Omukanda wa Vali Onohamba
21 Manasesi+ wakala ohamba etyi ena omanima 12, atumina omanima 55 mo Selusalei.+ Ina ankho utiwa o Hefasimba. 2 Walingile ovivi komaiho a Siovaa, okuhetekela ovituwa ovivi viovanthu vovilongo+ Siovaa ataatele otyo ova Isilayeli+ vatala. 3 Wapindulile-po onomphangu mbukola mbaya peulu tate yae Isekiya ahanyaunine-ko,+ atungila Mbaale omitala viovilikutila, alingi otyipandyi tyikola*+ ngeetyi Akambe ohamba yo Isilayeli alingile.+ Elipetamena komambamba ovita aeho o keulu, eefende.+ 4 Tupu atungu omitala viovilikutila viovika-huku mondywo ya Siovaa,+ muna Siovaa apopile okuti: “Mo Selusalei mandyipake-mo enyina liange.”+ 5 Atungila ovipuka aviho vyo meulu+ omitala viovilikutila momapata evali ondywo ya Siovaa.+ 6 Apake omona wae mwene motupia,* elipake mowanga, ataindya ovatali,*+ aholovona ovitapi, novanthu vokupopia novilulu.+ Walingile unene etyi tyapenga komaiho a Siovaa, opo emunumanese.
7 Otyipandyi tyikola*+ etyilingi otyilolo etyipake mondywo ina Siovaa apopilile Ndaviti nomona wae Salomau okuti: “Mondywo ei nomo Selusalei, omphangu nakoya pokati komihoko aviho vyo Isilayeli, mandyipake-mo enyina liange,+ ngamo likala atee-tee. 8 Himayeke vali onomphai mbova Isilayeli mbuhambe-hambe kokule notyilongo napa onombwale mbavo,+ vena vala okutavela nawa-nawa atyiho nevetuma,+ okutavela Otyitumino atyiho omuundapi wange Mwisesi evetumine vaendele-mo.” 9 Mahi ngwe avehetavela, Manasesi atwalako okuveyapula evelingisisa ovipuka ovivi vali tyipona vina vilingwa novanthu vovilongo Siovaa ahanyeneko otyo ova Isilayeli+ vatala.
10 Siovaa atwalako okupopia mokutuma ovaundapi vae ovauli+ okuti: 11 “Manasesi ohamba yo Sundaa walingile ovipuka ovio aviho vitoyesa. Walingile vali ovivi tyipona ova Amoleu+ aveho vatetekelele kwe,+ alingisisa Sundaa onkhali novilolo viae vitoyesa.* 12 Siovaa Huku yo Isilayeli ati: ‘Ame oo ndyiya, ndyikahi nokwetela o Selusalei+ no Sundaa emone malipatesa+ omakutwi vana maveliivi kovanthu velipopia. 13 Mandyitandavekela ko Selusalei epanda liokuheteka,+ lina nahetekele nalio o Samaliya,+ andyiiheteka nongoi yokuviukisa,* ina nahetekele nayo eumbo lya Akambe.+ Mandyisukula o Selusalei ngeetyi tyikohwa motyilindo, okutyikoha otyipupika-po.+ 14 Mandyiyeke-po vamwe vahupa-po pepingo liange,+ andyivepakula pomavoko onondyale mbavo. Mavakatyindwa-po avakala vonondyale+ mbavo ambuho, 15 mokonda valinga ovipuka ovivi komaiho ange, avatwalako okunumanesa, okuhimbikila monthiki ovakwaukulu vavo vatunda ko Isitu atee hono.’”+
16 Manasesi tupu wanengulile ohonde yovanthu vehena etyi valinga, atee ayulisa o Selusalei aiho.+ Tyihe-otyo vala, alingi onkhali etyi alingisisa ova Sundaa onkhali, avalingi etyi tyapenga komaiho a Siovaa. 17 Ovipuka ovikwavo viehipululo lya Manasesi, ovipuka aviho alinga nononkhali alingile, kaviahonekelwe momukanda womahipululo o pononthiki mbonohamba mbo Sundaa? 18 Ngootyo Manasesi akapululukwa-po novakwaukulu vae, apakwa povifo viononthemo vyo meumbo liae, ovifo viononthemo mba Usa,+ Amoo omona wae emupingi kouhamba.
19 Amoo+ wakala ohamba etyi ena omanima 22, watuminine mo Selusalei+ omanima evali. Ina ankho utiwa o Mesulemete omona wa Halusi wo ko Sotimbaa. 20 Watwaileko okulinga ovivi komaiho a Siovaa ngeetyi tyalingile+ tate yae Manasesi. 21 Weendelele monondyila mba tate yae, afende ovika-huku vitoyesa tate yae afendele+ elipetamena kuvio. 22 Ngootyo, ayeke-po Siovaa Huku yovakwaukulu vae, ahaendela monondyila mba Siovaa.+ 23 Konyima ovaundapi vae avemutyitukila-po, avemwipaela meumbo lyae mwene. 24 Mahi ovanthu aveho votyilongo avaipaa aveho vokwatyitukila-po ohamba Amoo, avapingiya omona wae Sosiya kovipundi.+ 25 Ovipuka ovikwavo viehipululo lya Amoo, ovipuka alingile, kaviahonekelwe momukanda womahipululo o pononthiki mbonohamba mbo Sundaa? 26 Pahe avekemupaka peendo liae, povifo viononthemo mba Usa,+ Sosiya+ omona wae emupingi kouhamba.