Omukai Wa Lot Watala Konyima

LOT nombunga yae ankho vakala na Abraiau motyilongo tyo Kanaa. Onthiki imue Abraiau wapopila Lot okuti: ‘Pano petupu ohika ituuka pala ovipako vietu aviho. Hahe tuliyapuke. Inkha wenda nthele imue, ame mandyiende no konthele onkhuavo.’

Lot atale nawa ohika. Iya amono onthele imue ongwa yotyilongo, ankho yokuna omeva neholi enyingi pala ovipako viae. Onthele oyo ankho ohika yo Jordau. Iya Lot ailukila pohika oyo nombunga yae. Mokuenda kuononthiki avatungu eumbo liavo mepundaumbo lio Sodoma.

Ovanthu vomo Sodoma ankho onondingavivi unene. Iya otyo atyinumanesa Lot. Mokonda Lot ankho omulume umue ondalawa. Tupu tyanumanesile Huku. Moluotyo, Huku watuma onoandyu onombali, opo mbulondole Lot, okuti mahanyaunapo o Sodoma, no Gomorra, mokonda youvi wovanthu ovo.

Onoandyu ambupopila Lot okuti: ‘Kanyauka! Kuata omukai wove novana vove vevali, tundeimo muno.’ Mahi, Lot nombunga yae ankho vekahi nokuseta. Iya onoandyu ambuvekuate momaoko okuvetuala kondye yepundaumbo. Oandyu imue aivepopila okuti: ‘Hatekei, hupisei omuenyo wenyi! Muahatalei konyima. Hatekelei konomphunda, opo muhupe.’

Lot novana vae avetavela, avatundumo nokuhateka mo Sodoma. Kavatalamene ni vala katutu. Tupu kavatalele konyima. Anthi, omukai wa Lot ketavelele. Vaendapo vala katutu atalama, atale konyima. Moluotyo, omukai wa Lot wakala otyimbumba tyomongwa. Umueete polutalatu olu?

Tupondola okulilongesilako onondunge onongwa. Tupu tyitulekesa okuti Huku uhupisa vala vana vemutavela. Mahi, vana vehemutavela mavakaipawa.