Opi Tuatunda?
OMOKONDA YATYI TYAKOLELA OKUVASA EKUMBULULO LIEPULO OLIO? Ovanthu ovanyingi valongeswa okuti omuenyo pano pohi, weyako vala awike. Vapopilwa okuti ovipuka ovinyingi viaenda kombanda yoohi, ovio viaetako ovanthu vokuna onondunge, nomalusoke, neyembelo liavo liokuhanda okufenda.
Mahi nkhele soka: Inkha tyili onthue tueya vala atuike kouye katuatungilwe, kutupu Omupakeko, ngotyo ovanthu vatyo aveho ononthyiwe. Vetupu oku vapola enoñgonoko liavilapo, nawike utukuatesako okutetulula ovitateka vietu. Ñgeno tuayumba vala onthumbi mounongo wovanthu opo tukelele ovitateka, nokutetulula ovilwa viopulitika, okutuavela onondonga movitateka vietu muene.
Okuti okuyumba vala onthumbi movanthu tyikuetela ombembwa momutima? Inkha katyikuetela, soka konthele yomunthu wokuna enoñgonoko enene. Otyo katyihambukiswa vala, mahi tupu tyaviuka vali.
Oityi Ombimbiliya Ipopia?
Ombimbiliya ilongesa okuti ovanthu aveho vatungwa na Huku. Onthue katuatundile kotyipuka tyihena omalusoke nokuahasukile nonthue. Anthi onthue tuvana va Tate wokuna oluembia, nenoñgonoko. Tala onondaka ombo mbayandyuluka nawa Mbombimbiliya.
Genêsis 1:27.“Iya Huku watunga omulume otyifuika tyae, wevetunga omulume nomukai.”
Salmo 139:14.“Mandyikuhilivika mokonda natungwa monkhalelo ihuvisa unene. Ovilinga viove vihuvisa. Ame netyinoñgonoka nawa.”
Mateus 19:4-6.“Kamunetange okuti una wevetunga tunde ponthyimbi, wevetungile omulume nomukai, iya ati: Moluotyo omulume masipo he naina, elihonyeka nomukai wae, iya ovo vevali avakala vala omunthu wike?’ Ngotyo, kavakala vali ovanthu vevali, anthi vakala omunthu wike vala. Moluotyo, etyi Huku apaka mokanga ike, omunthu ehetyiyapule.”
Atos 17:24, 25.“Huku wokuatunga ouye novipuka aviho vilimo, Oe Tatekulu yeulu noohi, wahakala monondyuo mbatungwa nomaoko ovanthu. Tupu kakuateswako novanthu, ngatyina esukisa otyipuka tyimue, mokonda oe muene wavela omuenyo ovanthu aveho, nomufuimo, novipuka aviho.”
Revelação [Apocalipse] 4:11.“Jeova, Huku yetu, ove vala watokala okupewa enkhimano nehumbilo noutumini, mokonda ove watunga ovipuka aviho. Mokonda yehando liove viatungwa no kukahiko.”
Oñgeni Omakumbululo Ombimbiliya Etuetela Ombembwa Yotyotyili Momutima
Okunoñgonoka okuti ‘ovanthu aveho . . . kombanda yoohi vatuka’ ku Huku, tyipilulula olusoke luetu konthele yovanthu vakuetu. (Efésios 3:15) Tupu, okunoñgonoka otyo, tyitukuatesako oñgeni tuna okusoka konthele yetu muene novitateka vietu. Matyitukuatesako okusoka mononkhalelo ombu mambulandulako.
Tyina tuhanda okulinga omatokolo epuiya, kamatusukalala nomalusoke elikalaila ovanthu. Anthi, matuyumbu onthumbi monondonga mbo Mbimbiliya. Omokonda yatyi? Omokonda “Ovihonekwa aviho vina esilivilo enene pala okulongesa, nokuviyula, nokuviukisa ovipuka, nokulonga nouviuki. Opo omunthu wa Huku akale tyafuapo nawa, nokuapongiyua nawa pala ovilinga aviho oviwa.”—2 Timóteo 3:16, 17.
Opo tuundapese tyotyili onondonga mbo Mbimbiliya, tuesukisa okulinga ononkhono nokuliyunga nawa. Ovikando vimue omalondolo Ombimbiliya ahanda tulinge ovipuka monkhalelo yelikalela netyi tuhole. (Gênesis 8:21) Mahi, inkha tutavela okuti tuatungwa na Tate keulu wokuna oluembia, tuna ehunga ewa liokuimbuka okuti oe wii vali nawa ondyila yaviuka pala onthue. (Isaías 55:9) Ondaka Yae itupopila okuti: “Yumba onthumbi mu Jeova nomutima wove auho, wahakolele menoñgonoko liove muene. Muimbuka monondyila mbove ambuho, iya oe maviukisa onomphai mbove.” (Provérbios 3:5, 6) Inkha tuundapesa onondonga ombo, kamatusukalala unene tyina tuna ovitateka nomatokolo tuesukisa okulinga.
Tyina tuamalingwa okapungulula, katukala nomutima walemenwa nomalusoke apenga okuti tuvahepi, ine tutupu esilivilo ngovanthu vomuhoko una ine otyilongo tyina. Anthi, matukala nomalusoke omawa okulihumba onthue muene. Omokonda yatyi? Omokonda Tate yetu Jeova Huku, “utupu okapungulula, mahi, oe utavela kese munthu una onthilo nae nokulinga etyi tyaviuka, momalongo aeho.”—Atos 10:34, 35.
Okutyinoñgonoka otyo, tupu matyitutyilika okukala nomalusoke okapungulula konthele ya vakuetu. Matunoñgonoka okuti tutupu ehunga liokusoka okuti onthue tuakolela vali tyipona omuhoko wa vakuetu. Mokonda ‘nomunthu wike vala Huku walinga omalongo aeho ovanthu, opo vakale kombanda yoohi aiho.’—Atos 17:26.
Tyotyili okunoñgonoka okuti tuatungwa nomunthu, nokuti Omupakeko wetu wasuka nonthue, tyituavela ehunga liokukala nombembwa yotyotyili momutima. Mahi, otyo, katyituuka opo tutualeko okukala nombembwa oyo mokati ketu.
[Onondaka Mbavilapo pefo 4]
Okuti ovanthu veya vala aveke kavatungilwe?