Omulume Wotete Nomukai Wotete

OITYI tyelikalela polutalatu olu? Ovanthu. Omulume wotete nomukai wotete. Olie wevelinga? O Huku. Ove wii enyina lia Huku? O Yehova. Iya enyina liomulume nomukai o Andau na Eva.

Yehova Huku alinga Andau ngetyi. Wapola ombuma yomeheke alingi olutu luomulume luafwapo. Afili meyulu liomulume, iya Andau akala nomuenyo.

Yehova Huku ankho una ovilinga pala Andau. Watolela Andau aavele omanyina ovinyama aviho. Tyipondola Andau wakala omuvo omunyingi nokutala ovinyama opo apondole okuviavela omanyina omawa. Pokuava omanyina kovinyama, Andau wahimbika okutala otyipuka tyimue. Ove utyii oityi?

Ovinyama aviho ankho vikahi vivali vivali. Ankho kuna tate yondyamba na me yondyamba. Tupu ankho kuna tate yonkhulika na me yonkheyama. Mahi Andau ankho ukahi aike. Ngotyo, Yehova walalesa Andau iya emupolo olupati. Olupati olo emupola Yehova walinga omukai. Iya omukai oo, alingi tembua Andau.

Andau pahe ahambukwa. Eva, nae akala nehambu etyi apakwa motyikunino otyiwa pala okukala. Pahe ovo ankho vapondola okukala novana nokukala kumue nehambu.

Yehova wahandele Andau na Eva vakaleko apeho. Wahandele vapilulule oohi aiho opo ikale omphangu imue ongwa ngo tyikunino tyo Endene. Andau na Eva vahambukilwe unene puetyi vasoka kombinga yokulinga ovilinga ovio. Okuti ove wahandele okulinga onthele mokulinga oohi otyikunino tyimue otyiwa? Anthi, ehambu lia Andau na Eva kaliatuaileko. Tutalei omokonda yatyi.