Selemiya
48 Etyi otyo Siovaa womambamba ovita, Huku ya Isilayeli apopia tyiyemba ko Moambe,+ wati:
“Tatiei waetesa Nembu,+ wahanywa-po!
Kiliyataii+ waya molukundo, vaya nae.
Eleva liokuholama* liakunda, liahanyikiswa.+
2 Omunkhima pahe kaveupe vali Moambe.
Oko Hesimboo+ vapangela okwiitokesa-po, vati:
‘Endywei, twiinyimei-ko yahatiwe vali otyilongo.’
Noove, ove Mandimee, uti filuu.
Mokonda omutunga uli monyima yove.
3 Kweivala onkhu, iivalela ko Holonaii,+
Onkhu yehanyauno, yotyinimawe otyinene.
4 O Moambe yateywa-po.
Ovana vayo valila.
5 Ovanthu kavatulu valila vala, tyina vainduka nondyila yo Lwiite.
Motyilauka tyokwenda no ko Holonaii mwiivalela ononkhu mokonda yotyinimawe.+
6 Kahatekei, endei mukahupise omienyo vienyi!*
Kalei ngomungalaviya uli moluhandya.
7 Mokonda ove uyumba onthumbi movilinga viove no molumono lwove,
Noove mokakwatwa.
Kemosi+ nae makatwalwa koupika,
Nae novanakwa vae novanene vatyo vae.
8 Omuhanyauni makanyingila momapunda-umbo aeho,
Petupu epunda-umbo malikahupa.+
9 Pakelei Moambe omahe alandule-mo,
Mokonda tyina amesala momphile makahateka,
Omapunda-umbo atyo maakakala otyipuka tyitilisa owoma,
Maakakala tyehena munthu.+
10 Akatengale ou ulinga otyilinga tya Siovaa nondende!
Akatengale ou ukondola omutunga wae kokumomesa ohonde!
11 Ova Moambe vapolelwa vala nawa nkhele tya poututu,
Uti vala ovinyu ili momilindi.
Kavatile avauyulilwa omu, avauyulilwa omu,
No koukonde vala kavekwi-ale.
Otyo vapepela vala ngo kohale,
Omuniko wavo kawapilulukile.
12 “‘Pahe tala! omboo mbuya ononthiki,’ o Siovaa wetyipopia ‘ononthiki mandyivetumu ovalume mavekevenengula. Mavekevenengula, momilindi viatyo amwehesala natyike, avatyatyaula omilindi viavo ominene. 13 Ova Moambe, o Kemosi maikevekundisa ngeetyi veumbo lya Isilayeli vakundiswa no Mbetele, omu vapamenene.+
14 Oityi mulipapaikila amuti: “Tuvakwa-vita vatyo vokwapama, twamaneka tukalwa”?’+
Ohamba yetyipopia, wenyina litiwa o Siovaa womambamba ovita.+
16 Ovihuna viova Moambe ovioo viya vili pepi;
Okutoka kwayo kweya kwalumbana.+
17 Aveho veveongelela mavekevelinga okankhenda,
Aveho vei enyina liavo.
Vepulei muti: ‘Otyimuti tyokwakola tyakateka vali ñgeni, omphangoti ongwa!’
18 Tuluka komunkhima wove,
Pumphama ove waliwa nohunga,* mona omukainthu wokukala mo Ndimboo,+
Mokonda omuhanyauni wo Moambe, wekweendela,
Mahanyauna-po onomphangu mbove ambuho mbokwapama.+
19 Talama ketapalo, otale, ove wokukala mo Alowele.+
Pula omulume uli nokukahomboka, nomukai uli nokukahateka uti: ‘Kweya-tyi oku?’
20 Moambe wakundiswa, wapaalala.
Lilei, liyavei.
Ketyipopiei ko Alunoo+ muti, Moambe wahanywa-po.
21 “Omphela yehika monthanthalahi,*+ yaendela o Holoo, no Saasi,+ no Mefaate;+ 22 no Ndimboo,+ no Nembu,+ no Mbete-Ndimbalataii; 23 no Kiliyataii,+ no Mbete-Ngamuli, no Mbete-Meoo;+ 24 no Keliyote,+ no Mbosila, nomapunda-umbo aeho otyilongo tyo Moambe, okokule no opopepi.
25 ‘Ononkhono mba Moambe mbapwa;*
Okuvoko kwae kwatiaulwa,’ o Siovaa wetyipopia.
26 ‘Mupei okunwa akolwa,+ mokonda welipakako waleva Siovaa.+
Moambe uli nokwaalangata monohandyo mbae,
Pahe walinga vala wokulingwa omukwele.
