Oñgeni Jesus Ankho Atala Opulitika?

OVAHONEKI vo Evandyeliu vapopia ovipuka ovinyingi konthele yovilinga via Jesus viokuivisa viemuetele popepi nopulitika. Mongeleka, konyima yombatisimu ya Jesus etyi ena omanima 30, Eliapu liemuavelele outumini wouye. Konyima, movilinga viae viokuivisa, ovanthu vemuitile akale ohamba yavo. Tupu, ovanthu vemukuluminyine opo akale wopulitika. Oñgeni Jesus alingile? Tutyitalei.

Outumini wouye. Ono Evandyeliu mbupopia okuti Eliapu liavelele Jesus outumini “womauhamba aeho ouye.” Soka kovipuka ovinyingi oviwa ñgeno Jesus alingila ovanthu vekahi nokumona ononkhumbi inkha wetavelele okukala omutumini wouye! Omunthu patyi wopulitika wesuka umwe nokutetulula ovitateka viovanthu ñgeno waanya otyilinga otyo? Mahi Jesus wetyianya.—Mateus 4:8-11.

Ohamba. Ovanthu ovanyingi pomuvo wa Jesus ankho vahanda unene omutumini upondola okutetulula ovitateka viavo vionombongo novio pulitika. Mokonda ovanthu ankho vahuva nounongo wa Jesus, vahandele anyingile mopulitika. Oñgeni alinga? O Evandyeliu ya João yati: “Etyi Jesus etyimona okuti maveya okumukuata opo vemulinge ohamba, wayombolokapo aende vali komphunda aike.” (João 6:10-15) Tyimoneka nawa okuti Jesus ketavelele okunyingila mopulitika.

Omunthu wopulitika. Tala etyi tyaendelepo etyi Jesus nkhele eheneipawe. Ovalongwa vova Faliseu ankho vahahande okutuminwa no va Roma, kumwe na vana ankho vaamena Herode, vokuayemba koutumini wo Roma, vakapopia na Jesus. Ankho vahanda okumuhongiliya elipake mopulitika. Vemupula inkha ova Judeu vena okufeta elilimu ko Roma.

Marku wahoneka etyi Jesus akumbulula, okuti: “‘Oityi mundyondyela? Ndyetelei ombongo ndyitale,’ avemuetela ike. Iya ati: Otyipala etyi nonondaka mbahonekwa apa ovialie?’ Ovo avati: Ovia Sesale. Jesus evepopila okuti: “Fetei ku Sesale ovipuka via Sesale, mahi via Huku viavei ku Huku.’” (Marcos 12:13-17) Omukanda Church and State—The Story of Two Kingdoms (Ongeleya Noutumini—Ehipululo Liomauhamba Evali) wapopia konthele yehunga liekumbululo lia Jesus okuti: “Ketavelele okukala mesiya wopulitika, alekesa nawa-nawa onondimbu pokati ka Sesale na Huku.”

Okuhelipake mopulitika katyilekesa okuti Kristu ankho kesukile nononkhumbi mbovanthu. Tyotyili, Ombimbiliya ilekesa okuti ononkhumbi mbovanthu ankho mbumuihama unene komutima. (Marcos 6:33, 34) Nongotyo, Jesus kalingile natyike opo amaneko ovivi, namphila vamwe vahandele elipake movitateka viopulitika.

Ngetyi onongeleka ombo mbetyilekesa nawa, Jesus waanyene okulipaka mopulitika. Iya Ovakristau hono? Oityi vena okulinga?