Omona Sesusi

Susee na Maliya ankho vakala ko Nasalee na Sesusi novana vavo ovakwavo ovakwendye novakainthu. Susee watekulile ombunga yae, wali omuhongi womavai, tupu walongesile ombunga yae etyi tyiyemba ku Siovaa Novitumino viae. O Susee apeho ankho venda kondywo yokufendela, tupu apeho menima vaya ko Selusalei okukalinga o Pasikwa.

Pweetyi Sesusi ena omanima 12, o Susee avaende ko Selusalei. Mepunda-umbo amuyula ovanthu veya kotyipito tyo Pasikwa. Etyi o Pasikwa yapwa, Susee na Maliya avakondoka keumbo liavo, avasoko okuti Sesusi nae wakondoka, uli pu vakwavo. Avaovola Sesusi pwaava vena-vo, avehemuvasi.

Avakondoka ko Selusalei avakala ononthiki ononthatu nokumwovola. Etyi vehemwete, avekemutala mondywo ya Huku, ngamo vemuvasa. Avavasi Sesusi, upumphi pokati kovalongesi, uvetehelela nawa otyo evepula. Ovalongesi avahuvu unene novipuka Sesusi evepula. Tupu avahuvu unene neetyi apopia. Avetyimono okuti wii nawa ovitumino vya Siovaa.

Susee na Maliya valingile unene otyiho. Maliya ati: ‘Mona wange, twepwila nokukwovola! Ankho ulipi?’ Sesusi ati: ‘Kamutyii okuti ame ndyina okukala mondywo ya Tate?’

Sesusi aende novo tate yae ko Nasalee. Susee alongesa Sesusi okuhonga omavai. Mokusoka kwove oñgeni Sesusi ankho ekahi pweetyi omona? Sesusi wali omunongo, apandwa na tate yae novanthu.