27 Have wokwalingaile omukwele Isilayeli?+
Okuti wavasiwa pokati kovifwanga,
Etyi ove upuka komutwe, omupopi?
28 Tundei momapunda-umbo amukakala mononkhanda, onwe vokukala mo Moambe.
Kalei ngopomba itunga otyiyu tyayo momakolo.’”
29 “Tweiva okulipaka-ko kwa Moambe — una navi omakamo —
Tweiva elungavi liae, nokulipaka-ko kwae, nonya yae, nomalityindailo omutima wae.”+
30 “‘Ame ndyii onyengo yae,’ o Siovaa wetyipopia,
‘Mahi etompho liae litupu-ale etyi lieeta;
Vetupu etyi mavakalinga.
31 Otyo mandyikalilila Moambe,
Mandyikeliyava mokonda yo Moambe aiho,
Andyikalila ovalume vo ko Kile-Elesi.+
Ovimpha viove viayova nawa, avityiki elunga,
Viatandavela kelunga viekehika ko Sasele.
Kovinyango viove vyo pombila, no konouva mbove,
Omuhanyauni weliyumba-ko.+
33 Pahe ehambu mepia liovinyango liatunda-mo, nondolo kaimo vali,
No kotyilongo tyo Moambe.+
Nakukutisa ovinyu apa pahininwa onouva.
Petupu vali ou makahina onouva otyo atwa ondolo.
Mavakatwa ondolo, mahi ondolo yelikalela.’”+
34 “‘Kweivala onkhu yatunda ko Hesimboo,+ yekehika ko Eleale.+
Nomeva oko Nilii umwe maakukuta.+
35 Ko Moambe mandyikanyima-ko,’ o Siovaa wetyipopia,
‘Ou utwala oviawa konomphangu mbukola mbaya peulu,
No ou ulingila huku yae ovilikutila.
36 Otyo omutima wange maukalilila* Moambe, lwolupowi luhika,+
Otyo omutima wange maukalilila ovalume vo ko Kile-Elesi, lwolupowi luhika.
Mokonda olumono aluho afuna malukapwa.
37 Omitwe aviho viatomonwa onohuki,+
Onondyeli ambuho mbakululwa-ko.
38 “‘Keulu lionondywo ambuho mbo Moambe,
No ponopalasa mbatyo ambuho,
Peivala vala okulila,
Mokonda natyatyaula o Moambe,
Uti omulindi wayumbwahi,’ o Siovaa wetyipopia.
39 ‘Tala etyi apaalala! Lilei!
Tala etyi Moambe akakondoka tyakunda!
Moambe pahe walinga wokulingwa omukwele,
Wakala otyipuka tyitilisa owoma aveho vemwoongelela.’”
40 “Mokonda etyi otyo tyapopia Siovaa wati:
‘Tala! Ngeetyi onkhombe inyingila onthwitwi+ ikwate etyi yahanda,
Ondyale maikatandaveka omavava aipapalela o Moambe.+
41 Momapunda-umbo mamunyingilwa,
Ovimato viatyo viokwapama, mavevepolo-vio.
Onthiki oyo omutima wovita vyo Moambe,
Maukala ngomutima womukai ukutula.’”
42 “‘O Moambe maikanyimwa-ko, kamaikala vali otyilongo tyovanthu,+
Mokonda yelipaka-ko,+ o Siovaa yaleva.
43 Owoma omunene ukukevela, atyiho netoto, neliva,
Ove wokukala mo Moambe,’ o Siovaa wetyipopia.
44 ‘Ou utila owoma akahateka, makatokela metoto,
Ou utunda metoto makankhia meliva.’
‘Mokonda mandyeetela Moambe enima lieetyi mavalingwa,’ o Siovaa wetyipopia.
45 ‘Motyihi tyo Hesimboo, vokukahomboka omo mavakatalama tyepwila.
Ko Hesimboo makukatunda otupia,
Pokati ko Siyoo apakatunda omutemo,+
Omphomo ya Moambe oko maikapia,
Nomakola omitwe viovakwa-vita vonya.’+
46 ‘Tatiei waetesa Moambe!
Ovanthu vomo Kemosi+ vanyimwa-mo.
Ovana vove ovakwendye vatwalwa koupika.
Ovana vove ovakainthu vatwalwa koukonde.+
47 Mahi kononthiki mbahulilila, mandyikakongolola ovikonde vyo Moambe,’ o Siovaa wetyipopia.
‘Omphela yo Moambe opo yapwila apa.’”+