Omuvia Wotete Wonkhongolo

UTYII oityi Noe atetekela okulinga, etyi oe nombunga yae valupuka mowato? Walingila Huku otyiawa. Tala! Otyo ekahi nokulinga polutalatu olu lukahi pombuelo. Noe walingila Huku otyiawa tyovinyama. Okupandula Huku etyi ayovola ombunga yae kombila onene.

Okuti Yehova wapandulile otyiawa otyo? Enga, wapandulile. Moluotyo, walaa Noe okuti kamahanyaunako vali ouye nombila onene.

Mokamuvo okatutu oohi aikukuta. Noe nombunga yae avahimbika omuenyo omupe kondye yowato. Huku wevepa ononkhano onongwa, ati: ‘Tyitei ovana ovanyingi. Liyawisei alo oohi aiho iyula ovanthu.’

Konyima yotyo, ovanthu tyina ankho veiva okupopia kombinga yombila onene, vakala nouoma. Ankho vasoka okuti ombila onene ipondola okuloka vali. Moluotyo, Huku waava otyipuka tyimue tyihinangelese ovanthu omulao wae, wokuti kamalokesa vali ombila onene kombanda yoohi. Utyii oityi Huku aava opo ahinangelese ovanthu? Waava omuvia wonkhongolo.

Omuvia wonkhongolo uhole okumoneka komakaka putyina ombila yamatyi, iya akuiya omutenya. Omuvia wonkhongolo una ovivala ovinyingi oviwa. Okuti onthiki imwe omuvia wonkhongolo weumuene? Umue oyou polutalatu apa.

Huku wati: ‘Ndyilaa okuti himalokesa vali ombila onene pala okunyimako ovanthu aveho, no vinyama aviho. Moluotyo napaka omuvia wange wonkhongolo komakaka. Putyina wamamoneka, mandyihinangela omulao wange.’

Ngotyo, tyina onue mumona omuvia wonkhongolo, oityi muhinangela? Muhinangela omulao wa Huku, wokuti kamanyimiko vali ouye nombila onene.