Omukanda Wa Vali wa Samuwele

13 Omona wa Ndaviti Ambisalau wali nomphange yae omuhikwena umwe omuwa utiwa o Tamale,+ ou Aminoo omona omukwavo wa Ndaviti,+ umuhanda. 2 Aminoo wemuhanda umwe unene, atyimulingi ngatyina avela tyokuhanda Tamale omphange yae, ngwe opo keneende na mulume, mahi Aminoo etyi memulingi ketyeete. 3 Aminoo wali nepanga liae utiwa o Sonandambe+ omona wa Simeya,+ Simeya velilandula na Ndaviti. Sonandambe ankho walunguka unene. 4 Sonandambe emupulu okuti: “Omokonda yatyi ove mona wohamba ukalela tyasoya ononthiki ambuho? Omokonda yatyi wehetyimphopila?” Aminoo ati: “Ame ndyihanda unene Tamale, omphange+ ya Ambisalau ondenge yange.” 5 Sonandambe emupopila okuti: “Langala koula olilingisa ngatyina wavela. Tyina ho ameya okukutala, mupopila okuti: ‘Omphange yange Tamale eye-vo amphe okulia. Ine Tamale unthelekela okakulia komuvei* otyo mwene ndyitala, opo mandyili etyi tyatunda peke liae.’”

6 Aminoo alangala-po, elilingisa ngatyina avela; ohamba ayeende aikemutala. Aminoo apopila ohamba okuti: “Omphange yange Tamale eye-vo kuno andingile-po omingome vivali vikahi ngomutima otyo ndyitala, opo ndyilie etyi tyatunda pomavoko ae.” 7 Ndaviti atumu keumbo vakapopile Tamale okuti: “Enda-vo keumbo liomphange yove Aminoo, ukemulingile-po okulia.”* 8 Tamale ai keumbo komphange yae Aminoo, ankho ulangi. Akwate ohinde, alingila ponthele yae enthapi liomungome ayoko omungome, ou otyo atala. 9 Aeta ombiya, emwavela okulia. Mahi Aminoo ahali aanye, ati: “Popilei aveho vende!” Aveho avaende.

10 Aminoo apopila Tamale okuti: “Eta okulia* muno ndyilangi opo ndyilie etyi tyatunda pomavoko ove.” Tamale akwate omingome viokukahi ngomutima, evitwaila omphange yae Aminoo omu elangi. 11 Etyi emwetela omungome opo alie, emukwate ati: “Endyu tulangale-po mphange yange.” 12 Mahi ngwe ati: “Katyitavela mphange yange! Wahankhundise, otyipuka otyo katyilingwa mo Isilayeli.+ Wahalinge otyipuka ngootyo tyikundisa.+ 13 Oñgeni mandyikala okulingwa otyipuka ngootyo tyikundisa? Ove mokala omulume watombwa mo Isilayeli. Mbambavo, kandyite kohamba kamayaanye.” 14 Mahi Aminoo ehetavela; emukwate alala nae kononkhono, emulingi otyipuka otyo tyikundisa. 15 Pahe Aminoo ahimbika okumuyala unene; emuyale umwe unene tyipona pweetyi akala etyi ahanda okulala nae. Aminoo emupopila okuti: “Katuka, enda!” 16 Tamale ati: “Wahalinge ngootyo mphange yange, okunthaata otyivi vali tyipona etyi wandinga!” Mahi ngwe ehetavela.

17 Apopila omukwendye umuundapela okuti: “Pola omunthu ou ponthele yange, mutwala pondye oiki-po!” 18 (Opo yatyo Tamale wavala otyikutu tyelikalela* mokonda ovana vohamba veheneende nomulume vavala otyikutu ngootyo.) Omuundapi wae emutwala pondye, aiki epito. 19 Tamale elipake etwe momutwe,+ atandula otyikutu avala; elikwate komutwe aende nokulila unene.

