Omukanda wo Tete Onohamba
21 Akukala otyitateka tyimwe tyepia lya Nambote liomiti vionouva, Nambote omu Sesiliyeli. Epia olio, ankho likala ko Sesiliyeli,+ ponthele yombala ya Akambe, ohamba yo Samaliya. 2 Akambe apopila Nambote okuti: “Mphe-vo epia liove ndyilime-mo, mokonda likala ponthele peumbo liange. Ame mandyikupe epia ekwavo likahi vali nawa. Mahi ine wahanda ndyipondola okukwavela onombongo mbutuukaa mulio.” 3 Mahi Nambote apopila Akambe okuti: “Kamatyitavela, hipondola okukwavela epia napiñgana kovakwaukulu vange,+ mokonda Siovaa wetyiilika.” 4 Akambe anyingila meumbo liae tyeihamenwa, ankho wasoya unene mokonda Nambote omu Sesiliyeli wemupopila okuti: “Hipondola okukwavela epia napiñgana kovakwaukulu vange.” Alangala-po koula wae apilukila moluhinyi, ehetavela okulia.
5 Omukai wae Sesambele+ akapopia nae emupulu okuti: “Omokonda yatyi ove wanumanena* ñgaa, ohetavela okulia?” 6 Emukumbulula okuti: “Omokonda napopila Nambote omu Sesiliyeli okuti: ‘Ndandese epia liove. Ine kwahandele okulilandesa, ame ndyipondola okukwavela epia ekwavo.’ Mahi, ngwe wati: ‘Ame hipondola okukupa epia liange.’” 7 Omukai wae Sesambele, emupulu okuti: “Ove have-ko ohamba yo Isilayeli? Pinduka-po ulie-po katutu, tula omutima hambukwa. Ame mandyikwavela epia lya Nambote, omu Sesiliyeli.”+ 8 Ahoneka omikanda menyina lya Akambe evipake otyilimbo,+ evitumu kovakulu+ no komanene-atyo ankho akala mepunda-umbo lya Nambote. 9 Momikanda ovio ahoneka-mo okuti: “Popiei okuti matukala onthiki tyihali, Nambote mupumphikei pokati kovanthu. 10 Ovolei ovalume omakongombanda, navo amuvepumphika pwe avemutendeleya+ okuti: ‘Ove upopia omapita Huku nohamba!’+ Konyima mutwalei kondye yepunda-umbo amumutyopa-tyopa nomamanya atee ankhia.”+
11 Ovalume vomepunda-umbo lya Nambote, ovakulu nomanene atyo ankho akala mepunda-umbo olio, avalingi umwe ngeetyi tyahonekwa pomikanda Sesambele evetuma. 12 Avakala onthiki tyahali, avapumphika Nambote, pokati kovanthu. 13 Ovalume vevali ovakalavi, aveya avapumphama komutwe wae, avemutendeleyila pokati kovanthu, okuti: “Nambote upopia omapita Huku nohamba!”+ Konyima, avemutwala kondye yepunda-umbo avemutyopa-tyopa nomamanya atee ankhia.+ 14 Avakapopila Sesambele okuti: “Nambote watyopwa-tyopwa nomamanya ankhi.”+
15 Etyi Sesambele etyiiva okuti Nambote watyopwa-tyopwa nomamanya atee ankhia, apopila Akambe okuti: “Enda, kapiñgane epia lya Nambote omu Sesiliyeli,+ kahandele okukulandesa-lio, mahi pahe Nambote utupu vali omwenyo. Wankhia.” 16 Etyi Akambe etyiiva okuti Nambote wankhia, aende liwa-liwa kepia lya Nambote omu Sesiliyeli, ekelipiñgane.
17 Iliya+ omu Tisimbee atambula ondaka yatunda ku Siovaa yati: 18 “Enda liwa-liwa ku Akambe ohamba yo Isilayeli ukahi ko Samaliya.+ Uli mepia lya Nambote, mokonda wahanda okulipiñgana-po. 19 Mupopila okuti: ‘Siovaa wati: “Ove waipaa omunthu+ opolo-po* ofika yae.”’+ Tupu mupopila okuti: ‘Siovaa wati: “Pomphangu ovimbwa viatyapela ohonde ya Nambote opo mavikatyapela ohonde yove.”’”+
20 Akambe apopila Iliya okuti: “Oñgeni ndyale yange,+ wambasa!” Ngwe ati: “Nekuvasa. Huku wati: ‘Mokonda watokola* okulinga etyi tyapenga komaiho a Siovaa,+ 21 noñgonoka okuti mandyikwetela ononkhumbi andyikuhanyeko* andyiipaa mo Isilayeli ovakwendye* aveho+ veumbo lya Akambe, tyilinge vana vahulilwa tyilinge vana vasoya.+ 22 Eumbo liove mandyililingi ngeetyi nalingile eumbo lya Selombowau+ omona wa Nembate, neumbo lya Mbaasa+ omona wa Aiya, mokonda ove wanumanesa unene, walingisisa o Isilayeli onkhali.’ 23 Siovaa apopi vali konthele ya Sesambele okuti: ‘Ovimbwa mavikalila Sesambele mohika yo Sesiliyeli.+ 24 Vomeumbo lya Akambe vana mavankhila mepunda-umbo, ovimbwa mavikevelia-po; vana mavakankhila mohika oviila mavikevelia-po.+ 25 Tyotyili kakunekale nawike waovolele* okulinga ovipuka ovivi komaiho a Siovaa nga Akambe,+ ankho uhindilwa na Sesambele omukai wae.+ 26 Walingile unene etyi tyapenga, okufenda ovilolo vitoyesa,* ngeetyi ankho tyilinga ova Amoleu aveho Siovaa ataatele motyilongo opo ova Isilayeli+ vanyingile-mo.’”
27 Etyi Akambe eiva onondaka ombo atandula ovikutu viae avale ovikutu vionongosa, akala tyahali; ankho ulangala konongosa, ankho weihamenwa unene. 28 Iliya omu Tisimbee atambula ondaka yatunda ku Siovaa yati: 29 “Wetyimona okuti Akambe weliola omutima mokonda yange?+ Mokonda weliola omutima komaiho ange, himaeta ononkhumbi tyina nkhele ena omwenyo. Mahi mandyikaetela ononkhumbi veumbo liae pononthiki mbomona wae.”+