Okuti Omakumbululo Maekukuatesako?

Omokonda yatyi otyiwa okunoñgonoka okuti kuna Omutungi? Inkha ove utavela okuti Huku okwekahi, opo mohande okuovolola mo Mbombiliya ovipuka vilekesa okuti, oe weituma okuihoneka. Ya pahe inkha ove utavela kuetyi Ombimbiliya ipopia opo mokala novipuka evi:

Ove mokala nehambu

OMBIMBILIYA YATI: Huku “wemuavela ombila, nomuvo wekuta, nokumuavela okulia okunyingi, eyulisa omitima vienyi nehambu enene.” — Ovilinga 14:17.

OTYO TYAHANDA OKUTIWI: Ovipuka aviho ove uhole, vili mouye uno wevipewa Nomutungi. Ya ove movipande vali tyina wamanoñgonoka okuti wekupavio tupu omokonda ukuhole unene.

Ove movasi etyi tyikukuatesako ononthiki ambuho

OMBIMBILIYA YATI: “Monoñgonoka ouviuki, nonondunge, noukuatyili, no nondyila ambuho onongwa.” — Provérbios 2:9.

OTYO TYAHANDA OKUTIWI: Mokonda Huku omutungi wove, wii umwe nawa etyi wesukisa ukale nehambu. Inkha ove ulilongesa umwe nawa Ombimbiliya, ove monoñgonoka ovipuka mavikukuatesako okukala nehambu pehepano.

Movasi omakumbululo omapulo ove

OMBIMBILIYA YATI: “Ove movasi enoñgonoko lya Huku.” — Provérbios 2:5.

OTYO TYAHANDA OKUTIWI: Okunoñgonoka okuti kuna omutungi wovipuka aviho, matyikukuatesako okuvasa omakumbululo omapulo ngaa: Omokonda yatyi Huku etutungila? Omokonda yatyi tumonena ononkhumbi? Oityi tyimoneka-po tyina tuamankhi? Ove upondola okuvasa omakumbululo ekahi nawa mo Mbimbiliya.

Mokala nekevelelo komutwe

OMBIMBILIYA YATI: “‘Ame muene ndyii nawa omalusoke ndyina konthele yenyi’, otyo tyapopia Siovaa, ‘omalusoke ombembwa, haononkhumbi, opo ndyimuavele ekevelelo.’” — Jeremias 29:11.

OTYO TYAHANDA OKUTIWI: Huku walaa okuti makamanako ovipuka ovivi, nononkhia. Inkha ove uyumba onthumbi movipuka Huku alaa okukalinga, matyikuatesako okulambela movitateka vya nthiki-na-nthiki.

Ouwa vamwe vapolako muekuetavela okuti kouye kuna Omuntungi

Cyndi, ukala ko Estado Unido wati: “Ame ndyihambukwa unene okutala oñgeni Siovaa ehole okukuatesako. Ukuatesako okulinga ovipuka vikahi nawa, nokulambela movitateka, nokukala epanga liae.”

Elise ukala ko França wati: “Okwetavela komutungi tyakuatesako unene. Apeho pena ovipuka ovanyingi ndyililongesila kwe, nokovipuka atunga, noko Ndaka Yae.”

Peter, ukala ko Europa wati: “Okuendela muetyi omutungi wetu etulongesa tyili mo Mbimbiliya, tyakuatesako okukala omunthu una ehambu. Tupu pahe ndyikahi nawa, nakala omunthu wovanthu. Nakala he ukahi vali nawa pala ovana vange.”

Liz, Ukala ko Estonia wati: “Kohale ame ankho omuenyo wange okulia vala nokulangalapo, nokulinga ononkhono mbukuhika liwa kovilinga. Ame ankho ndyitupu ehambu! Mahi pehepano, ame ndyitala omuenyo ngotyipuka tyimwe otyiwa napewa, nesukisa okupanda.”

Adrien, ukala ko França wati: “Ame ndyina otyiho otyinene. Mahi okuanoñgonoka okuti ononkhumbi, nolingwa onya, kamavikakalako vali tyikuatesako unene.”