Okuti Ukahi Nokuenda Nokomutue Neongano Lia Jeova?

1. Etyi elongo lio Isilayeli liatyitukilapo otyili eongano patyi liapingapo? (Tala olutalatu pefo pahimbikila onthele ei.)

HONO, ovanthu va Jeova pano pohi vekahi nokumufenda monkhalelo imuhambukiswa. Kohale, ova Isilayeli ankho ovanthu vaholovonwa na Huku. Mahi avatyitukilapo otyili. Iya Jeova aonganeka elongo epe, ovalanduli va Kristu. Ovalanduli ovo, vakala eongano liapakuako na Jeova. Namphila o Jelusalei yahanyenuepo mo 70 P.K., eongano olio kaliahanyenuepo. (Luc. 21:20, 21) Pomuvo uno wonthyulilo, elongo epe liaongana nawa mokonda liapakuako na Jeova. Ouye wa Satanasi mauhanyuako, mahi eongano lia Huku kamalihanyuako. (2 Tim. 3:1) Oityi tyipondola okutukalesa nonthumbi yokuti kamalihanyuako?

2. Oityi Jesus apopile konthele “yononkhumbi ononene”? Oñgeni mambuhimbika?

² Jesus waulile etyi matyikamoneka kononthiki mbahulililako, wati: “Makukakala ononkhumbi mbumwe ononene, mbuheneendeko tunde konthyimbi youye alo pahe. Tupu, kamambukaendako otyikando tyavali.” (Mat. 24:3, 21) Ononkhumbi ombo mambuhimbika tyina Jeova ahanyako “Ombambilonia Onene,” onongeleya ambuho mbomatutu. Makaundapesa ovatumini vovanthu opo vetyilinge. (Rev. 17:3-5, 16) Oityi matyikalandulako?

OVILWA VIA SATANASI MAVIETA O ARMAGEDOM

3. Tyina onongeleya ambuho mbomatutu mbamahanyuako, oityi matyikamonekela ovanthu va Jeova?

³ Tyina onongeleya ambuho mbomatutu mbamahanyuako, Onombangi mba Jeova ovo vala mavekesalako ouye auho. Iya Satanasi nouye wae mavakalwisa ovaumbili va Huku. Matyikamoneka ngoti ovanthu ovo ovana-mbembwa va Jeova vetupu ou uveyakulila. Ombimbiliya ipopia konthele ya “Goge wotyilongo tyo Magoge” okuti: “Ove nomafualali ove aeho novanthu aveho unavo, mokeveuhulukila ngomphepo onene, iya mokahika ohi ngomakaka.” Mahi, ovilwa ovio kamavieta ombembwa!​—Eze. 38:1, 2, 9-12.

4, 5. Oityi Jeova makalinga tyina ovanthu vae vamaluiswa?

⁴ Tyina Satanasi novanthu vae vamautukila ovanthu va Huku, otyo matyikala ngatyina vekahi nokulwisa Jeova. (Tanga Zacarias 2:8.) Oityi Jeova makalinga? Ohamba Youye Auho, makayakulila ovanthu Vae. Kameveyeke vahanyueko. Pomuvo opo, Jeova mahimbika ovilwa vio Armagedom ahanyeko ouye auho wa Satanasi.​—Rev. 16:14, 16.

⁵ Konthele yo Armagedom, Ombimbiliya yaula okuti: “Jeova makakoyesa omalongo. Oe muene makakoyesa ovanthu aveho. Jeova wati, ‘onondingavivi mekembuipaa nomutunga.’ Etyi otyo Jeova womambamba ovita apopia: ‘Tala! Ononkhumbi mbeliyandyana omalongo atyo aeho, iya otyipepe otyinene matyikeliyandyana alo kononthele ambuho mbo ohi. Vana mavaipawa na Jeova monthiki oyo mavakatuka konthele imwe yohi alo konthele onkhuavo yohi. Kamavakalilwa, nokuongololua ine okuihilwa. Mavakakala ngombumbi kombanda yohi.’” (Jer. 25:31-33) O Armagedom maikamanako ouye wa Satanasi. Mahi eongano lia Jeova malikatualako.

