ELONGESO 80
Sesusi Ukoya Ovatumwa 12
Etyi Sesusi aivisa enima notyihupe, alingi otyipuka tyimwe otyinene. Ovalie makoyo vaundape nae movilinga viokwivisa? Ovalie malongesa valulike ewaneno Liovakwa-Kilisitu? Opo aholovone ovanthu ovo, Sesusi ankho una umwe okukwateswako na Siovaa. Aende komphunda akakala-ko aike, elikwambela otyinthiki atyiho. Komuhuka, Sesusi aihana vamwe povalongwa vae akoyo-po ovatumwa 12. Uhinangela omanyina avo? Ovo Petulu na Andelee na Tiaku na Swau na Filipi na Mbatulumeu na Tomee na Mateusi na Tiaku omona wa Alufeu na Tandeu na Simau na Sunda Isikaliyote.
O Andelee, na Petulu, na Filipi, na Tiaku
Aveho 12 aveende na Sesusi. Evelongesa, evetumu vakaivise aveke. Siovaa eveavela ononkhono mbokuhakula ovanthu nokutaata ovilulu.
O Swau, na Mateusi, na Mbatulumeu, na Tomee
Sesusi ovatumwa ovo 12 wevetile omapanga ae, tupu weveyumbile onthumbi. Ova Faliseu ankho vatomba ovatumwa mokonda kavalongesilwe monosikola ononene. Mahi Sesusi wevelongesile oñgeni mavakaivisa. Ovatumwa vakalele na Sesusi pweetyi eheneipawe no pweetyi atutiliswa. Ovatumwa vamwe po 12 vatukile ko Ngalileya nga Sesusi. Vamwe ankho vanepa.
O Tiaku omona wa Alufeu, na Sunda Isikaliyote, na Tandeu, na Simau
Ovatumwa navo vali ovakwankhali vapengesile. Navo vapopaile umwe tyahasokele, valingaile ovipuka viahaviukile. Pamwe kavapwile elundo. Onthiki imwe avayaye tyokuhanda okutala olie vali omunene kuvakwavo. Mahi ankho ovanthu vekahi nawa, vehole Siovaa. Ovo ankho mavakala onomphandyi mbewaneno, tyina Sesusi amaipawa.
“Ame ndyimuti mapanga ange, mokonda nemupopila umwe ovipuka aviho neiva ku Tate.” — Swau 15:15