveho vokweliseta noove, vekutomba. 58 Ove mokondyo motyepeko kweevi vitunda movituwa viove vikundisa, movipuka ulinga vitoyesa,’ o Siovaa wetyipopia.”

59 “Etyi otyo tyapopia Tatekulu Ohamba Onene Siovaa, wati: ‘Ame pahe mandyikulingi umwe etyi ove walinga,+ mokonda ove watomba etyi naanene, wateya omphango yange.+ 60 Mahi ame mandyikahinangela omphango nekulingilile pononthiki ove nkhele umona, mankhekulingila omphango maikakala-kala-ko apeho.+ 61 Ove mokahinangela ovitwa viove, okakunda+ pokuyakula ava mulikwai navo ovakulu vali kwoove novana vali kwoove; mandyikekupa-vo avakalinga ovana vove ovakainthu, mahi himekekupela-vo omphango walingilwa.’

62 “‘Mwene ame mandyipumphika omphango nekulingila; ove motyikolo umwe okuti ame, ame Siovaa. 63 Opo pahe noove mokahinangela, nokwiikula vala omulungu matyikekukundisa kombanda yolukundo una-lo,+ tyina namekulingila etyi tyipata ononkhali mbove, anehesuku neevi walinga-linga,’+ o Tatekulu Ohamba Onene Siovaa wetyipopia.”