2 Huku Tyilityili Kesukile Nonthue Okuti Otyo Otyili?

Ove hamwe uhole okuiva okuti: “Inkha Huku tyili wesukile novanthu, oe ñgeno wamanako ovivi nononkhumbi mouye. Iya namphila hamwe asuka netyi tyipita novanthu aveho, oe kesukile netyi tyipita naame.”

Oityi Ombimbiliya ilongesa: Jeova Huku haeko weetako ovivi. (Tiago 1:13) Namphila apondola okumanako ovivi, oe uyekelako ovanthu onondingavivi hono, opo atetulule otyitateka tyakatulwa konthyimbi yovanthu. Konthyulilo makamanako ovivi aviho vikahi nokulingwa na vana vehetavela outumini wae.—Gênesis 3:1-6; Isaías 65:17.a

Huku uhole ovanthu aveho, mahi tupu wesuka na kese umwe puonthue. Mateus 10:29-31 ilekesa okuti oe utwii nawa alo umwe ovipuka tuhei. O testu oyo yati: “Ouila uvali kaulandwa onopalata onombali mbahasilivila? Mahi, na kamwe makatokela pohi otyo Tate yenyi ehetyii. Anthi, onohuki mbo komutwe wenyi ambuho mbavalulwa. Moluotyo, muhakalei nowoma, onwe muakolela vali tyipona oviila ovinyingi.”

Oñgeni okunoñgonoka otyili konthele ya Huku matyikukuatesako: Onthue tuhole okulityilika ovanthu vomphata nokuhetavela. Tyotyili, omatutu okuti Huku kesukile novanthu alingisa vamwe okulityilika okunoñgonoka Huku ine okumuovola vala tyina vahulilwa. Okunoñgonoka okuti Jeova Huku tyilityili wesuka noove matyikulundu okuhanda okulilongesa vali konthele yae nokulinga oupanga nae.

Hamwe uhole okulikuambela ku Huku mahi olipulu inkha ukutehelela umwe ine ukumbulula elikuambelo liove. Ombimbiliya itupopila okuti: “Omuteheleli womalikuambelo” apeho uhanda okutehelela aveho vehika kwe noukuatyili.—Salmo 65:2.

Huku ukuita opo ‘upakule omasukalalo ove aeho kwe, mokonda oe wasuka noove.’ (1 Pedro 5:7) Tupondola okukala nonthumbi yokuti oe metukuatesako namphila tukala novitateka ovinene, mokonda Ondaka yae yati: “Jeova ukahi popepi na vana vaihamenwa komutima. Uyovola vana vokuamona ononkhumbi.”—Salmo 34:18.

[Onondaka Poutoi]

[Onondaka Mbavilapo pefo 5]

Inkha Huku kesukile nonthue, oityi etuitila tulikuambele kwe?