Timoteo Omukuatesiko Omupe wa Paulu

OMUKUENDYE ou ukahi apa no apostolu Paulu o Timoteo. Timoteo ankho ukala ko Listra nombunga yae. Me yae ankho utiwa o Eunice, inakulu ankho utiwa o Loide.

Etyi ankho otyikando tyatatu Paulu eya okutalelapo otyilongo tyo Listra. Ankho papitale enima tunde etyi Paulu na Mbarnabe veile tete ko Listra okuivisa Ondaka ya Huku. Pahe otyikando etyi Paulu wakondoka nepanga liae Sila.

Utyii oityi Paulu ekahi nokupopila Timoteo? Ukahi nokumupula okuti: ‘Uhanda okuenda na ame na Sila? Upondola okutukuatesako okukaivisa Ondaka ya Huku kononthele ononkhuavo.’

Timoteo akumbulula okuti: ‘Enga, nahanda okuenda.’ Konyima, Timoteo wasapo ombunga yae iya aende na Paulu na Sila. Mahi, putyina nkhele tuhenelilongese kombinga youngendi wavo, tutalei etyi tyapita na Paulu. Ankho papita omanima 17 tunde etyi Yesu amonekela Paulu mondyila yoko Damasku.

Hinangela okuti Paulu ankho wenda ko Damasku pala okukamonesa emone ovalongwa va Yesu. Mahi pahe walinga omulongwa wa Yesu. Konyima, onondyale mbumue ankho vahanda okuipaa Paulu, mokonda ankho veyele omalongeso ae kombinga ya Yesu. Anthi, ovalongwa vakuatesako Paulu okutila. Vemupaka mo sestu imue onene iya avemutululila konyima yotyimato tyepundaumbo.

Konyima yotyo, Paulu akaivisa Ondaka ya Huku ko Antiokia. Iya ko Antiokia, oko ovalongwa va Yesu vaihanwa tete okuti ova Kristau. Paulu na Mbarnabe ankho vatumwa okukaivisa Ondaka ya Huku kovilongo ovikuavo. Epundaumbo limue vatalelapo o lio Listra, muna ankho mukala Timoteo.

Papita enima, iya pahe Paulu wakondoka ko Listra. Etyi Timoteo na Paulu na Sila vatunda mo Listra, utyii opi vaile nako? Tala pomapa ei, iya opo ulilongese onomphangu mbumue.

Tete, vaya ko Ikonio, iya avaende kepundaumbo lia vali litiwa Antiokia. Konyima yotyo, avalingi oungendi alo ko Troade, iya avaende ko Filipu, noko Tesalonika, noko Bereia. Ulwete pomapa apa, opi pekahi o Atena? Tupu nako Paulu waivisilako Ondaka ya Huku. Konyima yotyo, aivisila mo Korintu enima nomeya. Okuhulako, vakala okamuvo kehehi mo Efesu. Iya avakondoka nombapolo ko Sesareia, avaende alo ko Antiokia, kuna kwesala Paulu.

Ngotyo, Timoteo walinga omaungendi omanyingi okukuatesako Paulu okuivisa “onondaka onongwa Mbouhamba wa Huku” no kuonganeka omawaneno omanyingi. Putyina ove wamekulu, mokala omuumbili wa Huku wekolelo nga Timoteo?