OMOKONDA YATYI EONGANO LIA JEOVA LITUAILAKO OKUKULA

6, 7. (a) Opi “otyinyingi tyovanthu” tyikahi nokutunda? (b) Oityi tyilekesa okuti eongano lia Huku litualako nokukula?

⁶ Hono, eongano lia Huku pano pohi litualako okukula mokonda lieyula ovanthu ovaviuki vapandwa na Huku. Ombimbiliya yati: “Omaiho a Jeova atala ovaviuki, iya omatwi ae atehelela omalikuambelo avo.” (1 Ped. 3:12) Ovaviuki ovo, vakutikinya “otyinyingi tyovanthu,” vehevilwa okuvalulwa, mavakahupa “kononkhumbi ononene.” (Rev. 7:9, 14) Soka oñgeni mokelitehelela tyina wamahupu ‘kononkhumbi ombo ononene’ mokonda ove umwe “potyinyingi tyovanthu”!

⁷ Otyinyingi otyo tyovanthu, tyatunda momalongo aeho. Ovilinga viokuivisa ovio vikahi nokuongiya ovanthu ovo. Jesus wati: “Onondaka ombu onongwa Mbouhamba wa Huku, mambukaiviswa kombanda yohi aiho, pala oumbangi movilongo aviho, iya konyima onthyulilo aiya.” (Mat. 24:14) Ngotyo, ovilinga viakolela vali kovanthu va Huku, okuivisa onondaka onongwa Mbouhamba wa Huku. Mokonda yovilinga ovio, ovanthu ovanyingi vekahi nokufenda Huku “nospilitu notyili.” (João 4:23, 24) Mongeleka, okuhimbikila mo 2003 alo mo 2012, ovanthu valamba po 2.707.000 velipakula ku Huku avambatisalwa. Hono mouye auho, muna Onombangi valamba po 7.900.000, iya omanima aeho, ovityita novityita ovinyingi viovanthu vakala Pehinangelo liononkhia mba Kristu. Tuhambukwa mokonda otyinyingi tyovanthu tyikahi nokuliyauisa unene, iya onthue tutyii okuti o Jeova ukahi nokutyilinga.​—1 Cor. 3:5-7.

8. Eongano lia Jeova likahi nokukula unene mokonda yatyi?

⁸ Ovaumbili va Huku vekahi nokuliyawisa unene mokonda Jeova ukahi nokuvekuatesako. (Tanga Isaías 43:10-12.) Isaia waulile konthele yononthiki mbahulililako okuti: “Kehehi makakala ovityita ekwi, iya okatutu makakala elongo liapama. Pomuvo watyo ame Jeova mandyityilumbanesa.” (Isa. 60:22) Ovalembulwa, “o Isilayeli ya Huku,” ankho “kavehi,” mahi Huku wayamba ovilinga viavo viokuivisa. Ovalembulwa ovo, vahimbika okuliyawisa etyi ovanthu ovakuavo veya meongano lia Huku iya navo avakala ovalembulwa. (Gál. 6:16) Mokueenda kuomanima, ovanthu ovanyingi vokuna ekevelo liokukala pano pohi, navo vekahi nokutavela otyili.

OITYI JEOVA AHANDA KUONTHUE

9. Oityi tuna okulinga opo tukapole ouwa komulao wa Huku?

⁹ Jeova walaa okuti matukakala nomuenyo omuwa komutwe, tyilinge tuna ekevelelo liokuenda keulu ine oliokukala pano pohi. Opo tupole ouwa komulao oo, tuna okutavela ovitumino via Jeova. (Isa. 48:17, 18) Mongeleka, Jeova ankho uhanda ova Isilayeli vetavele Ovitumino viae. Ovitumino ovio ankho vipondola okuveyakulila, nokuvelongesa oñgeni vapondola okukala nehambu mombunga, nokukala nomapanga omawa, nokukala ovakuatyili monondando, nokukala noluembia navakuavo. (Êx. 20:14; Levi. 19:18, 35-37; De. 6:6-9) Nonthue hono, ovitumino via Huku vituyakulila, iya kavipuiya okuvitavela. (Tanga 1 João 5:3) Tyina tutavela Ovitumino via Huku, tukala nehambu, iya haunene ekolelo lietu mwe lipama.​—Tito 1:13.

