OMAPULO OMBIMBILIYA AKUMBULULWA

Okuti Huku utehelela omalikuambelo aeho?

Huku utehelela ovanthu vomalongo aeho. (Salmo 145:18, 19) Ondaka yae, Ombimbiliya, ituavela ondundo opo tumupopile ovipuka aviho vitusukalalesa. (Filipenses 4:6, 7) Tyotyili, omalikuambelo amwe kaahambukiswa Huku. Mongeleka, okuwanaununa onondaka mbuike momalikuambelo katyimuhambukiswa.​—Tanga Mateus 6:7.

Tupu, Jeova katehelela omalikuambelo ovanthu vatomba ovitumino viae. (Provérbios 28:9) Mongeleka, kohale, Huku katehelelele omalikuambelo ova Isilayeli vana ankho vaipaa. Tyimoneka nawa okuti pena etyi tuesukisa okulinga opo tutehelelwe na Huku.​—Tanga Isaías 1:15.

Oityi tuesukisa okulinga opo tutehelelwe na Huku?

Inkha tutupu ekolelo kamatutyivili okufuena ku Huku melikuambelo. (Tiago 1:5, 6) Tuesukisa okukala nonthumbi yokuti Huku okuekahi iya usuka nonthue. Tupondola okupameka ekolelo lietu mokulilongesa Ombimbiliya, mokonda opo tukale nekolelo liotyotyili tuesukisa okunoñgonoka omilao vikahi Mondaka ya Huku.​—Tanga Hebreus 11:1, 6.

Tuesukisa okulikuambela nomutima auho, nokueliola omutima. Alo umwe Omona wa Huku, Jesus, ankho ulikuambela nomutima weliola. (Lucas 22:41, 42) Moluotyo, tuesukisa okuovola okunoñgonoka ovitumino via Huku mokutanga Ombimbiliya, tyipona okumupopila etyi ena okulinga. Inkha tulinga ngotyo, matulingi elikuambelo lielikuata nehando lia Huku.​—Tanga 1 João 5:14.