Oñgeni Jesus Ñgeno Akumbulula?

Ovanthu ovanyingi vena onthilo na Huku vasoka okuti onongeleya ñgeno mbulipaka mopulitika. Vetavela okuti ongeleya ipondola okukuatesako unene pala okutetulula ovitateka viovanthu. Mahi, ovataveli ovakuavo vasoka okuti ongeleya, nopulitika viesukisa okuliyapuka. Oityi ove usoka konthele yotyilinga tyongeleya mopulitika? Okuti vapondola okuundapela kumwe?

JESUS KRISTU upopiwa ngatyina “omunthu wakolela unene mongeleya.” Moluotyo, soka ñgeno tumulinga epulo eli: Okuti ongeleya ipondola okulipaka mopulitika? Oityi ñgeno apopia? Puetyi ankho ekahi pano pohi, wakumbululile epulo olio muevi alinga, nevi apopia. Mongeleka, Melongomona liae lio Komphunda, Jesus waavele ovitumino viakuatesako ovalanduli vae okunoñgonoka otyilinga patyi vena okulinga potyilongo vakala. Tutalei ononthele mbumwe melongomona olio liankhimana.

Etyi Apopia Tyakuatesileko Vakuavo

Jesus wapopia oñgeni ovalanduli vae vena okukala mouye. Wati: “Onwe mumongwa wa pano pohi, mahi inkha omongwa uhava, oñgeni maululiswa? Kausilivila vali, una okuyumbuahi, opo uliatue novanthu. Onwe mutyimimi tyouye. . . . Yekei otyitei tyenyi tyiliaimine ovanthu, opo vamone ovilinga vienyi oviwa, avankhimaneka Tate yenyi ukahi keulu.” (Mateus 5:13-16) Omokonda yatyi Jesus aelekela ovalanduli vae nomongwa, notyimimi?

Onondaka mba Jesus kambulekesa okuti ovalanduli vae vekahi vala ngomongwa wovanthu vehehi, mahi owovanthu aveho. Tupu kavekahi vala ngotyimimi tyovanthu vehehi, mahi otyovanthu aveho vahanda okunoñgonoka nawa otyili. Pokuundapesa onondaka ombo, Jesus wayandyulula nawa okuti ankho kahande ovalanduli vae veliyapule kovanthu. Omokonda yatyi?

Tala: Omongwa kaupondola okupepesa okulia inkha katuupakemo. Okandiyelo kamakamimikila mondyuo inkha tukepolamo. Moluotyo, tyapepuka okunoñgonoka omokonda yatyi Jesus ahatumine ovalongwa vae veliyapule kovanthu avaende konthele onkhuavo yoohi opo vakale vala potyilongo tyovataveli. Tupu, kaavelele ondundo ovalanduli vae veliyapule kovanthu, avakakala mo nondyuo mbalingilwa vala ovanthu vongeleya. Anthi, ngetyi omongwa wesukisa okupakwa mokulia, nokandiyelo katema kesukisa okupakwa apa panthikovela, tupu Ovakristau vesukisa okukala pokati kavakuavo opo vevekuateseko.

“Kavalingi Onthele Youye”

Mahi, onondonga mba Jesus mbokuti ovalanduli vae vesukisa okukala pokati kovanthu vakuavo, tyikatula epulo liakolela konthele yoñgeni Ovakristau vena okutala opulitika. Omokonda yatyi? Etyi ankho kuakamba katutu opo Jesus aipawe, welikuambela ku Huku okuitilako ovalanduli vae okuti: “Ame ndyikuita, hapala uvepole mouye, mahi o pala uveyunge, mokonda yondingavivi. Kavalingi onthele youye, ngetyi ame nahalingi onthele youye.” (João 17:15, 16) Moluotyo, oñgeni Ovakristau vahalingi onthele youye, mahi tupu, otyo vakala kumwe novanthu vouye? Opo tuvase ekumbululo, tutalei omapulo omakuavo etatu:

[Olutalatu pefo 3]

• Oñgeni Jesus ankho atala opulitika?

• Oityi Ovakristau hono vesukisa okulinga?

• Oñgeni omalongeso Ovakristau akuatesako ovanthu?