Isekiyele
14 Vamwe povakulu ova Isilayeli aveya, avapumphama ponthele yange.+ 2 Pahe ondaka ya Siovaa aiya kwaame aiti: 3 “Mona womulume, ovalume ava vahula kokulandula ovilolo viavo vitoyesa,* vatela ovanthu velipunduke valinge onkhali. Okuti ame ndyiveyeka veye kwaame vapule etyi vahanda?+ 4 Popia navo, vetolela uti, ‘Etyi otyo tyapopia Tatekulu Ohamba Onene Siovaa, wati: “Ine omu Isilayeli umwe uhula umwe kokulandula ovilolo viae vitoyesa, atele ovanthu velipunduke valinge onkhali, aende komuuli akapule etyi ahanda, ame Siovaa, mandyimukumbulula umwe etyi tyata mwe kombanda yovilolo viae ovinyingi vitoyesa. 5 Ame mandyikatilisa unene owoma omitima vieumbo lya Isilayeli,* mokonda aveho vayapuka kwaame, vakalandula ovilolo viavo vitoyesa.”’+
6 “Popila eumbo lya Isilayeli uti: ‘Etyi, otyo tyapopia Tatekulu Ohamba Onene Siovaa, wati: “Kondokei, yekei-po ovilolo vienyi vitoyesa, seipo* oviso vienyi aviho vitoyesa.+ 7 Mokonda tyati omu Isilayeli, onthunda-vilongo ili mova Isilayeli, okuyapuka kwaame ahulu umwe kokulandula ovilolo viae vitoyesa, atele ovanthu velipunduke valinge onkhali, aende komuuli wange+ akapula tyimwe ahanda, ame Siovaa, ame mwene mandyimukumbulula. 8 Ame omunthu oo mandyimupilukila-po, mandyimulingi otyilekesa ovanthu valondokele-ko, akalinga-linga otyipopio, pokati kovanthu vange mandyimunyimi-po;+ onwe mamukankhola umwe okuti ame, ame Siovaa.”’
9 “‘Mahi omuuli okuyondywa, akumbulula, opo ame, ame Siovaa, ame nayondya omuuli oo,+ ame mandyimutandavekela okuvoko kwange, pokati kovanthu vange ova Isilayeli, andyimunyimi-po. 10 Mwene maveketyimona kombanda yonombei vena-mbo; onombei mbo vokukapula komuuli, mambukalinga otyipuka tyike no mbomuuli watyo, 11 opo eumbo lya Isilayeli liahayapuke vali kwaame, liehelisilise vali mononkhali mbalio. Ngwe mavakalinga ovanthu vange, ame andyikalinga Huku yavo,’+ wetyipopia Tatekulu Ohamba Onene Siovaa.”
12 Ondaka ya Siovaa aindyendela vali aiti: 13 “Mona womulume, otyilongo tyamalingi onkhali, atyinthyindamena, otyo mandyityikatulila okuvoko kwange, mandyihanye-po ovilimba viokulia kwatyo,*+ mandyitumu-mo ondyala,+ mailila-mo ovanthu novinyama viatyo.”+ 14 “‘Novalume ava umwe vetatu — o Nowee,+ o Ndaniyele,+ o Sombe+ — ine vali-mo, ñgeno vetyivila vala okuyovola omienyo viavo* mwene moundingaviwa wavo,’+ wetyipopia o Tatekulu Ohamba Onene Siovaa.”
15 “‘Soka ñgeno natumine ovinyama viohika ovikalavi motyilongo, avitaata-mo ovanthu aveho, otyilongo atyilingi ekongola, amwahakwata vali nawike mokonda yowoma novinyama,+ 16 ndyitukaila umwe omwenyo wange,’ o Tatekulu Ohamba Onene Siovaa wetyipopia, ‘novalume ovo umwe vetatu, ine vali-mo, ñgeno kavayovolele ovana vavo, nii ovakwendye, nii ovakainthu; ñgeno vayovola vala omienyo viavo, otyilongo atyilingi ekongola.’”
17 “‘Soka ñgeno nakatulila otyilongo otyo+ omutunga, andyiti: “Omutunga ukwate motyilongo,” wiipae-mo ovanthu novinyama,+ 18 novalume ovo umwe vetatu ine vali-mo, ndyitukaila umwe omwenyo wange,’ o Tatekulu Ohamba Onene Siovaa wetyipopia, ‘ñgeno kavayovolele ovana vavo, nii ovakwendye, nii ovakainthu; ñgeno vayovola vala omienyo viavo.’”
19 “‘Soka ñgeno natumine omukihi motyilongo omo,+ andyuuyulila-mo onyengo yange, andyimomesa ohonde ndyinyime-mo omunthu notyinyama, 20 novo Nowee+ umwe, na Ndaniyele,+ na Sombe,+ ine vali-mo, natukaila umwe omwenyo wange,’ o Tatekulu Ohamba Onene Siovaa wetyipopia, ‘ñgeno kavayovolele ovana vavo, nii ovakwendye, nii ovakainthu; ñgeno vayovola vala omienyo viavo* mokonda ngwe onondingaviwa.’”+
21 “Etyi otyo tyapopia Tatekulu Ohamba Onene Siovaa, wati: ‘Ongootyo matyiakaenda tyina namatumu onomphela mbange ononkhwana*+ — omutunga, nondyala, novinyama ovikalavi viohika, nomukihi+ — mo Selusalei ndyinyime-mo omunthu notyinyama.+ 22 Mahi, vamwe mavesala-mo, mavahupu avatwalwa kondye,+ novana ovakwendye novakainthu. Ovovo veya no kwoove, ngwe onwe apa mumona onondyila mbavo, novipuka valinga, matyimuungumanesa amufimi-po kononkhumbi naetela o Selusalei, movipuka aviho neilinga.’”
23 “‘Ngwe mavekemuungumanesa apa mumona onondyila mbavo, novipuka valinga, onwe mamuketyikola umwe okuti o Selusalei etyi neilinga tyata-mo umwe,’+ wetyitola o Tatekulu Ohamba Onene Siovaa.”