“Onondaka Ombu Onongwa Mbouhamba Mambukaiviswa”

“Onondaka ombu onongwa mbouhamba wa Huku, mambukaiviswa kombanda yoohi aiho, pala oumbangi movilongo aviho, iya konyima onthyulilo aiya.”—MATEUS 24:14.

Otyo Tyihangununa Tyi: O Evandyeliu yahonekwa na Luka, ipopia okuti Jesus “waendaenda momapundaumbo omanene nomatutu, okuivisa onondaka onongwa mbouhamba wa Huku.” (Lucas 8:1) Jesus wapopile okuti: “Ndyina okukaivisa onondaka onongwa Mbouhamba wa Huku mokonda etyi, otyo natuminwa.” (Lucas 4:43) Oe watumine ovalongwa vae okukaivisa onondaka onongwa Mbouhamba, momapundaumbo omanene nomatutu, iya konyima evepopila okuti: “Mamukala onombangi mbange . . . alo kononthele mbokokule-kule mboohi.”—Atos 1:8; Lucas 10:1.

Oñgeni Ovakristau Votete Vetyilekesa: Ovalongwa va Jesus kavasetele okulinga etyi Jesus evepopila. “Kese nthiki mondyuo ya Huku, vatualeleko tyihatalama okulongesa, nokuivisa umbo na umbo onondaka onongwa konthele ya Kristu.” (Atos 5:42) Ovilinga viokuivisa ankho vilingwa novanthu aveho mewaneno. Omuhipululi Neander wapopia okuti Celso, ankho ondyale Yovakristau, wahoneka okuti: “Vana valinga ovikutu, novanyiki vononkhaku, novokuhika onombandwa, novokuhelilongesile kosikola, ankho vaivisa nombili ono Evandyeliu.” Jean Bernardi wahoneka momukanda wae The Early Centuries of the Church, okuti: “[Ovakristau] ankho vesukisa okuenda okukapopia novanthu kononthele ambuho. Momatapalo, no momapundaumbo, napana palingilwa ovitanda, no pomaumbo. Tyilinge vetavelwa ine kavetavelwa. . . . Alo kononthele mbokokule-kule mboohi.”

Ovalie Valandula Onondonga Ombo Hono? David Watson onkhalamutwe yongeleya Anglicana, wahoneka okuti: “Hono ovanthu kavesukile nokufenda Huku mokonda onongeleya kambuivisa nokulongesa nombili.” José Luis Pérez Guadalupe, wahoneka momukanda wae Why Are the Catholics Leaving? konthele yovilinga vio va Evangelista no va Adventista, navakuavo vali, okuti “kavaivisa umbo na umbo.” Mahi, wahoneka konthele Yonombangi mba Jeova okuti: “Vaivisa apeho umbo na umbo.”

Jonathan Turley wapopia otyili tyimwe tyivasiwa mo Suprema Corte, 2001-2002, okuti: “Inkha omunthu umwe upopia Onombangi mba Jeova, ovanyingi vasoka liwa-liwa kovaivisi vetutalelapo pomaumbo etu mo ola ankho tuhakevela. Mokonda Onombangi mba Jeova kavaivisa vala umbo na umbo opo vayawise ekolelo liavo, mahi tyakolela pala ekolelo liavo.”

Okakasa pefo 7]

Wimbuka Ovalie Valandula Onondonga Ombo Hono?

Okutala kono testu Mbovihonekwa mbapopiwa mononthele ombu mbelilandula, hono ovalie usoka okuti Ovakristau votyotyili? Namphila kuna onongeleya ononyingi veliti Ovakristau, hinangela etyi Jesus apopilile ovalanduli vae: “Haaveho ko vati ‘Tatekulu, Tatekulu,’ mavakanyingila mouhamba wokeulu. Mukanyingila vala una ulinga ehando lia Tate yange uli keulu.” (Mateus 7:21) Okuimbuka vana vekahi nokulinga ehando lia Tate, nokulandula etyi tyihandwa Kovakristau votyotyili, nokulipaka kumwe navo, matyikutuala kononkhano onongwa Mouhamba wa Huku. Tukukonga upopie no Nombangi mba Jeova, vekuavela omukanda ou, opo ulilongese vali konthele Youhamba wa Huku novipuka oviwa maukaeta.—Lucas 4:43.