Sesusi Watualwa Ku Anasi, Atualwa Ku Kaifaa

Sesusi wakutilue ngatyina ongangala, atualwa ku Anasi, wokuali omunene-nakwa pu etyi Sesusi akumbululile ovalongesi mondyuo ya Huku monkhalelo ihuvisa, etyi omututu. (Luka 2:42, 47) Ovana vamwe va Anasi vakalele ovanene-nakwa iya pomuvo opo Kaifaa, ankho wanepa omona wa Anasi, oe ankho una otyilinga otyo.

Pu etyi Sesusi ekahi mondyuo ya Anasi, Kaifaa akaongiya Vombonge Onene yova Sundeu. Ovanthu vombonge oyo ankho vena 71, okukutikinya-mo omunene-nakwa novanthu ovakuavo ankho vakalele notyilinga otyo.

Anasi apulu Sesusi “konthele yovalongwa vae netyi alongesa.” Sesusi emukumbulula okuti: “Ame napopila pokati kovanthu. Apeho ankho ndyilongesila monondyuo mbokufendela no mondyuo ya Huku, muna ova Sundeu veliongiyila, hapopilile natyike pokamphengi. Omokonda yatyi umphulila? Pula vana veiva etyi nevepopila.” — Suau 18:19-21.

Umwe povayungi ankho utai popepi avete Sesusi nolukuihi motyipala, emupopila nokuanumana ati: “Ongotyo ukumbulula omunene-nakwa?” Mahi mokonda Sesusi ankho utyii okuti kalingile natyike tyapenga, emukumbulula okuti: “Inkha napopia otyipuka tyimwe tyapenga, tyimphopile. Mahi inkha etyi napopia tyaviuka, umbetela-tyi?” (Suau 18:22, 23) Konyima, Anasi atumu vatuale Sesusi ku Kaifaa.

Omunene-nakwa wavilapo, novakulu, novahoneki vovitumino, aveho Vombonge Onene yova Sundeu ankho veliongiya. Ankho veliongiyila meumbo lya Kaifaa. Movitumino ankho tyapenga okukoyesa omunthu motyinthiki tyo Pasikwa, mahi no ngotyo, avalingi otyipuka tyapenga ankho vahanda.

Ovanyingi po Vombonge Onene yova Sundeu ankho onondingavivi. Etyi Sesusi atutilisa Lasalu, avatokola okuipaa Sesusi. (Suau 11:47-53) Ononthiki mbumwe konyima, ononkhalamutwe mbonongeleya ankho vahandele-ale okukuata Sesusi na vemuipae. (Mateusi 26:3, 4) Alo umwe etyi Sesusi nkhele ehenekoyeswe, ankho vatokola-le okumuipaa!

Ovanene-nakwa novanthu ovakuavo Vombonge Onene yova Sundeu ankho vapengesa-le etyi vahalandulile ovitumino pokukoyesa Sesusi, pahe avaovola ovanthu onombangi mbomatutu opo vatendeleye Sesusi. Avavasi ovanyingi, mahi ankho etyi vapopia katyelikuatele kumwe. Pahe, akuya ovanthu vevali avati: “Onthue tuemuiva tyina apopia okuti: ‘Mandyiteye-po ondyuo ei ya Huku yatungwa nomavoko ovanthu, andyitungu onkhuavo mononthiki ononthatu, ihatungwa nomavoko ovanthu.’” (Maluku 14:58) Alo umwe ovanthu ovo, etyi vapopia katyelikuatele kumwe.

Kaifaa apulu Sesusi okuti: “Kukumbulula natyike? Kutyiivite okuti ovanthu ava vekahi nokukupopia?” (Maluku 14:60) Mahi etyi ovanthu ovo ankho vekahi nokupopia ovipuka vihelikuatele pokumutendeleya, Sesusi ahapopi natyike. Moluotyo, Kaifaa Omunene-nakwa Wavilapo, asoko otyipuka otyikuavo.

Kaifaa ankho utyii okuti ova Sundeu kavahande omunthu ulipopia okuti Omona wa Huku. Nthiki imwe etyi Sesusi elipopia okuti Omona wa Huku, ova Sundeu vahandele okumuipaa, mokonda ankho vasoka okuti ‘uhanda elifwe na Huku.’ (Suau 5:17, 18; 10:31-39) Kaifaa ankho utyii nawa, ngotyo apulu Sesusi okuti: “Ove una okupopia otyili, inkha kupopi otyili mokembe Huku. Ove, ove Kilisitu, Omona wa Huku?” (Mateusi 26:63) Sesusi ankho welipopia-le okuti Omona wa Huku. (Suau 3:18; 5:25; 11:4) Inkha pahe ketyipopi, ovanthu vapondola okusoka okuti ukahi nokuanya okuti oe Mesiya Omona wa Huku. Moluotyo, Sesusi ati: “Enga ame, iya ove mokamona Omona womulume upumphi kokulio kwa Huku Wepondolo aliho, ukahi nokuya kombanda yomakaka.” — Maluku 14:62.

Etyi Kaifaa eiva onondaka ombo, atandaula ovikutu viae muene, ati: “Wapopia omapita Huku! Ñgaa tuesukisa vali onombangi? Talei! Pahe muetyiiva etyi apopia omapita Huku. Oityi onwe musoka?” Vombonge yova Sundeu avapopi etokolo liavo liahaviukile, avati: “Una okuipawa.” — Mateusi 26:65, 66.

Avahimbika okulinga Sesusi omukuele, avemuvete. Vamwe avemuvete motyipala nomalukuihi, avemunthili omate. Konyima, avemuhiki motyipala, avemuvete otyo vapopia nomutomba okuti: “Inkha umuuli pahe tupopile olie wekuveta?” (Luka 22:64) Omona wa Huku ankho ukahi nokulingwa onya ngatyi!