Omukanda wa Vali Onohamba

23 Ohamba aitumu okwiihana ovakulu aveho vomo Sundaa no vomo Selusalei.+ 2 Ohamba pahe ailondeka no kondywo ya Siovaa novalume aveho vomo Sundaa, ovanthu aveho vokukala mo Selusalei, ovanakwa novauli, ovanthu aveho, ovatutu novanene. Evetangela onondaka ambuho mbomukanda+ womphango+ wokwavasiwa mondywo ya Siovaa.+ 3 Ohamba aitalamena ponthele potyipandyi, ailingi omphango* komaiho a Siovaa+ yokuti mailandula mu Siovaa, ayeendela movitumino viae no mweetyi alondola no mweetyi apopia, nomutima wayo auho nohande* yayo aiho, mokufwisapo onondaka mbomphango mbahonekwa momukanda oo. Ovanthu aveho avetavela omphango oyo.+

4 Ohamba aitumu Hilikiya+ omunene-nakwa novanakwa ovakwavo, novayungi vo konombundi vapole mondywo ya Siovaa ovipuka aviho vialingililwe Mbaale notyipandyi tyikola,*+ nomambamba aeho ovita o keulu. Ekevipaka otupia kondye yo Selusalei ponthele yo* Sendoloo, etwe liatyo elitwala ko Mbetele.+ 5 Amane-ko ovilinga viovanakwa vovika-huku viovilongo, vana onohamba mbo Sundaa vaavelele otyilinga tyokuyoka ovilikutila vitunde omwihi ponomphangu mbukola mbaya peulu komapunda-umbo o Sundaa no kononthele mbo Selusalei. Tupu amane-ko otyilinga tya vana valingila Mbaale nekumbi,* nohanyi, nominkheka-nkheka nomambamba aeho ovita o keulu+ ovilikutila viokutunda omwihi. 6 Apolo otyipandyi tyikola+ mondywo ya Siovaa etyitwala kondye yo Selusalei, komulola wo Sendoloo. Etyipakela otupia+ melola lyo Sendoloo atyikala etwe, ahandaulila etwe liatyo komalangalo ovanthu aveho.+ 7 Tupu ahanye-ko onondywo mbomakunga+ ovalume alala novalume vakwavo mondywo ya Huku, mbukala mondywo ya Siovaa, muna ovakai valingilile omakaka otyipandyi tyikola.*

8 Konyima apolo ovanakwa aveho momapunda-umbo o Sundaa, asilisa onomphangu mbukola mbaya peulu ombu ovanakwa ovo valingila ovilikutila vitunde omwihi, ambehetavela vali okufendela-po, okupolelela ko Semba+ atee ko Mbelesemba.+ Tupu ahanyauna-ko onomphangu mbukola mbaya peulu mbuli kombundi ya Susuwee omutumini wepunda-umbo, mbukala kokumbili kwa una unyingilila kombundi yepunda-umbo. 9 Ovanakwa vo ponomphangu mbukola mbaya peulu kavaundapa komutala wovilikutila wa Siovaa mo Selusalei,+ mahi valia onombolo mbahapakelwe onkhiso kumwe na ava velilandula navo. 10 Tupu asilisa o Tofete,+ omphangu ikala melola liovana va Hinoo,*+ opo pahakale omunthu nawike uyokela otyika-huku Moleke+ omona wae omukwendye ine omukainthu motupia.* 11 Wailikile ononkhambe mbuna onohamba mbo Sundaa mbapakulilile* ekumbi okukwata mondywo* ya Nataa-Meleke omuundapi womombonge, ondywo ikala kondywo yokunyingila mondywo ya Siovaa. Apake otupia omatemba ovilwa ana apakulililwe ekumbi.+ 12 Ohamba tupu aihanye-ko omitala viovilikutila onohamba mbo Sundaa mbatungile keulu liondywo+ yo keulu ya Akasi nomitala vivali Manasesi atungilile momapata evali ondywo ya Siovaa.+ Evityopa-tyopa avikala ofinde, eihandaulila Melola lyo Kindoloo. 13 Tupu ohamba aisilisa onomphangu mbaya peulu mbukala komutwe wo Selusalei kombwelo* Kotyipunda Tyehanyauno,* ambehetavela vali okufendela-po, onomphangu Salomau ohamba yo Isilayeli atungilile o Asitolete otyika-huku tyomukai tyitoyesa tyova Sindone, na Kemosi otyika-huku tyitoyesa tyova Moambe, na Milikoo+ otyika-huku tyitoyesa tyova Amoo.+ 14 Ahanye-ko onomphandyi mbukola, atyoko-po ovipandyi vikola,*+ ponomphangu mbatyo eyulisa-po omankhipa ovanthu. 15 Tupu ahanyauna-ko omutala wovilikutila ukala ko Mbetele nomphangu ikola yaya peulu Selombowau omona wa Nembate atungile, ina yalingisisile ova Isilayeli onkhali.+ Konyima yetyi ahanyauna-ko omutala oo wovilikutila nomphangu ikola yaya peulu, ayoko omphangu ikola yaya peulu aikala etwe, tupu ayoko-po otyipandyi tyikola.*+

