ONOMBALULO

1 Siovaa apopi na Mwisesi moluhandya lwo Sinai,+ mohinge yomaliongiyo,+ monthiki yo tete yohanyi ya vali, etyi palamba omanima evali apa vatunda ko Isitu,+ emutolela okuti: 2 “Honeka ova Isilayeli* aveho,+ vehoneka wike-wike, omu velikalaila monombunga, noomu velikalaila momihoko viavo. Honeka omanyina ovalume vatyo aveho. 3 Noove na Alau muna okuvehoneka omu veliyapaukila,* okuhimbikila po vokuna omanima 20 okwenda no komutwe.+ Honekei ova Isilayeli aveho vapondola okwenda movilwa.

4 “Momihoko viatyo aviho, polei-mo omulume wike-wike. Momihoko nomihoko, mupola-mo onohongoi mbatyo.+ 5 Ovalume mamwii navo, omanyina avo oyaa: Womuhoko wa Lumbe, o Elisule+ omona wa Sendeule. 6 Womuhoko wa Simiyau, o Selumiyeli+ omona wa Sulisandai. 7 Womuhoko wa Sundaa, o Nasoo+ omona wa Aminandambe. 8 Womuhoko wa Isakale, o Netaneli+ omona wa Swale. 9 Womuhoko wa Sembulau, o Eliyambe+ omona wa Heloo. 10 Povana va Susee, womuhoko wa Efalaii,+ o Elisama omona wa Amiyunde. Womuhoko wa Manasesi, o Ngamaliyeli omona wa Pendasule. 11 Womuhoko wa Mbesamii, o Ambindaa+ omona wa Sindeyoni. 12 Womuhoko wa Ndaa, o Aiyesele+ omona wa Amisandai. 13 Womuhoko wa Asele, o Pasieli+ omona wa Okalaa. 14 Womuhoko wa Ngande, o Eliyasafe+ omona wa Ndeuweli. 15 Womuhoko wa Nafitalii, o Aila+ omona wa Enaa. 16 Aveho vakongwa, vapolwa momihoko aviho, mavakala onohongoi+ mbomihoko viavo. Ovo vakala ononkhalamutwe mbovanthu ovityita-novityita ova Isilayeli.”+

17 Pahe Mwisesi na Alau, avaende novalume ovo aveho vatumbulwa omanyina. 18 Avaongiya ovanthu vatyo aveho monthiki yo tete mohanyi ya vali, vahonekwe omanyina avo, ovalume aveho vokuna omanima 20 okwenda no komutwe,+ vapolwa monombunga nonombunga, no momihoko nomihoko, 19 ngeetyi Siovaa ankho atuma Mwisesi. Wevehoneka pweetyi ankho veli moluhandya lwo Sinai.+

20 Vokwatuka mu Lumbe, otyiveli tya Isilayeli,+ avahonekwa omanyina. Avahonekwa onombunga nonombunga, nomihoko nomihoko. Ovalume aveho vokuna omanima 20 okwenda no komutwe, vapondola okwenda movilwa, avahonekwa wike-wike. 21 Vomuhoko wa Lumbe vahonekwa, avavasi po 46.500.

22 Vokwatuka mu Simiyau,+ avahonekwa omanyina avo, onombunga nonombunga, nomihoko nomihoko. Ovalume aveho vokuna omanima 20 ankho vapondola okwenda movilwa, avahonekwa wike-wike. 23 Vomuhoko wa Simiyau vahonekwa, avavasi po 59.300.

24 Vokwatuka mu Ngande,+ avahonekwa omanyina avo, onombunga nonombunga, nomihoko nomihoko. Ovalume aveho vokuna omanima 20 okwenda no komutwe, vapondola okwenda movilwa, avahonekwa. 25 Vomuhoko wa Ngande vahonekwa, avavasi po 45.650.

26 Vokwatuka mu Sundaa,+ avahonekwa omanyina avo, onombunga nonombunga, nomihoko nomihoko. Ovalume aveho vokuna omanima 20 okwenda no komutwe, vapondola okwenda movilwa, avahonekwa. 27 Vomuhoko wa Sundaa vahonekwa, avavasi po 74.600.

28 Vokwatuka mu Isakale,+ avahonekwa omanyina avo, onombunga nonombunga, nomihoko nomihoko. Ovalume aveho vokuna omanima 20 okwenda no komutwe, vapondola okwenda movilwa, avahonekwa. 29 Vomuhoko wa Isakale vahonekwa, avavasi po 54.400.

30 Vokwatuka mu Sembulau+ avahonekwa omanyina avo, onombunga nonombunga, nomihoko nomihoko. Ovalume aveho vokuna omanima 20 okwenda no komutwe, vapondola okwenda movilwa, avahonekwa. 31 Vomuhoko wa Sembulau vahonekwa, avavasi po 57.400.

32 Vokwatuka mu Susee vatundile momona wae Efalaii,+ avahonekwa omanyina avo, onombunga nonombunga, nomihoko nomihoko. Ovalume aveho vokuna omanima 20 okwenda no komutwe, vapondola okwenda movilwa, avahonekwa. 33 Vomuhoko wa Efalaii vahonekwa, avavasi po 40.500.

34 Vokwatuka mu Manasesi+ avahonekwa omanyina avo, onombunga nonombunga, nomihoko nomihoko. Ovalume aveho vokuna omanima 20 okwenda no komutwe, vapondola okwenda movilwa, avahonekwa. 35 Vomuhoko wa Manasesi vahonekwa, avavasi po 32.200.

36 Vokwatuka mu Mbesamii+ avahonekwa omanyina avo, onombunga nonombunga, nomihoko nomihoko. Ovalume aveho vokuna omanima 20 okwenda no komutwe, vapondola okwenda movilwa, avahonekwa. 37 Vomuhoko wa Mbesamii vahonekwa, avavasi po 35.400.

38 Vokwatuka mu Ndaa+ avahonekwa omanyina avo, onombunga nonombunga, nomihoko nomihoko. Ovalume aveho vokuna omanima 20 okwenda no komutwe, vapondola okwenda movilwa, avahonekwa. 39 Vomuhoko wa Ndaa vahonekwa, avavasi po 62.700.

40 Vokwatuka mu Asele+ avahonekwa omanyina avo, onombunga nonombunga, nomihoko nomihoko. Ovalume aveho vokuna omanima 20 okwenda no komutwe, vapondola okwenda movilwa, avahonekwa. 41 Vomuhoko wa Asele vahonekwa, avavasi po 41.500.

42 Vokwatuka mu Nafitalii+ avahonekwa omanyina avo, onombunga nonombunga, nomihoko nomihoko. Ovalume aveho vokuna omanima 20 okwenda no komutwe, vapondola okwenda movilwa, avahonekwa. 43 Vomuhoko wa Nafitalii vahonekwa, avavasi po 53.400.

44 Ovo aveho o vokwahonekelwe na Mwisesi na Alau, nonohongoi 12 mbova Isilayeli. Onohongoi ombo ankho mbakalela-po omihoko viambo. 45 Ova Isilayeli aveho vokuna omanima 20 okwenda nokomutwe, ankho vapondola okwenda movilwa, vahonekelwe, momihoko nomihoko. 46 Aveho-aveho vahonekwa, avavasi po 603.550.+

47 Mahi vomuhoko wa Levii+ avahahonekelwa kumwe no ovo, momihoko viavo.+ 48 Siovaa atolela Mwisesi, ati: 49 “Vahamahonekwa, o vomuhoko wa Levii vala. Wehevetentheke kova Isilayeli vakwavo.+ 50 Avela vomuhoko wa Levii otyilinga tyokuyunga ekaka liefendelo, muna onondaka Mbomphango,+ novityuma viamo aviho, novipuka aviho vili-mo.+ Ovo mavatyinda-tyinda ekaka liefendelo novityuma viamo,+ ngavo vaundapa-mo.+ Tyina muli monthanda, ngwe vena okukala popepi nekaka liefendelo, avelisete nalio.+ 51 Apeho tyina ekaka liefendelo lina okwiilulwa apa lili, o vomuhoko wa Levii vena okulitungulula.+ Tyina liamesukisa okutungwa vali, o vomuhoko wa Levii vena okulitunga. Omunthu una wahapelwe otyilinga otyo,* kapondola okufwena-po, ine ufwena-po una okunkhia.+

52 “Ova Isilayeli aveho, munthu na munthu una okutunga ohinge yae apa vamatumwa okukala, omu vayapaulilwa+ momihoko viavo vitatu-vitatu, no omu veliyapaukila.* 53 Vomuhoko wa Levii vena okukalela popepi ekaka liefendelo muna onondaka Mbomphango, avelisete nalio, opo ame nahanumanena ova Isilayeli aveho.+ Vomuhoko wa Levii ovo vena otyilinga tyokuyunga nawa ekaka* liefendelo muna onondaka Mbomphango.”+

54 Ova Isilayeli avalingi umwe atyiho Siovaa atumine Mwisesi. Ngatyo umwe valinga.

2 Siovaa atolela Mwisesi na Alau ati: 2 “Ova Isilayeli vena okukala apa vapakwa, momihoko viavo vitatu-vitatu.+ Munthu na munthu una okukala apa paoyela onondimbu mbo vomuhoko wae. Onohinge mbavo mbuna okupilukila kohinge yomaliongiyo, avelisete nayo.

3 “Ava mavakala koutundilo, o vomihoko vitatu vomonthanda ya Sundaa omu veliyapaukila.* Onkhalamutwe yo vomuhoko wa Sundaa, o Nasoo+ omona wa Aminandambe. 4 Vokwahonekwa vapondola okwenda movilwa, vena 74.600.+ 5 Vomuhoko wa Isakale ovo mavalandula kuvo. Onkhalamutwe yo vomuhoko wa Isakale, o Netaneli+ omona wa Swale. 6 Vokwahonekwa vapondola okwenda movilwa, vena 54.400.+ 7 Akulandula vomuhoko wa Sembulau. Onkhalamutwe yo vomuhoko wa Sembulau, o Eliyambe+ omona wa Heloo. 8 Vokwahonekwa vapondola okwenda movilwa, vena 57.400.+

9 “Aveho vokwahonekwa vapondola okwenda movilwa, vomonthanda yo vomuhoko wa Sundaa, vena 186.400. Tyina mwenda, ovo vena okutetekela okukatuka.+

10 “Omihoko vitatu vyo monthanda ya Lumbe,+ omu veliyapaukila,* mavahulu kombwelo. Onkhalamutwe yo vokwatuka mu Lumbe, o Elisule+ omona wa Sendeule. 11 Vokwahonekwa vapondola okwenda movilwa, vena 46.500.+ 12 Vomuhoko wa Simiyau, ovo mavalandula kuvo. Onkhalamutwe yo vokwatuka mu Simiyau, o Selumiyeli+ omona wa Sulisandai. 13 Vokwahonekwa vapondola okwenda movilwa, vena 59.300.+ 14 Akulandula vomuhoko wa Ngande. Onkhalamutwe yo vokwatuka mu Ngande, o Eliyasafe+ omona wa Leweli. 15 Vokwahonekwa vapondola okwenda movilwa, vena 45.650.+

16 “Aveho vomonthanda ya Lumbe vahonekwa vapondola okwenda movilwa, vena 151.450. Tyina mukatuka, ovo vena okulandula ko vokwatetekela.+

17 “Tyina ohinge yomaliongiyo iilulwa,+ onohinge mbo vomuhoko wa Levii, mbuna okukala pokati konohinge mbo vomihoko omikwavo.

“Tyina venda, vena okweendela omu velikalailila.+ Munthu na munthu akala pomphangu yae, okweendela omu veliyapaukila, omihoko vitatu-vitatu.

18 “Omihoko vitatu viomonthanda ya Efalaii omu veliyapaukila, mavakala koutakelo. Onkhalamutwe yo vokwatuka mu Efalaii, o Elisama+ omona wa Amiyunde. 19 Vokwahonekwa vapondola okwenda movilwa, vena 40.500.+ 20 Kuvo makulandula vomuhoko wa Manasesi.+ Onkhalamutwe yo vokwatuka mu Manasesi, o Ngamaliyeli+ omona wa Pendasule. 21 Vokwahonekwa vapondola okwenda movilwa, vena 32.200.+ 22 Akulandula vomuhoko wa Mbesamii. Onkhalamutwe yo vokwatuka mu Mbesamii, o Ambindaa+ omona wa Sindeyoni. 23 Vokwahonekwa vapondola okwenda movilwa, vena 35.400.+

24 “Aveho vokwahonekwa vapondola okwenda movilwa vomonthanda ya Efalaii, vena 108.100. Ovo, ova tatu mavalandula-ko.+

25 “Omihoko vitatu vyo monthanda ya Ndaa, omu veliyapaukila, mavikala kombanda yekaka. Onkhalamutwe yo vokwatuka mu Ndaa, o Aiyesele+ omona wa Amisandai. 26 Vokwahonekwa vapondola okwenda movilwa, vena 62.700.+ 27 Mavalandula kuvo o vomuhoko wa Asele. Onkhalamutwe yo vokwatuka mu Asele, o Pasiyeli+ omona wa Okalaa. 28 Vokwahonekwa vapondola okwenda movilwa, vena 41.500.+ 29 Akulandula vomuhoko wa Nafitalii. Onkhalamutwe yo vomuhoko wa Nafitalii, o Aila+ omona wa Enaa. 30 Vokwahonekwa vapondola okwenda movilwa, vena 53.400.+

31 “Aveho vahonekwa vapondola okwenda movilwa vomonthanda ya Ndaa, vena 157.600. Ovo mavesaililwa ku aveho,+ okweendela omu veliyapaukila, omihoko vitatu-vitatu.”

32 Ovo ova Isilayeli aveho vokwahonekwa, omu velikalailila momihoko viavo. Aveho vokwahonekwa ankho vapondola okwenda movilwa, vatuukile 603.550.+ 33 Mahi vomuhoko wa Levii avahahonekelwa+ kumwe nova Isilayeli vakwavo,+ ngeetyi Siovaa atumine Mwisesi. 34 Ova Isilayeli avalingi atyiho Siovaa atumine Mwisesi. Ongootyo ankho vakala momihoko viavo, omu vatepaulilwa,+ vitatu-vitatu. Pokukatuka tupu otyo ankho valinga.+ Munthu na munthu ukatukila kumwe nombunga yae, no vomuhoko wae mwene.

3 Ava vapopiwa apa, oveanda lya Alau no lya Mwisesi vali-ko etyi Siovaa apopia na Mwisesi komphunda Sinai.+ 2 Omanyina ovana va Alau, oyaa: Otyiveli tyatyo o Nandambe, akulandula Ambiyuu+ na Eliyasale+ na Itamale.+ 3 Ovo ovana va Alau, valembulilwe avapewa otyilinga tyounakwa.*+ 4 Mahi ava ovo Nandambe na Ambiyuu ovo vana vaipaelwe na Siovaa etyi valingila Siovaa+ otyilikutila notupia twahaviukile, moluhandya lwo Sinai. Ngwe tupu kavakalele novana. Eliyasale+ na Itamale+ ovo vatwaileko motyilinga tyounakwa, avaundapela kumwe na tate yavo Alau.

5 Siovaa atolela Mwisesi, ati: 6 “Eta vomuhoko wa Levii+ veye popepi, avakala ponthele pomunakwa Alau, vemukwateseko.+ 7 Mavalingi ovilinga viavo movipuka vena okumulingila, neevi vena okulingila ovanthu aveho mohinge yomaliongiyo tyina valinga ovilinga viayemba kekaka liefendelo. 8 Mavayungu nawa ovityuma aviho+ vyo mohinge yomaliongiyo, avalingi ovilinga viavo valingila ova Isilayeli, putyina valinga ovilinga viomekaka liefendelo.+ 9 Pakula vomuhoko wa Levii ku Alau no kovana vae. Pokati kova Isilayeli aveho,+ mavakala kolutei lwae, avalingi ngoviawa, o vomuhoko wa Levii. 10 Ove una okunaka Alau novana vae, avalingi ovilinga viavo aviho viounakwa.+ Una ufwena-po wahapelwe otyilinga otyo,* una okwiipawa.”+

11 Siovaa atolela vali Mwisesi, ati: 12 “Tala! Ame ndyili nokuyapula vomuhoko wa Levii kova Isilayeli vakwavo, na vapinge povana voviveli aveho* vova Isilayeli.+ Vomuhoko wa Levii, mavakala vange. 13 Omona wotyiveli owange.+ Monthiki naipaele oviveli aviho motyilongo tyo Isitu,+ nalinga ngatyina nakoha ovana aveho oviveli vova Isilayeli, tyilinge otyiveli tyomunthu tyilinge otyinyama tyokwatetekelwa okutyitwa.+ Oviveli aviho oviange. Ame, ame Siovaa.”

14 Moluhandya lwo Sinai,+ Siovaa apopila vali Mwisesi, ati: 15 “Honeka ovana va Levii aveho omu veliyapaukila momihoko, no omu veliyapaukila monombunga. Honeka ovana ovakwendye aveho, okuhimbikila kolukembe lwohanyi ike okwenda no komutwe.”+ 16 Okweiva otyo, Mwisesi etavela otyitumino tya Siovaa, evehoneka. Alingi umwe etyi atumwa. 17 Aa omanyina ovana va Levii: O Seleso, o Kowate, o Melali.+

18 Omanyina ovana va Seleso, mwatukaile onombunga mbavo, oyaa: O Limbini, o Simei.+

19 Ovana va Kowate, omu mwatukaile omanyina onombunga mbavo, oyaa: O Anilau, o Isale, o Hemboloo, o Usiyeli.+

20 Ovana va Melali, omu mwatukaile omanyina onombunga mbavo, oyaa: O Mali,+ o Musi.+

Ovo aveho o vombunga ya Levii, omu veliyapaukila momihoko nomihoko.

21 Mu Seleso omo mwatuka ombunga yo vomuhoko wa Limbini,+ nombunga yo vomuhoko wa Simei. Ovo o vombunga ya Seleso. 22 Ovakwendye aveho vahonekelwe, okuhimbikila kolukembe lwohanyi ike okwenda no komutwe, vekehikile 7.500.+ 23 Vombunga ya Seleso, onohinge mbavo mbuhula konyima yekaka liefendelo,+ ambuhulu koutakelo. 24 Ohongoi yo vomuhoko wa Seleso, o Eliyasafe omona wa Laeli. 25 Otyilinga tyovana va Seleso+ mohinge yomaliongiyo okuyunga nawa ekaka liefendelo, nohinge,+ notyiyambelo tyatyo,+ notyinyanga tyo pombundi+ yokunyingila mohinge yomaliongiyo, 26 novinyanga+ viomepata, notyinyanga tyo kombundi+ yepata lieliseta nekaka liefendelo, nomutala wovilikutila, nonongoi mbovinyanga viohinge, novilinga aviho vilingwa viayemba kovipuka ovio.

27 Vokwatuka mu Kowate, o vombunga ya Anilau, no vombunga ya Isale, no vombunga ya Hemboloo, no vombunga ya Usiyeli. Ombo onombunga mbatundile mu Kowate.+ 28 Ovakwendye aveho okuhimbikila kolukembe lwenima like okwenda no komutwe, vekehikile 8.600. Ovo vali notyilinga tyokuyunga momphangu ikola.+ 29 Onombunga mba ava vatukile momuhoko wa Kowate, onohinge mbavo mbahulile kokumbili kwekaka.+ 30 Ohongoi yo vomuhoko wombunga ya Kowate, o Elisafaa omona wa Usiyeli.+ 31 Otyilinga tyavo okuyunga otyikasa Tyomphango,+ nomesa,+ nokandiyelo konomphalavinga,+ nomitala viovilikutila,+ novityuma viatyo aviho+ vaundapa navio momphangu ikola, notyinyanga tyomokati,+ novilinga aviho vilingwa-mo.+

32 Ohongoi yo vomuhoko wa Levii, o Eliyasale+ omona womunakwa Alau. Oe wakalelele komutwe ovilinga aviho vilingwa momphangu ikola.

33 Vokwatuka mu Melali, o vombunga ya Mali, no vombunga ya Musi. Ovo, ovo o vombunga ya Melali.+ 34 Ovakwendye aveho vahonekelwe, okupolelela kolukembe lwenima like okwenda no komutwe, vekehikile 6.200.+ 35 Ohongoi yo vomuhoko wombunga ya Melali, wali Suliyeli omona wa Ambiyeli. Ovo onohinge mbavo mbuhula kokulio kwekaka liefendelo.+ 36 Vomuhoko wa Melali ovo vena otyilinga tyokuyunga omalukweyo+ ekaka liefendelo, nomaluvala atyo,+ nonomphandyi mbatyo,+ novipundi viatyo viokuna onombundi, novityuma viatyo+ novilinga vilingwa novipuka ovio,+ 37 nonomphandyi mbatyo mbeliseta nepata, novipundi viatyo vionombundi,+ nonomphehe mbatyo, nonongoi mbatyo.

38 Vaongele onthanda komutwe wekaka liefendelo, okutala koutundilo komutwe wohinge yomaliongiyo, ovo Mwisesi, na Alau novana vae. Ovo, ovo valulika otyilinga valingila ova Isilayeli momphangu ikola. Omunthu wahapelwe otyilinga otyo,* afwene-po, wiipawa.+

39 Ovakwendye aveho vomuhoko wa Levii, okupolelela kolukembe lwenima like vahonekelwe na Mwisesi na Alau omu veliyapaukila monombunga ngeetyi Siovaa atuma, vekehikile 22.000.

40 Siovaa apopila Mwisesi ati: “Honeka ovana vova Isilayeli aveho oviveli, okuhimbikila kolukembe lwohanyi ike okwenda no komutwe,+ vevalula, ohoneka omanyina avo. 41 Vomuhoko wa Levii vepaka tyavo, valinge vange, vapinge poviveli viovana vova Isilayeli aveho.+ Ovipako aviho vyo vomuhoko wa Levii, vipinge povipako aviho viova Isilayeli+ viatetekela okutyitwa. Ame, ame Siovaa.” 42 Mwisesi ahoneka ovana vova Isilayeli oviveli ngeetyi Siovaa atuma. 43 Ovakwendye aveho oviveli vokwahonekelwe, okupolelela kolukembe lwohanyi ike okwenda no komutwe, vekehikile 22.273.

44 Siovaa apopila Mwisesi okuti: 45 “Vomuhoko wa Levii vapinge povana vova Isilayeli aveho oviveli, evi ovipako viavo, avipingi povipako aviho viova Isilayeli. Vomuhoko wa Levii mavakala vange. Ame, ame Siovaa. 46 Mokonda vomuhoko wa Levii kavatuukile movana aveho vova Isilayeli oviveli, ava vokwahupa-po+ vena 273, mavayovolwa+ 47 nonosikulu* ononthano munthu na munthu mekwavela.+ Osikulu ike ihetekwa mosikulu yo momphangu ikola.* Osikulu ituuka onosela* 20.+ 48 Onombongo ombo mbuna okupewa Alau novana vae, mbuyovole vokwahupa-po valamba mombalulo yo vomuhoko wa Levii.” 49 Mwisesi akongolola onombongo ombo mambuyovola ovana oviveli vokwahupa-po, vahatuukile mo vomuhoko wa Levii. 50 Akongolola onombongo mbovana vova Isilayeli oviveli. Ambutuuka onosikulu 1.365, mbahetekwa mosikulu yo momphangu ikola. 51 Mwisesi ape Alau novana vae onombongo ombo mbokuyovola oviveli viova Isilayeli, ngo omu Siovaa apopila. Alingi umwe ngeetyi Siovaa emutumine.

4 Siovaa pahe apopila ovo Mwisesi na Alau, eveti: 2 “Muna okuvalula ovana va Kowate,+ Kowate umwe po vokwatuka mu Levii, mokwelikalaila kwavo mombunga, nomomuhoko. 3 Muna okuvevalula aveho, okuhimbikila po vokuna omanima 30+ atee po vokuna omanima 50,+ ava vaundapa na vakwavo mohinge yomaliongiyo.+

4 “Evi ovio ovilinga vokwatuka mu Kowate, mavalingi mohinge yomaliongiyo.+ Evi mavalingi ovilinga vikola: 5 Pokutunda apa ankho muli, tyina mwenda, Alau novana vae vena okunyingila mohinge yomaliongiyo, avapolo-mo otyinyanga+ avetyihiki Kotyikasa+ Tyoumbangi. 6 Avetyipake ombandwa* yotyinyama tyomelunga, kombanda avapake-ko otyinyanga otyingole, avetyipake omitengi+ viokutyityinda.

7 “Tupu vayale otyinyanga otyingole kombanda yomesa yonombolo mbokulekeswa,+ avapake-ko omalonga, nonomphindo, novilindo, nomalufo oviawa viokunwa.+ Onombolo mbwaawa nthiki na nthiki,+ oko mbuna okukala apeho. 8 Vayale-ko otyinyanga tyikuhuka, kombanda yomesa avapake-ko oseta* yotyinyama tyomelunga, avetyipake omitengi+ viokutyityinda. 9 Avapolo otyinyanga otyingole, avahiki natyo okandiyelo kokumimikila konomphalavinga,+ novikandiyelo viako,+ no viokunyima omutemo,* noviyukilo vietwe,+ novikwatelo aviho vipakwa omulela upakwa-mo opo kahanyime. 10 Avawingila okandiyelo konomphalavinga pombandwa yotyinyama tyomelunga novityuma viatyo aviho, avekepake komutengi wokuketyinda. 11 Vayale otyinyanga otyingole komutala wovilikutila woolu,+ avapake-ko oseta yotyinyama tyomelunga, pahe aveupake omitengi+ viao viokuutyinda. 12 Pahe avapolo ovityuma aviho+ vaundapa navio apeho momphangu ikola, avevipake potyinyanga otyingole. Vevihike noseta yotyinyama tyomelunga, avevipake komutengi wokuvityinda.

13 Etwe* komutala velipole-ko,+ avayale-ko otyinyanga tyotyivala tyonkhula. 14 Komutala oko vapake-ko ovityuma aviho vaundapa-ko navio, oviyukilo viotupia, nonombalo, nonopaa, novilindo, ovityuma aviho vaundapa navio komutala.+ Tupu vahike-ko oseta yotyinyama tyomelunga, aveupake omitengi+ viokuutyinda.

15 “Tyina vati pokwenda, pokutunda apa veli, Alau novana vae vena okuhika kovipuka aviho vyo momphangu ikola,+ novityuma viamo. Ovana va Kowate ovo mavanyingila-mo avevityindi-mo.+ Mahi kavapondola okuyama kovipuka vyo momphangu ikola, ine vayama-ko vankhia.+ Otyo otyilinga* ovana va Kowate mavalingi mohinge yomaliongiyo.

16 “Otyilinga tyokutala ine pena omulela,+ nombao yokunika nawa,+ notyiawa tyovilia tyilingwa apeho, nomulela wokulembula,+ otya Eliyasale+ omona womunakwa Alau. Oe una okuyunga ekaka liefendelo, novipuka aviho vili-mo, no momphangu ikola, novityuma viatyo.”

17 Siovaa atolela vali Mwisesi na Alau, ati: 18 “Wahayeke vomuhoko wa Kowate,+ vamwe po vokwatuka mu Levii vavombe-ko. 19 Mahi etyi muna okuvelingila opo tyina vafwena povipuka vikola unene+ vahupe, vahankhie, otyetyi: Alau novana vae mavanyingila-mo ngavo vapa ovanthu ovilinga, avapopila munthu na munthu etyi ena okutyinda. 20 Kavapondola okunyingila, avamono ovipuka vikola, nii vala katutu. Ine valinga ngootyo, mavankhi.”+

21 Siovaa atolela Mwisesi, ati: 22 “Honeka omanyina o vokwatuka mu Seleso,+ mokwelikalaila kwavo mombunga, momihoko nomihoko. 23 Honeka aveho vokuna omanima 30 atee po vokuna omanima 50, vamwe pu ava vapewa otyilinga tyokuundapa mohinge yomaliongiyo. 24 Vomuhoko wa Seleso ovilinga vapewa vena okulinga, novipuka vena okutyinda ovievi:+ 25 Ovo mavatyindi ovinyanga viekaka liefendelo,+ nohinge yomaliongiyo notyiyambelo tyatyo, noseta yotyinyama tyomelunga ili kombanda yatyo,+ notyinyanga tyo pombundi yohinge yomaliongiyo,+ 26 novinyanga viomepata,+ notyinyanga tyo pombundi yepata+ lieliseta Nekaka Liefendelo, nomutala wovilikutila nonongoi mbatyo, novityuma aviho vaundapa navio motyilinga otyo. Otyo, otyo otyilinga vapewa. 27 Movilinga ovio aviho vomuhoko wa Seleso+ mavalingi, novipuka mavatyindi, Alau novana vae ovo vevekalela komutwe. Onwe, onwe muvenakela ovilinga viovipuka aviho vena okutyinda. 28 Otyo otyilinga vomuhoko wa Seleso vena okulinga mohinge yomaliongiyo.+ Motyilinga tyavo, valulikwa na Itamale+ omona womunakwa Alau.

