Omukanda wo Tete wa Samuwele
23 Pononthiki mbatyo opo avapopila Ndaviti okuti: “Ova Filisitiya vekahi nokulwisa ova Keila,+ otyo vevepunda ovipale viavo.” 2 Ndaviti apulu ku Siovaa okuti:+ “Ndyipondola okwenda-ko ndyikaipae ova Filisitiya?” Siovaa apopila Ndaviti okuti: “Enda kaipae ova Filisitiya, oyovola ova Keila.” 3 Mahi ovita vya Ndaviti avimupopila okuti: “Kuno ko Sundaa twatila-le owoma,+ pahe ine twenda ko Keila tukalwe novita viova Filisitiya, matukakala ñgeni?”+ 4 Ndaviti apulu vali ku Siovaa.+ Siovaa emukumbulula okuti: “Katuka enda ko Keila, mokonda ame mandyipakula ova Filisitiya pomavoko ove.”+ 5 Ndaviti aende ko Keila novita viae, alwisa ova Filisitiya, eveipaa ovanyingi-nyingi atyindi-po ovipako viavo, ahupisa ova Keila.+
6 Etyi Ambiyatale+ omona wa Aimeleke, akahateka no ku Ndaviti ko Keila, ankho watyinda otyikutu tyounakwa. 7 Saulu apopilwa okuti: “Ndaviti ukahi ko Keila.” Saulu ati: “Huku wemupakula kwaame,*+ mokonda wanyingila mepunda-umbo lina omapito nomakumba, kametyivili okwenda-nkholo.” 8 Saulu pahe akongo ovanthu aveho vovilwa, vende ko Keila vakahitikinyine-ko Ndaviti novita viae. 9 Etyi Ndaviti etyiiva okuti Saulu wapanga okumwiipaa, apopila Ambiyatale omunakwa ati: “Eta kuno otyikutu tyounakwa.”+ 10 Ndaviti ati: “Siovaa, Huku yo Isilayeli omuundapi wove weiva okuti Saulu wapanga okuya ko Keila opo ahanye-po epunda-umbo kombanda yange.+ 11 Okuti ovanthu vo mo* Keila mavamphakula pomavoko ae? Okuti Saulu meya umwe ngeetyi omuundapi wove eiva? Siovaa, Huku yo Isilayeli kumbulula-vo mba omuundapi wove.” Siovaa akumbulula ati: “Meya.” 12 Ndaviti apulu vali okuti: “Okuti ova Keila mavamphakula, naame novita viange ku Saulu?” Siovaa akumbulula ati: “Yoo mavekupakula.”
13 Ndaviti wati vala ivee onondaka ombo, nae novita viae 600+ avatundu ko Keila, pahe ankho vati vala avai noku avai noku. Etyi Saulu etyiiva okuti Ndaviti wakahomboka, mo Keila kemo, ehemulandula vali. 14 Ndaviti atwalako okuholama monomphangu mbupwiya okumbuvasa, motyilongo tyo nomphunda tyo komaluhandya o Sife.+ Saulu apeho ankho woovola vala Ndaviti,+ mahi Siovaa ehemuhololola. 15 Pweetyi Ndaviti ankho ekahi momaluhandya o Sife, ko Olesa, Ndaviti eivi okuti* Saulu weya wahanda okumupola omwenyo wae.*
16 Sonataa omona wa Saulu akaovola Ndaviti ko Olesa, emukwatesako okupamena* mu Siovaa.+ 17 Emuti: “Wahatile owoma tate yange Saulu, kamekuvasi. Ove mokala ohamba yo Isilayeli,+ ame mandyikala omunthu mekukwatesako, otyipuka otyo tate nae utyii.”+ 18 Pahe aveho vevali avalingi omphango+ komaiho a Siovaa. Konyima Sonataa aende no keumbo, ou Ndaviti esala ko Olesa.
19 Pahe ovanthu vo ko Sife avaende ko Simbeaa+ avapopila Saulu avati: “Ndaviti waholama ponthele yetu+ monomphangu mbupwiya okumbuvasa ko Olesa,+ kotyipunda tyo Hakilaa,+ tyokukala kombwelo* mo Sesimoo.*+ 20 Ine tatekulu ohamba wahanda* okuya, upondola okuya, onthwe matumupakula pomavoko ove.”+ 21 Saulu ati: “Siovaa emuyambe mokonda mwandinga okankhenda. 22 Endei mba, kaovolei apa eli, amutale ine pena ou wemumona, mokonda vati tyatiwa walunguka unene. 23 Ovolei umwe nawa, amuvasi apa ehole okuholama, tyina mwamepevasi amuya, haa atwende atuho, ngwe ine uli motyilongo otyo, mandyimwovola pokati kovanthu ovanyingi-nyingi vomo* Sundaa atee ndyimuvasa.”
24 Avapiti komutwe, Saulu evelandula avaende no ko Sife,+ Ndaviti novita viae vali moluhandya lwo Maoo,+ ko Alambaa+ kombwelo mo Sesimoo. 25 Saulu aende novita viae ekemwovola.+ Etyi Ndaviti etyipopilwa, wati vala tyiive alauka atee meleva,+ akala moluhandya lyo Maoo. Etyi Saulu etyiiva alandula Ndaviti moluhandya lwo Maoo. 26 Tyina Saulu ehika nthele imwe yomphunda, Ndaviti novita viae veli nthele imwe. Ndaviti wenda vala nkholo liwa-liwa,+ mahi Saulu novita viae avafwene kovo Ndaviti novita viae vevekwate.+ 27 Akuya omutumwa-ndaka apopila Saulu ati: “Endyu liwa-liwa, ova Filisitiya vekahi nokulwisa otyilongo!” 28 Saulu ahalandula vali Ndaviti,+ aende akalwisa ova Filisitiya. Otyo pana palukilwa okuti Eleva Liokuyapula.
29 Pahe Ndaviti atundu-ko akakala monomphangu mbupwiya okumbuvasa ko Ene-Sendi.+