Omukanda wa Vali Ehipululo
6 Salomau apopi okuti: “Siovaa wapopile okuti makala momakaka anthikovela.+ 2 Pahe ame nekutungila ondywo imwe ongwa unene opo ukale-mo, omphangu natunga opo ukale-mo apeho.”+
3 Ohamba aipilukila kovaunyingi aveho vo Isilayeli, aihimbika okuveyamba, otyo ovaunyingi aveho vo Isilayeli vetai.+ 4 Aipopi okuti: “Siovaa Huku yo Isilayeli ahilivikwe, una wafwisapo nomavoko ae etyi alaele tate yange Ndaviti nomulungu wae, okuti: 5 ‘Tundee onthiki napola ovanthu vange motyilongo tyo Isitu, hakoyele epunda-umbo nalike pokati komihoko aviho vyo Isilayeli opo ndyitunge-mo ondywo omu mamukala enyina liange apeho.+ Tupu, hakoyele omulume nawike opo akale omutumini wovanthu vange ova Isilayeli. 6 Mahi nakoya o Selusalei+ opo enyina liange likale-mo apeho, tupu naholovona Ndaviti akale omutumini wovanthu vange ova Isilayeli.’+ 7 Etyi tate yange Ndaviti ahandele momutima wae, okutunga ondywo yenyina lya Siovaa Huku yo Isilayeli.+ 8 Mahi Siovaa apopila Ndaviti tate yange okuti: ‘Etyi wahanda komutima wove, okutunga ondywo yenyina liange, etyi wahanda okulinga otyiwa. 9 Mahi ove have-ko motungu ondywo, omona matuku mwoove* oe makatunga ondywo yenyina liange.’+ 10 Siovaa wafwisapo omulao alingile, etyi napinga tate yange Ndaviti, andyipumphama kotyipundi tyouhamba wo Isilayeli,+ ngeetyi Siovaa alaele.+ Tupu natunga ondywo yenyina lya Siovaa Huku yo Isilayeli, 11 ngamo ndyipaka Otyikasa tyina omphango+ Siovaa alinga nova Isilayeli.”
12 Salomau atalama pomutala wovilikutila wa Siovaa, komutwe wovaunyingi aveho vo Isilayeli, ayelula omavoko.+ 13 (Salomau walingile omutala omututu wotyivela otyitasu eupake pokati kepata.*+ Wali nonokovandu* ononthano moule, ononthano mounthanda, mokwaya no peulu onokovandu ononthatu. Atalama komutala oo.) Aikila konongolo komutwe wovaunyingi aveho ova Isilayeli, ayelula omavoko no peulu,+ 14 ati: “Siovaa Huku yo Isilayeli, kutupu vali Huku ulifwe noove keulu nii kombanda yohi. Ove kuyeke-po omphango walinga, nolwembia lwove olunene novaundapi vove, vokweendela monondyila mbove nomutima auho.+ 15 Ove wafwisapo etyi walaele omuundapi wove Ndaviti, tate yange.+ Walaele nomulungu wove mwene, hono wetyifwisapo nokuvoko kwove mwene.+ 16 Pahe Siovaa Huku yo Isilayeli, linga etyi wapopilile omuundapi wove Ndaviti, tate yange, etyi watile: ‘Apeho makukakala umwe makatuka mwoove makapumphama kotyipundi tyoutumini wo Isilayeli, ovana vove valinge ovakwatyili monondyila mbange, avaendela movitumino viange,+ ngeetyi ove wetavelele kwaame.’+ 17 Pahe, Siovaa Huku yo Isilayeli, etyi walaele omuundapi wove Ndaviti, tyikale otyili.
18 “Mahi okuti tyotyili Huku makala umwe novanthu pano pohi?+ Tala! Komaulu, keulu lyo komaulu, kufu-ko,+ pahe okuti mondywo ei natunga mofu-mo?+ 19 Pahe tehelela-vo elikwambelo liange ame muumbili wove neetyi nekwita okankhenda, Siovaa Huku yange, nthehelele-vo ame muumbili wove etyi nekwita unkhwateseko, nelikwambelo ame muumbili wove nalinga kwoove. 20 Omaiho ove ayunge-vo ondywo ei tyinthiki na tyitenya, omphangu ove wapopile okuti mopake-mo enyina liove.+ Tehelela elikwambelo ame muumbili wove nalingila pomphangu pano. 21 Tehelela-vo tyina omuundapi wove elivondela opo umukwateseko, na tyina ovanthu vove ova Isilayeli vamelikwambelela pomphangu ei.+ Tyiivale-vo kwoove, komphangu yove keulu, oku ukala;+ tavela-vo, oveevela.+
22 “Ine omulume umwe ulinga onkhali ku mukwavo, akuluminywa okulinga omulao,* pahe akala nonkhuluminya yetyi tyaitwa momulao oo,* aende komutala wove wovilikutila mondywo ei putyina nkhele eli momulao oo,+ 23 tehelela-vo keulu oko ukala, olingi tyimwe, okoyesa ovaundapi vove. Wokwalinga otyivi omukondolela-tyo, etyi alinga tyitokele komutwe wae mwene,+ wahavele onombei omuviuki,* muyamba mwetyi alinga tyaviuka.+
24 “Ine ovanthu vove ova Isilayeli vatila konondyale mbavo mokonda yokutwalako okulinga onkhali kwoove,+ avakondoka kwoove, avahilivika enyina liove,+ avelikwambela,+ avelivondela okwiita okankhenda kwoove mondywo ei,+ 25 vetehelela-vo keulu oko,+ oevela onkhali yovanthu vove ova Isilayeli, ovekondola kotyilongo wevepa novakwaukulu vavo.+
26 “Ine eulu lipata, ombila aihaloko,+ mokonda ovanthu vove vatwalako okulinga onkhali kwoove,+ avelikwambela pomphangu ei, avahilivika enyina liove, avayeke-po onkhali yavo mokonda wevelongesa okuliola omutima,*+ 27 vetehelela-vo keulu oko ukala, oevela onkhali yovanthu vove ova Isilayeli, ovelongesa ondyila ikahi nawa vena okweendela,+ olokesa ombila+ motyilongo waavela ovanthu vove, atyikala epingo liavo.