29 “Ava vomuhoko wa Melali,+ vehoneka mokwelikalaila kwavo mombunga, omihoko nomihoko. 30 Honeka ovanthu okuhimbikila po vokuna omanima 30 atee po vokuna omanima 50. Honeka aveho vapewa otyilinga tyokuundapa mohinge yomaliongiyo. 31 Otyilinga tyavo mavalingi mohinge yomaliongiyo, okutyinda+ ovipuka evi: Omavai omalukweyo+ ekaka liefendelo, nomaluvala atyo,+ nonomphandyi mbatyo,+ novipundi viatyo vionombundi,+ 32 nonomphandyi+ mbeliseta nepata, novipundi viatyo vionombundi,+ nonomphehe mbatyo,+ nonongoi mbatyo mbokwiikwata, novityuma viatyo aviho. Ovo vena okulinga ovilinga aviho viayemba kovipuka ovio. Una okutalela komanyina avo pokuvenakela evi vatyinda. 33 Evi ovilinga vomuhoko wa Melali+ mavalingi mohinge yomaliongiyo, tyihongolelwa na Itamale omona womunakwa Alau.”+

34 Pahe ovo Mwisesi na Alau, nonohongoi+ mbova Isilayeli aveho, avahoneka vomuhoko wa Kowate,+ mokwelikalaila kwavo mombunga, no momihoko, 35 aveho, okupolelela po vomanima 30 atee po vomanima 50, vamwe pu ava vaundapa mohinge yomaliongiyo.+ 36 Aveho vokwahonekwa mokwelikalaila kwavo mombunga, ankho vena 2.750.+ 37 Ovo, o vokwahonekwa vomuhoko wa Kowate, aveho ankho vapondola okuundapa mohinge yomaliongiyo. Mwisesi na Alau avevehoneka ngeetyi Siovaa atumine etyi apopia na Mwisesi.+

38 Vomuhoko wa Seleso+ avahonekwa mokwelikalaila kwavo mombunga, omihoko nomihoko. 39 Aveho okupolelela po vomanima 30 atee po vomanima 50, vamwe pu ava vaundapa mohinge yomaliongiyo avahonekwa. 40 Aveho vokwahonekwa mokwelikalaila kwavo mombunga, omihoko nomihoko, ankho vena 2.630.+ 41 Ovo, o vokwahonekwa vomuhoko wa Seleso, aveho ankho vapondola okuundapa mohinge yomaliongiyo. Mwisesi na Alau avevehoneka ngeetyi Siovaa atumine.+

42 Vomuhoko wa Melali avahonekwa aveho mokwelikalaila kwavo mombunga, omihoko nomihoko. 43 Vahonekelwe aveho okupolelela po vomanima 30 atee po vomanima 50, vamwe pu ava vapondola okuundapa mohinge yomaliongiyo.+ 44 Aveho vokwahonekwa, mokwelikalaila kwavo mombunga, ankho vena 3.200.+ 45 Ovo, o vomuhoko wa Melali, ava Mwisesi na Alau vahonekele ngeetyi Siovaa atumine etyi apopile na Mwisesi.+

46 Ovo Mwisesi na Alau, nonohongoi mbova Isilayeli avahoneka ovanthu ovo aveho vomuhoko wa Levii mokwelikalaila kwavo mombunga, omihoko nomihoko, 47 ankho o vomanima okupolelela 30 atee po vomanima 50. Aveho avapewa otyilinga mavalingi, novipuka vena okutyinda viohinge yomaliongiyo.+ 48 Aveho vokwahonekwa ankho vena 8.580.+ 49 Ovo aveho vahonekelwe ngeetyi Siovaa atumine etyi apopia na Mwisesi, omu ankho vayapaulilwa movilinga viavo, no movipuka ankho vena okutyinda. Vahonekelwe ngeetyi Siovaa atumine Mwisesi.

5 Siovaa atolela vali Mwisesi, ati: 2 “Popila ova Isilayeli vapole pokati kavo omunthu walinga otyilunda,+ no ou utunda oluvinga-honde,+ no ou wasila mokonda yokwayama kotyivimbi.*+ 3 Tyilinge omulume tyilinge omukai, muna okumutwala kokule na apa muli. Mupolei pokati kenyi opo ahatambulise+ nawike povanthu ame ndyikala navo.”+ 4 Ova Isilayeli ngatyo umwe valinga. Avalupula pondye ovanthu aveho valinga ovipuka ovio. Ova Isilayeli avalingi umwe etyi Siovaa atuma etyi apopia na Mwisesi.

5 Siovaa apopila Mwisesi, ati: 6 “Tolela ova Isilayeli uti: ‘Ine omunthu umwe, tyilinge omulume tyilinge omukai, ulinga ovipuka viapenga ovanthu valinga, alingi onkhali ku Siovaa, omunthu oo una* okuvelwa onombei.+ 7 Una* okulipopia+ onkhali alinga,* afete etyi tyituuka monkhali yae. Ku etyi afeta ayawisa-ko, konopalata 5 uyawisa-ko ike.+ Etyi afeta utyiavela omunthu apengesa. 8 Mahi ine omunthu wokwalingwa etyi tyapenga utupu wavo ombunga yae mwene-mwene upondola okutambula etyi tyafetwa, opo tyipewa Siovaa atyilingi tyomunakwa. Waavela omunakwa ovipuka ovio, nongi onthwei yokumukoha ononkhali alinga.+

9 “‘Oviawa aviho vikola+ ova Isilayeli valinga, evi vapa omunakwa, vilinga viae.+ 10 Ovipuka vikola munthu na munthu aeta, vilinga viae. Etyi munthu na munthu apa omunakwa, o tyomunakwa.’”

11 Siovaa atolela ñgoo vali Mwisesi, ati: 12 “Tolela ova Isilayeli, uti: ‘Omukai wamaende konyima omulume wae, akalinga oumbalehi, 13 omulume umwe alala nae,+ mahi omulume wae ehetyiivi, atyikala vala ngootyo tyaholama, ngwe akala tyasila, apahamono nawike upopia etyi alinga, nii apahamono nawike umuvasa, una okulingwa ñgaa: 14 Ine omulume wae umulingila onkhwelume, alungila omukai wae okuti hamwe walinga oumbalehi, mahi ngwe tyili wetyilinga umwe, ine hamwe omulume wae wemulingila onkhwelume, alungila vala omukai wae okuti hamwe walinga oumbalehi, mahi ngwe ketyilingile, 15 omulume una okutwala omukai wae komunakwa, atwailila otyiawa tyilingilwa omukai wae. Utwala omapati evali ohinde yosevata. Kapondola okutila-ko omulela, nii okupaka-ko olimbanu, mokonda otyo otyiawa tyovilia tyalingilwa onkhwelume, otyiawa tyovilia tyikuhinangelesa otyivi tyalingwa.

16 “‘Omunakwa umweeta, emutalameka komutwe wa Siovaa.+ 17 Omunakwa apole kapii omaande akola apake momulindi, apolo katutu ombuma yeheke pohi, mekaka liefendelo, einyanye momaande omo. 18 Omunakwa matalameka omukai oo komutwe wa Siovaa, onohuki mbomukai oo embukutulula ambuyendyelela, emupake pomavoko otyiawa tyovilia, tyokuhinangelesa otyivi tyalingwa, otyiawa tyovilia tyalingilwa onkhwelume.+ Omunakwa akwate peke liae omaande alula aeta elalavi.+

19 “‘Omunakwa matumu omukai oo aane, emuti: “Ine kwaendele nomulume omukwavo ngwe una-le omulume wove,+ tupu kwaendele konyima omulume wove nii kwalingile oumbalehi, opo omaande aa alula aetela ovanthu elalavi, kamaekulingi natyike. 20 Mahi ine waenda konyima omulume wove ngwe wanepwa, olingi oumbalehi, okulala nomulume+ wehe-wove, opo . . .” 21 omunakwa matumu omukai oo aane, elihingi, apopila omukai oo, ati: “Etyi Siovaa mekulingi, matyikapopaiwa apeho pokuteyela omunthu onkhano, na tyina omunthu umwe aana. Siovaa mekupolo olutyito* ohamono ovana, eimo liove alimiti. 22 Omaande aa okweeta elalavi, maekunyingila momala, eimo liove alimiti, ohakala vali nolutyito.”* Omukai apopie okuti: “Otyo yatyo! Otyo yatyo!”*

23 “‘Pahe omunakwa ahoneka omalalavi oo momukanda, omukanda oo eupake momaande okwalula, omalalavi oo eenyimi-ko. 24 Anwisa omukai oo omaande okwalula aeta elalavi, aanyingila molutu, otyo atyimweetela ononkhumbi. 25 Omunakwa mapolo otyiawa tyovilia peke liomukai oo, tyalingilwa onkhwelume,+ aendaisa otyiawa otyo tyovilia no komutwe no konyima, komutwe wa Siovaa. Pahe etyitwala komutala wovilikutila. 26 Omunakwa mapolo ovilia viyula peke, avilingi ngatyina o viotyiawa atyiho, evipake komutala+ vitwimine-ko, pahe atumu omukai oo anwe omaande atyo. 27 Tyina amemunwisa omaande oo, ine tyili walinga umwe oumbalehi, waenda konyima omulume wae, omaande aeta elalavi, maanyingila mwe, aemweetela ononkhumbi, eimo liae alimiti, ahakala vali novana.* Omukai oo apeho makatumbaulwa tyina pena ou uteyelwa onkhano. 28 Mahi ine omukai oo kalingile oumbalehi, wasukuka, opo mayovoka kononkhumbi ombo. Makala nolutyito, akala-kala novana.

29 “‘Otyo otyitumino tyonkhwelume+ tyina okulandulwa tyina omukai amaende omulume wae konyima, alingi oumbalehi ngwe wanepwa, 30 na tyina omulume amalingi onkhwelume, alungila omukai wae okuti hamwe wemweenda konyima. Una okumweeta emutalameka komutwe wa Siovaa, omunakwa alingi atyiho tyina okulingwa omukai oo tyapopiwa motyitumino. 31 Omulume mayovoka, kamavelwa onombei. Mahi omukai malingwa etyi tyata mweetyi alinga.’”

6 Siovaa atolela vali Mwisesi, emuti: 2 “Popila ova Isilayeli uti: ‘Tyilinge omulume tyilinge omukai, ou wamaane elipakula akale omu Nasileu*+ wa Siovaa, 3 kapondola okuyama kovinyu, nii kovikunwa ovikwavo vikoleswa. Kapondola okunwa ovinyu, nii otyipuka natyike tyipialukisa.+ Kapondola okunwa natyike tyalingwa nonouva, nii kapondola okulia onouva mbatyo, tyilinge mbatalala tyilinge mbakukuta. 4 Kapondola okulia otyipuka natyike tyomuti wonouva, tyilinge onouva mbahapile, tyilinge omapeta atyo, kapondola okulia ovipuka ovio ononthiki ambuho makala omu Nasileu.

5 “‘Kapondola okukululwa onohuki momutwe+ ononthiki ambuho apanga okukala omu Nasileu. Una okukala omunthu ukola, onohuki mbae embuyeke vala ngootyo atee ononthiki elipakula ku Siovaa mbupwa. 6 Ononthiki ambuho elipakula ku Siovaa, kapondola okufwena* pomunthu wanyima.* 7 Ngatyilinga-linga he, ine hamwe o ina, ine hamwe omukulu wae, ondenge yae, omphange yae, kapondola okumuyama elisilisa.+ Mokonda onohuki mbae mbekula tupu mbulekesa okuti omu Nasileu wa Huku yae.

8 “‘Malingi omunthu ukola wa Siovaa ononthiki ambuho mbou-Nasileu wae. 9 Mahi ine umwe utikuka, ankhila ponthee yae,+ emuyame, asilisa onohuki mbae mbulekesa okuti welipakula ku Huku,* una okumbukulula-ko ambuho komutwe+ monthiki makohwa. Una okumbukulula-ko monthiki ya pandu-vali. 10 Monthiki ya tyinana una okutwala komunakwa kombundi yohinge yomaliongiyo omakuti evali, okuti hatyo, omailona evali onopomba. 11 Omunakwa like melilingi otyiawa tyononkhali, ekwavo elilingi otyiawa tyokuyokwa, emukoho konkhali yae, mokonda wakwata onkhali+ yokwafwena pomunthu wankhia.* O monthiki omo, omunthu oo omu Nasileu makoho omutwe wae konkhali. 12 Una okuwana vali okulipakula, akala vali omu Nasileu wa Siovaa, aeta ondyona ina enima like ilingwe otyiawa tyokwavelwa onombei. Mahi ononthiki mbo tete ankho elipakula, kambuvalulwa mokonda walinga etyi tyapenga asilisa ou-Nasileu wae.

13 “‘Otyitumino tyomunthu welipakula akala omu Nasileu otyetyi: Tyina omanima elipakula akale omu Nasileu amapu,+ una okutwalwa kombundi yohinge yomaliongiyo. 14 Oko, oko malingila Siovaa otyiawa. Waava ondyona ikahi nawa ina enima like, ilingwe otyiawa tyokuyokwa,+ nondyona ondema ina enima like ikahi nawa ilingwe otyiawa tyononkhali,+ nongi onthwei ikahi nawa ilingwe otyilikutila tyombembwa,+ 15 nosesu yonombolo mbeliseta elola mbahaile onkhiso, mbalingwa nofinde yanyetuka yahonyekwa nomulela, nonombolo mbelisipata mbehena onkhiso mbawavekwa omulela, noviawa viatyo viovilia,+ no viovikunwa.+ 16 Omunakwa mevieetela Siovaa, evilingi otyiawa tyononkhali, notyiawa tyokuyokwa. 17 Aavela Siovaa ongi ilingwe otyilikutila tyombembwa, nosesu yonombolo mbahaile onkhiso. Omunakwa tupu maave otyiawa tyatyo tyovilia+ no tyovikunwa.

18 “‘Omu Nasileu makakeyelwa onohuki momutwe+ kombundi yohinge yomaliongiyo, embukulula-ko ambuho. Onohuki ombo mbekula etyi ankho omu Nasileu, embupolo, embuyumbu motupia mombwelo yotyilikutila tyombembwa. 19 Omunakwa mapolo epe liongi liatelekwa,+ nombolo yeliseta elola yahaile onkhiso yapolwa mosesu, nombolo yelisipata yahaile onkhiso, ovipuka ovio evipake pomavoko omu Nasileu tyina amakululwa onohuki mbae mbou-Nasileu. 20 Omunakwa mevieendaisa no komutwe no konyima, vilingwe otyiawa tya Siovaa+ tyokweendaiswa. Otyo, otyipuka tyikola tyilingwa nomunakwa, tyilingilwa kumwe nolukolo lwotyiawa tyokweendaiswa, notyikalo tyaawa.+ Tyina otyo tyamalingwa, omu Nasileu pahe anu ovinyu.

21 “‘Etyi otyitumino omu Nasileu+ walinga omphango aane ena okulandula. Ine una-tyo, utyivila okulingila Siovaa otyiawa otyinene, tyilamba pweetyi aitwa mou-Nasileu wae, mwene oe walinga omphango, una okulinga ngeetyi mwene apanga, opo afwisepo otyitumino tyou-Nasileu.’”

22 Siovaa atolela vali Mwisesi, ati: 23 “Popila ovo Alau novana vae uti: ‘Oñgaa muna okupopila ova Isilayeli tyina muvehandela elao,+ muti:

24 “Siovaa emupe elao,+ emuyungu nawa.

25 Otyipala tya Siovaa tyiete onohanya no mwoonwe,+ emuhambukilwa.

26 Siovaa emulinge onkhenda, emwaavela ombembwa.”’+

27 Ngwe mavakapaka enyina liange momuhoko wova Isilayeli,+ opo ame ndyivepe elao.”+

7 Monthiki Mwisesi amana okutalameka ekaka liefendelo,+ elilembula,+ elikoho, nalio novipuka viamo aviho, nomutala wovilikutila, novityuma viatyo aviho.+ Etyi elilembula, asukukisa ovipuka ovio,+ 2 ovakulu vomo Isilayeli,+ ononkhalamutwe mbomihoko nomihoko avalingi otyiawa. Onohongoi ombo mbomihoko, ovo vana vokwali ononkhalamutwe mbotyilinga tyokuhoneka ovanthu. 3 Avaeta otyiawa tyavo ku Siovaa. Vaetele omakalosa epandu, nonongombe ononthwei 12. Vevali vaetele okalosa keke, onongombe ononthwei,* atyiti ou waeta yae ou waeta yae. Avaeta oviawa ovio pekaka liefendelo. 4 Siovaa atolela Mwisesi, ati: 5 “Vetambula ovipuka ovio vaeta, mokonda ovio maviuundapwa navio motyilinga tyohinge yomaliongiyo, aveho veavaila-vio, okutalela kotyilinga vena-tyo.”

6 Mwisesi etavela, atambula omakalosa oo, nonongombe ononthwei mbaetwa, embupakula ko vomuhoko wa Levii. 7 Aavela vokwatuka mu Seleso omakalosa evali, nonongombe ononkhwana ononthwei, ovipuka mavesuku navio motyilinga tyavo.+ 8 Aavela vokwatuka mu Melali omakalosa ekwana, nonongombe etyinana ononthwei. Wevepa ovipuka ovio, ovipuka mavesuku navio motyilinga tyavo. Ovipuka ovio aviho vapewa-pewa, wevikalelele komutwe o Itamale omona womunakwa Alau.+ 9 Mahi ava ovana va Kowate, ehevepe natyike, mokonda ovilinga viavo viayemba ku etyi tyilingwa momphangu ikola.+ Ovo vatyinda ovipuka vikola potyipepe.+

10 Onohongoi ambulingi otyiawa tyokupakula+ omutala wovilikutila monthiki walembulwa. Etyi onohongoi ombo mbalinga otyiawa komutala wovilikutila, 11 Siovaa atolela Mwisesi, ati: “Onohongoi ambuho mbuna okweeta oviawa viambo viokupakula omutala wovilikutila. Tyitie ohongoi ei yeeta onthiki ei, ei yeeta onthiki ei, mononthiki mbelilandula.”

12 Ou waetele otyiawa tyae monthiki yo tete, o Nasoo+ omona wa Aminandambe, womuhoko wa Sundaa. 13 Otyiawa tyae alinga, otyilindo tyopalata tyilema ono sikulu* 130, nokatemba kopalata kalema ono sikulu 70, mbata mosikulu yomomphangu ikola.*+ Tyilinge motyilindo otyo tyilinge mokatemba oko mweyula ofinde yanyetuka yahonya nomulela, yotyiawa tyovilia,+ 14 nokalindo* okatutu koolu kalema ono sikulu 10 keyula ombao, 15 nondume-tane, nongi onthwei, nondyona onthwei ina enima, vilingwe otyiawa tyokuyokwa,+ 16 notyinkhombo otyitwei matyilingwa otyiawa tyononkhali.+ 17 Evi mavilingwa otyilikutila tyombembwa,+ aave onongombe onombali ononthwei, nonongi ononthano ononthwei, nononkhombo ononthano ononthwei, nonondyona ononthano ononthwei mbuna enima like-like. Otyo tyali otyiawa tya Nasoo omona wa Aminandambe.+

18 Monthiki ya vali, ohongoi yo vomuhoko wa Isakale, Netaneli+ omona wa Swale, alingi otyiawa tyae. 19 Otyiawa tyae aeta, otyilindo tyopalata tyilema ono sikulu 130, nokatemba kopalata kalema ono sikulu 70 mbata mo sikulu yomomphangu ikola.+ Tyilinge motyilindo otyo, tyilinge mokatemba oko mweyula ofinde yanyetuka yahonyekwa nomulela, yotyiawa tyovilia,+ 20 nokalindo okatutu ko olu kalema ono sikulu 10, keyula ombao, 21 nondume-tane, nongi onthwei, nondyona onthwei ina enima like, vilingwe otyiawa tyokuyokwa,+ 22 notyinkhombo otyitwei matyilingwa otyiawa tyononkhali.+ 23 Evi mavilingwa otyilikutila tyombembwa,+ aave onongombe onombali ononthwei, nonongi ononthano ononthwei, nononkhombo ononthano ononthwei, nonondyona ononthano ononthwei mbuna enima like-like. Otyo tyali otyiawa tya Netaneli omona wa Swale.

24 Monthiki ya tatu, ohongoi yo vomuhoko wa Sembulau,+ Eliyambe omona wa Heloo, 25 alingi otyiawa tyae. Otyiawa tyae aeta, otyilindo tyopalata tyilema ono sikulu 130, nokatemba kopalata kalema ono sikulu 70 mbata mo sikulu yomomphangu ikola.+ Tyilinge motyilindo otyo, tyilinge mokatemba oko, mweyula ofinde yanyetuka yahonya nomulela, yotyiawa tyovilia,+ 26 nokalindo okatutu koolu, kalema ono sikulu 10 keyula ombao, 27 nondume-tane, nongi onthwei, nondyona onthwei ina enima like, vilingwe otyiawa tyokuyokwa,+ 28 notyinkhombo otyitwei matyilingwa otyiawa tyononkhali.+ 29 Evi mavilingwa otyilikutila tyombembwa,+ aave onongombe onombali ononthwei, nonongi ononthano ononthwei, nononkhombo ononthano ononthwei, nonondyona ononthano ononthwei mbuna enima like-like. Otyo tyali otyiawa tya Eliyambe+ omona wa Heloo.

30 Monthiki ya kwana, ohongoi yo vomuhoko wa Lumbe, Elisule+ omona wa Sendeule, 31 alingi otyiawa tyae. Otyiawa tyae aeta, otyilindo tyopalata tyilema ono sikulu 130, nokatemba kopalata kalema ono sikulu 70 mbata mo sikulu yomomphangu ikola.+ Tyilinge motyilindo otyo, tyilinge mokatemba oko, mweyula ofinde yanyetuka yahonya nomulela, yotyiawa tyovilia,+ 32 nokalindo okatutu koolu kalema ono sikulu 10 keyula ombao, 33 nondume-tane, nongi onthwei, nondyona onthwei ina enima like, vilingwe otyiawa tyokuyokwa,+ 34 notyinkhombo otyitwei matyilingwa otyiawa tyononkhali.+ 35 Evi mavilingwa otyilikutila tyombembwa,+ aave onongombe onombali ononthwei, nonongi ononthano ononthwei, nononkhombo ononthano ononthwei, nonondyona ononthano ononthwei mbuna enima like-like. Otyo tyali otyiawa tya Elisule+ omona wa Sendeule.

36 Monthiki ya tano, ohongoi yo vomuhoko wa Simiyau, Selumiyeli+ omona wa Sulisandai, 37 alingi otyiawa tyae. Otyiawa tyae aeta, otyilindo tyopalata tyilema ono sikulu 130, nokatemba kopalata kalema ono sikulu 70 mbata mo sikulu yomomphangu ikola.+ Tyilinge motyilindo otyo, tyilinge mokatemba oko, mweyula ofinde yanyetuka yahonya nomulela, yotyiawa tyovilia,+ 38 nokalindo okatutu koolu kalema ono sikulu 10 keyula ombao, 39 nondume-tane, nongi onthwei, nondyona onthwei ina enima like, vilingwe otyiawa tyokuyokwa,+ 40 notyinkhombo otyitwei matyilingwa otyiawa tyononkhali.+ 41 Evi mavilingwa otyilikutila tyombembwa,+ aave onongombe onombali ononthwei, nonongi ononthano ononthwei, nononkhombo ononthano ononthwei, nonondyona ononthano ononthwei mbuna enima like-like. Otyo tyali otyiawa tya Selumiyeli+ omona wa Sulisandai.

42 Monthiki ya pandu, ohongoi yo vomuhoko wa Ngande, Eliyasafe+ omona wa Ndeuweli, 43 alingi otyiawa tyae. Otyiawa tyae aeta, otyilindo tyopalata tyilema ono sikulu 130, nokatemba kopalata kalema ono sikulu 70 mbata mo sikulu yomomphangu ikola.+ Tyilinge motyilindo otyo, tyilinge mokatemba oko, mweyula ofinde yanyetuka yahonya nomulela, yotyiawa tyovilia,+ 44 nokalindo okatutu koolu kalema ono sikulu 10 keyula ombao, 45 nondume-tane, nongi onthwei, nondyona onthwei ina enima like, vilingwe otyiawa tyokuyokwa,+ 46 notyinkhombo otyitwei matyilingwa otyiawa tyononkhali.+ 47 Evi mavilingwa otyilikutila tyombembwa,+ aave onongombe onombali ononthwei, nonongi ononthano ononthwei, nononkhombo ononthano ononthwei, nonondyona ononthano ononthwei, ambuho mbuna enima like. Otyo tyali otyiawa tya Eliyasafe+ omona wa Ndeuweli.

48 Monthiki ya pandu-vali, ohongoi yo vomuhoko wa Efalaii, Elisama+ omona wa Amiyunde, 49 alingi otyiawa tyae. Otyiawa tyae aeta, otyilindo tyopalata tyilema ono sikulu 130, nokatemba kopalata kalema ono sikulu 70 mbata mo sikulu yomomphangu ikola.+ Tyilinge motyilindo otyo, tyilinge mokatemba oko, mweyula ofinde yanyetuka yahonya nomulela, yotyiawa tyovilia,+ 50 nokalindo okatutu koolu kalema ono sikulu 10 keyula ombao, 51 nondume-tane, nongi onthwei, nondyona onthwei ina enima like, vilingwe otyiawa tyokuyokwa,+ 52 notyinkhombo otyitwei matyilingwa otyiawa tyononkhali.+ 53 Evi mavilingwa otyilikutila tyombembwa,+ aave onongombe onombali ononthwei, nonongi ononthano ononthwei, nononkhombo ononthano ononthwei, nonondyona ononthano ononthwei mbuna enima like-like. Otyo tyali otyiawa tya Elisama+ omona wa Amiyunde.

54 Monthiki ya tyinana, ohongoi yo vomuhoko wa Manasesi, Ngamaliyeli+ omona wa Pendasule, 55 alingi otyiawa tyae. Otyiawa tyae aeta, otyilindo tyopalata tyilema ono sikulu 130, nokatemba kopalata kalema ono sikulu 70 mbata mo sikulu yomomphangu ikola.+ Tyilinge motyilindo otyo, tyilinge mokatemba oko, mweyula ofinde yanyetuka yahonya nomulela, yotyiawa tyovilia,+ 56 nokalindo okatutu koolu kalema onosikulu 10 keyula ombao, 57 nondume-tane, nongi onthwei, nondyona onthwei ina enima like, vilingwe otyiawa tyokuyokwa,+ 58 notyinkhombo otyitwei matyilingwa otyiawa tyononkhali.+ 59 Evi mavilingwa otyilikutila tyombembwa,+ aave onongombe onombali ononthwei, nonongi ononthano ononthwei, nononkhombo ononthano ononthwei, nonondyona ononthano ononthwei mbuna enima like-like. Otyo tyali otyiawa tya Ngamaliyeli+ omona wa Pendasule.

60 Monthiki ya tyive, ohongoi+ yo vomuhoko wa Mbesamii, Ambindaa+ omona wa Sindeyoni, 61 alingi otyiawa tyae. Otyiawa tyae aeta, otyilindo tyopalata tyilema ono sikulu 130, nokatemba kopalata kalema ono sikulu 70 mbata mo sikulu yomomphangu ikola.+ Tyilinge motyilindo otyo, tyilinge mokatemba oko, mweyula ofinde yanyetuka yahonya nomulela, yotyiawa tyovilia,+ 62 nokalindo okatutu koolu kalema onosikulu 10 keyula ombao, 63 nondume-tane, nongi onthwei, nondyona onthwei ina enima like, vilingwe otyiawa tyokuyokwa,+ 64 notyinkhombo otyitwei matyilingwa otyiawa tyononkhali.+ 65 Evi mavilingwa otyilikutila tyombembwa,+ aave onongombe onombali ononthwei, nonongi ononthano ononthwei, nononkhombo ononthano ononthwei, nonondyona ononthano ononthwei mbuna enima like-like. Otyo tyali otyiawa tya Ambindaa+ omona wa Sindeyoni.

66 Monthiki 10, ohongoi yo vomuhoko wa Ndaa, Aiyesele+ omona wa Amisandai, 67 alingi otyiawa tyae. Otyiawa tyae aeta, otyilindo tyopalata tyilema ono sikulu 130, nokatemba kopalata kalema ono sikulu 70 mbata mo sikulu yomomphangu ikola.+ Tyilinge motyilindo otyo, tyilinge mokatemba oko, mweyula ofinde yanyetuka yahonya nomulela, yotyiawa tyovilia,+ 68 nokalindo okatutu koolu kalema onosikulu 10 keyula ombao, 69 nondume-tane, nongi onthwei, nondyona onthwei ina enima like, vilingwe otyiawa tyokuyokwa,+ 70 notyinkhombo otyitwei matyilingwa otyiawa tyononkhali.+ 71 Evi mavilingwa otyilikutila tyombembwa,+ aave onongombe onombali ononthwei, nonongi ononthano ononthwei, nononkhombo ononthano ononthwei, nonondyona ononthano ononthwei mbuna enima like-like. Otyo tyali otyiawa tya Aiyesele+ omona wa Amisandai.

72 Monthiki 11, ohongoi yo vomuhoko wa Asele, Pasiyeli+ omona wa Okalaa, 73 alingi otyiawa tyae. Otyiawa tyae aeta, otyilindo tyopalata tyilema ono sikulu 130, nokatemba kopalata kalema ono sikulu 70 mbata mo sikulu yomomphangu ikola.+ Tyilinge motyilindo otyo, tyilinge mokatemba oko, mweyula ofinde yanyetuka yahonya nomulela, yotyiawa tyovilia,+ 74 nokalindo okatutu koolu kalema ono sikulu 10 keyula ombao, 75 nondume-tane, nongi onthwei, nondyona onthwei ina enima like, vilingwe otyiawa tyokuyokwa,+ 76 notyinkhombo otyitwei matyilingwa otyiawa tyononkhali.+ 77 Evi mavilingwa otyilikutila tyombembwa,+ aave onongombe onombali ononthwei, nonongi ononthano ononthwei, nononkhombo ononthano ononthwei, nonondyona ononthano ononthwei mbuna enima like-like. Otyo tyali otyiawa tya Pasiyeli omona wa Okalaa.+

78 Monthiki 12, ohongoi yo vomuhoko wa Nafitalii, Aila+ omona wa Enaa, 79 alingi otyiawa tyae. Otyiawa tyae aeta, otyilindo tyopalata tyilema ono sikulu 130, nokatemba kopalata kalema ono sikulu 70 mbata mo sikulu yomomphangu ikola.+ Tyilinge motyilindo otyo, tyilinge mokatemba oko, mweyula ofinde yanyetuka yahonya nomulela, yotyiawa tyovilia,+ 80 nokalindo okatutu koolu kalema ono sikulu 10 keyula ombao, 81 nondume-tane, nongi onthwei, nondyona onthwei ina enima like, vilingwe otyiawa tyokuyokwa,+ 82 notyinkhombo otyitwei matyilingwa otyiawa tyononkhali.+ 83 Evi mavilingwa otyilikutila tyombembwa,+ aave onongombe onombali ononthwei, nonongi ononthano ononthwei, nononkhombo ononthano ononthwei, nonondyona ononthano ononthwei mbuna enima like-like. Otyo tyali otyiawa tya Aila+ omona wa Enaa.

