Selemiya
49 Etyi otyo Siovaa apopia tyiyemba kova Amoo,+ wati:
“Isilayeli utupu ovana?
Utupu omphinga?
Oityi Malikaa+ apiñganena o Ngande?+
Oityi vae vakalela momapunda-umbo a Isilayeli?”
2 “‘Pahe tala! omboo mbuya ononthiki,’ o Siovaa wetyipopia,
‘Ononthiki mankheivalesa onkhwino* yokulwisa o Lambaa+ yova Amoo.+
Maikakala onthunthu yomphile yasiwa-po,
Onohika mbatyo* mambukapakwa otupia.’
‘Isilayeli makapunda ava vemupundile,’+ o Siovaa wetyipopia.
3 ‘Lila, ove Hesimboo, Ai wahanywa-po!
Liyavelei, mapunda-umbo o Lambaa.
Pakei-mo onosaku mbonongosa.
Lilei, hambei-hambei monohambo mbomamanya,*
Mokonda Malikaa maende koukonde,
Mai novanakwa vae, novanene vatyo vae.+
4 Oityi ulimphandelela* omalola,*
Omataka ove atalala nawa, mukainthu wehe-wonthyole yotyili,
Wokwayumba onthumbi molumono lwae,
Ou wokuti: “Olie-vo undwisa?”’”
5 “‘Ame uno ndyiya ndyikuyumbe ovihuna’ o Tatekulu Ohamba Onene Siovaa womambamba ovita wetyipopia,
‘Mavitundilila ku aveho vekupaka pokati.
Ove mokatyandyaneswa nonohika ambuho,
Nawike makakongolola vokwakahomboka.’”
6 “‘Mahi haa mandyikakongolola ovikonde vyo Amoo,’ o Siovaa wetyipopia.”
7 Etyi otyo Siovaa womambamba ovita apopia tyiyemba ko Endoo, wati:
“Kutupu vali ounongo ko Temaa?+
Vena ekungunyiko ondondoi yevepwa?
Okuti ounongo wavo wavola?
8 Kahombokei, kondokei!
Endei, holamei momalola aya kohi, onwe vo mo Ndendaa!+
Mokonda mandyietela Isauu ovihuna,
Maiya-po ononthiki mandyimuhinangela.
9 Ine ovanyangi vonouva veile kwoove,
Okuti ñgeno kavasile-ko omayundilile?
Ovimphulu okuya kwoove kounthiki,
Vihanyauna-mo vala etyi viahanda.+
10 Mahi Isauu mandyimupundu tyae.
Mandyihololola apa aholama,
Ahamone apa aholama.
Ovana vae, naava velilandula navo, na vakwavo velitungaila navo, aveho mavakahanywa-ko,+
Isauu kamakakala-ko vali.+
12 Mokonda etyi otyo tyapopia Siovaa wati: “Tala! Ine ava vahakwatelwe tyokunwa kolufo lwonyengo yange, mavanu-ko, pahe ove, ove moyekwa umwe vala ohalingwa natyike? Ove kumahupu ohalingwa natyike, mokonda monu-ko umwe.”+
13 “Mokonda ame natukaila umwe ame mwene,” o Siovaa wetyipopia, “nati Mbosila mailingwa etyi tyitilisa owoma,+ makatoywa, mekesala tyehena natyike, makatumbaulwa pononkhano; omapunda-umbo ae maakala-kala vala tyahanyauka.”+
14 Neiva ondaka yatunda ku Siovaa,
Omutumwa-ndaka watumwa movanthu vovilongo wati:
“Liongiyei, yeendelei ilwisei,
Manekei mukalwe”+
15 “Tala! Ame nekulinga omunthu wehesilivila pokati kovanthu vovilongo,
Wokwatoywa pokati kovalume.+
16 Owoma waetaile movanthu wekukemba,
Omutima wove wokulitumbilika, wekuyondya,
Ove wokuholama momaleva mononkhanda,
Wo kotyipunda tyaya vali peulu.
Mbili watunga otyiyu tyove peulu-ulu ngonkhombe,
Ame mandyikutulula pohi,” o Siovaa wetyipopia.
17 “O Endoo maikatilisa owoma ovanthu.+ Aveho vakakwata-mo, okwiitala mavakatila owoma avahikila omwelwa* ovihuna viayo aviho. 18 Matyikala ngeetyi tyalingilwe o Sondoma, no Ngomola, nomapunda-umbo eli nao popepi,”+ o Siovaa wetyipopia, “nawike makakala-mo, petupu omulume makatunga-mo.+
19 “Tala! Pena umwe maendela omalihilo okwapama malingi ngonkhulika+ itunda motyiteta tyavinda tyo ko Solondau, mahi kamapakala ehimbwe, mandyikemuhatekesa aende kokule nayo. Mandyikemunakela ou wokwakoywa. Olie ulifwe naame, olie upondola okumphatana? Omunthita patyi upondola okulipambeka naame?+ 20 Onwe valume, tehelelei etyi Siovaa ati* metyilingi o Endoo, neetyi mahande okulinga ovanthu vakala ko Temaa:+
Onongi mambukakokelwa kokule.
