Okutunda
37 Mbesaleli+ alingi otyikasa+ tyomavai omuti omu akasiya. Tyina onokovandu* onombali notyihupe moule, nokovandu ike notyihupe mounthanda, nokovandu ike notyihupe motyitai.+ 2 Etyisolongolola noolu yatyo mwene, kondye no mokati, etyipake omwooyo woolu okuliseta natyo.+ 3 Alingi omayulu ekwana noolu, akale mononthele ononkhwana mbotyikasa. Atyiti evali eli oku, evali eli oku. 4 Pahe alingi omitengi viomuti omu akasiya evisolongolola noolu.+ 5 Apake omitengi momayulu omononthele mbotyikasa vatyindile-mo.+
6 Alingi otyipato tyoolu yatyo mwene,+ tyina onokovandu onombali notyihupe moule, nokovandu ike notyihupe mounthanda.+ 7 Alingila ono kelumbii+ onombali mboolu yatyopwa nohamala, pomavindi aeho otyipato.+ 8 O kelumbii ike eipake kevindi limwe, o kelumbii onkhwavo eipake kevindi ekwavo. Alingila ono kelumbii komavindi aeho otyipato. 9 Ono kelumbii onombali mbatandaveka omavava no peulu, aafiki kotyipato.+ Onokelumbii ombo mbelipilukila, ovipala viambo vianyongamena kotyipato.+
10 Alingi omesa nomavai+ omu akasiya, ina onokovandu onombali moule, nokovandu ike mounthanda, nokovandu ike notyihupe motyitai.+ 11 Eisolongolola noolu yatyo mwene, eipake omwooyo woolu weliseta nayo. 12 Tupu alingi omwooyo womesa ulifwe mounthanda wokuvoko,* okuliseta nomwooyo ahiviswa-ko noolu. 13 Alingi omayulu ekwana noolu yatyopwa, eemate mononthele ononkhwana mbotyikasa, atyiti evali eli oku evali eli oku. 14 Omayulu ankho akalela ponthele pomwooyo, omo mutomwa omitengi viokutyinda omesa. 15 Alingi omitengi viokutyinda omesa. Wevilinga nomavai omuti omu akasiya, evisolongolola noolu. 16 Tupu alingi noolu yatyo mwene ovityuma viokukala komesa: omalonga, nomalufo, novilindo, nomalukombo* okutila oviawa viokunwa.+
17 Pahe alingi okandiyelo konomphalavinga+ koolu yatyo mwene. Alingi okandiyelo konomphalavinga noolu yatyopwa nohamala. Omphapelo yatyo, nomwenge watyo, nomalufo, nonongolo, nononthemo, ambukala tyeliima kumwe.+ 18 Momwenge watyo amutundu onomphalavinga epandu: ononthatu mbahula nthele imwe, ononthatu ambuhulu konthele onkhwavo. 19 Konomphalavinga mbatyo ambuho, nthele imwe akukala omalufo etatu ekahi ngononthemo mbomunkhete mbayapaulwa nonongolo nononthemo. Konthele onkhwavo nako akukala omalufo etatu ekahi ngononthemo mbomunkhete mbayapaulwa nonongolo nononthemo. Ngootyo, alingi onomphalavinga epandu, mbaima komwenge wokandiyelo. 20 Komwenge wokandiyelo konomphalavinga akukala omalufo ekwana ekahi ngononthemo mbomunkhete mbayapaulwa nonongolo nononthemo. 21 Mombwelo yonomphalavinga mbo tete mbaima komwenge amukala ongolo ike, mombwelo yonomphalavinga mba vali amukala ongolo ike; mombwelo yonomphalavinga mbahulililako amukala vali ongolo ike. Ngatyo alinga onomphalavinga epandu mbaima komwenge wokandiyelo. 22 Onongolo mbatyo, nonomphalavinga, nokandiyelo katyo akeho akeliimi. Kalingwa noolu yatyo mwene yokwatyopwa nohamala. 23 Alingi noolu yatyo mwene ovikandiyelo epandu-vali,+ no viokunyima omutemo,* novityiyo vietwe. 24 Okandiyelo konomphalavinga novityuma viatyo aviho evilingi notalendu ike yoolu yatyo mwene.
25 Alingi omutala wokuyokela ombao+ nomavai omuti omu akasiya. Omutala oo una omavindi ekwana, una okovandu ike moule, nokovandu ike mounthanda, nonokovandu onombali motyitai. Onombinga mbao mbeliima kumwe.+ 26 Eusolongolola noolu yatyo mwene keulu, no mononthele, no konombinga. Eulingila omwooyo woolu weliseta nao. 27 Eulingila omayulu evali oolu mombwelo yomwooyo na nthele na nthele omu mamutomo omitengi viokutyinda omutala. 28 Tupu alingi omitengi viomavai omuti omukasiya, evisolongolola noolu. 29 Alingi vali omulela ukola wokulembula,+ nombao+ yatyo mwene yokunika nawa, evilingi umwe nawa.*