84 Otyo otyiawa+ tyalingilwe nonohongoi mbova Isilayeli tyokwapakulilwe komutala wovilikutila pweetyi walembulwa: Ovilindo 12 viopalata, nomatemba 12 opalata, noutemba oututu 12 woolu.+ 85 Ovilindo ovio viopalata tyike tyilema ono sikulu 130, omatemba aeho like lilema ono sikulu 70. Ono sikulu ambuho ambuleme 2.400, mbata mo sikulu yomomphangu ikola.+ 86 Outemba 12 woolu weyula ombao, tyati aka kalema ono sikulu 10 aka kalema ono sikulu 10, tyata mo sikulu yomomphangu ikola. Outemba oo auho woolu autuuka ono sikulu 120. 87 Ovipako aviho vialingwa otyiawa tyokuyokwa, atyiti onondume-tane 12, onongi ononthwei 12, onondyona ononthwei mbuna enima like 12, mbaavelelwe kumwe noviawa viovilia, novinkhombo ovitwei 12 viotyiawa tyonkhali. 88 Ovipako vialingilwe otyilikutila tyombembwa, tyati: Onongombe ononthwei 24, onongi ononthwei 60, ononkhombo ononthwei 60, nonondyona ononthwei mbuna enima like 60. Otyo otyiawa+ tyalingilwe pokupakula omutala wovilikutila, etyi walembulwa.+

89 Apeho tyina Mwisesi anyingila mohinge yomaliongiyo, akapopia na Huku,*+ wiiva ondaka iivalela kotyipato+ Tyotyikasa Tyoumbangi pokati kono kelumbii.+ O Huku upopia nae.

8 Siovaa atolela Mwisesi, ati: 2 “Tolela Alau, uti: ‘Tyina ayakesa ovikandiyelo epandu-vali, vina okumimikila komutwe wokandiyelo katyo konomphalavinga.’”+ 3 Alau alingi etyi atumwa, ayakesa ovikandiyelo vimimikile komutwe wokandiyelo katyo konomphalavinga,+ ngeetyi Siovaa apopilile Mwisesi. 4 Okandiyelo konomphalavinga ankho kalingwa ñgaa: Ankho kalingwa noolu yatyopwa nohamala, nomwenge watyo, nononthemo mbatyo, ankho mbalingwa noolu yatyopwa nohamala.+ Okandiyelo oko, ankho kalingwa ngeetyi Siovaa alekesile Mwisesi memonekelo.+

5 Siovaa atolela vali Mwisesi, ati: 6 “Yapula vomuhoko wa Levii kova Isilayeli, ovekoho.+ 7 Una okuvekoha ñgaa: Una okuvenyanya omeva okukoha onkhali, avelikulula olutu aluho nonkhiki yokukulula, avakoho ovikutu viavo, navo avelikoho.+ 8 Pahe avapolo onthane,+ notyiawa tyatyo tyovilia,+ ohinde yanyetuka yahonya nomulela, ove opolo onthane onkhwavo, ilingwe otyiawa tyonkhali.+ 9 Ove, ove motwala vomuhoko wa Levii komutwe wohinge yomaliongiyo, oongiya ova Isilayeli aveho.+ 10 Tyina utwala vomuhoko wa Levii ku Siovaa, ova Isilayeli aveho vena okuveyambeka omavoko komutwe.+ 11 Alau apakula* vomuhoko wa Levii ku Siovaa ngatyina otyiawa tyokweendaiswa+ tyova Isilayeli, vomuhoko wa Levii avaundapela Siovaa.+

12 “Pahe vomuhoko wa Levii avapake omavoko avo komitwe vionongombe onondume-tane.+ Imwe aveilingi otyiawa tyonkhali, ei onkhwavo aveilingila Siovaa otyiawa tyokuyokwa, opo vakohe+ vomuhoko wa Levii kononkhali. 13 Ove motalameka vomuhoko wa Levii komutwe wa Alau novana vae, ovelingi ngatyina otyiawa tyokweendaiswa tyalingilwa Siovaa. 14 Vomuhoko wa Levii veyapula kova Isilayeli. Vomuhoko wa Levii valinga vange.+ 15 Opo, opo vala vomuhoko wa Levii mavanyingaila mohinge yomaliongiyo avaundapa. Ongootyo una okuvekoha kononkhali mbavo, oveave valinge ngatyina otyiawa tyokweendaiswa. 16 Mokonda ovo napewa vakale ngatyina oviawa viokweendaiswa, napewa viaawa nova Isilayeli. Ovo nelipolela-po valinge ngatyina ovo oviveli* vyo va Isilayeli aveho.+ 17 Oviveli aviho viova Isilayeli, oviange, novinyama viokwatetela okutyitwa* oviange.+ Ame nevikoha konkhali monthiki naipaa ovana aveho oviveli vo motyilongo tyo Isitu.+ 18 Vomuhoko wa Levii mandyivepake pomphangu yovana aveho oviveli vova Isilayeli. 19 Vomuhoko wa Levii ndyivepakula ku Alau no kovana vae, valinge ngatyina oviawa viatunda mova Isilayeli, vaundapele ova Isilayeli mohinge yomaliongiyo,+ avevekoho kononkhali mbavo, opo ova Isilayeli+ vahamone ovihuna tyina vamafwene pomphangu ikola.”

20 Mwisesi na Alau, nova Isilayeli aveho, ngatyo valinga vomuhoko wa Levii, avevelingi umwe ngeetyi Siovaa atuma Mwisesi, etyi ankho tyina okulingwa vomuhoko wa Levii. 21 Vomuhoko wa Levii avelikoho kononkhali, avakoho ovikutu viavo.+ Pahe Alau evepakula ku Siovaa+ avalingi ngotyiawa tyokweendaiswa. Alau evekoho kononkhali vasukuke.+ 22 Vomuhoko wa Levii avanyingila mohinge yomaliongiyo, avalingi ovilinga viavo otyo valulikwa na Alau novana vae. Vevelinga umwe ngeetyi Siovaa atumine Mwisesi, etyi ankho tyina okulingwa vomuhoko wa Levii.

23 Siovaa atolela Mwisesi, ati: 24 “Etyi otyo tyilingwa vomuhoko wa Levii: Omulume wamavetesa omanima 25 okwenda no komutwe una okuundapa na vakwavo mohinge yomaliongiyo. 25 Mahi tyina amavetesa omanima 50, movilinga ovio una okutunda-mo, kapondola vali okulinga otyilinga natyike. 26 Upondola okukwatesako vakwavo vaundapa mohinge yomaliongiyo, mahi ngwe kapondola okulinga-mo otyilinga natyike. Vomuhoko wa Levii otyo vena okulingwa ngootyo, novilinga viavo ongootyo vina okulingwa.”+

9 Siovaa apopi na Mwisesi moluhandya lwo Sinai etyi vati mohanyi+ yo tete yenima lya vali, okuvalula apa vatunda ko Isitu. Emuti: 2 “Ova Isilayeli vena okulinga Opasikwa+ monthiki yatyo.+ 3 Onwe muna okwiilinga monthiki yatyo, monthiki 14 yohanyi ino, tyina ekumbi liamanyingila, kokangulohi.* Muna okwiilinga ngeetyi tyapopia ovitumino aviho vipopia etyi Opasikwa ina okulingwa.”+

4 Pahe Mwisesi apopila ova Isilayeli valinge otyilikutila Tyopasikwa. 5 Avalingila otyilikutila Tyopasikwa moluhandya lwo Sinai, monthiki 14 yohanyi yo tete, etyi ekumbi lianyingila kokangulohi. Ova Isilayeli avalingi umwe atyiho Siovaa atuma, etyi apopia na Mwisesi.

6 Mahi pali ovalume vamwe vasila mokonda vayamene kotyivimbi,*+ ovo atyehetavela valinge otyilikutila Tyopasikwa monthiki oyo, avaende koo Mwisesi na Alau monthiki yatyo oyo.+ 7 Avatolela Mwisesi, avati: “Onthwe twasila tyeetyi twayama kotyivimbi. Oityi tutyilikilwa, pahe opo tukala-po atwahalingila vali Siovaa otyilikutila momuvo wanakwa nava Isilayeli vakwetu?”+ 8 Ou Mwisesi eveti: “Nkhevelei-po katutu. Mandyikatehela etyi Siovaa matumu onwe muna okulinga.”+

9 Siovaa atolela Mwisesi, ati: 10 “Popila ova Isilayeli, uti: ‘Na tyina umwe pwoonwe, hamwe o puvana mavakatuka-tuka mwoonwe pena umwe usila mokonda yokwayama kotyivimbi,+ ine hamwe waya kokule na vakwavo, nongootyo una okulingila Siovaa otyilikutila Tyopasikwa. 11 Muna okwiilinga mohanyi ya vali,+ monthiki 14 tyina ekumbi liamanyingila, kokangulohi. Muna okulia ongi nonombolo mbahaile onkhiso, nonombi mbulula.+ 12 Tyina mwiilia mwahahupisei-po natyike tyivasa monthiki ilandula-ko,+ tupu mweheiteyei enkhipa nalike.+ Muna okwiilinga ngeetyi tyapopia otyitumino Tyopasikwa. 13 Mahi, ine omulume umwe utupu etyi alinga tyemusilisa, nii utupu oku aya nako, mahi ahalingi otyilikutila Tyopasikwa, omunthu oo* pu vakwavo una okwiipawa-po,+ mokonda kalingilile Siovaa otyiawa mononthiki mbanakwa. Omulume oo una okulingwa etyi tyata monkhali yae.

14 “‘Ine pokati kenyi pena umwe onthunda-vilongo mukala nae, nae una okulingila Siovaa otyilikutila Tyopasikwa.+ Una okulinga ngeetyi otyitumino Tyopasikwa tyipopia, neetyi tyatuma.+ Amuho mulandula vala otyitumino tyike, tyilinge onthunda-vilongo tyilinge omutyitwa-tyilongo.’”+

15 Monthiki ekaka liefendelo liatalamekwa,+ akuya ekaka limwe, alifiki ekaka liefendelo, kohinge Youmbangi. Mahi kounthiki, akuya tyimwe tyilinga ngotupia, atyikala kombanda yekaka liefendelo atee kwatya.+ 16 Otyo tyikala vala ngootyo apeho. Komutenya kuya ekaka, oku kounthiki akuya tyimwe tyilinga ngotupia.+ 17 Apeho tyina ekaka liamayeluka-ko katutu, alihondovoka kombanda yohinge yomaliongiyo, ova Isilayeli avakatuka, avaende.+ Apa ekaka liamatalama opo ova Isilayeli vaonga onthanda.*+ 18 Ova Isilayeli vatalama vala tyina otyitumino tya Siovaa tyevetuma vatalame, avakatuka putyina otyitumino tya Siovaa tyevetuma vakatuke.+ Tyina ekaka liahahondovokele kombanda yohinge yomaliongiyo, ova Isilayeli navo kavakatuka vaye. 19 Tyina ekaka liahatundu kombanda yohinge yomaliongiyo, alikala-ko ononthiki ononyingi, ova Isilayeli vetavela vala Siovaa, navo avahaende.+ 20 Pamwe ekaka kombanda yekaka liefendelo likalako vala ononthiki mbehehi. Ova Isilayeli apa vakala, vakala-po vala ononthiki Siovaa evetuma, na tyina vaya, napo vetavela etyi Siovaa amapopi. 21 Mahi pamwe ekaka likala-ko vala okuhimbikila kongulohi atee komuhuka. Tyina ekaka litunda-ko komuhuka, navo avaende. Apa ekaka liamatundila-ko navo opo vakatukila, tyilinge liatunda-ko kounthiki tyilinge liatunda-ko komutenya.+ 22 Pamwe tyina ekaka liamakala-ko vali ehimbwe, tyilinge liakala-ko ononthiki onombali, tyilinge liakala-ko ohanyi, tyilinge liakala-ko vali ononthiki ononyingi, ova Isilayeli navo ankho vakala vala opo, kavaende. Mahi tyina liamayeluka-ko navo avakatuka, avaende. 23 Tyiti vala apa vakala vetavela otyitumino tya Siovaa, tyina vatunda-po tupu vetavela otyitumino tya Siovaa. Vetavelele otyitumino tya Siovaa, otyitumino Siovaa apopilile Mwisesi.

10 Siovaa apopila Mwisesi, ati: 2 “Linga ononkhwino onombali.+ Mbulinga nopalata yatyopwa nawa nohamala. Ombo una okwiihana nambo ovanthu aveho, tupu ngambo uhika, ovanthu na vakatuke vende. 3 Tyina ononkhwino ombo ambuho onombali mbamahikwa, ovanthu aveho vena okuya kwoove, kombundi yohinge yomaliongiyo.+ 4 Mahi ine ike vala yahikwa, opo onohongoi mbatyo vala, ononkhalamutwe mbova Isilayeli vatyo aveho mbuna okuya okutavela kwoove.+

5 “Tyina wamahiki onkhwino yomuuno uteketa,* aveho vokwahula koutundilo+ vena okukatuka vende. 6 Tyina wamahiki lya vali onkhwino yomuuno uteketa, aveho vokwahula kombwelo+ yekaka vena okukatuka vende. Onkhwino ngo oyo, oyo ina okuhikwa tyina pena ava mavakatuka.

7 “Tyina ukongolola ova Isilayeli veye veliongiye, una okuhika onkhwino,+ mahi weheihike ngo yomuuno uteketa. 8 Ovana va Alau ovanakwa ovo vena okuhika ononkhwino.+ Otyo otyitumino muna okulandula, noonwe novanthu mavakatuka-tuka mu onwe.

9 “Ine ovanthu vamwe vemuyele, veya okumulwisila motyilongo tyenyi, muna okuhika onkhwino yovilwa.+ Siovaa Huku yenyi memuhinangela, emuyovola konondyale mbenyi.

10 “No pononthiki mbenyi mbehambu,+ — povipito vienyi,+ na tyina ohanyi yaviala pahe, — muna okuhikila onkhwino poviawa vienyi viokuyokwa,+ no povilikutila vienyi viombembwa.+ Otyo matyimukwatesako muhinangelwe na Huku yenyi. Ame, ame Siovaa Huku yenyi.”+

11 Menima lya vali, monthiki 20 yohanyi ya vali,+ ekaka alihondovoka kombanda yekaka liefendelo, lina otyikasa Tyoumbangi.+ 12 Ova Isilayeli pahe avahimbika okwenda. Avatundu moluhandya lwo Sinai ngo omu vayapaulilwa.+ Ekaka alitalama moluhandya lwo Palaa.+ 13 Ei onthiki yo tete vati tyina vakatuka avalingi etyi tyapopia otyitumino tya Siovaa, etyi atumine Mwisesi evepopile.+

14 Vomihoko vitatu vyo monthanda yo vokwatuka mu Sundaa, ngavo vatetekela. Avaendela omu vayapaulilwa.* Nasoo+ omona wa Aminandambe oe onkhalamutwe yavo. 15 Netaneli+ omona wa Swale oe wali onkhalamutwe yo vomuhoko wokwatuka mu Isakale. 16 Ou Eliyambe+ omona wa Heloo, oe onkhalamutwe yo vomuhoko wokwatuka mu Sembulau.

17 Etyi ekaka liefendelo liatungululwa,+ vomuhoko wa Seleso,+ no vomuhoko wa Melali+ vokuna otyilinga tyokutyinda ekaka liefendelo, avakatuka, avaende.

18 Pahe vomihoko vitatu vyo monthanda ya Lumbe, avakatuka, avalandula-ko. Avaendela omu vayapaulilwa. Elisule+ omona wa Sendeule oe onkhalamutwe yavo. 19 Selumiyeli+ omona wa Sulisandai, oe onkhalamutwe yo vomuhoko wokwatuka mu Simiyau. 20 Ou Eliyasafe,+ omona wa Ndeuweli, oe onkhalamutwe yo vomuhoko wo vokwatuka mu Ngande.

21 Vomuhoko wa Kowate, vokutyinda ovityuma vyo momphangu ikola,+ avalandula-ko. Ekaka liefendelo, vena okuti tyina vehika ngwe liatungwa-le.

22 Pahe vomihoko vitatu vyo monthanda yo vomuhoko wa Efalaii, avakatuka avaende. Avaendela omu vayapaulilwa. Ou Elisama+ omona wa Amiyunde oe onkhalamutwe yavo. 23 Ngamaliyeli+ omona wa Pendasule, oe onkhalamutwe yo vomuhoko wokwatuka mu Manasesi. 24 Ou Ambindaa+ omona wa Sindeyoni, oe onkhalamutwe yo vomuhoko wokwatuka mu Mbesamii.

25 Pahe akulandula vomihoko vitatu vyo monthanda yo vomuhoko wa Ndaa, avaende. Avaendela omu vayapaulilwa, avalingi ovayungi vavakwavo. Aiyesele+ omona wa Amisandai, oe wali onkhalamutwe yavo. 26 Pasiyeli+ omona wa Okalaa oe onkhalamutwe yo vomuhoko wokwatuka mu Asele. 27 Ou Aila+ omona wa Enaa, oe onkhalamutwe yomuhoko wokwatuka mu Nafitalii. 28 Ongootyo ova Isilayeli valinga tyina vakatuka. Vaendela omu vayapaulilwa.+

29 Mwisesi apopila Hombambe omona wa Leweli,*+ Leweli omu Mindiyaa heivi ya Mwisesi, ati: “Onthwe matweende kotyilongo Siovaa etupopila etyi atile: ‘Ame mandyimwaavela-tyo.’+ Twende atuho,+ kamatukekulinga onya. Siovaa wati maavela ova Isilayeli ovipuka oviwa.”+ 30 Ngwe ati: “Ame himaende, mandyikondoka kotyilongo tyetu, ndyenda kovetu.” 31 Mwisesi ati: “Mbambavo wehetuyeke, ove wii nawa apa matukakalaila moluhandya, ove moketuhongolela.* 32 Ine utavela twende atuho,+ otyali Siovaa ametulingi, etwaavela ovipuka oviwa, noonthwe otyo matukekulinga.”

33 Avatundu komphunda ya Siovaa+ avaende, avakala ononthiki ononthatu nokweenda. Vokwatyinda otyikasa+ tya Siovaa tyomphango, avevepiti komutwe. Avakala ononthiki ononthatu nokwovola apa mavapululukilwa.+ 34 Ekaka+ lya Siovaa likala keulu liavo tyina vatunda apa veli.

35 Tyina Otyikasa tyipolwa apa tyili, Mwisesi uti: “Katuka ove Siovaa.+ Onondyale mbove mbukapambe nohika. Vokukuyele vekekuhateke.” 36 Tyina otyikasa tyamatalama, uti: “Kondoka ove Siovaa. Endyu movityita novityita vyo va Isilayeli.”+

11 Pahe ovanthu avahimbika okuliyava unene, Siovaa etyiivi. Etyi Siovaa etyiiva, onyengo yae ainkhinduka. Akuya omutemo umwe wotupia twatunda ku Siovaa, atuya no muvo, vamwe veli kononthele, avapila-ko. 2 Etyi ovanthu vaulula ku Mwisesi, ngwe elikwambela ku Siovaa,+ otupia atunyimi. 3 Pofika opo, avaluku-po okuti, opo Tambelaa,* mokonda opo pevevasile otupia twatunda ku Siovaa, atuya no muvo.+

4 Mahi, ononthunda-vilongo vali navo,*+ avahimbika okupeleya okulia kupepa vehole.+ Ova Isilayeli navo avahimbika vali okulila, avati: “Olie pahe ñgaa metwaavela ohitu tulie?+ 5 Pahe tweivaluka ombisi ko Isitu twalile-lile vala otyali, nomatila, nonombalasiya, no ayu, nosapola!+ 6 Pahe tuli* vala nokuhoka, natyike vali tulia-vo otyikwavo, omanaa vala!”+

7 Mahi ngwe, omanaa+ ikahi ngomaha omanthwelu, tyina wiitala ñgaa uti omaka+ ena owiki.* 8 Ovanthu aveliyandyana, avahimbika okukoya, aveya avakunkhu, ava ovakwavo avatyopo motyini. Aveya, avateleka. Pamwe valinga nayo onombolo mbeliseta elola.+ Tyina valia tyipepa ngomungome walingwa nomulela. 9 Tyina eyombo kounthiki liamawili monthanda yavo veli, omanaa nayo aiya.+

10 Mwisesi tyina akatehela, ovanthu aveho veli nokulila, otyikumba notyikumba veli nokulila. Aveho veli ponombundi mbonohinge mbavo. Siovaa anumana unene,+ ou Mwisesi, pahe elinyengwa umwe. 11 Pahe Mwisesi apulu Siovaa, ati: “Omokonda yatyi umonesila emone, ame muumbili wove? Otyityi wahandingila-vo onkhenda? Otyityi umphela omulemo ou wovanthu ava aveho?+ 12 Ovanthu vatyo ava ame nevekutula? Ame nevekutula, etyi uti: ‘Vetyinda ponkhondo, ngeetyi omuundapi* aveleka omona omututu unyama,’ atee ndyivetwala kotyilongo wapopile okuti, otyo moavela ovakwaukulu vavo?+ 13 Opi mankhevepolela ohitu ovanthu vatyo ava aveho? Vana vakalela vala okulila, otyo veliyava kwaame vati: ‘Twaavele ohitu tulie!’ 14 Ovanthu ava aveho himevevili andyike. Etyi otyinene, hatyange.+ 15 Ine otyo naina undinga ñgaa, opo mbaa hahe wandyipaele vala pehepano.+ Okuti wandinga okankhenda, opo wahandyeke vali ndyimone emone.”

16 Siovaa apopila Mwisesi, ati: “Ndyongiyile ovalume 70, ovakulu mo Isilayeli, ovalume ove weete* okuti ovakulu, ovo onohongoi mbotyilongo.+ Veeta pohinge yomaliongiyo, ngapo mukala navo. 17 Ame mandyiya,+ ngoopo ndyipopila noove.+ Mandyipolo katutu komphepo ikola+ ove una-yo, andyiipake muvo. Ngwe mavekukwatesako okululika ovanthu ovo vepwiya, opo wahatutumbe awike.+ 18 Ove popila ovanthu, uti: ‘Hono lisukukisei, mokonda muhuka eli,+ mamuli ohitu. Mokonda mwalila atyiivala momakutwi a Siovaa,+ mwati: “Olie pahe ñgaa metwaavela ohitu tulie? Twali vali nawa etyi tuli ko Isitu!”+ Mahi Siovaa, tyili-tyili muhuka memwaavela ohitu, onwe na mulie.+ 19 Onwe kamamwiili vala monthiki ike aipu, nii mononthiki 2, nii mononthiki 5, nii ononthiki 10, nii ononthiki 20, kamamwiimane. 20 Mahi mamwiili ohanyi aiho. Mamwiili atee imutundila momayulu,* amwiitoyo, mokonda mwaanya Siovaa uli pokati kenyi.+ Mweliyava kwe amulili amuti: “Oityi twatundila ko Isitu?”’”+

21 Mwisesi ati: “Tala ovanthu ndyina-vo. Ndyili pokati kovalume,+ ovita ovinene, vena 600.000. Ovanthu ngaava, ovo uti: ‘Mandyivepe ohitu, aveili ohanyi!’ 22 Ngaa vaipaelwa otyunda atyiho tyonongi, no tyonongombe, valia avatuuka-po? Ine vafwilwa ombisi aiho ili melunga, aveipewa avali, valia avatuuka-po?”

23 Siovaa apopila Mwisesi, ati: “Okuti okuvoko kwa Siovaa kuna etyi kwehevili?+ Pahe mwene motale ine etyi napopia otyili ine hatyili-ko.”

24 Pahe Mwisesi alupuka, apopila ovanthu etyi Siovaa apopia. Aongiya ovalume 70, ovakulu vatyo, eveti talamei pohinge yomaliongiyo.+ 25 Siovaa eya nekaka,+ apopi nae,+ emupolo katutu omphepo ikola ena-yo,+ eipake movalume ovakulu vena 70. Vati vala tambulee omphepo ikola, avalingi ngovauli.+ Mahi vetyilingile vala monthiki oyo.

26 Ovalume vamwe vevali, navo vavalulililwe pu ovo, nkhele ankho veli vala ku vakwavo. Umwe utiwa o Elendande, omukwavo o Mendande. Omphepo ikola aiya muvo, ngwe vali vamwe povakulu vokwahonekwa, mahi vahaile pohinge yomaliongiyo. Avahimbika okulinga ngovauli konohinge oku veli. 27 Omukwendye umwe ahateka, akapopila Mwisesi, ati: “Ovo Elendande na Mendande vena nokulinga ngovauli!” 28 Okwiiva otyo, ou Susuwee+ omona wa Nuu, wahimbikale poukwendye okukwatesako Mwisesi, ati: “Tatekulu, Mwisesi, vepopila vetyiyeke-po!”+ 29 Mwisesi emuti: “Ove uvelwa* onkhi, tyehe-tyove? Ame nahandele ñgeno ovanthu vatyo aveho va Siovaa valinga ovauli. Ñgeno Siovaa aveho uvepa omphepo yae ikola!” 30 Pahe Mwisesi novakulu ovo vomo Isilayeli avakondoka konohinge.

31 Pahe Siovaa ankhindula omphepo imwe yatundilila kelunga, aihimbika okweeta ovikalanga, avitokela ponohinge mbavo,+ avilioongo onthunthu,* okutuka pohi okwenda no peulu, ina onokovandu* onombali. Ohika aiho apa viatokela ondaande, okutyama navio, atee ukehika apa viehikila, paendwa onthiki aiho. 32 Ovanthu aveho avahalala, avehimama nokukwata ovikalanga onthiki aiho, avalala natyo, avehimama vali natyo onthiki ya vali. Aveho avakwate ovikalanga ovinyingi. Nawike wahakwatele evi viyula momanguleta 10.* Aveviipaa, avevinyaneka, avilisete nonohinge mbavo. 33 Mahi vati vala pakee ohitu oyo komayo, kavavoyele-ale, onyengo ya Siovaa ainkhinduka. Siovaa eveipaa, aipaa ovanthu ovanyingi-nyingi.+

34 Pofika opo, avaluku-po okuti, opo Kimbelote-Ataavaa,*+ mokonda opo papakelwe vana vesukile nokulia ovipuka mwene vahanda.+ 35 Avatundu ko Kimbelote-Ataavaa, avaende ko Haselote. Ko Haselote ngako vakala.+

12 Ovo Miliaa na Alau avahimbika okupopia omapita Mwisesi, tyeetyi wanepa omukai wo ko Kusi. Mokonda omukai anepele oko ekemupolele.+ 2 Ankho vati: “Okuti Siovaa upopia vala na Mwisesi, ngwe kehole okupopia noonthwe?”+ Tyina vapopia Siovaa ankho uveivite.+ 3 Ngwe Mwisesi ankho omulume umwe ondalawa*+ tyipona ovanthu aveho kombanda yeheke.

4 Opo yatyo opo, Siovaa eivala okupopila Mwisesi na Alau na Miliaa, eveti: “Katukei amuho vetatu, endei kohinge yomaliongiyo.” Aveho vetatu avaende. 5 Siovaa alauka nekaka,+ akala pombundi yohinge, aihana Alau na Miliaa. Aveho vevali avafwene-po. 6 Evepopila okuti: “Tehelelei-vo etyi mandyipopi. Ine pokati kenyi pali omuuli wa Siovaa, ame mwene ñgeno nelilekesa kwe memonekelo,+ andyipopi nae mondyoi.+ 7 Mahi omuundapi wange Mwisesi, hatyo-ko ndyimulinga ngootyo! Eumbo liange nemupakulila-lio aliho.*+ 8 Ndyipopia nae+ tyipala na tyipala,* himuholeka natyike andyimupopila omihe. Nolupe lwa Siovaa ulumona. Otyityi onwe mwahatililile owoma wokupopia omapita omuundapi wange Mwisesi?”

