Okuti Huku Utavela Ononkhalelo Ambuho Mbokufenda?
Omakumbululo Ovanthu Vehole Okuava:
▪ “Onongeleya ambuho mbutuala ku Huku.”
▪ “Katyasukisile etyi ove utavela, tyakolela vali okukala nomutima omuwa.”
Oityi Jesus apopile?
▪ “Nyingililei mombundi yahita. Mokonda onthanda nokuahandyuka ondyila ituala kononkhia, iya ovanyingi omo vekahi nokunyingilila. Anthi, ondyila onthutu nokuahita ituala komuenyo, iya kavehi vekahi nokuivasa.” (Mateus 7:13, 14) Jesus ankho ketavela okuti onongeleya ambuho mbutuala ku Huku.
▪ “Ovanyingi monthiki oyo, mavakati: ‘Tatekulu, Tatekulu, katualongesile menyina liove, katuatundisile ovilulu menyina liove, nokulinga ovipuka ovinyingi vihuvisa menyina liove?’ Ame mandyivepopila okuti: Ame himui! Tundei ponthele yange, onue vokulinga ovipuka ovivi.” (Mateus 7:22, 23) Jesus ketavela aveho vapopia okuti ovalanduli vae.
OVANTHU ovanyingi vekahi monongeleya, vaavela esilivilo enene omatavelo avo, noviso. Mahi, oityi molingi inkha omalongeso oo kaelikuatele netyi tyikahi Mondaka ya Huku, Ombimbiliya? Jesus walekesile eliva liokulandula oviso viaetuako novanthu etyi apopila ononkhalamutue mbo kononthiki mbae okuti: “Onwe muapola esilivilo ondaka ya Huku mokonda yoviso vienyi.” Iya apopi onondaka ombu mba Huku okuti: “Ovanthu ava vamphanda nomilungu viavo, mahi omutima wavo ukahi kokule na ame. Vatualako nokundingila efendelo liahasilivila, mokonda valongesa omalongeso ovanthu.”—Mateus 15:1-9; Isaías 29:13.
Omatavelo haoko vala akolela, tupu novituwa viakolela. Ombimbiliya ipopia konthele ya vana vati vafenda Huku okuti: “Tyina vekahi pokati kovanthu, vapopia okuti vei Huku, mahi ovipuka valinga vilekesa okuti Huku kavemui.” (Tito 1:16) Tyotyili, Ombimbiliya ipopia konthele yavana vekahi momuvo wetu okuti: “Vehole vali ovitalukiso tyipona Huku. Velilekesa ngatyina vena onthilo na Huku, mahi kavayeke ondaka ya Huku ihongolele omuenyo wavo.”—2 Timóteo 3:4, 5.
Okupopia otyili tyakolela, mahi, pena vali ovipuka ovikuavo viesukisa. Omokonda yatyi okupopia otyili hatyoko vala tyesukisa opo efendelo lietu lipandwe na Huku? Mokonda omunthu upondola okukala nomutima waviuka mahi otyo ekahi mondyila ombi. Moluotyo, okukala nenoñgonoko liafuapo konthele ya Huku tyakolela. (Romanos 10:2, 3) Okukala nenoñgonoko olio, nokufuisapo etyi Ombimbiliya ipopia, matyitukuatesako okupandwa na Huku. (Mateus 7:21) Tyotyili, ongeleya yotyotyili, yakutikinya ovituwa viaviuka, nekolelo liaviuka, nokulinga etyi tyaviuka. Iya okulinga etyi tyaviuka tyihangununa okulinga ehando lia Huku kese nthiki!—1 João 2:17.
Inkha uhanda okunoñgonoka vali etyi Ombimbiliya itutolela konthele ya Huku, ovola Onombangi mba Jeova opo veye okukulongesa Ombimbiliya meumbo liove otyali.
[Onondaka Mbavilapo pefo 9]
Ongeleya yotyotyili, yakutikinya ovituwa viaviuka, nekolelo liaviuka, nokulinga etyi tyaviuka