10. Omokonda yatyi tuesukisila okutanga Ombimbiliya ononthiki ambuho nokulinga Efendelo Liombunga?

¹⁰ Eongano lia Jeova pano pohi likahi nokuenda nokomutue mononkhalelo ononyingi. Otyo tyitukuatesako okunoñgonoka otyili Tyombimbiliya monkhalelo yayandyuluka vali nawa. Otyo, otyo Ombimbiliya yalaele, yati: “Ondyila yovaviuki ikahi ngonohanya mbekumbi mbuyandyuluka katutu-katutu alo kutya nawa.” (Prov. 4:18) Mahi, kese umwe ponthue wesukisa okulipula okuti: ‘Okuti ndyikahi nokulandula omapiluluko alingwa konthele yoñgeni ankho tunoñgonoka Ovihonekwa? Okuti ndyitanga Ombimbiliya ononthiki ambuho? Okuti ndyityihole okutanga kese omukanda omupe? Okuti ndyilinga Efendelo Liombunga onosimanu ambuho?’ Ovipuka ovio kavialemene okuvilinga, mahi tyesukisa okuovola omuvo pala okuvilinga. Tyakolela unene tutualeko okulilongesa Ondaka ya Huku, nokulinga etyi tulilongesa, nokuenda nokomutue neongano lia Huku, haunene hono mokonda ononkhumbi ononene mbukahi popepi.

11. Omokonda yatyi ovanthu va Jeova vaila komaliongiyo, no kovionge?

¹¹ Eongano lia Jeova litulunda okulandula elondolo lia Paulu liati: “Tutalei nawa oñgeni matulipameka pokati, nokukala nohole novilinga oviwa. Tuhayekeipo okuenda komaliongiyo, ngetyi vamwe vetyiliya okulinga. Anthi, tuliavelei ondundo, haunene tyina mutala okuti onthiki ikahi popepi.” (Heb. 10:24, 25) Ova Isilayeli ankho veliongiya apeho pala okufenda Jeova nokulongeswa nae. Otyipito Tyomakaka tyalingilwe pononthiki mba Neemia, tyevehambukisilwe unene. (Êx. 23:15, 16; Ne. 8:9-18) Hono, tupu tuna omaliongiyo, novionge. Tuesukisa okulinga ononkhono mbokukala povionge ovio aviho, mokonda vitukuatesako okufuena ku Jeova, nokumuumbila nehambu.​—Tito 2:2.

12. Oñgeni tuna okutala ovilinga viokuivisa?

¹² Mokonda tukahi meongano lia Huku, tuna okuivisa onondaka onongwa. Olio elao enene pala onthue. Ombimbiliya iihana ovilinga ovio okuti ovilinga “vikola.” (Ro. 15:16) Tyina tuivisa, tukahi nokuundapa no “Sandu,” Jeova. (1 Cor. 3:9; 1 Ped. 1:15) Okuivisa onondaka onongwa tyitukuatesako okusukukisa enyina likola lia Jeova. Okuivisa “onondaka onongwa mbuhuvisa mba Huku wehambu,” tyituhambukiswa.​—1 Tim. 1:11.

13. Oityi tuna okulinga opo tukale nomuenyo noupanga omuwa na Jeova?

¹³ Huku utuhandela otyiwa. Otyo ahandela tufuene kwe no keongano liae. Moisesi wapopilile ova Isilayeli okuti: “Hono eulu nohi vikala onombangi mbange, konthele yokuti napaka kolupala luove omuenyo no nonkhia, ononkhano onongwa nehingano. Iya ove una okuholovona omuenyo opo ukale nomuenyo, ove nombuto yove. Mokukala nohole na Jeova Huku yove, nokutehelela ondaka yae, nokukakatela mwe. Tyetyi, oe omuenyo wove noule wononthiki mbove, opo ukale meheke Jeova aana okuti meliavela ovakuaukulu vove Abraiau, na Isake na Jako.” (De. 30:19, 20) Opo tukale nomuenyo, tuna okulinga ehando lia Jeova, nokukala nohole nae, nokutavela ondaka yae, nokukala apeho ovakuatyili keongano liae.

