Siovaa Waamenene Sesusi

Koutundilo wo Isilayeli ovanthu ankho vetavela okuti ononthungululu mbupondola okuvehongolela. Onthiki imwe kounthiki, ovalume vamwe Vokoutundilo vamwene otyipuka tyiliaima meulu ngonthungululu avetyilandula. “Onthungululu” oyo aivetwala ko Selusalei. Ovalume ovo avapulu kovanthu okuti: ‘Omona makala ohamba yova Sundaa ulipi? Onthwe tuna etyi tuhanda okumwavela.’

Helonde Ohamba yo Selusalei okwiiva okuti kwatyitwa ohamba onkhwavo, atyimunumanesa unene. Aihana ononkhalamutwe mbovanakwa evepulu okuti: ‘Ohamba oyo opi atyitilwa?’ Avemupopila okuti: ‘Ovauli vatile matyitilwa ko Mbelei.’ Helonde aihana ovalume vatunda Koutundilo evepopila okuti: ‘Endei noko Mbelei kaovolei omona oo. Nga mwemuvasa, amuya okumphopila apa eli. Naame ndyina etyi nahanda okumwavela.’ Mahi ankho omatutu vala.

“Onthungululu” aihimbika vali okweenda. Ovalume aveilandula okwenda noko Mbelei. “Onthungululu” aitalama kombanda yondywo imwe, ovalume avanyingila-mo. Avavasi-mo Sesusi na me yae Maliya. Avaikila konongolo, aveveavela ovipuka oviwa vaetela omona, vialanda onombongo ononyingi. Okuti o Siovaa watumine ovalume ovo opo vakaovole Sesusi? Au.

Kounthiki watyo Siovaa apopila Susee mondyoi okuti: ‘Helonde wahanda okwipaa Sesusi. Pola omukai wove nomona, kaholamei ko Isitu. Oko ukala, mwene ame haa mandyiti tunda-ko.’ Susee avaende na Maliya nomona wavo ko Isitu.

Siovaa wapopilile ovalume vahongolelelwe nonthungululu, vahakondoke ku Helonde. Etyi Helonde etyiiva okuti vakwata ondyila onkhwavo, anumana unene. Mokonda kametyivili okuvasa Sesusi, atumu okwipaa omalukembe aeho ovakwendye veti lya Sesusi akala mo Mbelei. Mahi Sesusi ahupu mokonda wali ko Isitu.

Apakala vala katutu, Helonde ankhi. Siovaa apopila Susee okuti: ‘Pahe upondola okukondoka.’ Susee na Maliya na Sesusi avakondoka ko Isilayeli, avakakala kotyilongo tyavo mepunda-umbo lyo Nasalee.