Onthane yo Olu

TALA VALA. Oityi ovanthu vekahi nokulinga? Vekahi nokufenda onthane. Omokonda yatyi valingila ngotyo?

Mokonda Moisesi wakala ononthiki ononyingi komphunda, ovanthu vati: ‘Katutyii oityi tyapita na Moisesi. Tulingei huku omukuavo opo etupole motyilongo tyino.’

Arau, omukulu wa Moisesi etavela. Iya ati: ‘Etei onombilingu mbenyi mbo olu.’ Etyi ovanthu vaeta, Arau evelingilako onthane yo olu. Iya ovanthu avati: ‘Ou, oe o Huku yetu, wetupola mo Egitu.’ Ngotyo, ova Isilayeli valinga otyipito tyimue otyinene, avafende onthane yo olu.

Etyi Yehova etyimona, anumana unene. Iya apopila Moisesi okuti: ‘Tuluka liwa liwa. Ovanthu vekahi nokulinga otyipuka tyimue otyivi. Valimbuako kovitumino viange, vekahi nokufenda onthane yo olu.’

Moisesi atuluka liwa liwa. Etyi ehika popepi, wamona ovanthu vekahi nokulisetaseta konthane yo olu, otyo vaimba nokunyana. Moisesi anumana unene ayumbu pohi omamanya ankho okuna ovitumino. Iya omamanya oo aatyatyauka. Konyima akuate onthane yo olu, eisengulula eiyumbuhi.

Ovanthu valinga otyipuka tyimue otyivi. Moluotyo, Moisesi watolela ovalume vamue opo vakuate omitunga viavo. Moisesi ati: ‘Ovanthu aveho vokuafenda onthane yo olu vena yokunkhia.’ Iya ovalume avaipaa nomitunga 3.000 ovanthu. Otyo tyilekesa okuti tuesukisa okuliyunga nawa opo tufende vala Yehova, atuhafende ono huku mbomatutu.