28 “Ine motyilongo mukala ondyala+ hamwe omukihi,+ nomutenya omunene, nonkhume,+ notyipahu tyovimphunia-mphunia ine ovimphunia-mphunia viokunyona,+ tupu ine onondyale mbuliseta nepunda-umbo limwe liotyilongo,*+ ine hamwe ovihuna ovikwavo ine ouvela umwe utumbukila motyilongo,+ 29 omulume umwe ine ovanthu vove aveho ova Isilayeli avalingi elikwambelo+ ine avaiti okankhenda+ (mokonda munthu na munthu wii ononkhumbi mbae mwene, nomalwihamo ae),+ tyina vamatandaveka omavoko aveeviukisa kondywo ei,+ 30 vetehelela-vo keulu oko, komphangu ove ukala,+ oveevela,+ okondolela munthu na munthu, okutalela konondyila mbae ambuho, mokonda ove wii omitima viavo (ove vala wii nawa omutima womunthu),+ 31 opo vakale nonthilo noove, avaendela monondyila mbove ononthiki ambuho mavakala motyilongo ove waavelele ovakwaukulu vetu.
32 “Ine umwe onthunda-vilongo wehe-wovanthu vove ova Isilayeli, utunda kotyilongo tyo kokule mokonda yenyina liove enene*+ nononkhono mbenkhanya liove, mbokuvoko kwove kwatandavekwa, eya elikwambelela pondywo ei,+ 33 mutehelela-vo keulu oko, komphangu ove ukala, olingi atyiho onthunda-vilongo yekwiita, opo ovanthu vovilongo aviho vanoñgonoke enyina liove,+ avakala nonthilo no ove ngeetyi ovanthu vove ova Isilayeli valinga, avanoñgonoka okuti enyina liove likahi nokutumbulwa mondywo ei natunga.
34 “Ine ovanthu vove vaya kovilwa, okukalwisa onondyale mbavo, avaendela mondyila wevelekesa,+ avelikwambela+ kwoove, tyapilukila kepunda-umbo eli waholovona, no kondywo natungila enyina liove,+ 35 vetehelela-vo keulu oko elikwambelo liavo, nokankhenda vekwita ovelingi ouviuki.+
36 “Ine valinga onkhali kwoove (mokonda kutupu omunthu wahalingi onkhali),+ oveyekela pomavoko ondyale yavo aivetwala koukonde kotyilongo tyimwe kokule ine opopepi,+ 37 kotyilongo oko vatwalwa avelivele, avakondoka kwoove, avelivondela kwoove opo uvelinge okankhenda motyilongo otyo veli koupika, avapopi okuti: ‘Twalinga onkhali, twalinga otyivi netyi tyapenga,’+ 38 avakondoka kwoove nomutima wavo auho,+ nohande* yavo aiho motyilongo veli koupika,+ oku vatwalwa avakala ovapika, avelikwambela tyapilukila kotyilongo waavelele ovakwaukulu vavo, kepunda-umbo waholovona,+ no kondywo natungila enyina liove, 39 tehelela-vo elikwambelo liavo keulu oko ukala, na tyina velivondela opo uvelinge okankhenda, ovelingi etyi tyata muvo,+ oevela ovanthu vove onkhali valinga.
40 “Pahe Huku yange, mbambavo, omaiho ove atale-vo omakutwi ove atehelele-vo omalikwambelo alingilwa momphangu ino.*+ 41 Pahe Siovaa Huku, londeka komphangu yove yokupululukilwa,+ ove Notyikasa tyononkhono mbove. Siovaa Huku, ovanakwa vove vavale eyovo, ovakwatyili kwoove vahambukilwe ouwa-tima wove.+ 42 Siovaa Huku, uhayeke-po* omulembulwa wove.+ Hinangela-vo olwembia lwove olunene wakala nalo na Ndaviti omuundapi wove.”+