Apa mbukala, mapakahanyaunwa,* kombanda yavo.+
21 Etyi yatoka-po, omuhindo watyo auteketesa ohi.
Kwiivala okulila!
Okulila kwatyo kweivala umwe Kelunga Likuhuka.+
22 Tala! Makalinga ngonkhombe inyingila onthwitwi,+ ikwata etyi yahanda,
Makatandavekela omavava ae o Mbosila.+
Onthiki oyo omutima wovita vyo Endoo,
Maukeihamenwa ngomutima womukai ukutula.”
23 O Ndamasiku+ weipopila okuti:
“O Hamate+ yakundiswa, nayo no Alupande,
Mokonda yotyivi veiva.
Veli nokusenguluka tyowoma.
Elunga lilitaha-taha, kalivilwa okulitulisa.
24 O Ndamasiku omutima weitunda.
Yatyindamena-ko yakahomboka, mahi owoma weikwata.
Onongembia mbeyoola onomona, onongembia nomalukeno,
Uti vala omukai ukutula.
25 Oñgeni epunda-umbo liomunkhima liahayekelwe-po,
Epunda-umbo liehambu?
26 Ovakwendye vatyo omatele mavatokela ponopalasa,
Ovakwa-vita aveho mavankhi monthiki oyo,” o Siovaa womambamba ovita wetyipopia.
27 “Mandyikapaka otupia kovimato vyo Ndamasiku,
Ovimato viokwapama vyo Mbeni-Handande+ avipi-po aviho.”
28 Siovaa wapopia o Kendale,+ nomauhamba o Hasole, aa Nambukondonosole* ohamba yo Mbambilonia ateya-po, wati:
“Katukei, endei londekei no ko Kendale,
Hanyaunei-ko ovana ovakwendye vo Koutundilo.
29 Mavakapolwa omakaka avo, novipako viavo,
Mavakapolwa ovinyanga viomakaka avo, novipuka viavo aviho.
Omakamelu avo mavakaya nao.
Ovanthu mavekeveihana avekeliyavela avati: ‘Kononthele ambuho kutilisa owoma!’”
30 “Kahatekei, endei umwe kokule!
Holamei momavoyo okwaya kohi, onwe vokukala mo Hasole,” o Siovaa wetyipopia.
“Mokonda Nambukondonosole* ohamba yo Mbambilonia wetyimona etyi memweende emulwise,
Wapanga okumulwisa.”
31 “Katukei, endei kalwisei ovanthu votyilongo tyili mombembwa,
Vokuli metuliyo!” o Siovaa wetyipopia.
“Tyitupu omapito, nii omakumba; vakala vala aveke.
32 Omakamelu avo maakapundwa;
Ovipako viavo ovinyingi mavikatyindwa-po.
Mandyikevetyandyanesa kononthele mbatyo ambuho,*
Ava vakululwa onohuki pomakutwi,+
Mandyiveetela ovihuna mavitundu kononthele ambuho,” o Siovaa wetyipopia.
33 “O Hasole, maikalinga ondyimbo yovimbandye,
Aikakala-kala ekongola.
Nawike makakala-mo,
Petupu omulume makatunga-mo.”
34 Ei oyo ondaka ya Siovaa yaendelele omuuli Selemiya ipopia o Elau,+ etyi Sendekiya+ ohamba yo Sundaa akala pahe kovipundi, aiti: 35 “Etyi otyo tyapopia Siovaa womambamba ovita wati: ‘Ame ndyili nokuteya onkhondyi ya Elau,+ omu apola* ononkhono. 36 Mandyeeta onomphepo ononkhwana mambutundu keulu ambeendela Elau, mandyihanyikisa ovanthu aveho vakala-mo monomphepo ombo ambuho. Kutupu otyilongo natyike mwahamakanyingila ovanthu vatunda mo Elau.’”
37 “Mandyiyeke ova Elau avapaalala apa vamona onondyale mbavo, naava vesukale nokuvepola omwenyo;* mandyiveetela ovihuna, onyengo yange yatokota,” o Siovaa wetyipopia. “Mandyitumu omutunga monyima yavo atee ndyivemana-ko aveho.”
38 “Otyipundi tyange tyounene mandyiketyipaka ko Elau,+ andyikaipaa ohamba yatyo, novanene vatyo,” o Siovaa wetyipopia.
39 “Mahi kononthiki mbahulilila, mandyikakongolola ovikonde vyo Elau,” o Siovaa wetyipopia.