Sesusi Ulinga Ovipuka Vihuvisa

Sesusi weile pano pohi aivise oviwa ovipe Viouhamba wa Huku. Opo tyimoneke evi Sesusi malingi tyina amakala Ohamba, Siovaa emwaavela omphepo ikola, alingi ovipuka vihuvisa. Sesusi wahakulile omauvela aeho. Ovavei veile ku Sesusi opo evekwateseko, evehakula aveho. Wapatulile omaiho ovamphoki, onompholo embupatula omakutwi, vokwalemana evehakula, tupu wapolele ovilulu ovanthu. Navana umwe vakwatele kovikutu viae vavelukile. Ovanthu ankho valandula Sesusi oku amai nako. Naapa umwe ahandele okukala vala aike, Sesusi kataatele ovanthu vahanda okukwateswako.

Nthiki imwe, ovanthu vamwe avaeta omulume umwe walemana pondywo Sesusi ekahi. Mahi mondywo ankho mweyula unene ovanthu. Mokonda ovanthu valinga ovanyingi, avayambulula ondywo peulu lya Sesusi, avatembe-po emphana, ngapo vemupitisila. Sesusi apopila omulume okuti: ‘Katuka enda.’ Omulume aende umwe. Otyipuka otyo alingile atyihuvisa unene ovanthu.

Nthiki imwe, Sesusi aende mepunda-umbo limwe avasi ovalume 10 vena ouvela wotyilunda, avemulandula otyo valaveleya avati: ‘Sesusi tulinge-vo okankhenda!’ Pomuvo opo ovanthu ankho vena ouvela oo, kavafwene pu vakwavo. Sesusi apopila ovalume ovo okuti endei kondywo ya Huku. Pokuli nokwenda nokondywo ya Huku avaveluka. Ovanthu ovo aveho 10 avahakuka. Etyi umwe etyimona okuti waveluka kouvela wae omuvi, akondoka akapandula Sesusi, ahilivika Huku. Povalume ovo 10 vahakulilwe, wike vala wapandulile Sesusi.

Kwali omukai umwe wakalele omanima 12 nokuvela, wahandele ñgeno uveluka kouvela wae. Aende pokati kovanthu ovanyingi, akala konyima ya Sesusi emuyame kotyikutu tyae. Wati vala yamee-ko aveluka. Etyi ayama-ko Sesusi ati: “Olie wayama kotyikutu tyange?” Omukai ateketa, eya ku Sesusi ati: Ame nekuyama. Sesusi emupameka, emuti: ‘Mona wange, enda nombembwa.’

Omutumini umwe utiwa o Sailu eya ku Sesusi emuti: ‘Twende keumbo liange! Omona wange wavela unene.’ Etyi Sesusi ehenehike keumbo lya Sailu, omona oo anyimi. Sesusi wati vala hikee uvasa ovanthu ovanyingi valila. Sesusi eveti: ‘Mutei, omukainthu ulele.’ Akwate omukainthu mokuvoko ati: “Mona wange, pinduka-po!” Omona apinduka-po, Sesusi apopila ovohe vemwavele okulia. Pahe soka oñgeni otyipuka otyo tyakalesile ovohe!