Okuti Upondola Okuyumba Onthumbi Mongeleya Konthele Yonombongo?

Estellea ankho wenda apeho kongeleya novana vae. Wati: “Napopile nonkhalamutwe yongeleya yange okuti nahanda okulongeswa Ombimbiliya. Mahi, nalumwe andongesile. Iya Estelle ayekepo okuenda kokapela. Ayawisako okuti: “Ononkhalamutwe mbongeleya avanthyonekela okuti, inkha kupondola okuya kuno, tuma vala onombongo. Andyisoko okuti: ‘Kavesukile naame ndyendeko, mahi vesuka vala nonombongo mbange.’”

Angelina, wenda apeho kongeleya, wati: “Mongeleya yange, tyina tukahi nokufenda, valambesa ongalo yonombongo ovikando vitatu, iya vahanda tupakemo onombongo ovikando ovio aviho. Apeho vaita vala onombongo. Andyisoko okuti: ‘Huku kekahi novanthu ava.’”

Okuti onongeleya potyilongo tyove vaundapesa ononkhalelo mbelikalaila opo vakuluminye ovanthu okuava onombongo? Okuti otyo tyelikuata Nombimbiliya?

OITYI OMBIMBILIYA ILONGESA?

Jesus wahinda ongeleya Yovakristau wati: “Muetyipewa otyali, nonwe tyiavei otyali.” (Mateus 10:8) Onondaka Mbombimbiliya kambulandeswa, mahi mbuavelwa aveho vembuhanda.

Oñgeni Ovakristau votete ankho valanda etyi tyesukisa mewaneno?

Kese umwe ankho waava “ngetyi atokola momutima wae, ahaave nokulivela, ine okukuluminyua, mokonda Huku uhole una waava nehambu.” (2 Coríntios 9:7) Apostolu Paulu wati: “Tuaundapa otyinthiki, notyitenya, opo tuhasukalalese nawike puonwe putyina tumupopila onondaka onongwa.” (1 Tessalonicenses 2:9) Paulu ankho utunga omakaka opo elitekule tyina aivisa.—Atos 18:2, 3.

ONOMBANGI MBA JEOVA VALINGA ÑGENI?

Onombangi mba Jeova veliongiyila monondyuo vatunga mbutiwa Onondyuo Mbomaliongiyo. Opi vapola onombongo? Kavalambesa onongalo, tupu kavaave ono evelope okuita onombongo. Mahi, una wapanda ovilinga viavo upondola okupaka etyi ena mokakasa kekahi Mondyuo Yomaliongiyo.

Tyotyili, pala okulinga Omutala ou Womulavi nokuutuma, tyesukisa onombongo. Mahi, kumamono vevilandesa ine vaita onombongo kovanthu. Otyilinga tyavo tyakolela vali okuivisa otyili Tyombimbiliya.

Oityi usoka: Okuti onkhalelo oyo valinga yelikuata nonondaka mba Jesus, nongeleka Yovakristau votete?