14. Oityi omukuatate umwe ankho asoka konthele yeongano lia Huku?

¹⁴ Omukuatate Pryce Hughes welilongesa otyili etyi enima 1914 lihenehikepo, watuaileko noukuatyili ku Jeova, no keongano Liae omuenyo wae auho. Mehipululo liomuenyo wae, wapopile okuti, otyipuka tyakolela vali elilongesa, okutualako okufuena keongano lia Jeova nokuhayumbu onthumbi komalusoke ovanthu. Otyo tyemukuatesileko okukoleleya movitateka. Omukuatate Hughes wapopia okuti, opo tupandwe na Jeova tuna okulandula apeho ehongolelo lieongano liae.

TUALAKO OKUENDA NOKOMUTUE NEONGANO LIA HUKU

15. Ava ongeleka ikahi Mombimbiliya ilekesa oñgeni tuna okukala tyina onkhalelo ankho tunoñgonoka Ombimbiliya yamapiluluka.

¹⁵ Jeova uhanda tukuateseko eongano liae, nokutavela omapiluluko alingwa konthele yoñgeni tunoñgonoka otyili Tyombimbiliya, noñgeni tuna okuivisa. Pomuvo Wovakristau votete, ova Judeu vamwe Ovakristau ankho nkhele vahanda okulandula Ovitumino Viapelwe Moisesi. (Atos 21:17-20) Mahi, apostolu Paulu wevelondolele, nokuvekuatesako okunoñgonoka okuti omunthu upondola okuevelwa ononkhali pokati kotyilikutila tya Jesus, ha tyovinyama. (Heb. 10:5-10) Ovanyingi pova Judeu ovo Ovakristau, vetavelele elondolo lia Paulu avapilulula onkhalelo yavo yokusoka. Ongeleka oyo itulongesa okuti tuna okulilongesa Ombimbiliya, nokutanga nawa omikanda vietu, iya tyina eongano lia Jeova lilinga omapiluluko, tuna okuetavela nomutima weliola.

16. (a) Omuenyo Momphangu Yombembwa maukakala omuwa mokonda yatyi? (b) Oityi ukevelela nehambu mouye omupe?

¹⁶ Aveho vatualako noukuatyili ku Jeova no keongano liae, mavakapewa ononkhano onongwa. Ovalembulwa mavakatumina na Kristu keulu. (Rom. 8:16, 17) Vana vena ekevelo liokukakala pano pohi, vakevelela nehambu omuenyo wahapu Momphangu Yombembwa. Ovanthu aveho va Jeova, vahambukwa tyina vapopila vakuavo konthele yekevelo olio! (2 Ped. 3:13) O Salmo 37:11 ipopia okuti: “Ovahiliyi mavakapiñgana ohi, iya avakakala nombembwa onene.” Ovanthu “mavakatunga onondyuo avakalamo . . . mavakalinga ovilinga vieta ehambu liotyotyili.” (Isa. 65:21, 22) Petupu vali ou makatekula vakuavo onya, kamakukakala vali oluhepo, nondyala. (Sal. 72:13-16) Onongeleya ambuho mbomatutu mbahalongesa otyili konthele ya Huku, kamambukakalako vali. (Rev. 18:8, 21) Vokuankhia mavakatutiliswa, avakakalako apeho pano pohi. (Isa. 25:8; Atos 24:15) Inkha tupameka oupanga wetu na Jeova, nokutualako okuenda nokomutue neongano liae, matuketyimona tyina omilao ovio vifuisuapo.

17. Oñgeni tuna okulitehelela konthele ya Jeova neongano liae?

¹⁷ Apa katutu ouye wa Satanasi mauhanyuako. Opo tuhupe, tuna okutualako okupameka ekolelo lietu, nokukala ovakuatyili ku Huku no keongano liae. Tulitehelela nga David, waimbile okuti: “Naita otyipuka tyike ku Jeova, otyo mandyiovola: Okukala mondyuo ya Jeova ononthiki ambuho mbomuenyo wange. Opo ndyitale ouwa wa Jeova, nokutala nolupandu ondyuo yae.” (Sal. 27:4) Atuho tutualeiko okukala tyafuena ku Huku, nokuenda nokomutue neongano liae.