16 Etyi Sosiya atala konyima, amono omalangalo eli komphunda, atumu vakapole-mo omankhipa ekeepakela otupia komutala wovilikutila, aukala omutala wasila wehetavela okufendela, ngeetyi tyapopile omunthu wa Huku yotyotyili, una Siovaa atumine okuula ovipuka ovio.+ 17 Pahe apulu okuti: “Elangalo lina ndyiete olia-lie?” Ovalume vomepunda-umbo avemukumbulula okuti: “Elangalo liomunthu wa Huku yotyotyili wo ko Sundaa,+ una wapopile ovipuka evi tatekulu alinga omutala wovilikutila mo Mbetele.” 18 Evepopila okuti: “Muyekei apululukwe-po. Nawike ukwata komankhipa ae.” Avahakwata komankhipa ae nii komankhipa omuuli wokwatundile ko Samaliya.+

19 Sosiya tupu ahanye-ko onondywo ambuho mbokufendela mbo ponomphangu mbukola mbaya peulu mbuli momapunda-umbo o Samaliya,+ mbuna onohamba mbo Isilayeli mbatungile opo mbunumanese Huku. Embulingi ngeetyi alingile omphangu ikola yaya peulu ko Mbetele.+ 20 Ngootyo, ayokela komitala viovilikutila ovanakwa aveho vo ponomphangu mbukola mbaya peulu vekahi-po, ayokela-ko omankhipa ovanthu.+ Konyima akondoka ko Selusalei.

21 Ohamba aitumu ovanthu aveho okuti: “Lingilei Opasikwa+ Siovaa Huku yenyi ngeetyi tyahonekwa momukanda oo womphango.”+ 22 Kakunelingwe Opasikwa ngeei okutuka kononthiki mbovakoyesi vova Isilayeli no mokweenda kwononthiki ambuho mbonohamba mbo Isilayeli, nonohamba mbo Sundaa.+ 23 Mahi menima 18 ohamba Sosiya eli nokutumina, Opasikwa oyo ailingilwa Siovaa mo Selusalei.

24 Sosiya tupu anyimi-ko ovanthu vana vokupopia novilulu+ no vokutapesa, novilolo vyo meumbo*+ novilolo vitoyesa,* novipuka aviho vitoyesa viamonekele motyilongo tyo Sundaa nomo Selusalei, opo tyifwisepo onondaka Mbotyitumino+ mbahonekwa momukanda omunakwa Hilikiya avasile mondywo ya Siovaa.+ 25 Kakwali ohamba naike yelifwa nae, yakondokele ku Siovaa nomutima wayo auho nohande yayo aiho,*+ nononkhono mbayo ambuho, yafwisilepo Otyitumino atyiho tya Mwisesi. Kakwakalele vali ohamba naike yelingile ngae.

26 Mahi Siovaa kayekele-po onyengo yae onene yankhindukilile ova Sundaa, mokonda yovipuka aviho vinumanesa vina Manasesi alingile opo emunumanese.+ 27 Siovaa ati: “Tupu mandyikapola o Sundaa kotyipala tyange+ ngeetyi napola-ko o Isilayeli.+ Mandyikaanya epunda-umbo eli naholovona, o Selusalei nondywo napopile okuti: ‘Omo enyina liange malitwalako okukala.’”+

28 Ovipuka ovikwavo viehipululo lya Sosiya, ovipuka aviho alinga, kaviahonekelwe momukanda womahipululo o pononthiki mbonohamba mbo Sundaa? 29 Pononthiki mbae, Falaoo Neku ohamba yo Isitu, aende vekelivase nohamba yo Asilia ponthele pondongi Eufalate. Ohamba Sosiya aende opo akalwise Falaoo Neku, mahi etyi Neku emumona, emwipaela ko Mesitu.+ 30 Mahi ovaundapi vae avatyindi olutu lwae ketemba limwe liovilwa, okutunda ko Mesitu atee ko Selusalei, avekemupaka meendo liae. Iya ovanthu vo motyilongo avapolo Seowakasi omona wa Sosiya, avemulembula avemupake kouhamba apingi pu he.+

31 Seowakasi+ wakala ohamba etyi ena omanima 23, watuminine mo Selusalei onohanyi ononthatu. Ina utiwa o Hamutale+ omona wa Selemiya wo ko Limbina. 32 Ahimbika okulinga ovipuka ovivi komaiho a Siovaa, ngovipuka aviho ovakwaukulu vae valingile.+ 33 Falaoo Neku+ emukwatela ko Limbela+ kotyilongo tyo Hamate, emutyilika okutumina mo Selusalei, afetesa otyilongo elilimu onotalendu* 100 mbopalata notalendu ike yoolu.+ 34 Tyehe-otyo vala, Falaoo Neku alingi ohamba omona wa Sosiya Eliyakii pomphangu ya tate yae Sosiya, apilulula enyina liae emuluku okuti o Seoyakii, mahi akwata Seowakasi, emutwala ko Isitu+ ngako akankhila.+ 35 Seoyakii aavela Falaoo opalata noolu, mahi opo aavele Falaoo onombongo emwiita, una yokwiita elilimu movanthu. Waitile kovanthu aveho vomotyilongo opalata noolu anakelwa, opo aavele Falaoo Neku.

36 Seoyakii+ wakala ohamba etyi ena omanima 25, watuminine mo Selusalei+ omanima 11. Ina utiwa o Sembinda, omona wa Pendaiya wo ko Luma. 37 Watwaile-ko okulinga ovipuka ovivi komaiho a Siovaa,+ ngovipuka aviho onombwale mbavo valingile.+