9 Poola yatyo opo, onyengo ya Siovaa ainkhinduka, evehi-po aende. 10 Ekaka alihondovoka keulu liohinge yomaliongiyo. Kapakalele-ale ehimbwe, Miliaa atokelwa notyilunda tyitwela ngomakoko ongandyi.+ Alau wati vala paku ku Miliaa, uti ñgaa Miliaa una otyilunda.+ 11 Alau ai noku Mwisesi, ati: “Tatekulu mbaa tulipopia-vo kwoove. Twiita-vo otyiponyo onkhali twalinga! Twalinga ouwova, katwalingile nawa. 12 Wehemuyeke akale ñgaa mbaa, ohitu yae otyo itunyauka ngo yolukembe lwatyitwa tyankhia!” 13 Mwisesi ahimbika okwiita ku Siovaa, ati: “Huku yange mbaa, muhakula-vo, aveluke!”+

14 Siovaa atolela Mwisesi, ati: “Kakala vala ngeetyi akala tyina he emunthila omate motyipala? Kakala tyakunda mononthiki epandu-vali? Akale aike mononthiki epandu-vali kokule na vakwavo,+ haa eya nawa.” 15 Pahe Miliaa apolwa pu vakwavo, akakala aike ononthiki epandu-vali.+ Ovanthu avahatungulula-po onohinge mbavo vende, mokonda Miliaa ankho nkhele keneye. 16 Etyi eya, ovanthu pahe avaende. Avatundu ko Aselote,+ avakakala koluhandya lwo Palaa.+

13 Siovaa apopila Mwisesi, ati: 2 “Tuma ovalume, vende vakatale* otyilongo tyo Kanaa etyi tyikahi, otyilongo mandyiavela ova Isilayeli. Ovalume motumu, vena okutunda momihoko nomihoko viovakwaukulu venyi. Ava mupola-po+ mamutumu, onohongoi mbatyo.”+

3 Mwisesi atumu ovalume ovo ngeetyi Siovaa apopia. Avatundu ko Palaa,+ avaende. Ovalume aveho ankho atuma, ononkhalamutwe mbova Isilayeli. 4 Omanyina avo oyaa: Vomuhoko wa Lumbe, o Samuwa omona wa Sakule. 5 Womuhoko wa Simiyau, o Safate omona wa Holi. 6 Womuhoko wa Sundaa, o Kalembe+ omona wa Sefunee. 7 Womuhoko wa Isakale, o Ingali omona wa Susee. 8 Womuhoko wa Efalaii, o Oseya+ omona wa Nuu. 9 Womuhoko wa Mbesamii, o Paliti omona wa Lafu. 10 Womuhoko wa Sembulau, o Ngandiyeli omona wa Sondi. 11 Womuhoko wa Susee,+ watundile mu Manasesi,+ o Ngandii omona wa Susi. 12 Womuhoko wa Ndaa, o Amiyeli omona wa Semalii. 13 Womuhoko wa Asele, o Setule omona wa Mikaeli. 14 Womuhoko wa Nafitalii, o Nambi omona wa Vofisi. 15 Womuhoko wa Ngande, o Seweli omona wa Maki. 16 Oo, omanyina ovalume Mwisesi atumine vakatale etyi otyilongo tyikahi. Oseya omona wa Nuu, Mwisesi emuluku okuti o Susuwee.*+

17 Pokuvetuma vende, vakatale otyilongo tyo Kanaa, Mwisesi eveti: “Endei amukakwata ko Nengembe, pahe amulondeka, amukwate kotyilongo tyonomphunda.+ 18 Talei umwe nawa oñgeni eheke liatyo likahi,+ amutale novanthu vatyo, okuvetala ine vapama ine kavapamene. Tupu amutale ine ovanyingi ine kavehi. 19 Talei ankho otyilongo tyatyo tyikahi nawa, ine katyikahi nawa. Amutale tupu ine momapunda-umbo atyo vakala ahondywa, ine kaahondyelwe. 20 Talei umwe nawa etyi eheke liatyo likahi, ine lianina* liyela ovikuna.+ Tupu amutale ohika yatyo, ine ohika yomiti. Pamekei,+ amweeta ovinyango mwavasa-ko viotyilongo tyatyo otyo.” Omuvo vaya-ko, omuvo onouva mbuhimbika okupia.+

21 Avakatuka, avaende, avakatala otyilongo otyo etyi tyikahi. Avahimbikila ko Sii,+ avaende atee ko Leombe,+ konthele ko Lembo-Hamate.*+ 22 Etyi vaya, avaindukila ko Nengembe, avekehika atee ko Hemboloo+ ankho kukala ovo Aimaa na Sesai na Talumai,+ vatukile mu Anake.+ O Hemboloo, epunda-umbo limwe liatetekelele okutungwa, apakala omanima epandu-vali, pahe akutungwa nawa o Sowaa yo Isitu. 23 Etyi vehika Komulola wo ko Esikole,+ avatyoko ompha imwe yonouva, ompha imwe onene ityindwa komutengi utyindwa novalume vevali. Tupu, avaeta omalomaa, nomakuyu.+ 24 Pohika yatyo opo, ankho valuka-po okuti, Elola lyo Esikole*+ mokonda yompha yonouva ova Isilayeli vatyokele-po.

25 Avakala-ko ononthiki 40+ nokutala vala etyi eheke likahi, pahe avaanguluka-ko, aveya. 26 Pahe, aveya kovo Mwisesi na Alau ankho vena ovanthu aveho ova Isilayeli, moluhandya lwo Palaa ko Kande.+ Avapopila ovanthu aveho etyi vavasa. Avalekesa ovinyango vaetelela kotyilongo oko. 27 Avapopila Mwisesi, avati: “Motyilongo wetutumine, twaile-mo. Twavasa omahini nowiki,+ tyimoma vala. Ovinyango vimwe twavasa-mo, ovievi.+ 28 Mahi tyalingisa vala, omokonda ovanthu votyilongo tyina, vapama unene. Omapunda-umbo atyo ahondywa novimato viokwapama. Tupu twakavasa-ko ovanthu vokwatuka mu Anake.+ 29 Ova Amaleke,+ vakala mohika yo Nengembe,+ ava ova Hete nova Sembusi+ nova Amoleu,+ vakala mohika yonomphunda. Ova Kanaa+ vakala popepi nelunga,+ okutyama nondongi yo Solondau.”

30 Kalembe ahetekela-ko okuvoveya ovanthu ankho veli pu Mwisesi, eveti: “Tukatukei vala twendei. Otyilongo tyina matyilingi tyetu, kavetupono-ale.”+ 31 Mahi ovalume aile navo, avemuti: “Katupondola okukatuka, atweende kovanthu vana. Ovanthu vana vapama vali kwoonthwe.”+ 32 Avaanyena umwe moyavo, avapopila+ ova Isilayeli ovipuka viahaviukile vavasa kotyilongo vakalavele, avati: “Otyilongo tyina twavasa, otyilongo tyimwe tyinyina-po ovanthu vatyo vakala-mo, ovalume twavasa-ko, ovalume vamwe ovanene, uti vala omakihi.+ 33 Ovanthu vana twavasa kuna, omakihi, vatuka mu Anake,+ Anake watukile momakihi.* Tyina tulieeleka navo ñgaa, onthwe uti vala tuvimphunia-mphunia. Navo vala mwene tyina vetutala ñgaa, kuvo tuvimphunia-mphunia vala.”

14 Ovanthu aveho avahimbika okuliyava, avalala nokulila unene, okulila otyinthiki atyiho.+ 2 Ova Isilayeli aveho avahimbika okuliyava unene. Pahe aveho avahimbika okupopia omapita ovo Mwisesi na Alau,+ avati: “Hahe vali ankho twankhilile mo Isitu, oo tunkhila vala moluhandya muno! 3 Oityi Siovaa etweetela motyilongo muno, tunkhie komutunga?+ Ovakai vetu novana vetu mavetupolo-vo, avai navo.+ Hahahe tukondoke ko Isitu?”+ 4 Avahimbika okulipopila na vakwavo, avati: “Tukoyei umwe pwoonthwe makala onkhalamutwe yetu, atukondoka ko Isitu!”+

5 Ovo Mwisesi na Alau okwiiva otyo, avelipetamena-po kova Isilayeli aveho ankho veliongiya. 6 Susuwee+ omona wa Nuu, na Kalembe+ omona wa Sefunee, navo vali pu ava vakatalele otyilongo, avanumana, avatandula ovikutu viavo, 7 avapopila ova Isilayeli aveho, aveveti: “Otyilongo tyina twakatalele, otyilongo tyikahi nawa, otyilongo otyiwa.+ 8 Ine Siovaa wetuhandela-tyo, metukwatesako motyilongo tyina atunyingila-mo, metwaavela-tyo, otyilongo tyomahini nowiki.+ 9 Mahi onwe mwahaanyei Siovaa, mwahatilei owoma ovanthu votyilongo tyina,+ matuvevili, kavetupono-ale, vetupu-ale apa vapamena. Siovaa una onthwe,+ mwehevetilei owoma.”

10 Ovanthu aveho avelipakaila-mo, vevetyope nomamanya.+ Mahi omunkhima wa Siovaa auya mohinge yomaliongiyo, aumoneka kova Isilayeli aveho.+

11 Pahe Siovaa apopila Mwisesi, ati: “Atee-pi ovanthu ava mavatwalako tyehena onthilo naame,+ atee-pi mavatwalako tyahandyumbu onthumbi, tyina ndyilinga umwe omaelema pokati kavo otyo vatala?+ 12 Veyeka ndyiveyumbe ouvela mauvemane-ko aveho. Puvo mandyipingiya-po ove, mwoove amukatuka ovanthu ovanyingi-nyingi vapama vali kuvo.”+

13 Mahi Mwisesi atolela Siovaa, ati: “Au wahalinge, matyiivala kova Isitu oku wapola ovanthu vove nokuvoko kwapama.+ 14 Kumbi vetyiiva mavetyipopila ovanthu votyilongo tyino, ngwe ovanthu votyilongo tyino navo vetyiiva okuti ove Siovaa uli pokati kovanthu ava,+ upopia navo tyipala na tyipala.+ Vetyiiva okuti ove, ove Siovaa, ekaka liove lili keulu liovanthu ava. Tupu vetyiiva okuti komutenya uvepita komutwe mekaka, oku kounthiki uvepita komutwe momukundu-kundu wotupia.*+ 15 Ine uveipaa-po aveho like vala,* ovanthu vovilongo veiva-iva omunkhima wove, mavati: 16 ‘Siovaa ovanthu ava apopile okuti meveavela otyilongo apopile, kevevilile, weveipaela momaluhandya omo.’+ 17 Siovaa mbaa, ononkhono mbove ononene mbulimonekele vala mu etyi molingi, ngeetyi wapopile etyi watile: 18 ‘Siovaa wapwa-elundo,* una olwembia olunene,*+ upolela-po ovanthu oviponyo, novipengi. Mahi kamayeke vala ngootyo una wavelwa onombei, ehemulingi natyike, mayeke ovana vamone ononkhumbi mbutuka kononkhali mbo vohe. Ononkhumbi ombo, mambukatokela umwe kovana vavo, no kovatekula vavo, no konomphokole mbavo.’+ 19 Mbambavo, polela-po-vo ovanthu vove otyiponyo etyi molwembia lwove olunene, ngeetyi uhole okulinga-linga-le etyi vatunda ko Isitu atee hono.”+

20 Siovaa emuti: “Mandyiveyeke ngeetyi wapopia, himevelingi natyike.+ 21 Mahi, tala! Etyi ndyikupopila otyili, ohi aiho maikeyula momunkhima wa Siovaa.+ 22 Mahi ovalume aveho vamwene-ale omunkhima wange, nomahuviso+ nalinga-linga-le ko Isitu, na aa nalinga moluhandya, mahi otyo vatwalako okundola,+ hono ñgaa vetyindinga lya 10, otyo vehetavela etyi ndyipopia,+ 23 kavakaliata motyilongo napopilile ovohe, nii vala katutu kavakaliata-mo. Nawike puvo wehena onthilo naame meketyimona.+ 24 Mahi, omuundapi wange Kalembe,+ wahalingile ngavo, wenthavela nomutima wae auho, mandyimutwala motyilongo otyo akaliatele, ovanthu mavakatuka-tuka mwe, matyikalinga tyavo.+ 25 Mahi mokonda ova Amaleke nova Kanaa+ vakala melola, muhuka kondokei no moluhandya, amukakwata mondyila ikwata Kelunga Enkhuhu.”+

26 Pahe Siovaa atolela ovo Mwisesi na Alau, eveti: 27 “Atee-pi ovanthu ava aveho onondingavivi mavakalela vala okundondovola?+ Ovipuka ova Isilayeli vamphopia neviiva.+ 28 Vepopila okuti: ‘Siovaa wati: “Tala! Etyi ndyimupopila hanyanene. Etyi neiva mwapopia, otyo umwe mandyimulingi!+ 29 Moluhandya omu, omo mamunkhila,+ amuho onwe vokwahonekwa, vokuna omanima okuhimbikila 20 okwenda no komutwe, amuho onwe ankho vokuli nokulondovola.+ 30 Nawike pwoonwe manyingila motyilongo nemupopilile etyi naana,* andyiti omo mamukakala,+ mavai-mo vala, ovo Kalembe omona wa Sefunee na Susuwee omona wa Nuu.+

31 “‘“Ovana venyi ankho mwati hamwe mavatyindwa-po nonondyali mbenyi,+ ambweende navo, ovo mandyitwala motyilongo otyo onwe mwaanya. Ovana venyi ovo maveketyimona.+ 32 Mahi onwe, onwe mamunkhila moluhandya omu. 33 Ovana venyi mavakala ovanthita, avakala moluhandya omanima 40.+ Mavakamona ononkhumbi mbutuka kovivi onwe mwalinga,* atee onwe amuho munkhila moluhandya apehesala nawike.+ 34 Onwe mamukala omanima 40 nokumona+ ononkhumbi mokonda yeetyi mwalinga, ngononthiki 40+ mwakakalele kotyilongo mwakatalele, onthiki ike enima, onthiki ike enima. Mamutyimono umwe nawa etyi ndyilinga omunthu wokwehenthavela.*

35 “‘“Ame Siovaa, ame netyipopia. Otyo mandyilingi ovanthu ava aveho onondingavivi, velipaka kumwe avehenthavela, omoluhandya muno mavakotela, omo mavankhila.+ 36 Ovalume Mwisesi atumine vakatale otyilongo, aveya avahindila vakwavo valondovole, etyi vapopia-popia ovipuka viahaviukile pokupopia etyi vavasa motyilongo,+ 37 aveho ovalume vokwapopia omapita otyilongo, mavaipawa. Siovaa mevepe oluvinda, avankhi.+ 38 Mahi Susuwee omona wa Nuu, na Kalembe omona wa Sefunee, navo vaile okukatala otyilongo, kamavankhi, mavahupu.”’”+

39 Etyi Mwisesi apopila ova Isilayeli aveho onondaka ombo, atyiveihama unene, avahimbika okulila. 40 Komuhuka-huka, avelihindila vende keulu liomphunda, avati: “Tyili twalinga onkhali, mahi pahe twahanda umwe okwenda kotyilongo Siovaa etupopilile.”+ 41 Mwisesi eveti: “Mokonda onwe kamwetavelele otyitumino tya Siovaa, etyi mwahanda okulinga, kamatyeende nawa. 42 Komphunda mwahayei-ko, mokonda Siovaa mutupu-e vali. Kamamukaveta-ko konondyale mbenyi, mamwiipawa.+ 43 Ova Amaleke nova Kanaa mamukavasa oko mwahanda okwenda, mavemulwisa,+ onwe mamukankhia komutunga. Onwe kamukahi nokutavela Siovaa, pahe Siovaa wemuyeka-po, mutupu-e vali.”+

44 Mahi, avelipe ovipuka viokulonda komphunda.+ Otyikasa Tyomphango ya Siovaa, atyahai, Mwisesi nae ahaende, esala monthanda.+ 45 Ova Amaleke nova Kanaa ankho vakala komphunda, avatuluka, avevelwisa avatili-ko, avevehanyaikisa, avakatoka atee ko Holomaa.+

15 Siovaa apopila Mwisesi, ati: 2 “Tolela ova Isilayeli, uti: ‘Tyina mwamekehika motyilongo omu ndyili nokumutwala namo, omu mamukakala,+ 3 amulingila Siovaa otyilikutila tyokuyokwa, otyipako mwapola ponongombe mbenyi, hamwe o povingi vienyi, hamwe o povinkhombo vienyi, amulingi otyiawa tyokuyokwa,+ hamwe otyilikutila na mufwisepo omphango mwalingile, ine hamwe amulingi otyiawa mwene kotyali tyenyi,+ hamwe otyiawa mwalinga pononthiki mbovipito vienyi,+ amulingi ngootyo omuniko wavio omuwa* na ukehike ku Siovaa,+ 4 una wamaeta otyiawa tyae, tupu una okweetela Siovaa otyiawa tyovilia, omapati evali ohinde yanyetuka,+ yahonya nolitulu ike yomulela. 5 Tupu una okwaava olitulu ike yovinyu, ilingwe otyiawa tyokunwa, oyaavela kumwe notyiawa tyokuyokwa,+ okuti hatyo, oyave notyilikutila tyilingwa nongi. 6 Apeho tyina weeta ongi, etelela otyiawa tyovilia, omapati evali ofinde yanyetuka yahonya nolitulu ike yomulela nenthinge. 7 Tupu muna okweeta olitulu ike yovinyu nenthinge, ilingwe otyiawa tyokunwa, otyiawa tyomuniko omuwa* tyilingilwa Siovaa.

8 “‘Mahi ine waava onthane, ailingwa otyiawa tyokuyokwa,+ hamwe ailingwa otyilikutila opo ufwisepo etyi wapangele,+ ine hamwe ulingila Siovaa otyiawa tyombembwa,+ 9 tupu tyina waava onthane, una okweeta notyiawa tyovilia,+ omapati etatu ohinde yanyetuka nawa, yahonya nonolitulu onombali mbomulela. 10 Tupu una okwaava onolitulu onombali mbovinyu, mbulinge otyiawa tyokunwa,+ otyiawa tyokuyokwa tyomuniko omuwa tyilingilwa Siovaa. 11 Otyo tyina okulingwa ngootyo tyina waava ongombe, na tyina waava ongi onthwei, na tyina waava otyinkhombo. 12 Ongootyo una okulinga ovipako aviho waava. Kotyipako tyike wamaave, uyawisa-ko ovipuka ovio, ngatyo uvilinga aviho. 13 Ongootyo ova Isilayeli ovatyitwa-tyilongo vena okulinga otyiawa tyokuyokwa, otyiawa tyomuniko omuwa tyilingilwa Siovaa.

14 “‘Ine onthunda-vilongo imwe mukala nayo pokati kenyi, hamwe o umwe mukala-le nae okutuka komanima o kohale-hale, alingi otyiawa tyokuyokwa, otyiawa tyomuniko omuwa tyilingilwa Siovaa, nae una vala okulinga ngoonwe.+ 15 Onwe va Isilayeli nononthunda-vilongo mukala nambo, amuho muna vala otyitumino tyike mutavela. Muna okutyitavela apeho, tyilinge onwe, tyilinge ovanthu vakatuka-tuka mwoonwe. Onthunda-vilongo, ku Siovaa ukahi vala ngoonwe.+ 16 Noonwe, nonthunda-vilongo mukala nayo, muna vala otyitumino tyike. Tupu muna vala ovitumino vike vionomphela.’”

17 Siovaa atolela vali Mwisesi, ati: 18 “Popila ova Isilayeli, uti: ‘Tyina mwamekehika motyilongo omu ndyili nokumutwala namo, 19 amuli kokulia kwo* motyilongo otyo,+ muna okwovola etyi mamwaavaila Siovaa. 20 Muna okwaava ohinde yakaluka yovilia vyo tete,+ amulingi nayo onombolo mbokweliseta elola. Onwe muna okwaavela Huku ohinde oyo, ngeetyi mulinga oviawa vienyi mupola potyipale. 21 Onwe muna okwaavela Siovaa ohinde yomankhalu yovikuna vienyi mwateya tete, tyilinge onwe, tyilinge ovanthu aveho vakatuka-tuka mwoonwe.

22 “‘Ine onwe mulinga etyi tyapenga, amuponyo movitumino ovio aviho Siovaa apopila Mwisesi, 23 ovipuka aviho Siovaa atuma Mwisesi, okuhimbikila monthiki Siovaa evituma, ovipuka onwe novanthu aveho mavakatuka-tuka mwoonwe muna okulinga, 24 ine tyalingwa motyiponyo, ovanthu aveho kavetyimwene, opo aveho vena okwaava ondume-tane ike, ailingwa otyiawa tyomuniko omuwa tyilingilwa Siovaa, noviawa viovilia, no viovikunwa viyawiswa-ko, ngeetyi tyilingwa-le.+ Avavandeka-ko otyinkhombo, tyilingwe otyiawa tyonkhali.+ 25 Omunakwa makoho ova Isilayeli aveho konkhali, avaevelwa onkhali yavo,+ mokonda veilinga motyiponyo. Avaeta otyiawa tyavo, otyiawa tyokuyokwa tyilingilwa Siovaa, notyiawa valingila Siovaa tyonkhali yavo valinga motyiponyo. 26 Ova Isilayeli aveho kumwe nonthunda-vilongo vakala nayo, mavaevelwa onkhali yavo, mokonda onkhali oyo, ovanthu veilinga vala motyiponyo.

27 “‘Ine omunthu* umwe ulinga onkhali motyiponyo, una okweeta otyinkhombo otyindema tyina enima like, tyilingwe otyiawa tyonkhali.+ 28 Omunakwa makoho omunthu oo,* asukuke komaiho a Siovaa konkhali alinga motyiponyo. Makoho omunthu oo konkhali alinga, aevelwa.+ 29 Kukala vala otyitumino tyike tyilandulwa, tyina omunthu amalingi onkhali motyiponyo, tyilinge omu Isilayeli omutyitwa-tyilongo, tyilinge onthunda-vilongo vakala nayo.+

30 “‘Mahi omunthu* una ulingila wina onkhali,+ tyilinge omu Isilayeli omutyitwa-tyilongo, tyilinge onthunda-vilongo, uundula Siovaa, pokati ka vakwavo una okwiipawa-po. 31 Mokonda wapondakana mondaka ya Siovaa, aanye otyitumino, omunthu oo* kapondola okuhupa, una okwiipawa.+ Una okulingwa etyi tyata monkhali alinga.’”+

32 Nthiki imwe, etyi ova Isilayeli nkhele ankho veli moluhandya, avavasi omulume umwe uli nokutiava ononkhunyi motyasapalo.+ 33 Vokwemuvasa utiava ononkhwii, avemutwala kovo Mwisesi na Alau, kova Isilayeli aveho. 34 Omulume oo, avemupake ngo opo tyakwatwa,+ mokonda nkhele ankho omunthu ngo oo, etyi ena okulingwa katyinepopiwe nawa-nawa.

35 Siovaa atolela Mwisesi, ati: “Omulume oo una okwiipawa.+ Ovanthu aveho vena okumutyopa nomamanya, okumutyopela kondye yonthanda, ankhi.”+ 36 Pahe, ovanthu aveho avemupolo monthanda, avemutwala no kondye, avemutyopa-tyopa nomamanya, ankhi. Avemulingi umwe ngeetyi Siovaa apopila Mwisesi.

37 Siovaa apopila Mwisesi, ati: 38 “Popia nova Isilayeli, vetolela okuti kovikutu viavo vavala, vena okupaka-ko ovindyendyelela. Otyo vena okulinga ngootyo, navo novanthu aveho vakatuka-tuka muvo. Apa ovindyendyelela viatyo vianyikilwa, papakwe ofita ongole.+ 39 ‘Onwe muna okupaka ovindyendyelela ovio kovikutu vienyi, opo tyina muvitala, muhinangele ovitumino aviho vya Siovaa, amuvitavela.+ Onwe kamupondola vala okutyindwa nomutima, amulandula vala kovipuka mumona, ovipuka vimutwala kokwehenthavela.+ 40 Onwe muna okulinga ngootyo, tyimuhinangailise ovitumino viange aviho, muna okuvitavela mulinge ovakwa-ukola ku Huku yenyi.+ 41 Ame, ame Siovaa Huku yenyi nemupola kotyilongo tyo Isitu, na ndyilinge Huku yenyi.+ Ame, ame Siovaa Huku yenyi.’”+

16 Pahe, ou Kolaa+ omona wa Isale,+ Isale omona wa Kowate,+ Kowate watukile mu Levii,+ elipake kumwe novo Ndataa na Ambilau ovana va Eliyambe,+ na Ome omona wa Pelete umwe pu ava vatukile mu Lumbe.+ 2 Avatyitukila-po Mwisesi, navo nova Isilayeli 250, onohongoi mbotyikumba tyova Isilayeli, ovalulikwa vatyo vaholovonwa, ovalume vomunkhima. 3 Avelipake kumwe, avatañgunisa+ ovo Mwisesi na Alau, avati: “Pahe kwapwa, hanwe-ko vali! Ovanthu aveho ovakwa-ukola,+ aveho-aveho, Siovaa uli pokati kavo.+ Omokonda yatyi mulipakela koutumini muhongolele ovanthu va Siovaa?”

4 Mwisesi wati vala tyivee, elipupika-po. 5 Pahe atolela Kolaa, novanthu aveho vahula kwe, eveti: “Muhuka komuhuka, Siovaa malekesa olie tyili-tyili omunthu wae,+ olie ukola, olie una okufwena pwe.+ Ou amakoyo-po,+ oe mafwena-fwena kwe. 6 Pahe tyitie umwe noove Kolaa, novanthu aveho vokwahula kwoove,+ lingei ñgaa: kwatei onoseke-seke+ mbotupia, 7 tyina tyiti komuhuka, pakei-po otupia nombao, muyokele Siovaa. Omunthu Siovaa amakoyo-po,+ oe ukola. Vana va Levii,+ oko mwaya okokule!”

8 Pahe Mwisesi atolela Kolaa, ati: “Vana va Levii, tehelelei kuno mbaa. 9 Onwe musoka okuti etyi Huku yova Isilayeli alinga tyokukoya-po vala onwe pova Isilayeli aveho,+ ngaanwe vala ayeka mufwene ponthele yae, okulinga ovilinga viomekaka lya Siovaa, amuundapela ovanthu aveho, otyitutu?+ 10 Soka wemuyeka, noove, novakulu vove vomuhoko wa Levii mufwene ponthele yae. Pahe mwahanda ounakwa ulinge wenyi mwene?+ 11 Otyipuka otyo mwalinga, noove novanthu aveho vahula kwoove, veliongiya, mwayala Siovaa. Pahe Alau mutañgunisa, olie?”+

12 Etyi pakala, Mwisesi, aihana ovo Ndataa na Ambilau+ ovana va Eliyambe. Mahi ngwe avati: “Onthwe kamatuya! 13 Wati hamwe etyi wetupola kotyilongo tyomahini, nowiki, otweeta tuye okunkhila moluhandya muno+ walinga nawa? Pahe uhanda okulipaka koutumini tulifefe kwoove?* 14 Ove wiivala okuti motwaavela otyilongo tyomahini nowiki!+ Pahe tyili-pi? Kwetwaavelele omapia, nii omiti vionouva! Wahanda okuhika ovanthu komaiho! Onthwe kamatuya-le oko!”

15 Mwisesi ankhi ononyengo, apopila Siovaa ati: “Koviawa viavo viovilia nii wahatale-ko. Ame hevepolele natyike, nii vala otyimbulu, nii ndyitupu nawike puvo nalinga onya.”+

16 Mwisesi pahe atolela Kolaa, ati: “Muhuka muna okuya ku Siovaa, noove novanthu aveho vokwahula kwoove. Tyitie noove, navo, na Alau, muna okuya. 17 Munthu na munthu akwate oseke-seke yae yotupia, apake-ko ombao, amweeta onoseke-seke mbenyi ambuho ku Siovaa, mbuna 250. Muya amuho, noove na Alau, tyatyinda onoseke-seke mbenyi.” 18 Avakwate onoseke-seke mbavo, avapake-ko otupia nombao, avatalama pombundi yohinge yomaliongiyo, navo na Mwisesi na Alau. 19 Etyi Kolaa aongiya aveho vokwahula kwe,+ aveho-aveho, kombundi yohinge yomaliongiyo, omunkhima wa Siovaa, auya, aumoneka kovanthu aveho.+

20 Ovo Mwisesi na Alau, Siovaa eveti: 21 “Ovanthu ovo vehondovokei. Mandyivenyimi-ko aveho tyahasete.”+ 22 Okwiiva otyo, avelipetamena-po, avati: “Ove Huku, Huku yomphepo yovanthu aveho,*+ monumanena umwe ovanthu ava aveho+ monkhali ya wike vala?”

23 Siovaa apopila Mwisesi, ati: 24 “Tolela ovanthu aveho, uti: ‘Vahondovoke ponohinge mbovo Kolaa na Ndataa na Ambilau!’”+

25 Pahe Mwisesi akatuka, aende kovo Ndataa na Ambilau. Ovakulu+ ova Isilayeli avemulandula. 26 Mwisesi atolela ovanthu aveho, ati: “Vehondovokei mbaa! Hondovokei ponohinge mbovanthu ava onondingavivi, mwahayamei kotyipuka natyike tyavo, opo onwe mwahaipawe mokonda yonkhali yavo.” 27 Ovanthu aveho avahondovoka ponohinge mbovo Kolaa na Ndataa na Ambilau. Ngwe ovo Ndataa na Ambilau, monohinge mbavo avalupuka-mo, avakalela vala pombundi, navo novakai vavo novana vavo vokwekula, novatutu vatyo.

28 Mwisesi ati: “Etyi matyimunoñgonokesa okuti, Siovaa oe wanthuma ndyilinge ovipuka evi aviho. Helihindile vala andyike nomutima wange.* 29 Ine ovanthu ava vankhia vala ngeetyi ovanthu vankhia-le, avamoneswa vala ononkhumbi ngo ombu ovanthu vehole-ale okumona, opo nkhwali ha Siovaa-ko wanthuma.+ 30 Mahi ine Siovaa uveetela ovihuna, eheke aliyuhama,* alivenyini-po, navo novipuka viavo aviho, avai nomwenyo Kondyembo,* onwe mamutyimono umwe nawa okuti, ovanthu ava kavalingile Siovaa onthilo.”

