FUENA KU HUKU
“Tualeiko Okuita, Opo Mupewe”
“Tatekulu tulongese oñgeni matulikuambela.” (Lucas 11:1) O umwe povalongwa va Jesus waitile ngotyo. Pokukumbulula, Jesus ahipulula ononthengele-popia onombali mbutulongesa oñgeni tuna okulikuambela opo tutehelelwe na Huku. Inkha welipulile inkha Huku utehelela umwe omalikuambelo ove, mohande okunoñgonoka ekumbululo lia Jesus.—Tanga Lucas 11:5-13.
Onthengele-popia yotete, ipopia konthele yauna ulikuambela. (Lucas 11:5-8) Mehipululo, omulume umwe watambula omueenda kounthiki iya ankho utupu okulia opo emupe. Kwe, okutaindya okulia ankho tyakolela unene. Namphila ankho okounthikiale, waya keumbo liepanga opo ekemuite onombolo. Tete, epanga ehetavela okupindukapo mokonda ankho ulangi kumwe nombunga yae. Mahi wokuaendelwa ahankhi ohonyi, atualako okuita alo epanga liae apindukapo emuavela etyi ankho ahanda.a
Oityi onthengele-popia oyo itulongesa konthele yokulikuambela? Jesus ukahi nokutulongesa okuti tuesukisa okutualako okuita, nokuovola, nokutotola. (Lucas 11:9, 10) Omokonda yatyi? Okuti Jesus ankho ukahi nokupopia okuti Huku useta okutehelela omalikuambelo etu? Au. Jesus wapopia okuti, tyelikalela nepanga wehetavelele potete, Huku utavela nehambu omalikuambelo avana vena ekolelo mwe. Tulekesa ekolelo olio tyina tutualako nokulikuambela. Tyina tutualako okulikuambela, tulekesa okuti tyotyili tuesuka umwe netyi tukahi nokuita, iya tuna onthumbi yokuti inkha etyi tuita tyelikuata nehando lia Huku, metuavela tyo.—Marcos 11:24; 1 João 5:14.
Onthengele-popia yavali, ipopia konthele “Yomuteheleli womalikuambelo,” Jeova. (Salmo 65:2) Jesus wapulile okuti: “Olie he pokati kenyi, tyina omona wae emuita ombisi, umuavela onyoka ehemupe ombisi? Ine inkha emuita eyiyi, umuavela onge?” Ekumbululo liayandyuluka nawa, kutupu he una oluembia wavela ovana vae ovipuka vivelinga omapita. Moluotyo, Jesus ahangununa onthengele-popia okuti: Inkha ovohe ovakuankhali, vetyivila okuavela ovana vavo “ovipuka oviwa,” “haunene vali Tate keulu, maavela ononkhono mbae” ovana vae vemuita pano pohi!b—Lucas 11:11-13; Mateus 7:11.
Huku wafuapo pala okukumbulula omalikuambelo aviuka avana velikuambela kwe nekolelo
Oityi onthengele-popia oyo itulongesa konthele ya Jeova, “Omuteheleli womalikuambelo”? Jesus ukahi nokutulongesa opo tutale okuti Jeova o Tate una oluembia, wafuapo pala okukuatesako ovana vae. Moluotyo, ovafendi va Jeova vapondola okulikuambela kwe okumuita atyiho tyikahi momitima viavo. Iya mokonda vetyii okuti Jeova uvehandela oviwa, vetavela nehambu ekumbululo liae, alo umwe tyina ahakumbulula ngetyi ankho vahanda.c
Upondola Okutanga Ombimbiliya mu
a Onthengele-popia ya Jesus ilekesa otyipuka tyimwe ankho tyilingwa umwe. Kova Judeu okutambula ovaenda ankho otyilinga tyimwe tyakolela unene. Ombunga ankho iyoka onombolo mbutuuka pala onthiki aiho, moluotyo, inkha onombolo mba umwe mbupwa ankho upondola okukaita kumukuavo. Tupu, inkha vahepa, ombunga aiho ankho ilala kumwe pohi.
b Jesus wapopile ovikando ovinyingi okuti “haunene vali,” opo alekese okuti Huku wavilapo vali tyipona ovanthu.
c Opo ulilongese vali konthele yoñgeni una okulikuambela opo utehelelwe na Huku, tala okapitulu 17 komukanda Oityi Ombimbiliya Tyili Ilongesa? walingwa no Nombangi mba Jeova.