Omukanda Wa Vali wa Samuwele
12 Siovaa atumu Nataa+ aye ku Ndaviti. Nataa aende-ko+ emupopila okuti: “Kwali ovalume vevali ankho vakala mepunda-umbo like; umwe omuhona omukwavo omuhepi. 2 Omulume omuhona ankho una onongi ononyingi nonongombe,+ 3 omulume omuhepi ankho una vala ondyona ike alanda.+ Ankho wiitekula nawa, aikulila pomavoko ae kumwe novana vae. Ondyona oyo ankho wiipolela pokulia kwae kuhehi ena-ko, ankho inwa kolufo lwae, ulala nayo pomavoko. Aikala ngatyina omona wae omukainthu. 4 Nthiki imwe, omulume omuhona atambula omweenda, mahi ankho kahandele okupola ponongi mbae ine ponongombe mbae opo aipaele-po omweenda wae. Mahi akwate ongi yomulume omuhepi ngayo aipaela-po omweenda.”+
5 Etyi Ndaviti eiva otyipuka otyo, anumana unene, apopila Nataa okuti: “Na Siovaa umwe una omwenyo,+ omulume walinga ngootyo una okwiipawa! 6 Una yokufeta onongi ononkhwana,+ mokonda yeetyi alinga neetyi ahakalele nokankhenda.”
7 Nataa apopila Ndaviti okuti: “Omulume oo, ove! Siovaa Huku yo Isilayeli wati: ‘Ame nekulinga ohamba yo Isilayeli,+ nekuyovola pomavoko a Saulu.+ 8 Ankho nahanda okukwavela eumbo+ lya tatekulu yove nokupakula ovakai+ vae pomavoko ove, tupu nekwavela eumbo lyo Isilayeli no lyo Sundaa.+ Tyihe-otyo vala, maa ndyikulingila ovipuka ovikwavo ovinyingi.+ 9 Omokonda yatyi walingila etyi tyapenga komaiho a Siovaa ohakala nonthilo nondaka yae? Ove waipaa Uliya omu Hete nomutunga!+ Etyi wemwipaa nomutunga wova Amoo,+ onepe-po omukai wae.+ 10 Mokonda yotyo apeho vomeumbo liove+ mavatokelwa nomutunga, mokonda ove kwakalele nonthilo naame, mokwapola-po omukai wa Uliya omu Hete opo akale omukai wove.’ 11 Siovaa wati: ‘Mandyikumonesa ononkhumbi mambutundu meumbo liove.+ Mandyipolo ovakai vove otyo utala, andyiveavela mulume mukwenyi,*+ alala navo komutenya watokota.*+ 12 Ove wetyilinga tyaholama,+ mahi ame mandyityilingila pova Isilayeli aveho otyo vatala, mandyityilingi komutenya watokota.’”*
13 Pahe Ndaviti apopila Nataa okuti: “Nalinga onkhali ku Siovaa.”+ Nataa apopila Ndaviti okuti: “Siovaa waevela onkhali yove,*+ ove kumankhi.+ 14 Mahi mokonda kwakalele nonthilo na Siovaa etyi walinga otyipuka otyo, omona wove wokwakutulwa tyotyili mankhi.”
15 Nataa akondoka keumbo liae.
Siovaa atahela ouvela omona wa Ndaviti vatyita nomukai wa Uliya. 16 Ndaviti aitila-ko omona ku Huku yotyotyili, ahali natyike. Ndaviti ankho tyina enda mondywo yae ulala pohi otyinthiki atyiho.+ 17 Ovakulu vomeumbo liae ankho vakala ponthele yae, otyo vahetekela okumukengelela apinduke-po pohi, mahi ankho waanya, ahahande okulia navo. 18 Monthiki ya pandu-vali omona anyimi. Mahi ovaundapi va Ndaviti avatili owoma wokumupopila okuti omona wanyima. Ankho vasoka okuti: “Pweetyi omona ankho ena omwenyo twemupopilile mahi ehetutehelela. Pahe oñgeni matumupopila okuti omona wanyima? Upondola okulinga otyipuka otyivi.”
19 Etyi Ndaviti amona ovaundapi vae vekahi nokulitotovekela, etyinoñgonoka okuti omona wanyima. Ndaviti apulu ovaundapi vae okuti: “Omona wanyima?” Avemukumbulula okuti: “Yoo, wanyima.” 20 Ndaviti apinduka-po elikoho, awave omulela,+ avale ovikutu ovikwavo. Aende kondywo ya Siovaa,+ elipetamena. Pahe akondoka keumbo* aiti vemwetele okulia avemwavela ali. 21 Ovaundapi vae avemupulu okuti: “Omokonda yatyi ulingila ñgaa? Pweetyi omona ankho ena omwenyo, ankho kuli, ulila vala; mahi etyi omona anyima, wapinduka-po oli.” 22 Ngwe evekumbulula okuti: “Etyi omona ankho ena omwenyo ankho hili,+ ndyilila vala mokonda ankho ndyisoka okuti: ‘Siovaa makala nokankhenda naame omona ahanyimi.’+ 23 Pahe omona wanyima-le, omokonda yatyi ndyikalela tyihali? Okuti ndyityivila vali okumweta?+ Ame mandyimulandula+ mahi ngwe kamakondoka kwaame.”+
24 Ndaviti aungumanesa omukai wae Mbate-Semba.+ Anyingila mondywo yae alala vali nae. Etyi pakala, akutula vali omona alukwa okuti o Salomau.*+ Siovaa ankho umuhole,+ 25 apopila omuuli Nataa+ okuti ankho vena okumwihana okuti o Sendindiya,* mokonda Siovaa ankho umuhole.*
26 Sowambe ankho utwalako okulwisa o Lambaa+ otyilongo tyova Amoo+ evepolo epunda-umbo omu ohamba ikala.*+ 27 Sowambe atumu ovatumwa-ndaka ku Ndaviti vekemupopile okuti: “Nalwisa o Lambaa,+ nevepola epunda-umbo liomaande.* 28 Pahe ongiya omaswalali ahupa-po amupake epunda-umbo pokati, amuvepolo-lio. Ine umwe kulingi ngootyo, ame mandyivepolo-lio, omunkhima aulingi wange.”*
29 Ndaviti aongiya omaswalali aeho aende ko Lambaa, evelwisa evepolo epunda-umbo. 30 Apolo otyuuya komutwe wa Malikaa. Otyuuya otyo kumwe nomamanya atyo omawa ankho tyilema otalendu* ike yoolu, avetyivaleka Ndaviti komutwe. Ndaviti tupu apundu ovipuka ovinyingi+ mepunda-umbo omo.+ 31 Ovanthu vali-mo evetyindi-mo, ekevepaka kovilinga viokuhonga omamanya, nokuundapa noviti viokwatwa, nononkhava, novilinga viokulinga omatisolu. Ongootyo alingile omapunda-umbo aeho ova Amoo. Konyima, Ndaviti nomafwalali aeho, avakondoka ko Selusalei.