31 Kamanene-ale okupopia, eheke aliikuka ponomphai mbavo apa valiatela.+ 32 Eheke aliyuhama, alivenyini-po, navo nomaumbo avo, novanthu aveho vahula ku Kolaa,+ novipuka viavo aviho. 33 Aveho umwe, navo na vana vahula kuvo, avaende Kondyembo* nomwenyo. Eheke alivenyini-po, pokati ka vakwavo, aveho avavombo-po.+ 34 Etyi vahimbika okuliyavela, ova Isilayeli aveho avatili owoma, avakahateka, avati: “Eheke noonthwe malitunyini-po!” 35 Ku Siovaa+ akutundu otupia, atwiipaa ovalume 250 vayoka ombao.+

36 Siovaa pahe atolela Mwisesi, ati: 37 “Tolela Eliyasale omona womunakwa Alau, uti apole onoseke-seke potupia,+ mokonda mbukola. Tupu mupopila, apole-po etwe elitwala kokule, elihanyaikisa. 38 Onoseke-seke mbovalume vokwakwata onkhali, avafete-po omwenyo wavo,* mbuna okunthilwa otyivela tyahanduka nawa, ambuvandekwa komutala wovilikutila,+ mokonda vembweetele ku Siovaa, pahe nambo mbukola. Mbuna okulingwa ngootyo, opo ova Isilayeli valondokele-ko.”+ 39 Omunakwa Eliyasale, apolo onoseke-seke mbuna mbotyitasu, mbaetelwe novalume vokwapila motupia, embunthili otyivela tyahanduka nawa, mbupakwe komutala wovilikutila, 40 ngeetyi Siovaa atumine etyi apopia na Mwisesi. Otyo tyilondola ova Isilayeli vahalimbwe-ko okuti, nawike omunthu wahatuminwe,* wahatukile momuhoko wa Alau, ufwena pu Siovaa,+ ayoko ombao. Tupu tyivehinangelesa okuti, kavapondola okulinga nga Kolaa, nii ngeetyi tyalinga ovanthu vana vahulile kwe.+

41 Muhuka tyee, ova Isilayeli aveho, avahimbika okutañgunisa ovo Mwisesi na Alau,+ avati: “Onwe umwe vevali mwaipaa ovanthu va Siovaa.” 42 Etyi ovanthu aveho velipaka kumwe, avahimbika okuyayesa ovo Mwisesi na Alau, tyina vakati ñgana, ohinge yomaliongiyo yahikwa nekaka, omunkhima wa Siovaa aumoneka.+

43 Ava, ovo Mwisesi na Alau, avakaya no kohinge yomaliongiyo,+ 44 Siovaa apopila Mwisesi ati: 45 “Onwe tundei-po pokati kovanthu ava, mandyiveipaa pehepano.”+ Okwiiva otyo, avelipetamena-po.+ 46 Mwisesi atolela Alau, ati: “Kwata oseke-seke opake-ko otupia two komutala,+ opake-ko ombao, hateka.+ Vekoha konkhali, Siovaa wankhia onyengo, ovihuna viahimbika-le!” 47 Alau akwate oseke-seke ngeetyi Mwisesi emutuma, ahateka, aende pokati kovanthu. Mahi ovanthu vahimbika-le okumona ovihuna. Apake ombao koseke-seke, ahimbika okukoha ovanthu konkhali. 48 Atalama pokati kovanthu vokwankhia-le no vokuna omwenyo, ovihuna avipoleya. 49 Vokwankhila movihuna ovio, vena 14.700, vayawisa ko vokwankhia kombanda ya Kolaa. 50 Pahe etyi Alau akondoka ku Mwisesi, pombundi yohinge yomaliongiyo, ovihuna viatalama-le.

17 Siovaa pahe atolela Mwisesi, ati: 2 “Popila ova Isilayeli, uti vaete onomphangoti mbonohongoi mbomihoko aviho.+ Ambuho mambutuuka onomphangoti 12. Komphangoti nomphangoti honeka-ko enyina liohongoi yatyo. 3 Enyina lya Alau lihoneka komphangoti yomuhoko wa Levii, mokonda momihoko nomihoko, mamutundu omphangoti ike-ike. 4 Onomphangoti ombo mbupaka mohinge yomaliongiyo, komutwe Wotyikasa Tyoumbangi,+ okwaame ndyikala tyina ndyiya kwoonwe apeho.+ 5 Omphangoti yomunthu ame namakoyo-po,+ mayeeta ondyovo, otyo matyitalameka ova Isilayeli, avahandondauvula vali,+ noonwe avehemutañgaunisa vali.”+

6 Pahe Mwisesi eketyipopia kova Isilayeli. Onohongoi mbatyo aveho avemupe onomphangoti mbavo. Ohongoi yomuhoko wike, omphangoti ike, ambutuuka onomphangoti 12. Omphangoti ya Alau nayo opo ili. 7 Mwisesi apolo onomphangoti ombo, embupakela pu Siovaa, mohinge yokuna Otyikasa Tyoumbangi.

8 Muhuka tyee, ou Mwisesi anyingila mohinge yokuna Otyikasa Tyoumbangi. Ukati ñgaa, omphangoti ya Alau, yo womuhoko wa Levii, yayova. Ankho yaeta onomphapule, nononthemo, nenkhete liapia. 9 Mwisesi omokweeta onomphangoti ambuho pondye, ankho mbuli pu Siovaa, embwaavaila ova Isilayeli. Ngwe avembutala-tala, atyiti ou upola-po yae, ou upola-po yae.

10 Siovaa atolela Mwisesi, ati: “Omphangoti ya Alau,+ ikondola Potyikasa Tyoumbangi opo ina okupakwa, ilinge otyilekesa+ tyilondola onomphwililiki,+ vayeke-po okundondovola opo vahupe.” 11 Mwisesi tyiivee, alingi umwe etyi Siovaa emutuma. Alingi umwe ngeetyi apopilwa.

12 Ava, ova Isilayeli pahe aveliyave ku Mwisesi, avati: “Etyi pahe matunkhi umwe vala, katuhupu-ale vali! Atuho-atuho matunkhi! 13 Pahe omunthu wamafwene umwe vala pekaka liefendelo lya Siovaa, mankhi!+ Naina otyo matunkhi vala ngeetyi atuho?”+

18 Siovaa atolela Alau, ati: “Tyati noove novana vove, no vomuhoko wove, onwe mamupulwa ine pena etyi tyapenga tyalingwa momphangu ikola.+ Ove novana vove, onwe mamupulwa ine pena etyi tyipenga motyilinga tyounakwa.+ 2 Tupu ihana vakwenyi vomuhoko wa Levii, omuhoko wovakwaukulu venyi, veye kwoove, vemuundapele, noove+ novana vove mohinge Yotyikasa Tyoumbangi.+ 3 Ovo vena okukuundapela, avalingi ovilinga mohinge.+ Mahi kavapondola okufwena povityuma vyo momphangu ikola, no pomutala wovilikutila, opo tyitie navo noove mwahankhie.+ 4 Mamukala navo, avalingi ovilinga viayemba kohinge yomaliongiyo, navina vilingwa mohinge yatyo. Nawike omunthu wahapelwe otyilinga otyo* una okuya kwoonwe.+ 5 Mamulingi ovilinga vienyi vyo momphangu ikola,+ no vyo komutala wovilikutila+ opo nahanumanena vali+ ova Isilayeli. 6 Ame mwene nelikoyela vomuhoko wa Levii vakwenyi. Nevepola mova Isilayeli andyimwaavela-vo otyali,+ vakale venyi. Ovo vapakulilwa Siovaa na valinge ovilinga vyo mohinge yomaliongiyo.+ 7 Tyati ove, ovana vove, onwe muna otyilinga tyayemba kounakwa tyilingilwa komutala, neetyi tyilingilwa konyima yotyinyanga tyo momphangu ikola,+ onwe muna otyilinga otyo.+ Nemwaavela otyilinga tyounakwa, kotyali tyange. Omunthu wahapelwe otyilinga otyo, kapondola okufwena-po, ufwena-po una okunkhia.”+

8 Siovaa apopila vali Alau, ati: “Ame mwene nekwaavela otyilinga tyokutambula oviawa napewa.+ Nevipa ove novana vove, vikale ondyambi yenyi ya apeho, ipolwa povipuka vikola ova Isilayeli vaava.+ 9 Ovipuka vilinga viove, vitunda poviawa viokuyokwa vikola, ovievi: oviawa aviho valinga, kumwe no viovilia,+ noviawa vionkhali,+ noviawa viokwavelwa+ onombei vandyetela. Vikala ovipuka vikola kwoove, no kovana vove. 10 Tyina uvilia, una okuvilila pomphangu ikola.+ Ovalume aveho vapondola okulia-ko, ovio ovipuka vikola kwoove.+ 11 Etyi natyo tyikala tyove: Oviawa aviho+ ova Isilayeli vamaetelela tyina vaeta oviawa viavo viokweendaiswa.+ Nevipa ove novana vove ovakwendye, novafikwena. Vilinga-linga vienyi apeho-apeho.+ Vo meumbo liove vapondola okulia-ko, ovava vala vasukuka.+

12 “Omulela ukahi vali nawa, novinyu omphe ikahi vali nawa, novilia, ovipuka vitunda kovikuna vyo tete,+ vina viamapewa Siovaa, nevipa onwe.+ 13 Ovinyango vitetekela okupia motyilongo tyavo, vina vamaetela Siovaa, vilinga vienyi.+ Vo meumbo liove vapondola okulia-ko ovava vala vasukuka.

14 “Ovipuka aviho viamapakulilwa Huku* mo Isilayeli, vilinga vienyi.+

15 “Oviveli aviho+ viamapakulilwa Siovaa, tyilinge omunthu, tyilinge ovinyama viokwatetekela okutyitwa, vilinga vienyi. Mahi otyiveli tyomunthu+ una okutyikumana. Notyinyama tyokwatetekela okutyitwa, mahi tyasila, una okutyikumana.+ 16 Una okutyifetela, utyiyovole-ko tyina palamba-le ohanyi apa tyatyitwa. Una okutyifetela ono sikulu* ononthano mbopalata,+ mbweelekwa mo sikulu yo momphangu ikola,* ituuka ono sela* 20. 17 Tyahakumanwa vala,+ tyati ongombe onthwei yokwatetekela okutyitwa, ongi onthwei yatetekela okutyitwa, notyinkhombo otyitwei tyatetekela okutyitwa. Ovipako ovio, vikola. Tyina wamaipaa tyimwe, ohonde yatyo inyanya komutala wovilikutila,+ ovilenga viatyo vipaka motupia vilinge otyiawa tyokuyokwa, vieetele omuniko omuwa* Siovaa.+ 18 Ohitu yatyo ilinga yenyi. Ilinga yenyi, ngolukolo lwotyiawa tyokweendaiswa, notyikalo tyo kokulio.+ 19 Ovipuka aviho vikola, ova Isilayeli vamaetela Siovaa,+ vilinga vienyi apeho-apeho. Ei omphango yomongwa* itwalako apeho-apeho+ pokati kenyi na Siovaa, noove novanthu mavakatuka-tuka mwoove.”

20 Siovaa atolela Alau, ati: “Ove kumapingi natyike motyilongo tyavo, tupu kumapingi ohika naike ailingi yove.+ Ame, ame pingo liove. Pu va Isilayeli vakwenyi, ove mopolo-po ame.+

21 “Tala! Vomuhoko wa Levii, povipuka aviho viaawa+ nova Isilayeli, ngondyambi yavo movilinga valinga mohinge yomaliongiyo, ndyivepolela-po vya 10, ngavio vilinga viavo. 22 Ova Isilayeli kavapondola okufwena pohinge yomaliongiyo. Ine valinga ngootyo, mavakwata onkhali, avankhi. 23 Vomuhoko wa Levii ovo mwene vena okulinga ovilinga vyo mohinge yomaliongiyo. Ovipuka viapenga+ viamalingwa-mo, vipulwa kuvo. Etyi otyitumino muna okulandula apeho, noonwe novanthu mavakatuka-tuka mwoonwe. Kavapiñgana natyike pokati kavo na va Isilayeli vakwavo.+ 24 Mokonda vomuhoko wa Levii nevepakulila ovipuka vipolwa kovipuka ova Isilayeli vaavela Siovaa. Otyo nevepopilila okuti: ‘Ngwe kavapondola okupinga natyike nava Isilayeli vakwavo.’”+

25 Pahe Siovaa atolela Mwisesi, ati: 26 “Popila vomuhoko wa Levii, uti: ‘Onwe mamupewa-pewa ovipuka vya 10 vipolwa koviawa viova Isilayeli. Ndyimupa-vyo vikale epingo lienyi.+ Tupu noonwe muna okupola ovipuka vya 10 kovipuka mwapewa, amwaavela Siovaa.+ 27 Otyo, otyo matyilinga-linga otyiawa tyenyi, ngatyina mwaava ovilia mwapola potyipale tyenyi, ngatyina mwapola kovinyu yenyi onyingi,+ no komulela wenyi omunyingi. 28 Okulinga ngootyo, noonwe mamulingi oviawa vienyi ku Siovaa mupola kovipuka mupola kova Isilayeli. Koviawa ovio, muna okupola-ko otyiawa matyilingilwa Siovaa, amutyiavela Alau. 29 Muna okulingila Siovaa oviawa viatyo aviho mupola povipuka vikahi vali nawa mwapewa,+ avilingi ovipuka vikola.’

30 “Tupu vepopila okuti: ‘Tyina mwamaave ovipuka mwapola po viokukahi vali nawa, viamahupu-po, onwe vomuhoko wa Levii muna okuvilinga ngatyina viatunda potyipale tyenyi, ngatyina viatunda kovinyu yenyi, no komulela wenyi. 31 Onwe no veumbo lienyi, mupondola okuvilila apa mwahanda. Mokonda ovio ondyambi yenyi movilinga mulinga mohinge yomaliongiyo.+ 32 Ine muti tyina mwaava, mupola-po viokukahi vali nawa, ngavio mwaava, opo kamamukwate onkhali. Mwahasilisei ovipuka viova Isilayeli vikola, ine muvisilisa munkhia.’”+

19 Siovaa atolela vali ovo Mwisesi na Alau, eveti: 2 “Etyi otyitumino Siovaa apopia, wati: ‘Tolela ova Isilayeli, uti vekweetele ongombe oina ikuhuka ikahi nawa, yehena otyinthembia,+ yehenepandekwe nkhele yali. 3 Muna okuyeeta amwiipe omunakwa Eliyasale, ngwe meipolo eitwala kondye yonthanda, ngako iipaelwa. 4 Haa omunakwa Eliyasale, ayave omunwe mohonde yatyo, einyanye okupalaika atee tyivasa pepandu-vali, okwiiviukisa kombundi yohinge yomaliongiyo.+ 5 Ongombe oyo, aipakwa motupia otyo atala, atyiti nombandwa yatyo, nohitu yatyo, nohonde yatyo, notyandya tyatyo, aiyokwa.+ 6 Omunakwa apolo evai liomusendulu, no isopu,+ notyinyanga tyikuhuka, eviyumbu potupia apa pena nokuyokwa ongombe oyo. 7 Pahe, omunakwa akoho ovikutu viae, nae elikoho. Tyina amelikoho, pahe anyingila monthanda. Mahi makala tyasila atee kokangulohi.

8 “‘Wokwayoka ongombe oyo, nae una okukoha ovikutu viae nomeva, nae elikoho, akala tyasila atee kokangulohi.

9 “‘Mapolo-ko etwe liongombe oyo,+ elitwala apa pasukuka kondye yonthanda, oyo una wasukuka. Ova Isilayeli aveho vena yokulipaka nawa, lihonyaikwe momaande maalingi okukoha ononkhali.+ Otyo otyiawa tyonkhali. 10 Una upola-ko etwe liongombe oyo, una okukoha ovikutu viae, akala tyasila atee kokangulohi.

“‘Otyo otyitumino ova Isilayeli vena okulandula apeho, navo nononthunda-vilongo vakala nambo.+ 11 Una wamayame komunthu wankhia,* makala tyasila ononthiki epandu-vali.+ 12 Una okulikoha nomaande okukoha ononkhali monthiki ya tatu, monthiki ya pandu-vali asukuka. Mahi ine kelikoho monthiki ya tatu, opo monthiki ya pandu-vali kamasukuka. 13 Omunthu wamayame komunthu wankhia,* ehelikoho, masilisa ekaka liefendelo lya Siovaa.+ Pokati kova Isilayeli+ vakwavo una okwiipawa-po.* Makala tyasila. Una okukala vala tyasila, mokonda kanyanyenwe omaande okukoha ononkhali.+ Ukala vala ngootyo tyasila.

14 “‘Etyi otyo otyitumino tyina okulandulwa tyina pena umwe wanyimina mohinge. Ou wamanyingila mohinge omo, nou ulimo-ale tyina omunthu oo anyima, vena okukala tyasila ononthiki epandu-vali. 15 Ovityuma aviho vili-mo, viahapatelwe, vikala tyasila.+ 16 Una uli poluhandya ngo opo, ayame komunthu wankhia, waipawa nomutunga, hamwe o kotyivimbi, hamwe o kenkhipa liomunthu, hamwe okeendo, makala tyasila ononthiki epandu-vali.+ 17 Omunthu oo wokwasila, una okupolelwa katutu petwe lioviawa viayokwa, vialingilwa onkhali, avataindya apa velipaka, avatili-ko omaande apolwa pondyivi-ndyivi. 18 Omunthu umwe wasukuka,+ apole o isopu+ eiyaveka momaande omo, anyanye kohinge, no kovityuma viatyo, no kovanthu* ankho veli-mo, no ku una wayama komankhipa, ine hamwe o komunthu waipawa, ine hamwe o kotyivimbi, hamwe wayama keendo. 19 Omunthu umwe wasukuka manyanye omaande komunthu oo wokwasila, monthiki ya tatu no monthiki ya pandu-vali. Monthiki ya pandu-vali,+ emukoho konkhali. Pahe oo wokwasila, akoho ovikutu viae, ngwe elikoho nomaande olutu aluho, tyina tyiti kokangulohi, asukuka.

20 “‘Omunthu una wasila, mahi ehelikoho, pu vakwavo una okwiipawa-po+ mokonda wasilisa omphangu ikola ya Siovaa. Mokonda kanyanyenwe omaande okukoha ononkhali, wasila.

21 “‘Etyi otyitumino tyina okulandulwa apeho. Ou wamanyanye mukwavo omaande okukoha ononkhali, una okukoha ovikutu viae.+ Una wamayame komaande oo, una okukala tyasila atee kokangulohi. 22 Otyipuka tyamayame kotyipuka tyasila, natyo tyikala tyasila. Nomunthu wamayame kotyipuka tyasila, ukala tyasila atee kokangulohi.’”+

20 Mohanyi yo tete, ova Isilayeli aveho avaende, avekehika moluhandya lwo Sii, avakakala mo Kande.+ Oko, ngako Miliaa+ anyimina, ngako apakwa.

2 Ankho kutupu omaande ovanthu mavanu.+ Avelipake kumwe aveho, avahimbika okuyayesa ovo Mwisesi na Alau. 3 Ovanthu avatañgunisa Mwisesi,+ avati: “Ine noonthwe twaipaelwe vala etyi ovakulu vetu vaipawa na Siovaa, ñgeno hahe! 4 Otyityi mwaetela ovanthu va Siovaa moluhandya muno? Pahe matyiti vala noonthwe, novipako vietu, atunkhila muno?+ 5 Otyityi mwetupolela ko Isitu, amutweeta motyilongo muno tyikahi omapita ñgaa!+ Tyati atyehena onohika mbokulima, atyehena omahipwa, atyehena onouva nii oma lomaa, nii vala omaande okunwa!”+ 6 Ava ovo Mwisesi na Alau, avatundu povanthu aveho, avaende. Avaende kombundi yohinge yomaliongiyo, avelipetamena-po. Omunkhima wa Siovaa auhimbika okumoneka kuvo.+

7 Siovaa atolela Mwisesi, ati: 8 “Pola-po omphangoti yove, ongiya ovanthu aveho-aveho, noove na Alau omukulu wove, kalelei komutwe wovanthu aveho, amupopila onkhanda, imwaavele omaande. Vepolelei omaande monkhanda, amuveavela aveho vanwe, navo novipako viavo.”+

9 Mwisesi apolo omphangoti ankho ili komutwe wa Siovaa,+ eikwate, ngeetyi Ngwe emutuma. 10 Pahe ovo Mwisesi na Alau, avakongololela ovanthu aveho ponkhanda opo. Ou Mwisesi eveti: “Tehelelei kuno nomphwililiki onwe! Mwahanda tumupolele omaande monkhanda ei?”+ 11 Mwisesi ayelula omphangoti nokuvoko kwae, avete monkhanda tuvali, amuhimbika okutyutyumuka omaande. Ava ovanthu aveho avahimbika okunwa, novipako viavo aviho avinu.+

12 Etyi pakala, Siovaa atolela ovo Mwisesi na Alau, eveti: “Etyi naina mwahayumbile onthumbi mwaame, amwahankhimaneka kotyipala tyovanthu ava aveho ova Isilayeli, onwe hanwe-ko vali mamutwala ovanthu ava motyilongo nati otyo mandyivepe.”+ 13 Omaande oo, omo Melimbaa,*+ o pweetyi ova Isilayeli vatañgunisile Siovaa, ngwe ankhimaneka enyina liae pokati kavo aveho.

14 Pahe Mwisesi, atumu ovatumwa-ndaka, vatunde ko Kande, vende kohamba yo Endoo,+ evetumu vakatie: “Muti tyatiwa ondenge yove Isilayeli+ wati: ‘Tatekulu, ove wii umwe nawa ovitateka aviho twakondya navio. 15 Ovakwaukulu vetu, vaile kotyilongo tyo Isitu.+ Onthwe ko Isitu oko twapangela omanima omanyingi.*+ Ova Isitu ankho vetulinga vala onya, noonthwe novakwaukulu vetu.+ 16 Etyi twakala, atuliyave ku Siovaa,+ ngwe etwiivi, atumu oandyu yae, itupole ko Isitu.+ Pahe onthwe vano, tuli pano po Kande, epunda-umbo lili monondimbu mbotyilongo tyove. 17 Tulambele-vo motyilongo tyove mbaa. Kamatuliate mepia nalike, nii momivinyu viove, nii kamatunu omaande ponyombo yove naike. Matukwate umwe vala mondyila yohamba, atwahayapuka-mo, nii okwenda no kokulio nii okwenda no kokumbili, atee umwe tulamba otyilongo tyove.’”+

18 Mahi, ei ohamba yo Endoo aiti: “Ove kupondola okuliata motyilongo tyange. Ine uliata-mo, mandyiya oko nomutunga.” 19 Pahe ova Isilayeli, avemuti: “Mukwe matukwate-mo vala ondyila. Tyati vala onthwe, ovipako vietu, kamatunu omaande ove. Ine tweenwa, opo haa tweefeta.+ Twahanda umwe vala okulamba ondyila, katuhande vali natyike.”+ 20 Mahi, ayaanye umwe, aiti: “Kamamulambela-le motyilongo tyino.”+ Ohamba yo Endoo aitundu opo, aikatula ovita viayo ovinene,* viokuna ononkhono, aii-ko. 21 Ohamba yo Endoo, ayehetavela umwe ova Isilayeli valambele motyilongo tyayo. Ava ova Isilayeli, avaovola ondyila onkhwavo.+

22 Ova Isilayeli aveho-aveho avakatuka ko Kande, avaende, avekehikila komphunda yo Hole.+ 23 Siovaa atolela ovo Mwisesi na Alau ankho veli komphunda yo Hole, mwaoyela otyilongo tyo Endoo ati: 24 “Alau mai kondyembo kovavo,*+ kamanyingila motyilongo mandyiavela ova Isilayeli, mokonda yeetyi mwaanya otyitumino tyange pomaande o Melimbaa.+ 25 Enda na Alau, nomona wae Eliyasale, pokatanga-tanga komphunda yo Hole. 26 Alau mupola ovikutu viae,+ vivaleka omona wae Eliyasale.+ Alau oko makankhila oko.”

27 Mwisesi alingi umwe ngeetyi Siovaa atuma. Avalondo komphunda yo Hole, ovanthu aveho otyo vatala. 28 Mwisesi alulu Alau ovikutu viae, evivaleka Eliyasale omona wa Alau. Alau, ankhila pokatanga-tanga komphunda oyo.+ Ovo Mwisesi na Eliyasale, avatuluka-ko. 29 Etyi ova Isilayeli aveho vetyimona okuti Alau wanyima, aveho avalili unene. Avayavala ononkhia mbae ononthiki 30.+

21 Etyi Alande+ ohamba yo Kanaa ukala mo Nengembe, eiva okuti ova Isilayeli vekahi nokuya nondyila yo Atalii, alwisa ova Isilayeli, akwate-po vamwe puvo, aende navo. 2 Ova Isilayeli avalingi omphango, avapopila Siovaa okuti: “Ine upakula ovanthu ava peke lietu, onthwe omapunda-umbo avo, matweehanyauna-po.” 3 Siovaa etavela etyi ova Isilayeli vapopia. Evepakulila ova Kanaa, aveveipaa, omapunda-umbo avo aveehanyauna-po. Otyo otyilongo otyo vetyilukila okuti o Holomaa.*+

4 Tyina venda, etyi vatunda komphunda yo Hole,+ vekwete mondyila ikwata Kelunga Enkhuhu, na velisetele ko Endoo,+ ovanthu* avaponwa unene mokonda yokwaenda ehimbwe. 5 Ovanthu avahimbika okupopia omapita Huku na Mwisesi,+ avati: “Otyityi mwetupolela ko Isitu, tuye okunkhila moluhandya muno! Kuno kwati vala akwehena kulia, akwehena maande!+ Onthwe* nomanaa ei tupewa katwiihande-ale* yanika.”+ 6 Siovaa evetahela ononyoka mboulio, ambuhimbika okuvenumata, ovanyingi pova Isilayeli, avankhi.+

7 Ovanthu avai ku Mwisesi, avati: “Twalinga onkhali ku Siovaa, no kwoove tatekulu.+ Twiitile-ko ku Siovaa etupole-vo ononyoka ombu.” Mwisesi, eveitila-ko.+ 8 Siovaa atolela Mwisesi, ati: “Linga otyipuka tyimwe tyilinga ngonyoka, otyiwingila kotyimuti. Tyina umwe amanumatwa nonyoka, oko ena okutala opo ahupe.” 9 Mwisesi tyiivee, alingi onyoka yotyitasu,+ ewingila kotyimuti.+ Apeho tyina umwe amanumatwa nonyoka, oko atala, ahupu.+

10 Pahe ova Isilayeli avaende, avakakala ko Ombote.+ 11 Etyi vatunda ko Ombote, avakakala ko Isee-Ambalii,+ moluhandya lwelihula no Moambe, okuviuka koutundilo. 12 Avatundu oko, avaende, avakakala komulola wo Selende.+ 13 Etyi vatunda vali oko, avaende no ko Alunoo,+ ikala moluhandya luli monondimbu mbova Amoleu, mokonda o Alunoo ili monondimbu mbotyilongo tyo Moambe, monondimbu mbo Moambe no Amoleu. 14 Otyo Omukanda wa Siovaa Wovilwa utila: “O Vahembe ko Sufaa, omilola vyo Alunoo 15 notyilauka tyomilola tyaviuka kepunda-umbo lyo Ale, atyipolesapo onondimbu mbo Moambe.”

16 Pahe avaende no ko Mbeele. Oyo onyombo ina Siovaa atolelele Mwisesi etyi ati: “Ongiya ovanthu ndyiveavele omaande.”

17 Pononthiki mbatyo opo, opo pana ova Isilayeli vaimbile otyiimbo etyi:

“Kena omaande, ove nyombo! Mutavelei!*

Pahe avatundu moluhandya omo, avaende no ko Matanaa. 19 Etyi vatunda ko Matanaa avaende no ko Naalieli, etyi vatunda ko Naalieli avakapita no ko Mbamote.+ 20 Avatundu ko Mbamote, avaende komulola ukala motyilongo tyo* Moambe,+ pokatanga-tanga ko Pisinga,+ tyina uli-po, o Sesimoo* imoneka vala nawa.+

21 Ova Isilayeli avatumu ovatumwa-ndaka, vakapopile Siyoo ohamba yova Amoleu, okuti:+ 22 “Tuyeke-vo tulambele motyilongo tyove. Kamatuyapuka mondyila, atuliate mepia liove, nii mepia liove lionouva. Kamatunu omaande monyombo naike. Matweende umwe vala nondyila yohamba, atee tulamba motyilongo tyove.”+ 23 Siyoo ahayeke ova Isilayeli valambele motyilongo tyae. Mahi aongiya ovita viae. Aende akalwise ova Isilayeli veli moluhandya. Etyi ehika ko Saasi, ahimbika okulwisa ova Isilayeli.+ 24 Mahi, ova Isilayeli avevelwisa nomutunga,+ avatili-ko. Avevepolo otyilongo tyavo,+ okuhimbikila ko Alunoo+ atee ko Samboke+ popepi nova Amoo, mokonda o Sasele+ ina onondimbu notyilongo tyova Amoo.+

25 Ova Isilayeli avapolo omapunda-umbo oo aeho ova Amoleu,+ mo Hesimboo ngavo vakala-mo, no movilongo viatyo aviho vyo popepi, vitavela kepunda-umbo olio. 26 O Hesimboo epunda-umbo liohamba Siyoo, Siyoo ohamba yova Amoleu, walwisile ohamba yo Moambe, evepolo otyilongo tyayo atyiho no Alunoo. 27 Otyo kwahindilwa omuhe womukwele, wati:

“Endywei ko Hesimboo.

Epunda-umbo lya Siyoo, litungwe, likale epunda-umbo liokwapama.

