Sesusi Ulongesa Ovalongwa Vae Okulikwambela

Ova Faliseu ankho vehole okulilekesa kovanthu. Tyina valinga tyimwe otyiwa, ankho opala vala okulilekesa kovanthu. Ankho vetyihole okulingila omalikwambelo pana pena ovanthu ovanyingi opo vamonwe. Ova Faliseu ankho vapaka momutwe omalikwambelo nokwewana-wana tyina vekahi mondywo yokufendela, no pomatapalo opo vatalwe novanthu. Ovanthu avahuvu unene etyi Sesusi evepopila okuti: ‘Muhelikwambelei ngova Faliseu. Vasoka okuti Huku matehelela omalikwambelo avo okuwanwa-wanwa. Elikwambelo opala vala ove, na Siovaa. Tyina ulikwambela uhawane-wane vala otyipuka tyike. Siovaa wahanda ove umupopile atyiho tyikahi momutima wove.

‘Onwe likwambelei ñgaa: “Tate yetu keulu, enyina liove lisukukiswe. Ouhamba wove uye. Etyi wahanda, tyilingwe-vo pohi ngeetyi tyilingwa keulu.”’ Sesusi tupu evepopila okuti vena okulikwambela okwiita etyi mavali kese nthiki, nokwiita opo ononkhali mbavo mbwevelwe, novipuka ovikwavo vesukisa.

Sesusi ati: ‘Muhayekei-po okulikwambela. Twaleiko okwita ku Tate yenyi, Siovaa, ovipuka oviwa. Ovohe aveho vahanda okwavela ovana vavo ovipuka oviwa. Ine omona wove ukwiita ombolo okuti momwavela emanya? Ine ukwiita ombisi, okuti momwavela onyoka?’

Pahe Sesusi ati: ‘Ine onwe ovana venyi muvepa oviwa, Tate yenyi Siovaa kememwavela omphepo ikola? Atyiho musuka natyo tyiitei vala.’ Okuti ove ukahi nokulandula etyi Sesusi alongesile? Ovipuka patyi ove wiita tyina ulikwambela?