Okuovola Omakumbululo

“Ovanthu aveho vena etyi vasoka konthele yolie [Jesus]. Tyilinge tuna ekolelo ine tutupu, atuho tulipula okuti: ‘Omulume ou olie?’” —OMUHONEKI STAN GUTHRIE.

OVANTHU vahanda unene okunoñgonoka olie Jesus. Omikanda vipopia konthele yae, vilandeswa vali unene. Tupu onosinema mbupopia konthele yae mbuiwe unene. Mahi, omapulo konthele ya Jesus nkhele atualako. Ovanthu vena omalusoke elikalela konthele yolie Jesus.

Momanima okualamba, ovanthu vevali vaundapa molaliu vaita ovanthu vakumbulule epulo eli: “Jesus olie?” Vamwe vakumbulula okuti:

● “Tyafuile wali omulongesi waava ongeleka ongwa yokankhenda.”

● “Wali omunthu ngonthue ankho wankhimana.”

● “Kutupu natyike tyilekesa okuti Jesus waliko.”

● “Jesus Omona wa Huku, watyitua, ankhi, atutiliswa opo etuyovole kononkhali mbetu. Hono oe una omuenyo, iya makondoka vali pano pohi.”

● “Ame ndyitavela okuti Jesus Kristu omona wike vala wa Huku, oe munthu oe o huku.”

● “Okutavela okuti Jesus waliko, onoñgano mbovana.”

Tyotyili, katupondola okusoka okuti omakumbululo oo aeho aviuka. Okuti kuna apa tupondola okuvasa omakumbululo otyotyili konthele ya Jesus? Ovahoneki vomukanda ou vetavela okuti Ombimbiliya Ondaka ya Huku, iya oyo vala itupopila otyili atyiho konthele ya Jesus.a—2 Timóteo 3:16.

Monthele mailandulako, matulilongesa oñgeni Ombimbiliya ikumbulula omapulo amwe ehole okulingwa konthele ya Jesus. Oe muene watile okuti ondyila yeyovo yaikulilwa vana “vena ekolelo mwe.” (João 3:16) Tukukonga utale omakumbululo, iya otokola ove muene inkha wesukisa okulilongesa vali konthele ya Jesus, noñgeni mokala nekolelo mwe.

[Onondaka Poutoi]