28 Mo Hesimboo, mwakatuka otupia. Mepunda-umbo lya Siyoo mwatunda ekundungala liotupia.

Twayoka-po otyilongo tyo Ale, mepunda-umbo lyo Moambe. Twayoka-po ovatumini vali ponomphangu mbakulama mo Alunoo.

29 Ove Moambe, ngongo yove! Onwe mamukahanywa-ko vanthu va Kemosi!+

Ovana vae ovakwendye mavapambe motyilongo kombanda yae. Ovafikwena mavatwalwa koukonde na Siyoo, ohamba yova Amoleu.

31 Pahe ova Isilayeli avakala motyilongo tyova Amoleu. 32 Mwisesi atumu ovalume vakatale etyi otyilongo tyo Sasele tyikahi.+ Avevepolo ovilongo viavo vimwe,* avataata-mo ova Amoleu vakala-mo. 33 Pahe, avaanguluka-ko, avaende nondyila yoko Mbasaa. Onge+ ohamba yo Mbasaa, akatula ovita viae aviho, aende-ko ekevelwise tyina vati ko Endelei.+ 34 Siovaa atolela Mwisesi, ati: “Wehemutile owoma,+ mokonda mandyimupakula peke liove,+ nae novanthu votyilongo aveho, notyilongo tyatyo. Momulingi ngeetyi walinga-le Siyoo ohamba yova Amoleu mo Hesimboo.”+ 35 Ova Isilayeli avemwiipaa, nae novana vae, novanthu votyilongo tyae, nawike wahupile motyilongo tyae.+ Motyilongo tyatyo, ngavo vakala-mo.+

22 Ova Isilayeli avatundu opo, avaende avakakala momanthanthalahi omoluhandya lwo Moambe, nthele ina ondongi yo Solondau, konthele ko Selikoo.+ 2 Pahe ou Mbalake+ omona wa Sipole, wetyimwene atyiho ova Isilayeli valinga ova Amoleu. 3 Ova Moambe avatili owoma ovanthu ovo, mokonda ovanyingi unene. Avatili unene owoma ova Isilayeli.+ 4 Pahe ova Moambe avapopila ovakulu vomo Mindiyaa+ okuti: “Pahe ovanthu ovo aveho mavali-po umwe ovipuka aviho vili ponthele yetu, ngongombe ilia eholi ivasa movipembe.”

Pononthiki opo Mbalake omona wa Sipole, oe wali o ohamba yo Moambe. 5 Atumu ovatumwa-ndaka vakaihane Mbalaau omona wa Mbeole ukala ko Petole,+ ponthele pondongi Eufalate potyilongo tyae atyitilwa, vekemupopile okuti: “Tala, kuno kweya ovanthu vamwe vatunda ko Isitu. Tala! Ovanthu vamwe ovanyingi vahika ohi aiho,*+ veli kuno ponthele potyilongo tyange. 6 Endyu kuno mba, uye utele-vo onkhano ovanthu ava mokonda vena vali ononkhono kwaame,+ hamwe tyina namevelwisa ndyivevila avatili-ko kwaame andyivetaata motyilongo tyino. Mokonda ame ndyityii umwe nawa okuti omunthu ove upeleyila oviwa, umona oviwa, ou uteyela onkhano umona ovihuna.”

7 Ovakulu vomo Moambe novakulu vomo Mindiyaa avaende avatyindila ondyambi omutali, avaende komutali Mbalaau+ avemutolela ondaka yatunda ku Mbalake. 8 Pahe ou Mbalaau eveti: “Lalei kuno, muhuka nga kwatya ame mandyimupopila etyi Siovaa amakumbulula.” Pahe ovakulu vo ko Moambe avalala oko.

9 Huku aendela Mbalaau emupulu okuti:+ “Ovalume ava una-vo ovalie?” 10 Mbalaau akumbulula Huku yotyotyili ati: “Ohamba yo Moambe Mbalake omona wa Sipole watuma kuno ondaka, wati: 11 ‘Tala! Kweya ovanthu vamwe kuno vatunda ko Isitu veli nokwoya ohi aiho,* pahe endyu kuno uvetele onkhano,+ hamwe tyina ndyilwa navo ndyivevila andyivetaata.’” 12 Mahi Huku atolela Mbalaau ati: “Ove wahaye-ko, wahakatele onkhano ovanthu ovo mokonda ame nevepa elao.”+

13 Mbalaau etyi kwatya, apopila ovakulu vokwatumwa na Mbalake ati: “Kondokei, endei vala kotyilongo tyenyi, ame Siovaa kandyekele twende atuho.” 14 Ovakulu vo ko Moambe avakondoka, avaende ku Mbalake avati: “Mbalaau una waanya keile.”

15 Mahi Mbalake atumu-ko vali ovakulu, pahe atumu-ko vali ovanyingi, mahi ovanene vali ko vo tete. 16 Avaende ku Mbalaau avemuti: “Mbalake omona wa Sipole wati: ‘Mbambavo endyu kuno wahayeke natyike tyikutyike oheya kwaame. 17 Ame mandyikunkhimaneka unene, mandyikulingila atyiho undyita. Endyu mba kuno, uye utele onkhano ovanthu ava.’” 18 Mahi Mbalaau akumbulula ovatumwa va Mbalake eveti: “Namphila Mbalake umpha umwe eumbo liae lieyula opalata no olu, ame himalingi-ale otyipuka natyike, tyilinge otyinene tyilinge otyitutu,+ tyahatuminwe na Huku yange Siovaa. 19 Mahi lalei ñgo nkhele kuno, ame mandyitehele etyi Siovaa mapopi andyimuungulula.”+

20 Huku, eya vali ku Mbalaau kounthiki emuti: “Ine ovalume ovo veya okukwihana wende, enda, mahi kapopie vala etyi ame namekupopila.”+ 21 Ou Mbalaau muhuka tyee vala, akwata otyimbulu* tyae, akatuka avaende novakulu vatundile ko Moambe.+

22 Mahi, onyengo ya Huku ainkhinduka, mokonda yeetyi etavela okwenda, oandyu ya Siovaa aitalama mondyila na imutyilike. Ou Mbalaau wavelama kotyimbulu, ava ovakwatesiko vae vevali ena-vo vemukwai. 23 Otyimbulu tyati vala monee oandyu ya Siovaa itai mondyila yakwata omutunga peke, atyii no mohika, mahi Mbalaau ahimbika okutyiveta tyikondoke mondyila. 24 Pahe oandyu ya Siovaa aitalama mondyila pomuvanda umwe wahita, pokati komapia evali omiti vionouva, omuvanda ukwata pokati kovimato viatungwa nomamanya. 25 Etyi otyimbulu tyakati ñgaa oandyu ya Siovaa itai mondyila, atyihimbika okulikulumba notyimato atyiolominya omphai ya Mbalaau motyimato, ou Mbalaau etyivete vali.

26 Oandyu ya Siovaa opo aihondovoka-po aiyende vali no komutwe aikatalama pamwe pahita vali unene, apa otyimbulu matyihetyivili okufenga nii okwenda no kokumbili nii okwenda no kokulio. 27 Etyi otyimbulu tyamona oandyu ya Siovaa atyilangala-po, otyo Mbalaau eli keulu, ou Mbalaau anumana unene etyivete vali notyimbonde tyae. 28 Pahe Siovaa atumu otyimbulu tyipopie,* atyipopila Mbalaau atyiti:+ “Oityi nekulinga umbetela? Ñgaa pahe eli umbeta otatu.”+ 29 Mbalaau akumbulula otyimbulu ati: “Nkhwali hame-ko-ale una nokulinga ñgaa, ine nali nomutunga peke ñgeno nekwipaa.” 30 Otyimbulu atyipulu vali Mbalaau atyiti: “Nkhele wahimbikile hame otyimbulu tyove wendela vala atee hono? Kumbi limwe nekulingile-ale ñgaa?” Ou Mbalaau akumbulula ati: “Au, kunetyindinge!” 31 Siovaa pahe apahula Mbalaau komaiho,+ ukati ñgaa oandyu ya Siovaa itai mondyila ina omutunga peke. Ngwe paku vala koandyu oyo, aikila konongolo, elipetamena-po.

32 Ei oandyu ya Siovaa aimuti: “Oityi wavetela otyimbulu tyove tutatu? Tala! Ame, ame neya okukutyika mokonda ondyila yove heihandele.+ 33 Aluho otyimbulu tyove tyahandela okuyapuka mondyila tutatu, ame tyamona.+ Tala! Ine hatyetyi otyimbulu tyayapuka ñgeno hono o hono! Ove ñgeno ñgaa utupu-ale vali omwenyo. Ñgeno nahupisa vala otyimbulu.” 34 Mbalaau apopila oandyu ya Siovaa ati: “Nakwata onkhali, hityii okuti ove utai mondyila tatekulu weya kwaame. Pahe naina, ine etyi nahanda okulinga kwoove tyapenga mandyikondoka.” 35 Oandyu ya Siovaa aitolela Mbalaau aiti: “Enda navo, mahi ukapopia vala etyi ame mandyikupopila.” Mbalaau ahakondoka aende umwe novakulu ovo vatuminwe na Mbalake.

36 Mbalake tyiive vala okuti Mbalaau weya, aende-ko vekelihonyene mepunda-umbo lyo Moambe likala molutyamo lwo Alunoo monondimbu mbotyilongo. 37 Mbalake apulu Mbalaau ati: “Have natuma uye kuno? Otyityi weheilile? Wasoka okuti hityivili okukupa ondyambi onene?”+ 38 Mbalaau akumbulula Mbalake ati: “Otyo umwe, mahi pahe neya. Mahi okuti mandyiyekwa umwe ndyipopie tyimwe? Ame mandyipopi vala ondaka Huku amapake momulungu wange.”+

39 Pahe Mbalaau avaende na Mbalake atee vekehika ko Kiliyate-Usote. 40 Mbalake alingi otyilikutila aipaa onongombe nonongi, apolela-ko Mbalaau novakulu vana ena-vo. 41 Komuhuka etyi kwatya, Mbalake atyindi Mbalaau avalondeka no ko Mbaale-Mbamote, opo etyivile okutala ovanthu aveho.+

23 Mbalaau apopila Mbalake, ati: “Pano tunga-po omitala epandu-vali,+ ondyipaela onondume-tane epandu-vali, nonongi ononthwei epandu-vali.” 2 Mbalake tyiivee, alingi etyi Mbalaau emupopila. Ovo Mbalake na Mbalaau avalingi ovilikutila, atyiti komutala oku vayokela-ko onthane ike nongi ike, komutala oku vayokela-ko onthane ike nongi ike.+ 3 Pahe Mbalaau atolela Mbalake, ati: “Ove kalela apa potyilikutila tyove tyokuyokwa, ame nkhele mandyeende no oku, hamwe Siovaa ukapopia naame. Ame mandyiya okukutolela atyiho mamphopila.” Aende no kotyipunda tyimwe tyehena omiti.

4 Huku apopi na Mbalaau, ou Mbalaau+ apopila Huku okuti: “Natunga-le omitala epandu-vali, andyilingi ovilikutila. Tyati oku nayokela-ko ondume-tane ike nongi ike, oku nayokela-ko ondume-tane ike nongi ike.” 5 Siovaa apake ondaka yae momulungu wa Mbalaau,+ ati: “Kondoka ku Mbalake. Otyo, otyo ukemupopila.” 6 Akondoka, tyina avasa, ou Mbalake novakulu aveho vo mo Moambe, vetai potyilikutila tyae tyokuyokwa. 7 Evepopila omuhe ou, ati:+

‘Endyu kuno, untheyele onkhano Sakoo.

Endyu uhingane Isilayeli.’+

 8 Ñgeni ame mandyiteyela onkhano ava Huku ahateyelele onkhano?

Ñgeni ame mandyihingana ava Siovaa ahahinganene?+

11 Pahe Mbalake atolela Mbalaau, ati: “Oityi wandingila ñgaa? Ame nekweeta kuno uteyele onkhano onondyale mbange, mahi ove wembupa elao.”+ 12 Ngwe emukumbulula okuti: “Ame hipopi vala ondaka Siovaa amphaka momulungu wange?”+

13 Mbalake emutolela, ati: “Twende atuho mbaa, twende na apa movemonena. Mahi kumevemono aveho, momono-ko vala vamwe. Tyina twamehiki-po, ventheyele-vo onkhano.”+ 14 Mbalake emupolo opo, emutwala pohika yo Sofii, pokatanga-tanga ko Pisinga.+ Atungu-po omitala epandu-vali, ayokela-ko ovilikutila. Atyiti oku ondume-tane ike nongi, oku ondume-tane ike nongi.+ 15 Pahe Mbalaau atolela Mbalake okuti: “Ove kalela apa ponthele potyilikutila tyove tyokuyokwa. Ame nkhele mandyeende no opo, ndyikapopie Nae.” 16 Siovaa apopi na Mbalaau, emupake ondaka momulunga wae, ati:+ “Kondoka ku Mbalake, otyo ukemupopila ngootyo.” 17 Pahe akondoka kwe. Tyina emuvasa, uli potyilikutila tyae tyokuyokwa, ukevela novakulu vo Moambe ena-vo. Mbalake emupulu okuti: “Siovaa wekutiwi?” 18 Ngwe apopi omuhe ou, ati:+

“Katuka Mbalake, tehelela.

Nthehelele mona wa Sipole.

Tyina amapopi otyipuka, okuti ketyilingi?

Etyi amapopi, okuti ketyifwisapo?+

22 Huku wevepola ko Isitu.+

Wakala onombinga mbavo, onombinga ngo mbongombe onthwei yo mohika.+

Pahe tyina tupopia Sakoo, na tyina tupopia Isilayeli, tuti:

‘Talei etyi Huku alinga!’

25 Pahe Mbalake atolela Mbalaau ati: “Ine naina kuveteyela onkhano, opo nelao wehevepe-lio.” 26 Mbalaau akumbulula Mbalake, ati: “Ame hekutile: ‘Tyamapopi Siovaa otyo mandyilingi’?”+

27 Mbalake atolela Mbalaau, ati: “Endyu mbaa, ndyikutwale vali no popakwavo. Hamwe pahe otyo tyiviuka ku Huku yotyotyili, tyina twamehiki-po, oventheyela-vo onkhano.”+ 28 Mbalake atyindi opo Mbalaau, emutwala pokatanga-tanga ko Peole, petavela okutala o Sesimoo.*+ 29 Mbalaau apopila Mbalake, ati: “Pano tunga-po omitala epandu-vali, ondyipaela onondume-tane epandu-vali, nonongi ononthwei epandu-vali.”+ 30 Ou Mbalake, alingi umwe atyiho Mbalaau apopia, atyiti komutala oku wayokela-ko ondume-tane ike nongi onthwei, oku wayokela-ko ondume-tane ike nongi onthwei.

24 Etyi Mbalaau atala okuti Siovaa mahande vala* okupa elao ova Isilayeli, ahaovola vali okutalesa.+ Apiluluka, atale moluhandya. 2 Pahe Mbalaau alingi ngoti utala peulu, ukati ñgaa, ova Isilayeli veli nokwoonga onthanda omu velikalailila, omihoko nomihoko.+ Omphepo ya Huku, aimweendela.+ 3 Apopi omihe, ati:+

10 Pahe Mbalake, ankhila ononyengo Mbalaau. Mbalake apumu peke tyokwanumana, apopila Mbalaau, ati: “Ame nekwihanena+ okuya okutela onkhano onondyale mbange, mahi pahe, ñgaa eli otatu ove uli nokuvepa elao. 11 Pahe kondoka keumbo liove. Ame nahandele umwe okukuyamba,+ mahi pahe tala! Siovaa wekupumbiswa ondyambi.”

12 Mbalaau akumbulula Mbalake, ati: “Ame ovatumwa-ndaka vove, hevepopilile-ale okuti: 13 ‘Mbalake nga amphe umwe ondywo yae yeyula opalata, noolu, himalingi natyike kohalwange,* tyilinge otyiwa, tyilinge otyivi. Hilingi natyike nahatuminwe na Siovaa. Mandyipopi vala etyi Siovaa amapopi’?+ 14 Ame pahe mandyeende kovetu. Tyina nkhele nehenekatuke ndyende, tala! Ndyikupopile etyi ovanthu ovo mavakalinga ovanthu vove komutwe wandyila.”* 15 Apopi omuhe, ati:+

20 Etyi amona Amaleke, atwalako nokupopia omuhe, ati:

21 Etyi amona ova Keneu,+ atwalako okupopia omuhe, ati:

“Eumbo liove lili mombembwa, ondywo yove ili monkhanda yapama.

22 Mahi pena umwe mayumbu ekundungala liotupia, ova Keneu avapila-mo.

Onalupi ova Asilia mavatwalwa koukonde?”

23 Atwalako okupopia omihe evi, ati:

“Tatiei! Olie pahe mahupu tyina Huku amalingi ngootyo?

Mahi nayo maikahanywa-po aiho.”

25 Pahe Mbalaau+ aende, akondoka. Ou Mbalake, nae aende nondyila yae.

25 Pweetyi ova Isilayeli vakala ko Sitii,+ ovanthu avahimbika okulipaka mouhayo wokulihanda novahikwena vo ko Moambe.+ 2 Ovahikwena ovo avakongo ova Isilayeli povilikutila valingila ovika-huku viavo.+ Avahimbika okulia, avelipetamena-po, okufenda ovika-huku viovakai ovo.+ 3 Ova Isilayeli avahimbika okufenda* Mbaale yo Peole.+ Otyipuka otyo ova Isilayeli valinga, Siovaa atyimunumanesa unene. 4 Siovaa atolela Mwisesi, ati: “Kwata ononkhalamutwe mbovanthu* ava aveho, oveleke. Veyendya komutenya watokota,* otyo Siovaa atala, opo onyengo ya Siovaa itule, ova Isilayeli vahupe.” 5 Mwisesi apopila vokukoyesa onomphela mo Isilayeli,+ eveti: “Ipaei ovanthu velipaka mefendelo lya Mbaale* yo Peole amuho.”+

6 Manee vala okupopia, omu Isilayeli umwe, aeta pu vakwavo omukai+ omu Mindiyaa, momaiho a Mwisesi umwe, nova Isilayeli aveho otyo vatala. Ova Isilayeli veli pombundi yohinge yomaliongiyo, otyo valila. 7 Fineya+ omona wa Eliyasale, Eliyasale omona womunakwa Alau, oko ati vala tuki, akatuka pokati ka vakwavo, akapola-po eonga. 8 Alandula omulume oo omu Isilayeli wanyingila mohinge yae, evetomo neonga. Atyiti, omulume omu Isilayeli wemwiipaa, omukai wemutoma omapita neonga alikatumba nthele ina, nae ankhi. Etyi alinga ngootyo, ovihuna viatokelele ova Isilayeli, avitalama.+ 9 Vokwankhia novihuna ovio, vena 24.000.+

10 Pahe Siovaa apopila Mwisesi, ati: 11 “Fineya+ omona wa Eliyasale, Eliyasale omona womunakwa Alau, wayakulila ova Isilayeli konyengo yange, tyeetyi kayekele vala ngootyo ava vayapuka kwaame.+ Otyo nahaipaelele ova Isilayeli, namphila ame nahanda okufendwa vala andyike.+ 12 Mupopila okuti: ‘Mandyilingi nae omphango yombembwa. 13 Omphango oyo, mailingi apeho yetu nae, younakwa, nae novanthu mavakatuka-tuka mwe.+ Tyeetyi kayekele vala ngootyo una wayapuka ku Huku yae.+ Wakoha ova Isilayeli konkhali.’”

14 Omu Isilayeli oo waipaelwa kumwe nomufikwena omu Mindiyaa, utiwa o Silii, omona wa Salu, ohongoi yomuhoko umwe watukile mu Simiyau. 15 Omufikwena watyo omu Mindiyaa, o Kosimbi omona wa Sule.+ Sule ohongoi yomuhoko umwe watukile mu Mindiyaa.+

16 Etyi pakala, Siovaa apopila Mwisesi, ati: 17 “Monesei ononkhumbi ova Mindiyaa, veipaei,+ 18 mokonda vemumonesa ononkhumbi novipuka viapenga valingile, viayemba ku Peole,+ no ku Kosimbi omona omufikwena wohongoi yo Mindiyaa, omphange yavo, wankhile+ monthiki yovihuna vamwene kombanda ya Peole.”+

26 Etyi ovihuna vialamba,+ Siovaa atolela Mwisesi, na Eliyasale omona womunakwa Alau, ati: 2 “Valula ovanthu aveho mo Isilayeli, aveho okuhimbikila po vokuna omanima 20 okwenda no komutwe, mokwelikalaila kwavo momihoko nomihoko, ovevalula aveho vapondola okwenda movita viova Isilayeli.”+ 3 Pahe etyi vati monthanthalahi yo moluhandya lwo Moambe,+ popepi no Solondau, ponthele po Selikoo,+ ovo Mwisesi nomunakwa Eliyasale,+ avati: 4 “Valulei ovanthu, okuhimbikila po vokuna omanima 20 okwenda no komutwe, ngeetyi Siovaa atuma Mwisesi.”+

Ovana va Isilayeli vatundile kotyilongo tyo Isitu, ovava: 5 O Lumbe,+ otyiveli tya Isilayeli. Ava ovana va Lumbe,+ ovava: O Anoke no veimo liae,* o Palu no veimo liae, 6 o Hesiloo no veimo liae, o Kalumi no veimo liae. 7 Ovo aveho vomuhoko wa Lumbe, vena 43.730.+

8 Omona wa Palu, o Eliyambe. 9 Veimo lya Eliyambe ovo Nemwele, na Ndataa, na Ambilau. Ovo Ndataa na Ambilau, vali ovalume vokwaholovonwa potyinkhunkha tya vakwavo. Ovo valwisile ovo Mwisesi+ na Alau, kumwe no vokwelipakele kumwe no vokwahula ku Kolaa,+ vana vokwalwisile Siovaa.+

10 Eheke aliikuka,* alivenyini-po. Ou Kolaa, novalume 250 vahula kwe,+ avaipawa notupia. Kuvo, ovanthu avalondokela-ko.+ 11 Mahi, ovana vatyo va Kolaa, avahankhi.+

12 Vokwatuka mu Simiyau,+ mokwelikalaila kwavo momihoko nomihoko, ovava: O Nemwele no veimo liae, o Samii no veimo liae, o Sakii no veimo liae, 13 o Sela no veimo liae, o Saulu no veimo liae. 14 Ovo aveho vomuhoko wa Simiyau, vena 22.200.+

15 Vokwatuka mu Ngande,+ mokwelikalaila kwavo momihoko nomihoko, ovava: O Sefoo no veimo liae, o Hangi no veimo liae, o Suni no veimo liae, 16 o Osini no veimo liae, o Eli no veimo liae, 17 o Alonde no veimo liae, o Aleli no veimo liae. 18 Ovo aveho o vonombunga mbatukile momuhoko wa Ngande. Vahonekelwe aveho vena 40.500.+

19 Ovana va Sundaa+ ovo Elii na Onaa. Mahi ovo Elii na Onaa,+ vankhilile kotyilongo tyo Kanaa.+ 20 Vokwatukile mu Sundaa mokwelikalaila kwavo momihoko nomihoko, ovava: O Selaa+ no veimo liae, o Pelesi+ no veimo liae, o Sela+ no veimo liae. 21 Vatukile mu Pelesi ovava: O Hesiloo+ no veimo liae, o Hamuli+ no veimo liae. 22 Aveho vomuhoko wa Sundaa, vokwahonekelwe vena 76.500.+

23 Vokwatuka mu Isakale,+ mokwelikalaila kwavo momihoko nomihoko, ovava: O Tola+ no veimo liae, o Puva no veimo liae, 24 o Sesumbe no veimo liae, o Siniloo no veimo liae. 25 Aveho vomuhoko wa Isakale, vahonekelwe vena 64.300.+

26 Vomuhoko wa Sembulau,+ mokwelikalaila kwavo momihoko nomihoko, ovava: O Selende no veimo liae, o Eloo no veimo liae, o Salele no veimo liae. 27 Aveho vomuhoko wa Sembulau, vahonekelwe vena 60.500.+

28 Ovana va Susee+ mokwelikalaila kwavo momihoko viavo, ovo Manasesi na Efalaii.+ 29 Vomuhoko wa Manasesi,+ ovava: O Makili+ no veimo liae. Ou Makili, atyiti Sileyande,+ mu Sileyande amutundu eimo ekwavo. 30 Ava o vokwatukile mu Sileyande: O Esele no veimo liae, o Seleke no veimo liae, o Heleke no veimo liae, 31 o Asiliyeli no veimo liae, o Sikei no veimo liae, 32 o Seminda no veimo liae, o Efele no veimo liae. 33 Selofeyande, omona wa Efele kamwene ovana ovakwendye, watyitile vala ovakainthu.+ Omanyina ovana va Selofeyande+ ovakainthu, oyaa: O Maala, o Nowa, o Hongala, o Milika, o Tilisa. 34 Aveho vomuhoko wa Manasesi, aveho vahonekelwe, vena 52.700.+

35 Vokwatukile mu Efalaii,+ mokwelikalaila kwavo momihoko nomihoko, ovava: O Sutela+ no veimo liae, o Mbekele no veimo liae, o Taa no veimo liae. 36 Mu Sutela amutuku Elaa no veimo liae. 37 Vatukile mu Efalaii, aveho vahonekwa avatuuka 32.500.+ Aveho ovo vatukile mu Susee, mokwelikalaila kwavo omihoko nomihoko.

38 Vokwatukile mu Mbesamii+ omihoko nomihoko, ovava: O Mbela+ no veimo liae, o Asimbele no veimo liae, o Ailau no veimo liae, 39 o Sufufa no veimo liae, o Hufau no veimo liae. 40 Ovana va Mbela, ovo Alinde na Naamaa.+ Mu Alinde amutuku eimo ekwavo, omu mu Naamaa amutuku eimo ekwavo. 41 Ovo aveho ovana va Mbesamii mokwelikalaila kwavo omihoko nomihoko. Aveho vahonekelwe vena 45.600.+

42 Ava vokwatukile mu Ndaa+ mokwelikalaila kwavo omihoko nomihoko, ovava: O Swaau no veimo liae. Ovo aveho vali vomuhoko wa Ndaa. 43 Aveho vokwahonekelwe veimo lya Swaau, vena 64.400.+

44 Vokwatukile mu Asele+ mokwelikalaila kwavo omihoko nomihoko, ovava: O Iminaa no veimo liae, o Isivi no veimo liae, o Mbeliya no veimo liae. 45 Vatukile mu Mbeliya, o Hembele no veimo liae, na Malikiyeli no veimo liae. 46 Omona wa Asele omukainthu watyo, utiwa o Sela. 47 Vokwatukile mu Asele vahonekelwe vena 53.400.+

48 Vokwatukile mu Nafitalii,+ mokwelikalaila kwavo omihoko nomihoko, ovava: O Saseeli no veimo liae, o Nguni no veimo liae, 49 o Sesele no veimo liae, o Silei no veimo liae. 50 Vokwatukile mu Nafitalii omu velikalaila omihoko nomihoko, vahonekelwe vena 45.400.+

51 Aveho ova Isilayeli vokwahonekelwe, vena 601.730.+

52 Etyi otyihoneka tyapwa, Siovaa atolela Mwisesi, ati: 53 “Onofika veyapaulila-mbo aveho, mbukale epingo liavo, aveho omu vahonekelwa omanyina avo.*+ 54 Ava watala ovanyingi, kepingo liavo yawisa-ko, ava watala okuti kavehi, kepingo liavo+ otepula-ko. Epingo waavela otyinkhunkha notyinkhunkha, lina okuta motyifwe tyo vokwahonekwa. 55 Mahi, pokuteta-teta otyilongo pena okutaleswa.+ Epingo velipelwe momanyina omihoko vyo vohe. 56 Pokutala olie mapewa epingo, pena okutaleswa, ovanyingi ovepe liavo, ava vehehi ovepe liavo.”

