Kavalingile Ngeetyi Vapopile

Siovaa wapopilile Mwisesi okuti: ‘Londa komphunda. Mandyihoneka ovitumino viange komamanya, andyikwavela-vio.’ Mwisesi alondo komphunda akala-ko ovitenya 40 novinthiki 40. Pweetyi Mwisesi eli komphunda, Siovaa ahoneka Ovitumino 10 komamanya evali, eeavela Mwisesi.

Ova Isilayeli etyi vatala Mwisesi waseta, avasoko okuti keya vali. Avapopila Alau okuti: ‘Twahanda omunthu umwe utuhongolela. Tulingile otyika-huku!’ Alau evepopila okuti: ‘Mphei oolu.’ Eiyoko, alingi nayo otyilolo tyonthane. Ovanthu avapopi okuti: ‘Otyilolo etyi o Huku yetu wetupola ko Isitu!’ Avahimbika okutyifenda, avalingi otyipito. Etyi valingile tyapenga? Eenga, mokonda ova Isilayeli vapopilile Siovaa okuti oe vala mavafende. Mahi pahe avahalingi ngeetyi vapopile.

Siovaa amono etyi ova Isilayeli vena nokulinga, apopila Mwisesi okuti: ‘Lauka, enda kova Isilayeli. Kavetavelele, vekahi nokufenda otyika-huku.’ Mwisesi atundu komphunda, nomamanya evali.

Etyi Mwisesi alauka, ukatehela ovanthu vekahi nokwiimba. Ukatala vekahi nokunyana otyo velipetamena kotyilolo. Mwisesi anumana unene. Ayumbuhi omamanya aatyatyuka. Mwisesi apulu Alau okuti: ‘Omokonda yatyi wayekela ovanthu vekuhongiliye okulinga otyipuka etyi tyapenga?’ Alau apopi okuti: ‘Wahanumane. Ove wii nawa ovanthu ava. Ankho vahanda otyika-huku, avandyetela oolu, andyiiyoko andyilingi otyilolo!’ Etyi Alau alingile ankho kapondola okutyilinga. Mwisesi akondoka komphunda aiti ku Siovaa opo aevele ova Isilayeli.

Siovaa aevela vana ankho vahanda okumutavela. Ove wetyinoñgonoka omokonda yatyi ova Isilayeli ankho vesukisila okutavela kweetyi Mwisesi evepopila?