Sesusi Ukwatwa

Sesusi novatumwa vae vaile Komphunda Yomindyambi, mokati kovinthiki ankho kuna omwii. Etyi vehika mo Ngetesemani, Sesusi evepopila okuti: “Salei pano, kalei tyipahi.” Sesusi atundu puvo, aende ngopo, aikila konongolo. Elikwambela ku Siovaa ati: “Tyeende ngeetyi ove wahanda.” Siovaa atumu oandyu ipameke Sesusi. Etyi Sesusi akondoka kovatumwa, evevasi velele. Evepopila okuti: ‘Pahukei-po! Ei ha oola yokulala! Onondyale mbange mbukahi nokuya opo mbunkhwate.’

Pakala vala katutu Sunda eya, eya novanthu ovanyingi vatyinda omitunga novimuti. Sunda ankho utyii okuti mavasi Sesusi ko Ngetesemani mokonda oko vehole okwenda nae. Sunda wevepopilile okuti mandyimulekesa Sesusi. Aviuku pu Sesusi ati: ‘Okamene Mulongesi,’ emuhipi ombesu. Sesusi ati: ‘Sunda ukahi nokumphakula nombesu?’

Sesusi apulu ovanthu veya na Sunda ati: “Olie mwoovola?” Avapopi okuti: “Twoovola Sesusi omu Nasalee.” Sesusi evepopila okuti: ‘Ndyili pano, ovalume ava veyekei vaye.’ Sesusi evepulu vali okuti: “Olie mwoovola?” Avakumbulula vali okuti: “O Sesusi omu Nasalee.” Sesusi akumbulula okuti: ‘Nemupopila-le okuti ndyili pano. Yekei ovalume ava vende.’

Etyi Petulu amona etyi tyikahi nokweenda-po, apolo-mo omutunga atete okutwi kwa Maluku, omupika womunene-nakwa. Mahi Sesusi akwate okutwi kwomulume oo ekuhakula. Apopila Petulu okuti: ‘Paka omutunga wove motyilalo. Okulwa nomutunga, tupu monkhi komutunga.’ Ovanthu avakwate Sesusi, avemukutu komavoko. Ovatumwa avakahateka. Avatwala Sesusi komunakwa Anasi. Anasi apulu Sesusi ehimbwe, emutumu kondywo Yomunene-nakwa Kaifaa. Ovatumwa valingile ñgeni?