57 Ava o vokwatuka mu Levii,+ mokwelikalaila kwavo omihoko nomihoko: O Seleso no veimo liavo, o Kowate+ no veimo liavo, o Melali no veimo liavo. 58 Ava o vombunga yatyo ya Levii: Ombunga ya Limbini,+ ombunga ya Hemboloo,+ ombunga ya Malii,+ ombunga ya Musi,+ ombunga ya Kolaa.+

Ou Kowate, oe watyitile Anilau.+ 59 Tembwa Anilau utiwa o Sokembende, Sokembende+ omona wa Levii, ou Levii atyitila ko Isitu. Anilau oe ohe ya Alau na Mwisesi nomphange yavo Miliaa.+ 60 Ou Alau, ngae weeta Nandambe, na Ambiyuu na Eliyasale, na Itamale.+ 61 Ava ovo Nandambe na Ambiyuu ovovana vankhile etyi valinga otyilikutila notupia vahatuminwe, Siovaa eveipaa.+

62 Ovanthu aveho vahonekelwe, avatuuka 23.000. Aveho ovakwendye, okuhimbikila kolukembe lwohanyi ike, okwenda no komutwe.+ Ovo kavahonekelelwe kumwe na va Isilayeli+ vakwavo, mokonda kavapondola okutambulila kumwe na vakwavo epingo liavo.+

63 Ovo o vokwahonekelwe na Mwisesi nomunakwa Eliyasale, etyi vahoneka ovanthu aveho moluhandya lwo Moambe, popepi no Solondau, konthele ko Selikoo. 64 Puvo kapali nawike wahonekelwe na Mwisesi nomunakwa Alau, pweetyi ova Isilayeli vahonekelwe aveho moluhandya lwo Sinai.+ 65 Mokonda Siovaa wevepopilile okuti: “Ngaliti pano, vena okunkhila moluhandya.”+ Ovo aveho avankhi, apahahupu nawike. Pahupile vala Kalembe omona wa Sefunee, na Susuwee omona wa Nuu.+

27 Pahe, ovana va Selofeyande, Selofeyande+ omona wa Ifele, Ifele watundile mu Sileyande, omona wa Makili, Makili omona wa Manasesi, womuhoko wa Manasesi, Manasesi omona wa Susee, avafwene-po. Ovana ovo, tyati o Maala, o Nowa, o Hongila, o Milika, o Tilisa. 2 Avatalama kotyipala tya Mwisesi nomunakwa Eliyasale, komutwe wonohongoi+ mbutai novanthu aveho kombundi yohinge yomaliongiyo, avati: 3 “Tate wankhila moluhandya, mahi kakalele pu vana velipakele kumwe avalwisa Siovaa, vana vahulile ku Kolaa,+ wankhia vala mwene tyonkhali yae alinga. Mahi kamwene ovana ovakwendye. 4 Ñgaa enyina lya tate malivombo umwe mombunga yae, mokonda kamwene ovana ovakwendye? Tupelwe kumwe epingo, no veimo liovo tate.” 5 Ou Mwisesi tyiivee vala, eketyipopila Siovaa.+

6 Siovaa apopila Mwisesi, ati: 7 “Etyi ovana va Selofeyande vapopia, otyili. Vepa epingo kumwe no veimo lya he. Ovipuka vya tate yavo, vepa-vio vevipiñgane.+ 8 Popila ova Isilayeli, uti: ‘Ine omulume umwe unkhia tyahatyitile omona omukwendye, ovipuka viae vipiñganwa nomona wae omuhikwena. 9 Ine utupu omona omuhikwena, opo ovipuka viae, vipiñganwa nonondenge mbae, novakulu vae. 10 Ine utupu ndenge, nii mukulu, ovipuka viae vipiñganwa no veimo lya he. 11 Ine he utupu ndenge, nii mukulu, upiñgana ovipuka viae, o umwe mombunga yae mwene-mwene. Oo, oe mapiñgana ovipuka viae. Otyitumino otyo, otyo ova Isilayeli aveho vena okulandula, ngeetyi Siovaa atolela Mwisesi.’”

12 Siovaa atolela Mwisesi, ati: “Londa komphunda ei yo Mbaalii,+ utale otyilongo mandyiavela ova Isilayeli.+ 13 Tyina wametyitale, ove moende kondyembo kovenyi*+ nga Alau omukulu wove,+ 14 mokonda, pweetyi ovanthu veli nokulondovola moluhandya lwo ko Sii, onwe kamwetavelele otyitumino tyange. Kamwankhimanekelele puvo, pomaande+ oko Melimbaa. Oyo o Melimbaa+ yo ko Kande,+ moluhandya lwo Sii.”+

15 Pahe Mwisesi apopila Siovaa, ati: 16 “Ove Siovaa, mwaavi womienyo viovanthu aveho.* Holovona omulume makala onkhalamutwe yovanthu ava, 17 akatuke, apiti komutwe wavo, ngae ukala wokuvelupula nokuvenyingiya, opo ovanthu va Siovaa vahakale ngonongi mbehena munthita.” 18 Siovaa atolela Mwisesi, ati: “Ihana Susuwee omona wa Nuu, omulume wokwapahuka, oyambeka omavoko ove kwe.+ 19 Mutuma atalame komutwe womunakwa Eliyasale, ovanthu aveho otyo vatala. Omuvialeka akale onkhalamutwe yavo otyo velieetele-ko.+ 20 Ove una okumupolela katutu koutumini wove,+ opo ova Isilayeli aveho vatehelele kwe.+ 21 Ende komunakwa Eliyasale, memupulila-ko ku Siovaa, atalela ko Ulii+ etyi Huku apopia. Mavatehela kwe tyina valupuka, na tyina vanyingila, nae nova Isilayeli aveho, otyikumba tyatyo atyiho.”

22 Pahe Mwisesi alingi etyi Siovaa emutuma. Aihana Susuwee emutumu atalame komutwe womunakwa Eliyasale, komutwe wotyikumba atyiho tyova Isilayeli, 23 emuyambeka omavoko, emuvialeka,+ alinge onkhalamutwe. Alingi umwe atyiho Siovaa apopila Mwisesi.+

28 Siovaa apopila vali Mwisesi ati: 2 “Tuma ova Isilayeli uti: ‘Onwe apeho sukei nokundingila otyiawa tyange, okumpha ombolo yange. Oviawa viange viokuyokwa, vindingila omuniko omuwa,* vina okulingwa mononthiki mbanakwa.’+

3 “Vepopila okuti: ‘Otyiawa tyokuyokwa mamulingaila Siovaa tyilingwa ñgaa: ononthiki ambuho mweeta onondyona onombali mbukahi nawa mbuna enima like, mbulingwe otyiawa tyayokwa tyilingwa apeho.+ 4 Otyingi tyimwe motyaave komuhuka, otyingi otyikwavo otyaave kokangulohi.*+ 5 Tyina utyaava, etelela otyiawa tyovilia omapati evali ohinde yanyetuka, yahonya nolitulu ike yomulela womundyambi watyo mwene.+ 6 Etyi otyiawa tyokuyokwa tyilingwa apeho,+ tyahindilwa komphunda yo Sinai tyomuniko omuwa,* otyiawa tyokuyokwa tyilingilwa Siovaa. 7 Okunwa moave, kuna okuyula molitulu, ivandekwa kongi ike ike.+ Tilila Siovaa momphangu ikola otyiawa tyokunwa. 8 Ongi onkhwavo una okuyaava kokangulohi, tyina uyaava una okweetelela otyiawa tyovilia, noviawa viatyo viokunwa, ngeevi waava komuhuka watyo, tyilingwe otyiawa tyokuyokwa tyomuniko omuwa tyilingilwa Siovaa.+

9 “‘Motyasapalo+ muna okulinga otyiawa tyonongi onombali mbukahi nawa, mbuna enima like, nomapati evali ohinde yanyetuka yahonya nomulela, ilinge otyiawa tyovilia, amuvandekako otyiawa tyokunwa. 10 Otyo, otyo otyiawa tyokuyokwa tyilingwa motyasapalo, tyivandeka kotyiawa tyokuyokwa tyilingwale apeho, notyiawa tyatyo tyokunwa.+

11 “‘Tyina ohanyi yamaviale,* onwe muna okulingila Siovaa otyiawa tyokuyokwa onondume-tane onombali, nongi ike, nonondyona epandu-vali mbukahi nawa mbenima like.+ 12 Mamulingi otyiawa tyomapati evali ohinde yanyetuka, yahonya nomulela ilinge otyiawa tyovilia+ tyivandekwa kondume-tane ike, nomapati evali ohinde yanyetuka yahonya nomulela, ilinge otyiawa tyovilia tyivandekwa kongi ike,+ 13 nepati like liohinde yanyetuka yahonya nomulela, ilinge otyiawa tyovilia tyivandekwa kondyona ike. Otyo otyiawa tyomuniko omuwa+ tyokuyokwa tyilingilwa Siovaa. 14 Una okwaava otyiawa tyokunwa olitulu ike yovinyu nenthinge, mondume-tane ike,+ nolitulu ike nokanthinge mongi ike onthwei,+ nolitulu ike mondyona ike.+ Otyo otyiawa tyokuyokwa tyilingwa hanyi na hanyi menima. 15 Tupu muna okulingila Siovaa otyiawa tyotyinkhombo, tyilinge otyiawa tyonkhali, tyivandeka kotyiawa tyilingwale apeho, notyiawa tyatyo tyokunwa.

16 “‘Mohanyi yotete, monthiki 14 kohanyi muna okulingila Siovaa opasikwa.+ 17 Tyina tyiti monthiki 15 yohanyi oyo, amulingi otyipito. Mukala ononthiki epandu-vali tyilia onombolo mbehena onkhiso.+ 18 Monthiki yotete, muna okulinga otyiawa tyikola. Kamupondola okulinga otyilinga natyike. 19 Muna okulingila Siovaa oviawa viokuyokwa, onondume-tane onombali, nongi ike, nonondyona epandu-vali mbenima like. Muna okulinga oviawa ovinyama viokukahi nawa.+ 20 Muna okuviava amuvandekako oviawa viovilia viohinde yanyetuka yahonya nomulela,+ omapati etatu nomeya mondumetane, nomapati evali mongi ike, 21 monondyona ambuho epandu-vali, ku ike ike uvandekako epati liohinde. 22 Tupu muna okwaava otyinkhombo tyilingwe otyiawa tyonkhali tyokumukoha kononkhali mbenyi. 23 Koviawa vilingwa komuhuka, oviawa viokulingwa apeho, ovio muyawisa-ko ovio. 24 Oviawa ovio, otyo muvilinga ngootyo aviho mononthiki ambuho epandu-vali, vilinge ngatyina okulia,* otyiawa tyokuyokwa tyomuniko omuwa tyilingilwa Siovaa. Vina okulingilwa kumwe noviawa viokuyokwa vilingwa apeho, notyiawa tyatyo tyokunwa. 25 Monthiki ya pandu-vali onwe muna okulinga eliongiyo enene likola.+ Kamupondola okulinga ovilinga.+

26 Monthiki yovikuna viotete,+ tyina mweetela Siovaa+ oviawa viovilia viotete, muna okulinga eliongiyo enene likola, potyipito tyenyi tyonosimanu.+ Kamupondola okulinga ovilinga.+ 27 Muna okulingila Siovaa otyiawa tyokuyokwa tyomuniko omuwa, onondume-tane onombali, nongi ike, nonondyona epandu-vali mbenima like.+ 28 Otyiawa tyovilia tyahonya nomulela, muna okulinga omapati etatu nomeya mondume-tane, nomapati evali mongi ike, 29 konondyona ambuho epandu-vali muvandekako epati like liohinde kondyona ike ike. 30 tupu muna okwaava otyinkhombo tyilinge tyokumukoha kononkhali mbenyi.+ 31 Kotyiawa tyilingwa apeho, notyiawa tyatyo tyovilia, muna okuvandekako vali oviawa ovio aviho; ovipako aviho mamulingi oviawa vina okukala evi vikahi nawa,+ avilingilwa kumwe noviawa viatyo viokunwa.

29 “‘Mohanyi ya pandu-vali, monthiki yo tete yohanyi, onwe muna okulinga eliongiyo enene likola. Kamupondola okulinga otyilinga natyike.+ Oyo onthiki muna okuhika onkhwino.+ 2 Onwe muna okulingila Siovaa otyiawa tyokuyokwa tyomuniko omuwa, ondume-tane ike, nongi ike onthwei, nonondyona epandu-vali mbenima like. Ovipako ovio aviho vina okukala evi vikahi nawa. 3 Etyi otyiawa tyohinde yanyetuka yahonya nomulela, oave omapati etatu nomeya ohinde mondume-tane, nomapati evali ohinde mongi ike onthwei. 4 Onondyona ambuho epandu-vali, ku ike uvandeka-ko epati liohinde. 5 Amweeta otyinkhombo otyitwei tyilingwe otyiawa tyonkhali, tyimukohe kononkhali mbenyi. 6 Mamulingi oviawa ovio aviho vivandeka kotyiawa tyokuyokwa tyilingwa hanyi na hanyi, amuyawisa-ko oviawa viatyo viovilia,+ otyo pena vali otyiawa tyokuyokwa tyilingwa apeho, noviawa viatyo viovilia,+ kumwe noviawa viokunwa,+ vilingwe ngeetyi tyapopiwa opo vikale otyiawa tyokuyokwa tyomuniko omuwa tyilingilwa Siovaa.

7 “‘Monthiki 10 yohanyi ya pandu-vali, onwe muna okulinga eliongiyo enene likola,+ munthu na munthu elilingi onya.* Kamupondola okulinga otyilinga natyike.+ 8 Muna okulingila Siovaa otyiawa tyokuyokwa tyomuniko omuwa, ondume-tane ike, nongi ike onthwei, nonondyona epandu-vali mbenima like. Ovipako ovio aviho vioviawa, ovievi vikahi nawa.+ 9 Etyi otyiawa tyohinde yanyetuka yahonya nomulela, oave omapati etatu nomeya ohinde mondume-tane, nomapati evali ohinde mongi ike onthwei. 10 Onondyona ambuho epandu-vali, ku ike, uvandeka-ko epati liohinde. 11 Tyihe-otyo vala, amweeta otyinkhombo otyitwei, tyilingwe otyiawa tyonkhali tyimukohe kononkhali mbenyi.+ Muna okulinga oviawa ovio aviho, vivandeke kotyiawa tyokumukoha kononkhali, no kotyiawa tyokuyokwa tyilingwa apeho notyiawa tyatyo tyovilia, no viokunwa.

12 “‘Monthiki 15 yohanyi ya pandu-vali, onwe muna okulinga eliongiyo enene likola. Kamupondola okulinga otyilinga natyike. Muna okulingila Siovaa otyipito matyikala ononthiki epandu-vali.+ 13 Onwe mamulingi otyiawa tyokuyokwa,+ otyiawa tyomuniko omuwa tyilingilwa Siovaa, onondume-tane 13, nonongi ononthwei 2, nonondyona 14 mbenima like. Aviho ovio, ovievi vikahi nawa.+ 14 Etyi otyiawa tyohinde yanyetuka yahonya nomulela, oave omapati etatu nomeya ohinde mondume-tane ike, ambuho 13, nomapati evali ohinde mongi ike onthwei, ambuho 2. 15 Onondyona 14, ku ike, uvandeka-ko epati liohinde. 16 Tupu, muna okulinga otyiawa tyotyinkhombo tyilinge tyononkhali. Lingei oviawa ovio aviho vivandeka kotyiawa tyilingwa apeho tyokuyokwa, notyiawa tyatyo tyovilia, no tyokunwa tyivandekwa-ko.+

17 “‘Monthiki ya vali muna okwaava onondume-tane 12, nonongi 2 ononthwei, nonondyona 14 mbenima like. Aviho ovio, ovievi vikahi nawa.+ 18 Noviawa viatyo viovilia, no viovikunwa vivandekwa konondume-tane, no konongi, no konondyona, viata movipako ovio, vilingwa ngeetyi tyatumwa. 19 Tupu, muna okulinga otyiawa tyotyinkhombo tyilinge tyononkhali. Lingei oviawa ovio aviho vivandeka kotyiawa tyilingwa apeho tyokuyokwa, no kotyiawa tyatyo tyovilia, noviawa viokunwa vivandekwa-ko.+

20 “Monthiki ya tatu amwave onondume-tane 11, nonongi 2 ononthwei, nonondyona 14 mbenima like. Aviho ovio, ovievi vikahi nawa.+ 21 Noviawa viatyo viovilia, no viovikunwa vivandekwa konondume-tane, no konongi ononthwei, no konondyona, viata movipako ovio, vina okulingwa ngeetyi tyilingwa. 22 Tupu, muna okulinga otyiawa tyotyinkhombo tyilinge tyononkhali. Lingei oviawa ovio aviho vivandeka kotyiawa tyilingwa apeho tyokuyokwa, notyiawa tyatyo tyovilia, kumwe noviawa viokunwa vivandekwa-ko.+

23 “‘Monthiki ya kwana avei onondume-tane 10, nonongi 2 ononthwei, nonondyona 14 mbenima like. Aviho ovio, ovievi vikahi nawa.+ 24 Noviawa viatyo viovilia, no viovikunwa vivandekwa konondume-tane, no konongi ononthwei, no konondyona, viata movipako ovio, vina okulingwa ngeetyi vilingwa. 25 Tupu, muna okulinga otyiawa tyotyinkhombo tyilinge tyononkhali. Lingei oviawa ovio aviho vivandeka kotyiawa tyilingwa apeho tyokuyokwa, notyiawa tyatyo tyovilia, kumwe noviawa viokunwa vivandekwa-ko.+

26 “Monthiki ya tano amwave onondume-tane 9, nonongi 2 ononthwei, nonondyona 14 mbenima like. Aviho ovio, ovievi vikahi nawa.+ 27 Noviawa viatyo viovilia, no viovikunwa vivandekwa konondume-tane, no konongi ononthwei, no konondyona, viata movipako ovio, ngeetyi tyina okulingwa. 28 Tupu, muna okulinga otyiawa tyotyinkhombo tyilinge tyononkhali. Oviawa ovio vivandeka kotyiawa tyilingwa apeho tyokuyokwa, no kotyiawa tyatyo tyovilia, noviawa viokunwa vivandekwa-ko.+

29 “‘Monthiki ya pandu, amwave onondume-tane 8, nonongi 2 ononthwei, nonondyona 14 mbenima like. Aviho ovio, ovievi vikahi nawa.+ 30 Noviawa viatyo viovilia, no viovikunwa vivandekwa konondume-tane, no konongi ononthwei, no konondyona, viata movipako ovio, ngeetyi tyina okulingwa. 31 Tupu, muna okulinga otyiawa tyotyinkhombo tyilinge tyononkhali. Oviawa ovio aviho vivandeka kotyiawa tyilingwa apeho tyokuyokwa, notyiawa tyatyo tyovilia, noviawa viokunwa vivandekwa-ko.+

32 “‘Monthiki ya pandu-vali amwave onondume-tane 7, nonongi 2 ononthwei, nonondyona 14 mbenima like. Aviho ovio, ovievi vikahi nawa.+ 33 Noviawa viatyo viovilia, no viovikunwa vivandekwa konondume-tane, no konongi ononthwei, no konondyona, viata movipako ovio, ngeetyi tyina okulingwa. 34 Tupu, muna okulinga otyiawa tyotyinkhombo tyilinge tyononkhali. Oviawa ovio aviho vivandeka kotyiawa tyilingwa apeho tyokuyokwa, notyiawa tyatyo tyovilia, noviawa viokunwa vivandekwa-ko.+

35 “‘Monthiki ya tyinana onwe muna okulinga otyonge otyinene. Kamupondola okulinga otyilinga natyike.+ 36 Otyiawa tyokuyokwa tyomuniko omuwa tyilingilwa Siovaa, muna okwava ondume-tane, notyingi otyitwei, nonondyona epandu-vali ononthwei mbenima like. Ovio aviho ovievi vikahi nawa.+ 37 Noviawa viatyo viovilia, no viovikunwa vivandekwa kondume-tane, no konongi ononthwei, no konondyona, ngeetyi tyina okulingwa. 38 Tupu, muna okulinga otyiawa tyotyinkhombo tyilinge tyononkhali. Oviawa ovio aviho vivandeka kotyiawa tyilingwa apeho tyokuyokwa, notyiawa tyatyo tyovilia, noviawa viokunwa vivandekwa-ko.+

39 “‘Ovio oviawa mulingila Siovaa povipito vienyi+ mulinga vivandeka koviawa mulinga viokufwisapo omphango,+ no koviawa mulinga kotyali tyenyi,+ vilinge oviawa viokuyokwa,+ oviawa viovilia,+ oviawa viokunwa,+ novilikutila viombembwa.’”+ 40 Mwisesi apopila ova Isilayeli ovipuka ovio aviho Siovaa atuma.

30 Pahe Mwisesi apopila ononkhalamutwe+ mbomihoko viova Isilayeli ati: “Siovaa watuma okuti: 2 Ine omulume umwe una etyi apangela+ Siovaa, hamwe aane+ elipe okwahalingi otyipuka tyimwe, mwene ati hityilingi,* kapondola okutyilinga.+ Una umwe okwehetyilingi ngeetyi apanga.+

3 “Ine omukai umwe una etyi apopila Siovaa, hamwe aane elipe okwahalingi otyipuka tyimwe tyina nkhele omuhikwena akala meumbo liovohe, 4 tate yae eivi etyi apopia neetyi elipa* okwahalingi otyipuka tyimwe, mahi he ahapopi natyike, opo etyi apanga una okutyilinga. Otyipuka ati himetyilingi una umwe okwehetyilingi. 5 Mahi tyina he haa ameivi omphango omona wae alinga, hamwe otyetyi omona wae elipa okulinga emutyilika-tyo, opo upondola okwehetyilingi. Siovaa memwevela, mokonda wetyityilikwa na he.+

6 “Mahi ine unepwa ngwe walinga omphango, ine hamwe welipa okulinga otyipuka tyimwe ahasokele nawa, 7 ou omulume wae eivi omphango oyo, mahi etyi etyiiva ehemutyilika, opo onomphango ombo neetyi elipa okulinga, una umwe okutyilinga. 8 Ine omulume wae monthiki eiva omphango oyo umutyilika-yo, omphango oyo ayahalingwa, neetyi elipa okulinga+ tyahasokele nawa atyahalingwa, Siovaa memwevela.

9 “Mahi ine omuhepe, ine hamwe omukai wahengwa ulinga omphango yotyipuka tyimwe, atyiho elipa okulinga, apeho una okutyilinga.

10 “Mahi ine tyina elipa omphango yokulinga otyipuka tyimwe, tupu hamwe tyina ena etyi ati himetyilingi nkhele uli meumbo liomulume wae, 11 omulume eivi omphango oyo ahapopi natyike nii eheyaanye, atyiho apanga okulinga neetyi mwene elipa okulinga, una okutyilinga. 12 Mahi ine omulume wae wiiva omphango oyo emutyilika-yo, ine hamwe emutyilika etyi mwene elipa, opo upondola okwehetyilingi.+ Mokonda wetyiilikwa nomulume wae, Siovaa memwevela. 13 Omulume watyo upondola okutavela omphango omukai alinga, okuti hatyo, eyaanye. Tupu otyo apondola okulinga ine omukai wae una etyi ati himetyilingi.* 14 Mahi ine palamba ononthiki otyo omulume wae ahapopi natyike, otyo matyilekesa okuti wetavela omphango omukai alinga novipuka aviho ati himevilingi. Matyilekesa okuti wetavela mokonda kapopile natyike etyi eiva omphango omukai alinga. 15 Mahi ine umutyilika konyima, onthiki etyiiva yalamba-le, ovitateka mavituku-ko mavilingi viae.+

16 “Otyo, otyo otyitumino Siovaa apele Mwisesi, tyipopia omulume nomukai wae, nomulume una omona omuhikwena nkhele ukala meumbo.”

31 Siovaa pahe atolela Mwisesi ati: 2 “Ova Mindiyaa+ vetyifete+ etyi valinga ova Isilayeli. Ove pahe oende kovenyi.”*+

3 Mwisesi apopila ovanthu ati: “Ovalume vamaneke vaye vakalwise ova Mindiyaa, vaipae ova Mindiyaa, Siovaa wanumana. 4 Momihoko aviho viova Isilayeli, mupola-mo ovalume 1.000 ngavo mutuma kovilwa.” 5 Pahe motyikumba tyova Isilayeli+ avapolo-mo ovalume vatyo, momihoko nomihoko avapolo-mo 1.000. Avapolo-mo ovalume mavaende kovita, ovalume 12.000 avamaneka vaye kovilwa.

6 Mwisesi evetumu vaye kovilwa, momihoko aviho apola-pola-mo ovalume 1.000, avaende na Fineya+ omona womunakwa Eliyasale, wokulandula movita tyatyinda ovityuma vikola nononkhwino mbokuhikila ovilwa.+ 7 Avakalwisa ova Mindiyaa ngeetyi Siovaa atuma Mwisesi, avaipaa ovalume vatyo aveho. 8 Vamwe povo vokwaipawa, pali onohamba mbo Mindiyaa, okuti: O Evi, o Lekei, o Sule, o Huli, o Lemba, onohamba ononthano mbo Mindiyaa. Tupu avaipaa Mbalaau+ omona wa Mbeole nomutunga. 9 Ova Isilayeli avatyindi-po ovakai vova Mindiyaa novana vatyo avai navo. Tupu avatyindi-po ovipako viavo aviho, omambamba atyo aeho, novipuka viavo aviho avai navio. 10 Omapunda-umbo avo aeho omu vakala aveepake otupia aapi, nononthanda* mbavo ambuho ambupi. 11 Avapolo-ko ovipuka viatyo aviho ovanthu vena-vio, ovipako viavo aviho, avakwate-mo ovanthu vatyo. 12 Avaeta ononkhwatwa ombo novipuka vevepola nevi vapunda, avahungama konthanda oku ovo Mwisesi nomunakwa Eliyasale nova Isilayeli aveho veli, momaluhandya o Moambe+ popepi no Solondau konthele ko Selikoo.

13 Pahe ovo Mwisesi nomunakwa Eliyasale nononkhalamutwe mbotyikumba atyiho tyova Isilayeli avaende vekevetetelele. 14 Mahi etyi tyalinga ovalume vokwapewa otyilinga tyounkhalamutwe movilwa, Mwisesi ehetyihande, tyilinge ononkhalamutwe mbovityita ekwii, tyilinge mbotyita vaile kovilwa. 15 Mwisesi evepulu okuti: “Ovakai vatyo aveho mwevehupisa mokonda yatyi? 16 Tala! Ovakai ava, ovo Mbalaau ayapulile navo ova Isilayeli, avatyindamena+ Siovaa avakafenda otyika-huku tyomatutu tyo Peole,+ ovihuna aviipaa otyikumba tyovanthu va Siovaa. Otyo vamonenene ovihuna vieveipaele.+ 17 Pahe muna okwipaa ovana ovakwendye vatyo aveho novakai vatyo aveho vaenda-le novalume. 18 Mahi ovafikwena vatyo aveho vahaendele nomulume, vehupisei.+ 19 Onwe muna okukala tyenyi kondye yonthanda ononthiki epandu-vali. Una waipaa omunthu* na una wayama kotyivimbi,+ una okukohwa+ konkhali monthiki yatatu, no monthiki yapandu-vali. Muna okulinga ngootyo amuho na ava mwaetelela kotyilongo oko. 20 Onwe muna okukoha ovikutu aviho konkhali, novipuka aviho vialingwa noseta, novipuka aviho vialingwa nomainya otyinkhombo, novipuka aviho vialingwa nomavai.”

21 Omunakwa Eliyasale apopila ovalume aveho vokwaile kovilwa ati: “Otyitumino Siovaa atumine Mwisesi otyetyi: 22 ‘Oolu vala, nopalata, notyivela, notyitasu, nositanyu, nosumbu, 23 ovipuka aviho vitavela okuvipaka motupia, una okuvipaka motupia visukuke konkhali. Mahi tupu vina okukohwa konkhali nomaande okukoha.+ Vina viehetavela okuvikwatesa motupia muna okuvikoha nomaande. 24 Monthiki yapandu-vali kohei ovikutu vienyi avisukuka konkhali, pahe amunyingila nawa monthanda.’”+

25 Pahe Siovaa atolela Mwisesi ati: 26 “Honeka ovipuka aviho mwapunda, okuvalula aviho mwaeta tyilinge ovanthu tyilinge ovinyama. Lingei otyilinga otyo nomunakwa Eliyasale nonohongoi mbomihoko viovanthu aveho. 27 Tepula pokati ovipuka aviho mwaeta, vimwe vilinge viomaswalali aile kovilwa, evi ovikwavo, oviavaila ovanthu.+ 28 Povipuka waeta kovilwa polelapo Siovaa elilimu, povanthu 500 upola-po wike, no ponongombe, no povimbulu, no ponongi. 29 Ovipuka ovio muna okuvipola kovipuka ngwe vapewa, amuviavela omunakwa Eliyasale avilingi vya Siovaa.+ 30 Ku evi viapewa ova Isilayeli aveho, nako muna okupola-ko, povipuka 50 mupola-po tyike, tyilinge ovanthu, tyilinge onongombe, tyilinge ovimbulu, tyilinge onongi, tyilinge otyipako tyimwe otyikwavo. Vina okupewa vomuhoko wa Levii,+ vena otyilinga tyokuundapa mekaka liefendelo lya Siovaa.”+

31 Ovo Mwisesi nomunakwa Eliyasale avalingi umwe ngeetyi Siovaa atuma Mwisesi. 32 Ovipuka aviho viokwapundwa evi ovalume vovilwa vaetele, okuvivalula onongi mbatyo ambutuuka 675.000, 33 onongombe 72.000, 34 omambulu 61.000. 35 Ovakai* vavalulwa veheliyamene kolutu nomulume+ nawike, vena 32.000. 36 Ovipuka ovalume vokwaile kovilwa vatepulililwe-ko, okuvivalula onongi mbatyo ambutuuka 337.500. 37 Ponongi opo mbapelwe Siovaa ngelilimu mbuna 675. 38 Ombu onongombe, mbuna 36.000, akupolwa mbelilimu lya Siovaa mbuna 72. 39 Aa omambulu, ena 30.500, akupolwa elilimu lya Siovaa ena 61. 40 Ovanthu vena 16.000, akupolwa velilimu lya Siovaa 32. 41 Pahe Mwisesi ovipuka ovio vielilimu eviavela omunakwa+ Eliyasale vilinge vya Siovaa, ngeetyi Siovaa atumine Mwisesi.

42 Povipuka viapelwe ova Isilayeli aveho, Mwisesi atepulile kovipuka viovalume vokwaile kovilwa ovievi: 43 Onongi evepele mbuna 337.500, 44 onongombe evepa mbuna 36.000, 45 omambulu evepa ena 30.500, 46 ovanthu evepa vena 16.000. 47 Pahe Mwisesi apolo povipuka viapelwe ova Isilayeli, po 50 apolo-po tyike, tyilinge povanthu tyilinge povipako. Ovipuka ovio eviavela vomuhoko wa Levii,+ vena otyilinga tyokuundapa mekaka+ liefendelo lya Siovaa, ngeetyi Siovaa atumine Mwisesi.