20 Pahe omphange yae Ambisalau+ emupulu okuti: “Omphange yove Aminoo wekulinga otyipuka otyo? Wehetyipopie kovanthu, mphange yange. Aminoo omphange yove.+ Otyipuka otyo tyehekusoyese.” Tamale akala meumbo liomphange yae Ambisalau, ahaende povanthu. 21 Etyi Ohamba Ndaviti etyiiva, anumana unene.+ Mahi kahandele okulinga omapita Aminoo omona wae, mokonda umuhole unene, ngwe oe otyiveli tyae. 22 Ambisalau ahapopila Aminoo natyike, tyilinge otyiwa tyilinge otyivi ahapopi, mahi pahe ayale+ Aminoo mokonda yeetyi alinga omphange yae Tamale.+

23 Etyi palamba omanima evali, vokukulula onongi mba Ambisalau veli ko Mbaale-Hasole konthele ko Efalaii,+ Ambisalau akongo ovana aveho vohamba opo vende-ko.+ 24 Ambisalau aende kohamba, emupopila okuti: “Omuundapi wove ukahi nokukulula onongi. Mbambavo, hamba endywei novaundapi vove twende atuho.” 25 Mahi ohamba aipopila Ambisalau okuti: “Au mona wange. Ine twenda atuho matukupwilisa.” Namphila Ambisalau akuluminya ohamba opo yende, ohamba ayehetavela, aimuyambe vala. 26 Ambisalau apopi ati: “Ine hamba kumaende opo eta twende na Aminoo omukulu wange.”+ Ohamba aipulu aiti: “Omokonda yatyi mamwiila na Aminoo?” 27 Mokonda Ambisalau waita ehimbwe, ohamba aiyeke Aminoo novana vayo aveho vaye.

28 Ambisalau atumu ovakwatesiko vae okuti: “Yungei nawa, tyina mwamatale Aminoo wapialuka novinyu, ame mandyimupopila okuti: ‘Ipaei Aminoo!’ Onwe muna yokumwipaa. Muhakalei nowoma; ame nemutuma. Kalei tyapama, amukolo omutima.” 29 Ovakwatesiko va Ambisalau avalingi umwe Aminoo ngeetyi vatumwa na Ambisalau. Ovana ovakwavo vohamba avakatuka, avavelama konomula mbavo, avaende-nkholo. 30 Putyina vati mondyila, Ndaviti eivi ondaka vati: “Ambisalau waipaa ovana vohamba aveho, nawike wahupa-po.” 31 Etyi ohamba yeiva otyipuka otyo, aikatuka aitandaula ovikutu viayo, ailiyumbu pohi. Ovaundapi vayo aveho veli ponthele yayo, navo avatandaula ovikutu viavo.

32 Sonandambe+ omona wa Simeya,+ Simeya velilandula na Ndaviti ati: “Tatekulu yange, wahasoke okuti ovana vove aveho vaipawa, mokonda waipawa vala o Aminoo.+ Ambisalau oe wati aipawe+ mokonda okutuka apa alala nomphange yae+ Tamale,+ woovola-le okumwipaa. 33 Tatekulu yange hamba, wehetavele* okuti ovana vove aveho vankhia hamba; wankhia vala o Aminoo.”

34 Pononthiki opo, Ambisalau aende-nkholo.+ Omuyungi wepunda-umbo amono ovanthu metapalo vekahi nokuya, vahula oku atyindamena, popepi nomphunda. 35 Sonandambe+ apopila ohamba okuti: “Tala! Ovana vove hamba vakondoka. Hatyo ame muundapi wove nekupopila!” 36 Tyina amana vala okupopia, ngwe kuna ovana vohamba vanyingila otyo valila unene. Ohamba novaundapi vayo navo avatokela mokulila unene. 37 Mahi Ambisalau aende-nkholo no ku Talumai+ omona wa Amiyunde, ohamba yo Sesule. Ndaviti alili ehimbwe ononkhia mbomona wae. 38 Ambisalau wakalele omanima etatu ko Sesule+ oku akaholamene.

39 Pahe Ohamba Ndaviti esuku nokukatala Ambisalau velimone, mokonda pahe omutima watula,* pokwatuka pononkhia mba Aminoo.