48 Pahe ovalume ovanene vovita,+ ononkhalamutwe mbovityita ekwii no mbotyita, avafwene pu Mwisesi, 49 avapopila Mwisesi avati: “Ovaundapi vove vavalula ovalume vovilwa veli kolutei lwetu, ondaka yeya kwoonthwe+ o yokuti kapakambele nawike. 50 Pahe twasoka okuti munthu na munthu pwoonthwe aavele Siovaa etyi ena-tyo, ovipuka vioolu, ovinunga vyo konomphai, novinunga vyo komavoko, nono nela mbotyilimbo, nonombilingu, novipuka ovikwavo viomahiwe, opo tukohwe konkhali, tusukuke komaiho a Siovaa.”

51 Ou Mwisesi nomunakwa Eliyasale avatambula oolu novipuka ovikwavo aviho vaeta viomahiwe. 52 Oolu aiho ovanene vatyo ononkhalamutwe mbovityita ekwii, no mbotyita vaavelele Siovaa, aituuka onosikulu 16.750. 53 Ovita aviho avipolo povipuka viapunda. 54 Oo Mwisesi nomunakwa Eliyasale avatambula oolu oyo vapewa nononkhalamutwe mbovityita ekwii no mbotyita, aveitwala mohinge yomaliongiyo, ilinge yokuhinangelesa etyi Siovaa alingilile ovanthu vae ova Isilayeli.

32 Ovana va Lumbe+ novana va Ngande+ vali nomambamba ovipako. Avafweve otyilongo tyo Sasele+ notyilongo tyo Sileyande, mokonda vetyimwene okuti ovilongo vili nawa vina omalihilo ovipako. 2 Pahe ovana ovo va Ngande novana va Lumbe, avaende koo Mwisesi nomunakwa Eliyasale, no konohongoi mbotyikumba tyova Isilayeli, avati: 3 “O Atalote no Ndimboo, no Sasele, no Nila, no Hesimboo,+ no Eleyale, no Sembaa, no Nembo,+ no Mbeoo,+ 4 otyilongo ova Isilayeli+ vapola konondyali mbavo etyi vakwatehiwako na Siovaa, otyilongo tyimwe tyikahi nawa, tyitavela okutekula ovipako, onthwe vaumbili vove tuna ovipako ovinyingi.”+ 5 Avapopi ñgoo vali okuti: “Ine kwoove tyitavela, otyilongo otyo hahe tyihule ku onthwe mbaa, onthwe vaumbili vove. Wehetutwale nthele ina o Solondau.”

6 Mwisesi apulu ovana va Ngande novana va Lumbe okuti: “Onwe mamusala kuno, vakwenyi avai aveke kovilwa? 7 Okuti opo kamamusoyesa ova Isilayeli venda kotyilongo Siovaa evepopilile okuti otyo mevepe? 8 Otyo-ale ovoho valingile etyi tuli ko Kande-Mbalineya andyivetumu vakatale otyilongo.+ 9 Etyi vehika komulola* wo Sikole,+ avatale otyilongo, aveya avasoyesa ova Isilayeli vahaye kotyilongo Siovaa atile mevepe-tyo.+ 10 Monthiki oyo, Siovaa anumana unene, ati:+ 11 ‘Ndyimutukaila umwe, ovalume vokwatunda ko Isitu, okuhimbikila po vokuna omanima 20 kavakaliata motyilongo+ etyi napopilile Ambalayau, na Isake, na Sakoo,+ mokonda kaventhavelele. 12 Mai-mo vala, o Kalembe+ omona wa Sefunee watuka mu Kene, na Susuwee+ omona wa Nuu, mokonda ovo, ovo vetavela umwe nawa+ ame Siovaa.’ 13 Otyo Siovaa anumanenene unene neetyi ova Isilayeli valingile, eveyekela moluhandya, ngamo vaangauluka, avakala-mo omanima 40,+ atee umwe ovanthu aveho vo pononthiki opo valingaile ovivi komaiho a Siovaa vapwa-ko.+ 14 Onwe pahe, vokwatuka movalume vana ovakwankhali, ovapengesi, mwahanda okupinga po voho namunkhindule vali onyengo ya Siovaa, anumanene ova Isilayeli! 15 Ine onwe mumutyindamena, ovanthu ava meveyekela ñgoo vali moluhandya, amuveetela ononkhumbi aveho.”

16 Etyi pakala, aveya vali kwe, avati: “Tutungile-vo pano omaumbo ovana vetu, nonohambo mbetu mbomamanya mukale ovipako vietu. 17 Mahi onthwe matumaneka umwe tyokwenda kovilwa,+ matweende umwe na va Isilayeli vakwetu, atuvehikiya motyilongo venda. Ava ovana vetu, mavesala momapunda-umbo apama, opo vahalwiswe novanthu votyilongo tyino. 18 Kamatukondoka komaumbo etu, matukondoka vala tyina ova Isilayeli aveho vamehiki motyilongo venda.+ 19 Mokonda, onthwe kamatukapewelwa kumwe navo epingo nthele ina kuna ondongi yo Solondau, nii kokukwavo vali, twatambula-le epingo lietu nthele ino kuno o Solondau.”+

20 Mwisesi eveti: “Ine otyo mamulingi otyo, manekei mwende kovilwa ngeetyi Siovaa atuma,+ 21 tupu ine amuho mumaneka, mwende kovilwa amutauluka ondongi yo Solondau tyina Siovaa ataata onondyali mbae komutwe wae,+ 22 atee otyilongo vevepola-tyo ngeetyi Siovaa+ ahanda, opo haa mupondola okukondoka,+ kamamuvelwa onombei nii na Siovaa nii nova Isilayeli. Otyilongo etyi mutyitambula atyilingi tyenyi momaiho a Siovaa.+ 23 Mahi ine kamulingi ngootyo, mamulingi onkhali ku Siovaa, opo noñgonokei okuti kamamuhupu kovitateka mavituku konkhali yenyi. 24 Mupondola okutungila ovana venyi omapunda-umbo, amutungu onohambo mbovipako vienyi,+ mahi mwahalimbwei-ko okulinga etyi mwapopia.”

25 Ovana va Ngande novana va Lumbe, avapopila Mwisesi, avati: “Onthwe vaundapi vove, matulingi umwe ngeetyi tatekulu wapopia. 26 Ovana vetu, novakai vetu, nomambamba ovipako vietu, ovipako aviho twatekaula, mavisala momapunda-umbo o Sileyande,+ 27 mahi onthwe vaundapi vove, matutauluka o Solondau, atuho ovalume vatyo tyamaneka, atwii movilwa vya Siovaa+ ngeetyi wapopia tatekulu.”

28 Pahe, Mwisesi eveavela otyitumino, etyaavela omunakwa Eliyasale, na Susuwee omona wa Nuu, nonohongoi ambuho mbomihoko viova Isilayeli. 29 Mwisesi eveti: “Ine ovana va Ngande novana va Lumbe, vatauluka ondongi yo Solondau amwii navo, ovalume vatyo aveho avamaneka tyovilwa komaiho a Siovaa, otyilongo vakala-mo amuvepolo-tyo, atyilingi tyenyi, opo eheke lyo Sileyande mamuvepe-lio lilinge liavo.+ 30 Mahi ine kavamaneka amwii navo himba lina, opo mamukakala navo motyilongo tyo Kanaa.”

31 Ava ovana va Ngande nova Lumbe, avakumbulula, avati: “Matulingi umwe etyi Siovaa etupopila onthwe vaundapi vae. 32 Onthwe matumaneka, atweende nthele ina o Solondau ngeetyi Siovaa ahanda, matweende motyilongo tyo Kanaa.+ Mahi, onthwe eheke lietu, malikala umwe eli nthele ino kuno o Solondau.” 33 Mwisesi aavela ovana va Ngande novana va Lumbe+ na vamwe po vomuhoko wa Manasesi+ ovana va Susee, otyilongo tyituminwa na Siyoo+ ohamba yova Amoleu, notyilongo tyituminwa na Onge+ ohamba yo Mbasaa, ovio, ovilongo vitavela komapunda-umbo atyo oo, nomapunda-umbo opopepi yovilongo ovio.

34 Ovana va Ngande avatungu* epunda-umbo lyo Ndimboo+ no lyo Atalote+ no lyo Aluwele,+ 35 no lyo Atolote-Sofaa, no lyo Sasele,+ no lyo Songembeyaa,+ 36 no lyo Mbete-Nila,+ no lyo Mete-Halaa,+ omapunda-umbo okwapama. Ovipako avevitungila oviuunda viatungwa* nomamanya. 37 Ava ovana va Lumbe avatungu epunda-umbo lyo Hesimboo,+ no lyo Eleyale,+ no lyo Kiliyataii,+ 38 no lyo Nembo,+ no lyo Mbaale-Meoo,+ no lyo Simbima. Omapunda-umbo oo aeho, aveeluku omanyina omakwavo.

39 Ovana va Makili,+ Makili omona wa Manasesi, avalwisa o Sileyande, otyilongo otyo avevepolo-tyo, avataata-mo ova Amoleu vali-mo. 40 Mwisesi aavela Makili omona wa Manasesi otyilongo tyo Sileyande ngamo akala.+ 41 Ou Saile, omutekula wa Manasesi, alwisa o Kanaa, otyilongo otyo evepolo-tyo nomaumbo atyo. Aende komaumbo onohinge atungwa motyilongo otyo, ngako akala, epeluku okuti, o Havote-Saile.+ 42 Nombaa apolo-po o Kenate nomaumbo atyo, ngamo akala, eiluku enyina liae mwene, eiti o Nombaa.

33 Ova Isilayeli etyi vatunda kotyilongo tyo Isitu vaendaile ñgaa:+ vaendele ovinkhunkha-ovinkhunkha,*+ tyihongolelwa novo Mwisesi na Alau.+ 2 Mwisesi alingi etyi Siovaa emutuma ahoneka apa valalailile; onofika valalailile ombombu:+ 3 Ko Lamisesi+ vatundile-ko mohanyi yo tete monthiki 15.+ Monthiki vala valinga opasikwa,+ komuhuka tyee avahimbika okutunda-ko, momaiho ova Isitu umwe, tyehesukile nii.* 4 Tyina oku venda, oku ova Isitu otyo vapaka ovana vavo oviveli vaipaelwe na Siovaa,+ mokonda Siovaa wevetahelele ovihuna viehevilwa novika-huku viavo.+

5 Ova Isilayeli avatundu ko Lamisesi, avakalalela ko Sukote.+ 6 Etyi vakatuka ko Sukote, avakalalela ko Etau,+ o Etau ankho ikala oku kwaoyela oluhandya. 7 Okutunda ko Etau, avakondoka vali no konyima, avaviuku ko Pi-Ailote, ikala okuviuka ko Mbaale-Sefoo,+ avakalalela komutwe wo Mingindole.+ 8 Avatundu po Pi-Ailote avakwata pokati kelunga+ aveya moluhandya+ lwo Etau,+ avelweende ononthiki ononthatu avakalalela ko Mala.+

9 Avatundu ko Mala, avaende no ko Elii, oko ko Elii kuna ononyombo 12, tupu kuna omindende 70, ngako valalela.+ 10 Etyi vatunda ko Elii, avakalalela Pelunga Enkhuhu. 11 Etyi vakatuka Pelunga Enkhuhu avakalalela moluhandya lwo Sine.+ 12 Avatundu moluhandya lwo Sine avakalalela po Ndofika. 13 Etyi pakala, avatundu po Ndofika, avakalalela ko Alusi. 14 Etyi vatunda ko Alusi, avakalalela ko Lefindii+ kwahali omaande okunwa. 15 Avatundu ko Lefindii, avakalalela moluhandya lwo Sinai.+

16 Avakatuka moluhandya lwo Sinai, avakalalela moluhandya lwo Kimbelote-Ataavaa.+ 17 Avatundu ko Kimbelote-Ataavaa, avakalalela ko Haselote.+ 18 Avakatuka ko Haselote, avakalalela ko Litimaa. 19 Etyi vatunda ko Litimaa, avakalalela ko Limoo-Pelesi. 20 Pahe avatundu ko Limoo-Pelesi, avakalalela ko Limbina. 21 Etyi vatunda ko Limbina, avakalalela ko Lisa. 22 Oko ko Lisa avatundu-ko, avakalalela ko Keehelata. 23 Avatundu ko Keehelata, avakalalela komphunda yo Seefele.

24 Avakatuka komphunda yo Seefele, avakalalela ko Halanda. 25 Etyi vatunda ko Halanda, avakalalela ko Makelote. 26 Avakatuka ko Makelote,+ avakalalela ko Taate. 27 Oko ko Taate avatundu-ko, avakalalela ko Tela. 28 Avatundu ko Tela, avakalalela ko Mitika. 29 Etyi vatunda ko Mitika, avakalalela ko Hasimona. 30 Etyi pahe vatunda ko Hasimona, avakalalela ko Moselaa. 31 Ko Moselaa avatundu-ko, avakalalela ko Mbene-Sakaa.+ 32 Avatundu ko Mbene-Sakaa, avakalalela ko Hole-Asindingande. 33 Etyi vatunda ko Hole-Asindingande, avakalalela ko Sotimbata.+ 34 Oko ko Sotimbata avatundu-ko, avakalalela ko Ambolona. 35 Avatundu ko Ambolona, avakalalela ko Esioo-Sembele.+ 36 Etyi vatunda ko Esioo-Sembele, ovovo moluhandya lwo Sii,+ ohika yo Kande.

37 Ko Kande avatundu-ko, avakaya no komphunda yo Hole,+ monondimbu notyilongo tyo Endoo. 38 Omunakwa Alau alondo komphunda yo Hole, ngeetyi Siovaa emutumine, ngako ankhila etyi pakala omanima 40 apa ova Isilayeli vatunda kotyilongo tyo Isitu, monthiki yotete yohanyi ya tano.+ 39 Etyi Alau ankhila komphunda yo Hole wali nomanima 123.

40 Pahe, omu Kanaa umwe ohamba yo Alande,+ ankho ukala motyilongo tyo Nengembe mo Kanaa etyiivi okuti ova Isilayeli veli nokuya.

41 Apakala-apakala, avatundu komphunda yo Hole+ avakalalela ko Salumona. 42 Avatundu ko Salumona, avakalalela ko Punoo. 43 Etyi vatunda ko Punoo, avakalalela ko Ombote.+ 44 Pahe avatundu ko Ombote, avakalalela ko Isee-ambalii monondimbu no Moambe.+ 45 Avatundu ko Iyimi avakaya no ko Ndimboo-Ngande.+ 46 Etyi vatunda ko Ndimboo-Ngande, avakalalela ko Alumone-Ndimbalatai. 47 Ko Alumone-Ndimbalatai avatundu-ko, ovovo konomphunda mbotyilongo tyo Ambalii+ komutwe womphunda yo Nembu.+ 48 Okutunda oko konomphunda mbo Ambalii avakalalela momapembe o Moambe po Solondau ponthele po Selikoo.+ 49 Avakala ponthele po Solondau okuhimbikila ko Mbete-Sesimote, atee ko Ambele-Sitii,+ momapembe o Moambe.

50 Etyi veli monthanthalahi momaluhandya o Moambe ponthele po Solondau, popepi no Selikoo Siovaa atolela Mwisesi ati: 51 “Popila ova Isilayeli uti: ‘Onwe mamutauluka o Solondau amwii motyilongo tyo Kanaa.+ 52 Motyilongo otyo muna okutaatamo vahekulu aveho, amuteya-teya ovilolo viavo viomamanya,+ amuteya-teya ovilolo viavo*+ viovivela, nonomphangu mbavo mbokwaya peulu.+ 53 Onwe otyilongo muna okuvepola-tyo, mokonda otyo mandyimwavela tyilinge tyenyi ngamo mukala.+ 54 Pokutetaila ovanthu otyilongo otyo onombunga nonombunga, muna okutalesa.+ Ava mwatala ovanyingi vetetelei ohika onene, ava mwatala kavehi amuvetetela-ko katutu.+ Pokupa ohika munthu na munthu muna umwe okutalesa, onwe onohika mamupewa, mbulinga mbepingo liomihoko vienyi.+

55 “‘Mahi ine ovanthu ovo kamuvetaata-mo aveho, mavakala ngovitohi momaiho enyi,+ avalingi ngomankhwenya komalutu enyi. Motyilongo mavemumonesila-mo ononkhumbi.+ 56 Ame andyimulingi etyi maa ndyivelinga.’”+

34 Siovaa apopila vali Mwisesi ati: 2 “Popila ova Isilayeli etyi vena okulinga: ‘Uti tyina vamanyingila motyilongo tyo Kanaa,+ otyilongo mavapewa tyilinge epingo liavo, matyikala tyavo atyiho atee oku tyakaoyaila.+

3 “‘Kombwelo, onondimbu mbotyilongo tyenyi mambuhikila moluhandya lwo Sii konthele ko Endoo, oku koutundilo, onondimbu mbotyilongo tyenyi mambuhikila apa paoyela Elunga Liomongwa.*+ 4 Onondimbu mbotyilongo tyenyi kombwelo mambukakwata kotyilondeka tyo Akilambii,+ ambukaya atee ko Sii, atyikaoyela atee kombwelo yo Kande-Mbalaneya.+ Atyitandavela atee ko Kande Hasale-Andale,+ atyikaya atee ko Asimoo. 5 Okutunda ko Asimoo matyiende atyikaoyela komulola wo Isitu, atyiende atyikaoyela Melunga.+

6 “‘Koutakelo matyioyela kongengeso Yelunga Enene. Omo, omo omonondimbu mbotyilongo tyenyi.+

7 “‘Okutala kombanda, otyilongo tyenyi matyiende ñgaa: Mamupake onondimbu mbotyilongo tyenyi okuhimbikila Kelunga Enene atee Komphunda yo Hole. 8 Onondimbu mbenyi mambuhimbikila Komphunda yo Hole, ambukehikila ko Lembo-Hamate,+ ambweende ambukehikila ko Sendande.+ 9 Onondimbu mambukakwata ko Sifoloo, ambweende ambukehikila ko Hasale-Enaa.+ Ombo, ombo onondimbu mbotyilongo tyenyi okutala kombanda.

10 “‘Pahe amupake onondimbu mbo koutundilo, okuhimbikila ko Hasale-Enaa atee ko Sefau. 11 Onondimbu ombo, mambutundu ko Sefau ambwii atee ko Limbela koutundilo wo Aii, ambukwata kongengeso Yelunga koutundilo, Kelunga lyo Kinelete.+ 12 Onondimbu mbatyo ambuho mambutundu ko Solondau ambukehikila Melunga Liomongwa.+ Otyo, otyo otyilongo tyenyi+ nonondimbu mbatyo.’”

13 Mwisesi alongesa ova Isilayeli, eveti: “Etyi, otyo otyilongo mamuti pokutyitetaila ovanthu amutalesa,+ tyilinge epingo liavo, etyi Siovaa atuma tyipewe ovanthu vomihoko etyive na vamwe vomuhoko wa Manasesi. 14 Ava vokwatuka mu Lumbe, omu velikalailila momihoko nomihoko, no vokwatuka mu Ngande omu velikalailila momihoko nomihoko notyihupe tyo vomuhoko wa Manasesi, vatambula-le ohika yavo.+ 15 Omihoko ovio vivali notyihupe tyo vomuhoko wa Manasesi vatambula-le epingo liavo kotyilongo tyo Solondau popepi no Selikoo okutala koutundilo.”+

16 Siovaa apopila vali Mwisesi ati: 17 “Ovalume mavemutetaila onohika mbotyilongo mamupiñgana ovava: Omunakwa Eliyasale+ na Susuwee+ omona wa Nuu. 18 Momihoko nomihoko, muna okupola-mo ohongoi ike malingi umwe po vokuteta-teta otyilongo mamupiñgana.+ 19 Omanyina ovalume ovo oywaa: Momuhoko wa Sundaa+ o Kalembe+ omona wa Sefunee. 20 Momuhoko wokwatuka mu Simiyau,+ o Semweli omona wa Amiyunde. 21 Momuhoko wa Mbesamii,+ o Elindande omona wa Kisiloo. 22 Momuhoko wokwatuka mu Ndaa,+ ohongoi Mbuki omona wa Songili. 23 Vokwatuka mu Susee+ vomuhoko wa Manasesi,+ ohongoi Haniyeli omona wa Efonde. 24 Momuhoko wokwatuka mu Efalaii,+ ohongoi Kemwele omona wa Sifitaa. 25 Momuhoko wokwatuka mu Sembulau,+ ohongoi Elisafaa omona wa Palenake. 26 Momuhoko wokwatuka mu Isakale,+ ohongoi Palitiyeli omona wa Asaa. 27 Momuhoko wokwatuka mu Asele,+ ohongoi Aiyunde omona wa Selomi. 28 Momuhoko wokwatuka mu Nafitalii,+ ohongoi Pendaeli omona wa Amiyunde.” 29 Ovo, ovo Siovaa atumine vatetaile ova Isilayeli otyilongo tyo Kanaa.+

35 Siovaa apopila Mwisesi etyi veli monthanthalahi momaluhandya o Moambe ponthele po Solondau,+ popepi no Selikoo ati: 2 “Tolela ova Isilayeli uti, konohika mavapiñgana+ vapolele-ko vomuhoko wa Levii omapunda-umbo, tupu vape vomuhoko wa Levii omalihilo, monohika mbo popepi nomapunda-umbo.+ 3 Vomuhoko wa Levii momapunda-umbo omo, omo mavakala, onofika mbomalihilo avo, ambulingi mboviunda viavo, ovipako viavo, novinyama ovikwavo vatekaula. 4 Onofika mbomalihilo mbomapunda-umbo mamwavela vomuhoko wa Levii, mbuna okuhimbikila motyimato tyeliseta nepunda-umbo ambweende atee apa paendwa onokovandu* 1.000. 5 Kondye yepunda-umbo muna okweeleka-ko onokovandu 2.000 okwenda no koutundilo, amweeleka onokovandu 2.000 okwenda no kombwelo, amweeleka onokovandu 2.000 okwenda no koutakelo, amweeleka onokovandu 2.000 okwenda no kombanda, epunda-umbo alikala pokati nakati. Ombo onofika mbomalihilo avo.

6 “Avelei vomuhoko wa Levii omapunda-umbo 6 okutilila,+ ayawise komapunda-umbo 42. Wamaipaa mukwavo ngako akahateka nako.+ 7 Ngootyo, vomuhoko wa Levii mamuvepe omapunda-umbo 48, nonofika mbatyo mambulingi omalihilo avo.+ 8 Omapunda-umbo mamupe vomuhoko wa Levii, atunde pomaheke ova Isilayeli.+ Povanyingi mupola-po omapunda-umbo omanyingi, pwa ava vehehi amupolo-po aa ehehi.+ Momihoko nomihoko muna okutunda omapunda-umbo, okutalela komapunda-umbo munthu na munthu apewa.”

9 Siovaa apopila vali Mwisesi ati: 10 “Popila ova Isilayeli, uti: ‘Mamuyauka o Solondau, amweende kotyilongo tyo Kanaa.+ 11 Likoyelei omapunda-umbo ekahi nawa alinge enyi okutilila, ou wamaipaa mukwavo* motyiponyo, ngamo ataulila.+ 12 Omapunda-umbo oo maalingi enyi okutilila, ngamo mutaulila ou wamaipaa mukwavo motyiponyo, ahaipawa vala nauna uyavala ohonde yo wae+ tyina nkhele omphela yehenekoywe novaunyingi.+ 13 Otyilinga tyomapunda-umbo oo epandu onwe mamwovola, otyotyo. 14 Omapunda-umbo mamwaave, etatu maahulu nthele-ino kuno o Solondau,+ omakwavo etatu aakahula nthele-ina o Solondau motyilongo tyo Kanaa,+ alinge omapunda-umbo okutilila. 15 Omapunda-umbo oo epandu maalingi okutilila, omo mamutilila ova Isilayeli, novanthu vovilongo+ ovikwavo vakala navo. Tyina umwe amaipaa mukwavo motyiponyo, omo ena okutaulila.+

16 “‘Mahi ine waveta mukwavo notyivela, mukwavo ankhi, opo omwiipai. Omwiipai una umwe okwipawa.+ 17 Ine waveta mukwavo nemanya eete okuti lipondola okumwiipaa, mukwavo ankhi, opo omwiipai. Omwiipai una umwe okwipawa. 18 Tupu ine waipaa mukwavo nevai eete okuti lipondola okumwiipaa, mukwavo ankhi, opo omwiipai. Omwiipai una umwe okwipawa.

19 “‘Wokuyavala ohonde yo wae, oe memwiipaa. Apa amemuvasi opo emwipaela. 20 Ine omunthu oo, wemutahula tyokumuyele ine hamwe wemuyumba notyipuka tyimwe, emuvetela umwe tyawina,*+ 21 tupu hamwe umuyele, avete mukwavo nosoko ankhi, omunthu oo una okunkhia. Oo omwiipai. Wokuyavala ohonde yo wae, apa amemuvasi opo emwipaela.

22 “‘Mahi ine hatyo-ko ahanda, kaveliyele nomunthu atahula ine hamwe wemutokesila otyipuka motyiponyo,*+ 23 tupu ine kemweete, emutokesila emanya, ngwe ankho kaveliyele-ale, nii kahande-ale okumulinga omapita, mukwavo ankhi, 24 ovanthu aveho vena okumwongela omphela, nae no wokuyavala ohonde yo wae, ngeetyi tyipopia ovitumino vionomphela.+ 25 Aveho vena okwaamena wokwaipaa mukwavo ko wokuyavala ohonde yo wae, avemukondola kepunda-umbo oku aholama, ngako akala atee omunene-nakwa walembulwa nomulela ukola anyima.+

26 “‘Mahi ine ou wokwaipaa mukwavo, utunda mepunda-umbo omu atilila, 27 ou uyavala ohonde yo wae, avasi omwiipai oo kondye yonondimbu mbepunda-umbo liokutilila, emwipaa, opo wokuyavala ohonde yo wae kamavelwa onombei mbohonde. 28 Mokonda wokwaipaa una okukala mepunda-umbo omu atilila atee omunene-nakwa anyima. Mahi tyina omunene-nakwa amanyimi, opo pahe upondola okukondoka kohika yae.+ 29 Akuho oku mamukakala-kala, ovitumino ovio, ovio mamulandaula apeho tyina muna omphela, noonwe novanthu vakatuka-tuka mwoonwe.

30 “‘Una wamaipaa omunthu,* una okwipawa mokonda omwipai,+ mahi wiipawa vala tyina etyi alinga tyapopiwa nonombangi* onombali;+ nawike wiipawa* tyina tyamapopiwa vala nomunthu wike. 31 Mwehetavelei okufetwa, amuyovola omwenyo womunthu* waipaa mukwavo, ngwe uhiwa umwe okwiipawa. Una umwe okwipawa.+ 32 Tupu mwehetavelei okufetwa, amuyovola una wakaholama mepunda-umbo liokutilila, akondoka akakale pohika yae ngwe nkhee omunene-nakwa kenenyime.

33 “‘Mwahasilisei otyilongo mukala mokonda ohonde isilisa otyilongo,+ petupu natyike tyipondola okukoha otyilongo kohonde yamomesilwa-mo, ikohwa-mo vala nohonde ya una weimomesa.+ 34 Mwahasilisei otyilongo mukala, otyilongo ame ndyikala, mokonda ame Siovaa, ndyikala pokati kova Isilayeli.’”+

36 Onohongoi mbo vokwatuka mu Sileyande, Sileyande omona wa Makili,+ Makili omona wa Manasesi umwe po vomomuhoko wa Susee, avakapopia na Mwisesi no nonkhalamutwe mbomihoko nonohongoi mbova Isilayeli, 2 avati: “Siovaa wekutumine pokutetaila ova Isilayeli eheke liepingo liavo utalese,+ Siovaa tupu wekutumine epingo lya Selofeyande ulipe ovana vae ovahikwena;+ 3 okuti vanepwa novalume vomuhoko omukwavo, wova Isilayeli, opo epingo liovahikwena ovo, malipolwa-ko kepingo liovo tate, aliyawiswa kepingo liomuhoko wovalume vokwevenepa, malipolwa kofika yetu twapiñgana. 4 Tyina enima lieyovo+ liova Isilayeli liamehiki-po, epingo liovafikwena ovo aliyawiswa kepingo lyo vomuhoko wovalume vevenepa, opo, epingo liavo, kepingo liovo tate malipolwa-ko.”

5 Pahe Mwisesi alingi umwe etyi tyatuma Siovaa, apopila ova Isilayeli ati: “Etyi vomuhoko wa Susee vapopia tyaviuka. 6 Siovaa watuma okuti, ovana va Selofeyande vena okulinga ñgaa: ‘Vapondola okunepwa nomunthu vahanda. Mahi vanepwe vala no vomuhoko wa he. 7 Petupu epingo lyo mu Isilayeli nawike litunda komuhoko umwe aliende komuhoko omukwavo, mokonda ova Isilayeli vena okukala nepingo liomuhoko wovakwaukulu vavo mwene. 8 Omufikwena umwe po vomuhoko wova Isilayeli una epingo, una okunepwa na umwe watuka momuhoko wa he,+ opo ova Isilayeli vakale-kale nepingo liovakwaukulu vavo. 9 Petupu epingo nalike litunda momuhoko umwe aliende momuhoko omukwavo, mokonda omuhoko nomuhoko wova Isilayeli una okukala nepingo liao mwene.’”

10 Ovana va Selofeyande avalingi umwe ngeetyi Siovaa atuma Mwisesi.+ 11 Pahe Maala, na Tilisa, na Hongala, na Milika, na Nowa, ovana va Selofeyande ovahikwena,+ avanepwa umwe na vana velilandula navo mo vohe. 12 Avanepwa novalume vatuka movana va Manasesi, Manasesi omona wa Susee, opo epingo liavo liahatunde momuhoko wa tate yavo.

13 Ovio ovitumino vionomphela, Siovaa apele ova Isilayeli etyi atuma Mwisesi, monthanthalahi momaluhandya o Moambe popepi no Solondau konthele ko Selikoo.+